‏ Psalms 119

က

1ပှၤလၢအလၢအပှဲၤလၢကျဲန့ၣ်,ဒီးလဲၤတၢ်လၢယွၤအတၢ်သိၣ်တၢ်သီအပူၤန့ၣ်ဘၣ်ဆိၣ်ဂ့ၤဝဲလီၤ.

2ပှၤလၢအတိၢ်န့ၢ်ဖံးဃာ်အတၢ်အုၣ်အသးဒီး,ဒီးဃုယွၤလၢအသးဒီဖျၢၣ်ညါန့ၣ်ဘၣ်ဆိၣ်ဂ့ၤဝဲလီၤ.

3တမၤစ့ၢ်ကီးတၢ်အၢနီတမံၤဘၣ်.လဲၤဝဲလၢအကျဲဧိၤကပူၤဧိၤန့ၣ်လီၤ.

4နမၤလိာ်လၢပဘၣ်တိၢ်န့ၢ်ဖံးဃာ်နတၢ်သိၣ်တၢ်သီထံထံဆးဆးလီၤ.

5ဒ်သိးယကတိၢ်န့ၢ်ဖံးဃာ်နတၢ်မၤလိာ်န့ၣ်မ်ယကျဲအိၣ်ဂၢၢ်ဆိးကျၢၤတက့ၢ်.

6တုၤယကွၢ်မဲာ်နတၢ်မၤလိာ်ခဲလၢာ်ဒီး,ယမဲာ်တဆှးဘၣ်.

7တုၤယမၤလိနစံၣ်ညီၣ်တၢ်တီတဖၣ်ဒီး,ယကစံးထီၣ်ပတြၢၤနၤလၢယသးစၢၢ်ဆၢလီၤ.

8ယကတိၢ်န့ၢ်နတၢ်မၤလိာ်လီၤ.မ်နသုတလဲၤသဒၣ်ကွံာ်ယၤတုၤအလၢာ်တဂ့ၤ.

ခ

9ပှၤဖိၣ်သၣ်ခွါကမၤကဆှီအကျဲဒ်လဲၣ်.မ့ၢ်အဘၣ်ပလီၢ်အသးဒ်နကလုၢ်ကထါအသိးန့ၣ်လီၤ.

10ယဃုတ့ၢ်နၤလၢယသးဒီဖျၢၣ်ညါလီၤ.မ်ယသုတလဲၤကမၣ်ဘၣ်လၢနတၢ်မၤလိာ်န့ၣ်တဂ့ၤ.

11ယပာ်ဖှိၣ်နကလုၢ်ကထါလၢယသးကံၢ်ပူၤ,ဒ်သိးယသုတမၤကမၣ်ဘၣ်နၤတဂ့ၤလီၤ.

12ယွၤဧၢ,မ်နဘၣ်တၢ်စံးထီၣ်ပတြၢၤနၤတက့ၢ်.သိၣ်လိယၤလၢနလုၢ်နလၢ်န့ၣ်တက့ၢ်.

13ယစံၣ်တဲၤတဲလီၤကယဲၢ်နစံၣ်ညီၣ်တၢ်လၢနထးခိၣ်ခဲလၢာ်န့ၣ်လၢယပျုၤလီၤ.

14ယသူၣ်ဖှံယသးညီလၢနတၢ်အုၣ်နသးအကျဲပူၤ,ဒ်လၢကယဲၢ်တၢ်စုလီၢ်ခီၣ်ခိၣ်အသိးန့ၣ်လီၤ.

15ယကဆိကမိၣ်တၢ်လၢနတၢ်မၤလိာ်အဂ့ၢ်,ဒီးယကကွၢ်မဲာ်နကျဲဧိၤကပူၤဧိၤလီၤ.

16ယကသူၣ်ဖှံသးညီလၢနတၢ်မၤလိာ်အပူၤလီၤ.ယတသးပ့ၤနီၣ်ဘၣ်နကလုၢ်ကထါဘၣ်.

ဂ

17မၤဂ့ၤနခ့နပှၤဒ်သိးယကမူ,ဒီးယကတိၢ်န့ၢ်ဖံးဃာ်နကလုၢ်ကထါလီၤ.

18အိးထီၣ်ယမဲာ်တက့ၢ်.ဒီးယကထံၣ်ဘၣ်တၢ်လီၤလးလၢနတၢ်သိၣ်တၢ်သီအပူၤလီၤ.

19ယမ့ၢ်ပှၤတမှံၤလၢဟီၣ်ခိၣ်ချၢအံၤလီၤ.သုတပာ်ခူသူၣ်နတၢ်မၤလိာ်လၢယမဲာ်ညါတဂ့ၤ.

20ယသးဆၢန့ၢ်နတၢ်စံၣ်ညီၣ်တဖၣ်ကိးအဆၢအကတီၢ်ဒဲးတုၤယသူၣ်ကၢ်ယသးလီၤလီၤ.

21ပှၤလၢအပာ်အသးထီၣ်ထီလၢအဘၣ်တၢ်ဆိၣ်အၢ,လၢအဟးဖျိးနတၢ်မၤလိာ်တဖၣ်အကျဲန့ၣ်နသိၣ်ဃီၣ်လံအီၤလံ.

