Psa 102 | KswSKMB | STEP | ပှၤလၢအဘၣ်တၢ်နးတၢ်ဖှီၣ်တုၤအဘၣ်တၢ်လုၣ်ဘၢအီၤဒီး,လူလီၤအတၢ်မိၣ်တၢ်မးလၢယွၤအမဲာ်ညါန့ၣ်အဘါထုကဖၣ်တၢ်. ယွၤဧၢ,ဒိကနၣ်ယဘါထုကဖၣ်တၢ်,ဒီးမ်ယတၢ်ဃ့ကညးဟဲထီၣ်ဆူနအိၣ်တက့ၢ်.

‏ Psalms 102

ပှၤလၢအဘၣ်တၢ်နးတၢ်ဖှီၣ်တုၤအဘၣ်တၢ်လုၣ်ဘၢအီၤဒီး,လူလီၤအတၢ်မိၣ်တၢ်မးလၢယွၤအမဲာ်ညါန့ၣ်အဘါထုကဖၣ်တၢ်.

1 ယွၤဧၢ,ဒိကနၣ်ယဘါထုကဖၣ်တၢ်,ဒီးမ်ယတၢ်ဃ့ကညးဟဲထီၣ်ဆူနအိၣ်တက့ၢ်. 2 မုၢ်နံၤမုၢ်နၤလၢယဘၣ်တၢ်ကိၢ်တၢ်ဂီၤန့ၣ်သုတမၤဘၢနမဲာ်လၢယၤတဂ့ၤ,ဒီးနနၢ်လၢယၤတက့ၢ်.မုၢ်တနံၤလၢယကိးထီၣ်တၢ်ဒီး,စံးဆၢယၤချ့ချ့တက့ၢ်. 3 အဂ့ၢ်ဒ်အံၤ,ယမုၢ်နံၤဒံကွံာ်ဝဲဒ်မ့ၣ်အူခုၣ်အသိး,ဒီးမ့ၣ်အူအီၣ်ကွံာ်ယဃံယကွဲဒ်သ့ၣ်မုၣ်အသိးန့ၣ်လီၤ.

4 ယသးဘၣ်တၢ်ကျီကွံာ်,ဒီးဃ့ထီၣ်ကွံာ်ဒ်နီၣ်ဧိၤမံၤဧိၤအသိးတုၤယသးပ့ၤနီၣ်အီၣ်ယကိၣ်လီၤ. 5 မ့ၢ်ယကအုကစွါတၢ်အသီၣ်ဒီး,ယဃံစဲဘူးဒီးယညၣ်လီၤ. 6 ယမၤသးဒ်ထိၣ်ဝိၣ်ဘိၤလၢပှၢ်လၢ်ကျါအသိး,ယမ့ၢ်ဒ်တၢ်လီၤပှီၢ်အဒိကအိအသိးန့ၣ်လီၤ. 7 ယဆိးသီဒီးယမၤသးဒ်ထိၣ်ဖှံးအိၣ်တဘ့ၣ်ဃီလၢဟံၣ်ခိၣ်အဖီခိၣ်အသိးန့ၣ်လီၤ. 8 ယဒုၣ်ယဒါဒုၣ်ဒွဲၣ်ယၤသ့တနံၤကျၢၤ,ဒီးပှၤလၢအသးထီၣ်ယၤဆိၣ်လီၤအသးထီဒါယၤလီၤ.

9 အဂ့ၢ်ဒ်အံၤ,ယအီၣ်ဖၣ်ဆါဒ်ကိၣ်အသိးန့ၣ်,ဒီးယမၤဃါဃုာ်ယတၢ်အီဒီးမဲာ်ထံလီၤ. 10 မ့ၢ်လၢနသူၣ်ထီၣ်သးထီၣ်ဒီးနသူၣ်ကဲၤထီၣ်နသးကဲၤထီၣ်အဃိလီၤ.အဂ့ၢ်ဒ်အံၤ,နဟံးထီၣ်ယၤ,ဒီးညိကွံာ်ယၤလီၤ.

11 ယမုၢ်နံၤမုၢ်နၤမၤသးဒ်တၢ်ကဒုလၢအမၤထီၣ်ထီအသးအသိးန့ၣ်,ဒီးယဲဒၣ်အံၤယဃ့ထီၣ်ကွံာ်ဒ်နီၣ်ဧိၤမံၤဧိၤအသိးန့ၣ်လီၤ. 12 မ့မ့ၢ်နၤ,ယွၤဧၢ,နအိၣ်နဆိးလီၤစိၤလီၤထီ,ဒီးတၢ်သ့ၣ်နီၣ်ထီၣ်က့ၤနၤန့ၣ်အိၣ်အစိၤစိၤအဃၣ်ဃၣ်လီၤ.

