‏ Psalms 105

1စံးထီၣ်ပတြၢၤယွၤ,ကိးထီၣ်အမံၤ,ဒုးသ့ၣ်ညါပှၤဂီၢ်မုၢ်လၢအမၤတၢ်န့ၣ်တက့ၢ်. 2သးဝံၣ်ထီၣ်အီၤ,အူးထီၣ်အီၤ,ဆိကမိၣ်လၢအတၢ်လီၤလးခဲလၢာ်အဂ့ၢ်တက့ၢ်. 3ပာ်ကဖိသုသးလၢအမံၤစီဆှံအပူၤတက့ၢ်.ပှၤလၢအဃုယွၤန့ၣ်မ်အသူၣ်ခုသးခုလၢအသးတက့ၢ်. 4ဃုယွၤဒီးအဂံၢ်အဘါ,ဃုအမဲာ်တထံၣ်ဃီတက့ၢ်. 5သ့ၣ်နီၣ်ထီၣ်က့ၤတၢ်လီၤလးလၢအမၤတ့ၢ်ဝဲ,အတၢ်လီၤလးဒီးတၢ်စံၣ်ညီၣ်လၢအထးခိၣ်န့ၣ်တက့ၢ်. 6အခ့အပှၤစီၤအၤဘြၤဟၣ်အချံအသၣ်သ့ၣ်ဧၢ,ပှၤလၢအဃုထၢအီၤစီၤယၤကိာ်အဖိအလံၤသ့ၣ်သုဧၢ, 7အဝဲဒၣ်မ့ၢ်ယွၤပကစၢ်,အတၢ်စံၣ်ညီၣ်တဖၣ်အိၣ်ဝဲလၢဟီၣ်ခိၣ်ဒီဘ့ၣ်ညါလီၤ. 8သ့ၣ်နီၣ်ထီၣ်က့ၤအတၢ်အၢၣ်လီၤအီလီၤအထူအယိာ်,တၢ်ကတိၤလၢအမၤလိာ်ဝဲအစိၤတကထိလီၤ. 9တၢ်လၢအအၢၣ်လီၤအီလီၤဒီးစီၤအၤဘြၤဟၣ်,ဒီးအတၢ်ဆိၣ်ဒီးစီၤအံၤစဲးလီၤ. 10ဒီးပာ်ကျၢၤအီၤလၢစီၤယၤကိာ်လၢတၢ်သိၣ်တၢ်သီအဂီၢ်,ဒီးလၢစီၤအံၣ်စရ့လးလၢတၢ်အၢၣ်လီၤအီလီၤအထူအယိာ်အဂီၢ်, 11ဒီးစံးဝဲဒၣ်ယကဟ့ၣ်လီၤနၤလၢကီၢ်ကနၤဧၣ်,သုန့ၢ်သါတၢ်အတၢ်ဖးတမံၤန့ၣ်လီၤ. 12လၢအအိၣ်ပှၤစှၤဂၤ,ဒီးမ့ၢ်ပှၤတခီဘီမုၢ်ဖိလၢအပူၤ, 13ဒီးလဲၤတၢ်လၢပှၤတကလုာ်ဆူပှၤတကလုာ်,လၢတခီတဘီမုၢ်ဆူပှၤဂီၢ်မုၢ်အဂၤအအိၣ်န့ၣ်, 14ဒီးတဒုးမၤနးမၤဖှီၣ်အီၤနီတဂၤဘၣ်,ဒီးသိၣ်ဃီၣ်စီၤပၤတဖၣ်လၢအဃိလီၤ. 15ထိးယပှၤဒိးဖှူအအသးတဂ့ၤ,ဒီးမၤအၢယဝံသ့ၣ်တဖၣ်န့ၣ်တဂ့ၤ.

16ဒီးကိးဝဲတၢ်သၣ်ဝံၤလီၤဒိဆူကီၢ်အဖီခိၣ်,မၤကၢ်ကိၣ်အနီၣ်ထိးကိးဘိဒဲးလီၤ.

17မၢလီၤပှၤတဂၤလၢအမဲာ်ညါ,စီၤယိၤသးတဂၤလၢအဘၣ်တၢ်ဆါကွံာ်အီၤလၢကုၢ်အဂီၢ်လီၤ. 18ပှၤမၤနးအခီၣ်လၢထးသွဲ,အသးလဲၤနုာ်လၢထးဧိၤတြၤဧိၤအပူၤ, 19တုၤလီၤလၢအကတီၢ်လၢအကလုၢ်ဟဲ,ဒီးယွၤအတၢ်ကတိၤမၤကွၢ်အီၤလီၤ. 20စီၤပၤမၢလီၤတၢ်ဒီးမၤထူၣ်ဖျဲးအီၤ,ပှၤပၢပှၤဂီၢ်မုၢ်တဂၤန့ၣ်,ဒီးပျၢ်အီၤလီၤ.

21ပာ်ဝဲလၢအဟံၣ်အကစၢ်,ဒီးပှၤပၢအတၢ်ဖိတၢ်လံၤခဲလၢာ်, 22ဒ်သိးအကစၢဃာ်အပဒိၣ်ဖးဒိၣ်တဖၣ်ဖဲဒၣ်အသး,ဒီးသိၣ်လိအပှၤသူၣ်က့သးပှၢ်လၢတၢ်ကူၣ်သ့လီၤ. 23ဒီးစီၤအံၣ်စရ့လးဟဲနုာ်လၢအဲၤကူပတူးအပူၤ,ဒီးစီၤယၤကိာ်အိၣ်တမှံၤလၢစီၤဃၣ်အကီၢ်ပူၤလီၤ. 24ဒီးဒုးသၣ်ထီၣ်အပှၤဂီၢ်မုၢ်အါအါကလဲာ်,ဒီးဒုးကဲထီၣ်အီၤဆူၣ်န့ၢ်အဒုၣ်အဒါတက့ၢ်လီၤ. 25ဘိးဃၣ်ဝဲအသးလၢအကသးဟ့အပှၤဂီၢ်မုၢ်,လၢအကမၤအခ့အပှၤလၢတၢ်လီတၢ်ဝ့ၤလီၤ.