22တၢ်ဒုၣ်ဒွဲၣ်,ဒီးတၢ်မၤတရီတပါန့ၣ်မၤပူၤမၤဖျဲးဒီးယၤတက့ၢ်.အဂ့ၢ်ဒ်အံၤ,ယတိၢ်န့ၢ်နတၢ်အုၣ်နသးတဖၣ်လီၤ.

23ပဒိၣ်ဖးဒိၣ်စ့ၢ်ကီးဆ့ၣ်နီၤဒီးကတိၤထီဒါယၤလီၤ.မ့မ့ၢ်နခ့နပှၤဆိကမိၣ်တၢ်လၢနတၢ်မၤလိာ်အဂ့ၢ်လီၤ.

24နတၢ်အုၣ်နသးန့ၣ်မ့ၢ်စ့ၢ်ကီးယတၢ်သူၣ်ဖှံသးညီ,ပှၤလၢအကူၣ်စၢၤယၤလီၤ.

ဃ

25ယသးစဲဘူးဒီးဟီၣ်ခိၣ်အကမူၣ်လီၤ.ဒ်နတၢ်ကတိၤအသိးန့ၣ်ဒုးမူထီၣ်က့ၤယၤတက့ၢ်.

26ယကျဲဧိၤကပူၤဧိၤန့ၣ်ယတဲဖျါထီၣ်လံ,ဒီးနနၢ်ဟူလံယကလုၢ်လံ,သိၣ်လိယၤလၢနလုၢ်နလၢ်တက့ၢ်.

27ဒုးနၢ်ပၢၢ်ယၤလၢနတၢ်မၤလိာ်အကျဲတက့ၢ်.ဒီးယကဆိကမိၣ်တၢ်လၢနတၢ်လီၤလးအဂ့ၢ်လီၤ.

28မ့ၢ်ယသူၣ်အုးယသးအုးသတးဒီးယသးပှံၢ်လီၤလီၤ.ဒုးဂဲၤဆၢထၢၣ်က့ၤယၤဒ်နကလုၢ်နကထါအသိးန့ၣ်တက့ၢ်.

29မၤပူၤမၤဖျဲးယၤလၢတၢ်ကဘျံးကဘျၣ်အကျဲ,ဒီးဟ့ၣ်သးကညီၤယၤလၢနတၢ်သိၣ်တၢ်သီန့ၣ်တက့ၢ်.

30တၢ်အကလုၢ်တီအကျဲန့ၣ်ယဃုထၢလံ.နစံၣ်ညီၣ်တၢ်တဖၣ်န့ၣ်ယပာ်လီၤလၢယမဲာ်ညါလံလီၤ.

31ယစဲဘူးဒီးနတၢ်အုၣ်နသးလီၤ.ယွၤဧၢ,ဒုးမဲာ်ဆှးယၤတဂ့ၤ.

32တုၤနမၤလဲၢ်ထီၣ်ယသးဒီး,ယကဃ့ၢ်လၢနတၢ်မၤလိာ်အကျဲလီၤ.

င

33ယွၤဧၢ,သိၣ်လိယၤလၢနတၢ်မၤလိာ်အကျဲန့ၣ်တက့ၢ်.ဒီးယကတိၢ်န့ၢ်ဖံးဃာ်တုၤအကတၢၢ်လီၤ.

34ဒုးနၢ်ပၢၢ်ယၤတက့ၢ်.ဒီးယကတိၢ်န့ၢ်ဖံးဃာ်နတၢ်သိၣ်တၢ်သီန့ၣ်,ယကတိၢ်န့ၢ်လၢယသးဒီဖျၢၣ်ညါလီၤ.

35ဒုးလဲၤယၤလၢနတၢ်မၤလိာ်အကျဲန့ၣ်တက့ၢ်.အဂ့ၢ်ဒ်အံၤ,ယမုာ်လၤတၢ်လၢအပူၤလီၤ.

36ဘိးဃၣ်ယသးဆူတၢ်သးကွံတဂ့ၤ.မ့ၢ်ဆူနတၢ်အုၣ်နသးတဖၣ်တက့ၢ်.

37ဒုးဃၣ်ကွံာ်ယမဲာ်လၢတၢ်ကလီကလီန့ၣ်တက့ၢ်.ဒုးမူထီၣ်က့ၤယၤလၢနကျဲနကပူၤန့ၣ်တက့ၢ်.

38ဒုးအိၣ်ဂၢၢ်ဆိးကျၢၤနကလုၢ်ကထါလၢနခ့နပှၤလၢအပျံၤနၤတဂၤအဂီၢ်အံၤတက့ၢ်.

39မၤပူၤမၤဖျဲးယၤလၢတၢ်ဒုၣ်ဒွဲၣ်လၢယပျံၤအီၤန့ၣ်တက့ၢ်.အဂ့ၢ်ဒ်အံၤ,နတၢ်စံၣ်ညီၣ်တဖၣ်န့ၣ်မ့ၢ်အဂ့ၤအဘၣ်လီၤ.

40ကွၢ်ကွၢ်,ယဆၢန့ၢ်ဘၣ်နတၢ်မၤလိာ်လီၤ.မၤမူထီၣ်က့ၤယၤလၢနတၢ်တီတၢ်လိၤန့ၣ်တက့ၢ်.

စ

41ဒီးယွၤဧၢ,မ်နဘျုးနဖှိၣ်,နတၢ်အုၣ်က့ၤခီၣ်က့ၤဟဲဘၣ်ယၤဒ်နကလုၢ်ကထါအသိးန့ၣ်တက့ၢ်.