13 နကဂဲၤဆၢထၢၣ်,နကသူၣ်ကညီၤသးကညီၤစံယိၣ်လီၤ.အဂ့ၢ်ဒ်အံၤ,အဆၢအကတီၢ်လၢနသ့ၣ်ပာ်,လၢနကသူၣ်ကညီၤသးကညီၤအီၤန့ၣ်ဘၣ်လံ. 14 အဂ့ၢ်ဒ်အံၤ,နခ့နပှၤဘၣ်အသးလၢအလၢၢ်,ဒီးသးကညီၤအဟီၣ်ခိၣ်အကမူၣ်လီၤ.

15 ဒီးပှၤကလုာ်တဖၣ်န့ၣ်ကပျံၤယွၤအမံၤ,ဒီးကယဲၢ်ဟီၣ်ခိၣ်အစီၤပၤန့ၣ်နလၤကပီၤလီၤ. 16 အဂ့ၢ်ဒ်အံၤ,ယွၤမၤထီၣ်က့ၤစံယိၣ်,ဒီးအိၣ်ဖျါထီၣ်လၢအလၤအကပီၤလီၤ. 17 ဃၣ်အသးဆူပှၤဖှီၣ်ဖိယာ်ဖိအတၢ်ထုကဖၣ်အအိၣ်,ဒီးတမၤတရီတပါအတၢ်ထုကဖၣ်ဘၣ်.

18 တၢ်အံၤကဘၣ်ကွဲးအသးလၢပှၤဆူညါတစိၤအဂီၢ်,ဒီးပှၤလၢအကဘၣ်တ့အသးတကလုာ်ကစံးထီၣ်ပတြၢၤယွၤလီၤ. 19 အဂ့ၢ်ဒ်အံၤ,ကွၢ်လီၤတၢ်လၢအလီၢ်စီဆှံထီၣ်ထီ,လၢမူခိၣ်ယွၤကွၢ်လီၤဝဲဆူဟီၣ်ခိၣ်, 20 ဒ်သိးအကနၢ်ဟူပှၤဘၣ်စၢဃာ်အသးအတၢ်ကအုကစွါ,ဒ်သိးအကမၤစၢၤပှၤဘၣ်သံဖိ, 21 ဒ်သိးပှၤကစံၣ်တဲၤတဲလီၤယွၤအမံၤလၢစံယိၣ်အပူၤ,ဒီးအတၢ်စံးထီၣ်ပတြၢၤလၢယရူၤၡလ့ၣ်အပူၤ. 22 ဖဲပှၤကလုာ်တဖၣ်အိၣ်ဖှိၣ်တပူၤဃီဒီးပှၤဘီမုၢ်ဖိဒ်သိးအကမၤယွၤအတၢ်လီၤ.

23 မၤစၢ်လီၤဝဲယဂံၢ်ယဘါလၢကျဲ,ဒီးမၤစှၤလီၤယမုၢ်နံၤမုၢ်နၤတဖၣ်လီၤ.

24 ယစံး,ယကစၢ်ဧၢ,ဟံးထီၣ်ကွံာ်ယၤလၢဖးဖီယမုၢ်နံၤအပူၤတဂ့ၤ.နနံၣ်နလါအိၣ်ဝဲအစိၤစိၤအဃၣ်ဃၣ်လီၤ. 25 လၢပျၢၤန့ၣ်နပာ်လီၤဟီၣ်ခိၣ်အခီၣ်ထံး,ဒီးမူခိၣ်န့ၣ်မ့ၢ်နစုအတၢ်မၤလီၤ.

26 တၢ်တဖၣ်န့ၣ်ကတုၤလၢတၢ်ဟးဂီၤ,မ့မ့ၢ်နဲဒၣ်အံၤနကအိၣ်နကဆိးလီၤ.အဝဲသ့ၣ်ကလီၢ်လံၤခဲလၢာ်ဒ်ယၣ်တဘ့ၣ်အသိးန့ၣ်,ဒ်ဆ့တဘ့ၣ်အသိးနကလဲက့ၤအီၤ,ဒီးကအိၣ်လဲက့ၤအသးလီၤ. 27 မ့မ့ၢ်နဲဒၣ်အံၤနမ့ၢ်တၢ်ဒ်လီၢ်လီၢ်,ဒီးနနံၣ်နလါအကတၢၢ်တအိၣ်ဘၣ်လီၤ.

28 နခ့နပှၤအဖိအလံၤကအိၣ်ကဆိး,ဒီးအချံအသၣ်ကအိၣ်ဂၢၢ်ဆိးကျၢၤလၢနမဲာ်ညါလီၤ.