26မၢလီၤအခ့အပှၤစီၤမိၤရှ့ဒီးစီၤအၤဟရိၣ်လၢအဃုထၢအီၤလီၤ. 27အဝဲသ့ၣ်ပာ်လီၤအတၢ်ပနီၣ်လၢအကျါ,အတၢ်လီၤလးလၢစီၤဃၣ်အကီၢ်ပူၤလီၤ.

28မၢလီၤတၢ်ခံး,ဒီးတၢ်ခံးလီၤဝဲ,ဒီးတပူထီၣ်ဘၣ်အကလုၢ်ဘၣ်.

29မၢအထံတဖၣ်ကဲထီၣ်တၢ်သွံၣ်,ဒီးမၤသံအဒ့ၣ်ဧိၤညၣ်ဧိၤလီၤ.

30အထံအကီၢ်န့ၣ်ဖှံထီၣ်ဒ့ၣ်အါအါကလဲာ်လၢအစီၤပၤအဒၢးပူၤလီၤ.

31ကတိၤတၢ်ဒီးတၢ်အဖုဟဲထီၣ်,ဃးသူဃးလါလၢအဃၢၤခဲလၢာ်လီၤ.

32ဟ့ၣ်လီၤသူၣ်လၢတၢ်စူၤအလီၢ်,မ့ၣ်အူလၣ်လၢအကီၢ်ပူၤလီၤ.

33မၤဟးဂီၤအစပံးမုၢ်,ဒီးအချၢၣ်ဒၢ,ဒီးမၤကၢ်လီၤကွံာ်အသ့ၣ်လၢအဃၢၤတဖၣ်လီၤ.

34ကတိၤတၢ်,ဒီးဒွဲၣ်အၢ်ဘၤဟဲထီၣ်,ဒီးဒွဲၣ်ယ့ၤလ့းန့ၣ်,လၢအတၢ်ဂံၢ်တအိၣ်ဘၣ်. 35ဒီးအီၣ်နီၣ်ဧိၤမံၤဧိၤလၢအကီၢ်ပူၤခဲလၢာ်,ဒီးအီၣ်ကွံာ်အဟီၣ်ခိၣ်အတၤသၣ်လီၤ.

36ဒီးကျီကွံာ်အဖိဝဲၢ်ကိခဲလၢာ်လၢအကီၢ်ပူၤ,အတၢ်ဂံၢ်တၢ်ဘါခဲလၢာ်အဝဲၢ်ကိလီၤ.

37ဒီးဒုးဟးထီၣ်ကွံာ်အပှၤဂီၢ်မုၢ်ဒီးကျိၣ်ဧိၤစ့ဧိၤ,ဒီးထူဧိၤလွဲဧိၤ,ဒီးပှၤလၢအခီၣ်ဘၣ်တိၢ်တအိၣ်ဘၣ်လၢအဒူၣ်တဖၣ်အကျါနီတဂၤဘၣ်. 38တုၤအဟးထီၣ်ကွံာ်ဒီး,ပှၤအဲၤကူပတူးဖိသးခုဝဲလီၤ.အဂ့ၢ်ဒ်အံၤ,တၢ်ပျံၤအီၤလီၤဘၣ်လၢအလိၤလီၤ.

39သလၣ်ထီၣ်တၢ်အၢၣ်လၢတၢ်ကျၢၢ်ဘၢအဂီၢ်,ဒီးမ့ၣ်အူလၢမုၢ်နၤဒ်သိးအကကပီၤထီၣ်လီၤ.

40ပှၤဃ့ဝဲ,ဒီးအဝဲဒၣ်ဒုးဟဲထိၣ်ဘှၢၣ်တဖၣ်,ဒီးဒုးဘျဲးအီၣ်အီၤလၢမူခိၣ်အကိၣ်လီၤ.

41အိးထီၣ်လၢၢ်ဧိၤလ့ဧိၤ,ဒီးထံဖျိးထီၣ်,ယွၤလီၤဝဲဒ်ထံကျိအသိးလၢတၢ်အလီၢ်ဃ့အပူၤလီၤ.

42အဂ့ၢ်ဒ်အံၤ,သ့ၣ်နီၣ်ထီၣ်က့ၤအတၢ်ကတိၤစီဆှံဒီးအခ့အပှၤစီၤအၤဘြၤဟၣ်, 43ဒီးဒုးဟးထီၣ်ကွံာ်အပှၤဂီၢ်မုၢ်,အိၣ်ဒီးတၢ်သူၣ်ဖှံသးညီ,ဒီးအပှၤဃုထၢဖိဒီးတၢ်သူၣ်ခုသးခုလီၤ.

44ဒီးဟ့ၣ်လီၤအီၤလၢပှၤကလုာ်တဖၣ်အထံအကီၢ်,ဒီးအဝဲသ့ၣ်န့ၢ်သါပှၤဂီၢ်မုၢ်အတၢ်မၤ, 45ဒ်သိးအကတိၢ်န့ၢ်အတၢ်မၤလိာ်,ဒီးတိၢ်န့ၢ်ဖံးဃာ်အတၢ်သိၣ်တၢ်သီလီၤ.စံးထီၣ်ပတြၢၤယွၤတက့ၢ်.