42ဒီးယကစံးဆၢပှၤလၢအဒုၣ်ဒွဲၣ်ယၤလီၤ.အဂ့ၢ်ဒ်အံၤ,ယသန့ၤယသးလၢနကလုၢ်လီၤ.

43ဒီးဟံးထီၣ်ကွံာ်နတၢ်ကတိၤအမ့ၢ်အတီလၢယထးခိၣ်တုၤအလၢာ်န့ၣ်တဂ့ၤ.အဂ့ၢ်ဒ်အံၤ,ယမုၢ်လၢ်လၢနတၢ်စံၣ်ညီၣ်တဖၣ်န့ၣ်လီၤ.

44ဒီးယကတိၢ်န့ၢ်ဖံးဃာ်နတၢ်သိၣ်တၢ်သီတထံၣ်ဃီအစိၤစိၤအဃၣ်ဃၣ်လီၤ.

45ဒီးယကလဲၤတၢ်လၢအလီၢ်ဖးလဲၢ်လီၤ.အဂ့ၢ်ဒ်အံၤ,ယဃုနတၢ်မၤလိာ်လီၤ.

46ဒီးယကကတိၤတၢ်လၢနတၢ်အုၣ်အသးအဂ့ၢ်လၢစီၤပၤတဖၣ်အမဲာ်ညါ,ဒီးယမဲာ်တဆှးဘၣ်.

47ဒီးယကသူၣ်ဖှံသးညီလၢနတၢ်မၤလိာ်လၢယအဲၣ်အီၤအပူၤန့ၣ်လီၤ. 48ဒီးယကယူာ်ထီၣ်ယစုဆူနတၢ်မၤလိာ်လၢယအဲၣ်အီၤအအိၣ်န့ၣ်,ဒီးယကဆိကမိၣ်တၢ်လၢနတၢ်မၤလိာ်အဂ့ၢ်လီၤ.

ဆ

49မ့ၢ်နဒုးမုၢ်လၢ်ယၤလၢတၢ်ဒီးသ့ၣ်နီၣ်ထီၣ်က့ၤနကလုၢ်ကထါလၢနခ့နပှၤအဂီၢ်တက့ၢ်.

50အအံၤမ့ၢ်တၢ်လၢအမၤမုာ်ထီၣ်က့ၤယၤလၢယဘၣ်နးဘၣ်ဖှီၣ်အဖၢမုၢ်န့ၣ်,လၢနကလုၢ်နကထါမၤမူထီၣ်က့ၤလံယၤလီၤ.

51ပှၤပာ်အသးထီၣ်ထီတဖၣ်န့ၣ်ဒုၣ်ဒွဲၣ်ယၤနးမးလီၤ.ယတဟးဆှဲးဘၣ်နတၢ်သိၣ်တၢ်သီဘၣ်.

52ယွၤဧၢ,နစံၣ်ညီၣ်တၢ်လၢပျၢၤလၢကစၢၤန့ၣ်ယသ့ၣ်နီၣ်ထီၣ်က့ၤ,ဒီးယမၤမုာ်ထီၣ်ယသးလီၤ.

53မ့ၢ်ပှၤတတီတလိၤလဲၤသဒၣ်နတၢ်သိၣ်တၢ်သီဒီး,ယသးကိၢ်ထီၣ်ဒိၣ်ဒိၣ်ကလဲာ်လီၤ.

54နတၢ်မၤလိာ်န့ၣ်မ့ၢ်ယတၢ်သးဝံၣ်လၢယအိၣ်တမှံၤအဟံၣ်ပူၤန့ၣ်လီၤ.

55ယွၤဧၢ,ယသ့ၣ်နီၣ်ထီၣ်က့ၤနမံၤလၢမုၢ်နၤ,ဒီးယတိၢ်န့ၢ်ဖံးဃာ်နတၢ်သိၣ်တၢ်သီလီၤ.

56အအံၤအိၣ်ဒီးယၤ,လၢယတိၢ်န့ၢ်နတၢ်မၤလိာ်တဖၣ်န့ၣ်လီၤ.

ၡ

57ယွၤမ့ၢ်ယဂီၢ်လီၤ.ယစံးလၢယကတိၢ်န့ၢ်ဖံးဃာ်နကလုၢ်ကထါလီၤ.

58ယဃုနအိၣ်ပှိၤယၤလၢယသးဒီဖျၢၣ်ညါလီၤ.သူၣ်ကညီၤသးကညီၤယၤဒ်နကလုၢ်ကထါအသိးန့ၣ်တက့ၢ်.

59ယဆိကမိၣ်တၢ်လၢယကျဲအဂ့ၢ်,ဒီးဃၣ်က့ၤယခီၣ်ဆူနတၢ်အုၣ်နသးအအိၣ်န့ၣ်လီၤ.

60ယတမၤယံာ်မၤနီၢ်ဘၣ်ဒီး,ယမၤချ့ချ့ဒ်သိးယကတိၢ်န့ၢ်ဖံးဃာ်နတၢ်မၤလိာ်တဖၣ်န့ၣ်လီၤ.

61ပှၤတတီတလိၤဘၣ်အပျံၤသကွီၤအိၣ်ဝးတရံးယၤလီၤ.ယတသးပ့ၤနီၣ်ဘၣ်နတၢ်သိၣ်တၢ်သီဘၣ်.

62ယကဂဲၤဆၢထၢၣ်လၢဖးဖီမုၢ်,ဒ်သိးယကစံးထီၣ်ပတြၢၤနၤလၢနတၢ်တီတၢ်လိၤအတၢ်စံၣ်ညီၣ်တဖၣ်အဃိန့ၣ်လီၤ.

63ယဒီတံၤဒီသကိးဒီးကယဲၢ်ပှၤလၢအပျံၤနၤ,ဒီးတိၢ်န့ၢ်ဖံးဃာ်နတၢ်မၤလိာ်တဖၣ်န့ၣ်လီၤ.

64ဟီၣ်ခိၣ်လၢပှဲၤဝဲဒီးနဘျုးနဖှိၣ်လီၤ,ယွၤဧၢ,သိၣ်လိယၤလၢနတၢ်မၤလိာ်န့ၣ်တက့ၢ်.

ည

65ယွၤဧၢ,ဒ်နကလုၢ်ကထါအသိးန့ၣ်နမၤဂ့ၤနခ့နပှၤလီၤ.

66သိၣ်လိယၤလၢတၢ်စံၣ်ညီၣ်အဂ့ၤဒီးတၢ်သ့ၣ်ညါတက့ၢ်.အဂ့ၢ်ဒ်အံၤ,ယနာ်နတၢ်မၤလိာ်လီၤ.

67ယတချုးဘၣ်ဒံးဘၣ်တၢ်နးတၢ်ဖှီၣ်ဒီး,ယဟးဖျိးကျဲလီၤ.မ့မ့ၢ်ခဲကနံၣ်အံၤ,ယတိၢ်န့ၢ်ဖံးဃာ်နကလုၢ်ကထါလီၤ.

68နမ့ၢ်တၢ်ဂ့ၤ,ဒီးနမၤတၢ်ဂ့ၤလီၤ.သိၣ်လိယၤလၢနတၢ်မၤလိာ်န့ၣ်တက့ၢ်.

69ပှၤပာ်အသးထီၣ်ထီန့ၣ်ကူၣ်ထီၣ်ဖးလီၤတၢ်ကတိၤကဘျံးကဘျၣ်ထီဒါယၤလီၤ.မ့မ့ၢ်ယဲဒၣ်အံၤယတိၢ်န့ၢ်ဖံးဃာ်နတၢ်မၤလိာ်တဖၣ်လၢယသးဒီဖျၢၣ်ညါလီၤ.

70အဝဲသ့ၣ်တဖၣ်အသးန့ၣ်ဘီၣ်ဝဲဒ်သိဧိၤချါဧိၤအသိးလီၤ.မ့မ့ၢ်ယဲဒၣ်အံၤယသူၣ်ဖှံသးညီလၢနတၢ်သိၣ်တၢ်သီအပူၤလီၤ.

71ယဘၣ်တၢ်နးတၢ်ဖှီၣ်န့ၣ်ဂ့ၤဝဲလၢယဂီၢ်လၢယကမၤလိနတၢ်မၤလိာ်အဂ့ၢ်လီၤ.

72တၢ်သိၣ်တၢ်သီလၢနထးခိၣ်န့ၣ်ဂ့ၤန့ၢ်ထူဧိၤလွဲဧိၤ,ဒီးကျိၣ်ဧိၤစ့ဧိၤအကထိတဖၣ်တက့ၢ်လီၤ.

တ

73နစုတ့ယၤ,ဒီးကတဲာ်ကတီၤယၤလီၤ.ဒုးနၢ်ပၢၢ်ယၤဒ်သိးယကမၤလိနတၢ်မၤလိာ်န့ၣ်တက့ၢ်.

74ပှၤလၢအပျံၤနၤန့ၣ်ကထံၣ်ဘၣ်ယၤ,ဒီးအသးကခုလီၤ.အဂ့ၢ်ဒ်အံၤ,ယမုၢ်လၢ်လၢနကလုၢ်ကထါလီၤ.

75ယွၤဧၢ,ယသ့ၣ်ညါလၢနစံၣ်ညီၣ်တၢ်န့ၣ်မ့ၢ်အတီအလိၤ,ဒီးလၢနမၤနးမၤဖှီၣ်ယၤန့ၣ်မ့ၢ်လၢနကလုၢ်တီအဃိန့ၣ်လီၤ.

76ဒ်နကလုၢ်ကထါလၢနခ့နပှၤအသိးန့ၣ်မ်နဘျုးနဖှိၣ်မၤမုာ်ထီၣ်က့ၤလၢ်ယၤတက့ၢ်.

77မ်နတၢ်သူၣ်ကညီၤသးကညီၤဘၣ်ယၤဒ်သိးယကမူတက့ၢ်.အဂ့ၢ်ဒ်အံၤ,နတၢ်သိၣ်တၢ်သီမ့ၢ်ယတၢ်သူၣ်ဖှံသးညီလီၤ.

78မ်ပှၤပာ်အသးထီၣ်ထီန့ၣ်အမဲာ်ဆှးတက့ၢ်.အဂ့ၢ်ဒ်အံၤ,မၤအၢယၤလၢတၢ်ကဘျံးကဘျၣ်,မ့မ့ၢ်ယဲဒၣ်အံၤယကဆိကမိၣ်တၢ်လၢနတၢ်မၤလိာ်တဖၣ်လီၤ.

79ပှၤလၢအပျံၤနၤ,ဒီးပှၤလၢအသ့ၣ်ညါနတၢ်အုၣ်အသးတဖၣ်န့ၣ်ကဟဲက့ၤဆူယအိၣ်လီၤ.

80ဒ်သိးယသုတမဲာ်ဆှးတဂ့ၤဒီး,မ်ယသးလၢထီၣ်ပှဲၤထီၣ်လၢနတၢ်မၤလိာ်အပူၤတက့ၢ်.

ထ

81ယဆၢနတၢ်အုၣ်က့ၤခီၣ်က့ၤတုၤယသးလီၤဘှါလီၤ.ယကွၢ်လၢ်နကလုၢ်ကထါအကျဲလီၤ.

82ယမဲာ်လၢာ်လၢနကလုၢ်နကထါအဃိဖဲယစံးနကမၤမုာ်ထီၣ်က့ၤယၤအဆၢအကတီၢ်ဖဲလဲၣ်.

83အဂ့ၢ်ဒ်အံၤ,ယမၤယသးဒ်ထံဒၢတၢ်ဖံးလၢမ့ၣ်အူခုၣ်အပူၤအသိးန့ၣ်လီၤ.နတၢ်မၤလိာ်တဖၣ်န့ၣ်ယတသးပ့ၤနီၣ်ဘၣ်.

84နခ့နပှၤအမုၢ်နံၤန့ၣ်အိၣ်ဆံးအါလဲၣ်.နကစံၣ်ညီၣ်ပှၤမၤအၢမၤသီယၤန့ၣ်အဆၢအကတီၢ်ဖဲလဲၣ်.

85ပှၤပာ်ထီၣ်ထီအသးန့ၣ်ခူၣ်လီၤတၢ်ပူၤလၢယဂီၢ်လီၤ.အဝဲသ့ၣ်တဖၣ်န့ၣ်တဒ်ဘၣ်နတၢ်သိၣ်တၢ်သီအသိးဘၣ်.

86နတၢ်မၤလိာ်တဖၣ်န့ၣ်မ့ၢ်အမ့ၢ်အတီခဲလၢာ်လီၤ.ပှၤမၤအၢမၤသီယၤလၢတၢ်ကဘျံးကဘျၣ်လီၤ.မၤစၢၤယၤတက့ၢ်.

87ဘူးဝဲလၢအကမၤဟးဂီၤတ့ၢ်ယၤလၢထံဧိၤကီၢ်ဧိၤအပူၤ,ဒီးယတလဲၤသဒၣ်ဘၣ်နတၢ်မၤလိာ်တဖၣ်ဘၣ်.

88မၤမူထီၣ်က့ၤယၤဒ်နဘျုးနဖှိၣ်အသိး,ဒီးယကတိၢ်န့ၢ်ဖံးဃာ်နထးခိၣ်အတၢ်အုၣ်အသးန့ၣ်လီၤ.

ဒ

89ယွၤဧၢ,နကလုၢ်ကထါအိၣ်ဂၢၢ်ဆိးကျၢၤလၢမူခိၣ်အပူၤလီၤစိၤလီၤထီလီၤ.

90နတၢ်မ့ၢ်တၢ်တီအိၣ်ဝဲအစိၤစိၤအဃၣ်ဃၣ်,နတ့လီၤပာ်လီၤဟီၣ်ခိၣ်,ဒီးအိၣ်ဂၢၢ်ဆိးကျၢၤဝဲလီၤ.

91နတၢ်စံၣ်ညီၣ်တဖၣ်န့ၣ်အိၣ်ဂၢၢ်ဆိးကျၢၤဝဲတုၤမုၢ်မဆါတနံၤအံၤလီၤ.အဂ့ၢ်ဒ်အံၤ,ကယဲၢ်တၢ်ခဲလၢာ်ခဲဆ့မ့ၢ်နခ့နပှၤလီၤ.

92နတၢ်သိၣ်တၢ်သီမ့တမ့ၢ်ဘၣ်ယတၢ်သူၣ်ဖှံသးညီဘၣ်ဒီး,ယကဟးဂီၤတ့ၢ်လံလၢယဘၣ်တၢ်နးတၢ်ဖှီၣ်အပူၤလံ.

93ယတသးပ့ၤနီၣ်ဘၣ်နတၢ်မၤလိာ်တဖၣ်နီတဘျီဘၣ်.အဂ့ၢ်ဒ်အံၤ,နမၤမူထီၣ်က့ၤယၤလၢအီၤလီၤ.

94ယမ့ၢ်နတၢ်လီၤ.အုၣ်က့ၤခီၣ်က့ၤယၤတက့ၢ်.အဂ့ၢ်ဒ်အံၤ,ယဃုနတၢ်မၤလိာ်တဖၣ်လီၤ.

95ပှၤတတီတလိၤခိးယၤလၢအကမၤဟးဂီၤယၤလီၤ.မ့မ့ၢ်ယဲဒၣ်အံၤ,ယဆိကမိၣ်တၢ်လၢနတၢ်အုၣ်နသးတဖၣ်အဂ့ၢ်လီၤ.

96တၢ်လၢတၢ်ပှဲၤခဲလၢာ်အကတၢၢ်န့ၣ်ယထံၣ်ဘၣ်လံ,မ့မ့ၢ်နတၢ်မၤလိာ်န့ၣ်လဲၢ်မးဝဲလီၤ.

န

97ယအဲၣ်ဒိးနတၢ်သိၣ်တၢ်သီန့ၣ်ဆံးဒိၣ်လဲၣ်.ယဆိကမိၣ်တၢ်လၢအဂ့ၢ်အကျိၤသ့သ့တနံၤလီၤ.

98နတၢ်မၤလိာ်တဖၣ်ဒုးကူၣ်သ့ထီၣ်ယၤအါန့ၢ်ယဒုၣ်ယဒါတဖၣ်တက့ၢ်လီၤ.အဂ့ၢ်ဒ်အံၤ,အိၣ်ဒီးယၤလီၤထူလီၤယိာ်လီၤ.

99ယနူၤပၢၢ်ယနၢ်ပၢၢ်တၢ်န့ၣ်အါန့ၢ်ပှၤသိၣ်လိယၤခဲလၢာ်တက့ၢ်လီၤ.အဂ့ၢ်ဒ်အံၤ,ယဆိကမိၣ်လၢနတၢ်အုၣ်အသးတဖၣ်အဂ့ၢ်အကျိၤလီၤ.

100ယနၢ်ပၢၢ်တၢ်အါန့ၢ်ပမှံၤပပှၢ်တက့ၢ်လီၤ.အဂ့ၢ်ဒ်အံၤ,ယတိၢ်န့ၢ်ဖံးဃာ်နတၢ်မၤလိာ်တဖၣ်လီၤ.

101ယတြီကွံာ်ယခီၣ်လၢကယဲၢ်ကျဲအအၢအသီဒ်သိးယကတိၢ်န့ၢ်နကလုၢ်ကထါလီၤ.

102ယတလဲၤသဒၣ်ဘၣ်နတၢ်စံၣ်ညီၣ်တဖၣ်ဘၣ်.အအဂ့ၢ်ဒ်အံၤ,နသိၣ်က့ၤသီက့ၤယၤလီၤ.

103လၢယလ့ၣ်ကွၢ်တၢ်န့ၣ်နကလုၢ်ကထါဆၢဆံးဒိၣ်လဲၣ်.ဆၢန့ၢ်ကနဲစီလၢယကိာ်ပူၤန့ၣ်တက့ၢ်လီၤ.

104ယနူၤပၢၢ်နၢ်ပၢၢ်တၢ်လၢနတၢ်မၤလိာ်တဖၣ်အဃိလီၤ.မၤသးဒ်န့ၣ်ဒီးယသးဟ့တၢ်ကတိၤကဘျံးကဘျၣ်အကျဲခဲလၢာ်လီၤ.

ပ

105နကလုၢ်ကထါန့ၣ်မ့ၢ်မ့ၣ်အူဒၢတဖျၢၣ်လၢယခီၣ်အဂီၢ်,ဒီးတၢ်ကပီၤတဖျၢၣ်လၢယကျဲအဂီၢ်လီၤ.

106ယဆိၣ်လီၤယသးဒီးပာ်ဂၢၢ်ပာ်ကျၢၤလံယကလုၢ်လၢယကတိၢ်န့ၢ်နတၢ်စံၣ်ညီၣ်အတီအလိၤတဖၣ်လီၤ.

107ယဘၣ်တၢ်နးတၢ်ဖှီၣ်နးမးလီၤ,ယွၤဧၢ.မၤမူထီၣ်က့ၤယၤဒ်နကလုၢ်ကထါအသိးန့ၣ်တက့ၢ်.

108ယွၤဧၢ,ယထးခိၣ်အတၢ်မၤဘူၣ်ဒၣ်တၢ်တဖၣ်န့ၣ်မ်အဘၣ်နသးတက့ၢ်.ဒီးသိၣ်လိယၤလၢနတၢ်စံၣ်ညီၣ်တဖၣ်န့ၣ်တက့ၢ်.

109ယသးအိၣ်ဝဲလၢယစုပူၤတထံၣ်ဃီလီၤ.ဘၣ်ဆၣ်ဒီးယတသးပ့ၤနီၣ်ဘၣ်နတၢ်သိၣ်တၢ်သီဘၣ်.

110ပှၤတတီတလိၤပာ်ပျံၤသကွီၤလၢယဂီၢ်လီၤ.ဘၣ်ဆၣ်ဒီးယသးတဟးဖျိးဘၣ်နတၢ်မၤလိာ်တဖၣ်အကျဲဘၣ်.

111ယပာ်နတၢ်အုၣ်အသးတဖၣ်န့ၣ်လၢယဂီၢ်ဒၣ်ယဲလီၤထူလီၤယိာ်လီၤ.အဂ့ၢ်ဒ်အံၤ,အဝဲန့ၣ်ဒုးဖှံဒုးညီယသးလီၤ.

112ယပာ်လီၤယသးလၢယကတိၢ်န့ၢ်နတၢ်မၤလိာ်တဖၣ်တထံၣ်ဃီတုၤအကတၢၢ်လီၤ.

ဖ

113ပှၤလၢအသးခံဖျၢၣ်တဖၣ်န့ၣ်ယသးဟ့အီၤလီၤ.မ့မ့ၢ်နတၢ်သိၣ်တၢ်သီန့ၣ်ယအဲၣ်အီၤလီၤ.

114နမ့ၢ်ယအိၣ်တဒၢအလီၢ်,ဒီးယကတီၤတဘ့ၣ်လီၤ.ယမုၢ်လၢ်တၢ်လၢနကလုၢ်ကထါလီၤ.

115ပှၤမၤတၢ်အၢသ့ၣ်ဧၢ,ဟးဖးဒီးယၤတက့ၢ်.ဒီးယကတိၢ်န့ၢ်ယကစၢ်အတၢ်မၤလိာ်တဖၣ်လီၤ.

116ဒုးအိၣ်ဂၢၢ်ဆိးကျၢၤယၤဒ်နကလုၢ်ကထါအသိးန့ၣ်တက့ၢ်.ဒီးယကမူလီၤ.ဒီးမ်ယသုတမဲာ်ဆှးလၢယတၢ်မုၢ်လၢ်အဃိန့ၣ်တဂ့ၤ.

117မၤစၢၤယၤတက့ၢ်,ဒီးယကတုၤလၢတၢ်အုၣ်က့ၤခီၣ်က့ၤယၤလီၤ.ဒီးယကွၢ်မဲာ်လၢနတၢ်မၤလိာ်တဖၣ်တထံၣ်ဃီလီၤ.

118ကယဲၢ်ပှၤလၢအဟးဖျိးနတၢ်မၤလိာ်တဖၣ်အကျဲခဲလၢာ်န့ၣ်နညိကွံာ်အီၤလီၤ.အတၢ်လီတၢ်န့ၣ်မ့ၢ်တၢ်ကဘျံးကဘျၣ်လီၤ.

119ဒ်တၢ်အအ့ၣ်အသိးနတ့ၢ်လီၤကွံာ်ကယဲၢ်ပှၤတတီတလိၤလၢဟီၣ်ခိၣ်ချၢခဲလၢာ်လီၤ.မၤသးဒ်န့ၣ်ဒီးယအဲၣ်နတၢ်အုၣ်အသးတဖၣ်လီၤ.

120ယညၣ်ကနိးလၢတၢ်ပျံၤနၤအဃိ,ဒီးယပျံၤနတၢ်စံၣ်ညီၣ်တဖၣ်လီၤ.

ဘ

121ယမၤတၢ်စံၣ်ညီၣ်ဒီးတၢ်တီတၢ်လိၤလီၤ.လဲၤသဒၣ်ယၤလၢပှၤမၤအၢမၤသီယၤအစုပူၤန့ၣ်တဂ့ၤ.

122ကဲထီၣ်နခ့နပှၤအတၢ်အုၣ်တၢ်ခီၣ်အသးလၢတၢ်ဂ့ၤအဂီၢ်န့ၣ်တက့ၢ်.ပှၤလၢအပာ်အသးထီၣ်ထီန့ၣ်မ်အသုတမၤအၢမၤသီယၤတဂ့ၤ.

123ယမဲာ်လၢာ်လၢယဆၢနတၢ်အုၣ်က့ၤခီၣ်က့ၤအဃိ,ဒီးလၢနတၢ်တီတၢ်လိၤအကလုၢ်ကထါအဃိန့ၣ်လီၤ.

124မၤနခ့နပှၤဒ်နဘျုးနဖှိၣ်အသိး,ဒီးသိၣ်လိယၤလၢနတၢ်မၤလိာ်တဖၣ်န့ၣ်တက့ၢ်.

125ယဲဒၣ်အံၤယမ့ၢ်နခ့နပှၤလီၤ.ဒုးနၢ်ပၢၢ်ယၤဒ်သိးယကသ့ၣ်ညါနတၢ်အုၣ်အသးတဖၣ်န့ၣ်တက့ၢ်.

126အမုၢ်အလါဘၣ်လံလၢယွၤကမၤတၢ်လီၤ.အဂ့ၢ်ဒ်အံၤ,ပှၤဘိးကဒါကွံာ်နတၢ်သိၣ်တၢ်သီလံလီၤ.

127မၤသးဒ်န့ၣ်ဒီးယအဲၣ်ဒိးနတၢ်မၤလိာ်တဖၣ်အါန့ၢ်ထူဧိၤလွဲဧိၤ,ဒီးထူစီတက့ၢ်လီၤ.

128မၤသးဒ်န့ၣ်ဒီးကယဲၢ်နတၢ်မၤလိာ်တဖၣ်ယပာ်တီပာ်လိၤကိးထံၣ်ဒဲးလီၤ.ဒီးကယဲၢ်ကျဲဘၣ်ဃးဒီးတၢ်ကဘျံးကဘျၣ်န့ၣ်ယသးဟ့အီၤကိးဘိဒဲးလီၤ.

မ

129နတၢ်အုၣ်အသးတဖၣ်န့ၣ်လီၤလးဝဲလီၤ.မၤသးဒ်န့ၣ်ဒီးယတိၢ်န့ၢ်အီၤလၢယသူၣ်ယသးလီၤ.

130တၢ်အိးထီၣ်နကလုၢ်နကထါန့ၣ်မၤကပီၤထီၣ်တၢ်,ဒီးဒုးနၢ်ပၢၢ်ပှၤလၢအတမၤလိဘၣ်တၢ်ဘၣ်လီၤ.

131ယအဲးထီၣ်ယထးခိၣ်ဒီးယသါဟုသါဟီလီၤ.အဂ့ၢ်ဒ်အံၤ,ယဆၢန့ၢ်နတၢ်မၤလိာ်တဖၣ်လီၤ.

132ဃၣ်နသးဆူယအိၣ်,ဒီးသူၣ်ကညီၤသးကညီၤယၤ,ဒ်နညီနုၢ်မၤပှၤလၢအအဲၣ်နမံၤအသိးန့ၣ်တက့ၢ်.

133ဒုးထွဲယခီၣ်လၢနကလုၢ်ကထါအပူၤတက့ၢ်.ဒီးမ်တၢ်အၢတၢ်သီအသုတပၢယၤနီတမံၤတဂ့ၤ.

134အုၣ်က့ၤခီၣ်က့ၤယၤလၢပှၤကညီအတၢ်မၤအၢမၤသီတက့ၢ်.ဒီးယကတိၢ်န့ၢ်ဖံးဃာ်နတၢ်မၤလိာ်တဖၣ်လီၤ.

135ဒုးကပီၤထီၣ်နမဲာ်လၢနခ့နပှၤအလိၤ,ဒီးသိၣ်လိယၤလၢနတၢ်မၤလိာ်တဖၣ်န့ၣ်တက့ၢ်.

136မ့ၢ်ပှၤတတိၢ်န့ၢ်ဘၣ်နတၢ်သိၣ်တၢ်သီဘၣ်ဒီး,ထံကျိယွၤလီၤလၢယမဲာ်လီၤ.

ယ

137ယွၤဧၢ,နမ့ၢ်တၢ်တီတၢ်လိၤ,ဒီးနတၢ်စံၣ်ညီၣ်တဖၣ်န့ၣ်တီဝဲလိၤဝဲလီၤ.

138နတၢ်အုၣ်အသးလၢနမၤလိာ်တဖၣ်န့ၣ်တီဝဲလိၤဝဲ,ဒီးမ့ၢ်တၢ်ကလုၢ်တီသပှၢ်ပှၢ်လီၤ.

139ယသးဆူၣ်န့ၣ်အီၣ်ကွံာ်ယၤလီၤ.အဂ့ၢ်ဒ်အံၤ,ယဒုၣ်ယဒါသးပ့ၤနီၣ်နကလုၢ်ကထါလီၤ. 140မ့ၢ်နကလုၢ်ကထါကဆှီဝဲဒိၣ်မးဒီး,နခ့နပှၤအဲၣ်အီၤလီၤ.

141ယမ့ၢ်ပှၤအဆံး,ဒီးပှၤတပးကဲဘၣ်ယၤဘၣ်,ယတသးပ့ၤနီၣ်ဘၣ်နတၢ်မၤလိာ်တဖၣ်ဘၣ်.

142နတၢ်တီတၢ်လိၤန့ၣ်မ့ၢ်တၢ်တီတၢ်လိၤအထူအယိာ်,ဒီးနတၢ်သိၣ်တၢ်သီန့ၣ်မ့ၢ်တၢ်မ့ၢ်တၢ်တီလီၤ.

143တၢ်နးတၢ်ဖှီၣ်,ဒီးတၢ်ကိၢ်တၢ်ဂီၤန့ၣ်ဘၣ်လံယၤလီၤ.နတၢ်မၤလိာ်တဖၣ်န့ၣ်မ့ၢ်ယတၢ်သူၣ်ဖှံသးညီလီၤ.

144နတၢ်အုၣ်အသးတဖၣ်န့ၣ်မ့ၢ်တၢ်တီတၢ်လိၤလီၤထူလီၤယိာ်လီၤ.ဒုးနၢ်ပၢၢ်ယၤတက့ၢ်,ဒီးယကမူလီၤ.

ရ

145ယဃ့ကညးတၢ်ဒီးယသးဒီဖျၢၣ်ညါလီၤ.စံးဆၢယၤတက့ၢ်,ယွၤဧၢ.ယကတိၢ်န့ၢ်နတၢ်မၤလိာ်တဖၣ်လီၤ.

146ယဃ့တၢ်လၢနၤလီၤ.အုၣ်က့ၤခီၣ်က့ၤယၤတက့ၢ်,ဒီးယကတိၢ်န့ၢ်နတၢ်အုၣ်အသးတဖၣ်လီၤ.

147ယလဲၤဘျီမုၢ်ဆ့ၣ်ဝါ,ဒီးယဃ့ကညးတၢ်လီၤ.ယမုၢ်လၢ်တၢ်လၢနကလုၢ်ကထါလီၤ.

148ယမဲာ်လဲၤဘျီတၢ်ဆိးသီအဆၢအကတီၢ်တဖၣ်ဒ်သိးယကဆိကမိၣ်တၢ်လၢနကလုၢ်ကထါအဂ့ၢ်လီၤ.

149ဒိကနၣ်လၢ်ယကလုၢ်ကထါဒ်နဘျုးနဖှိၣ်အသိးန့ၣ်တက့ၢ်.ယွၤဧၢ,ဒ်နစံၣ်ညီၣ်တၢ်အသိးန့ၣ်မၤမူထီၣ်က့ၤယၤတက့ၢ်.

150ပှၤလၢအဃုမၤတၢ်အၢတဖၣ်န့ၣ်သုးဘူးအသး,ဒီးအိၣ်ယံၤဝဲဒီးနတၢ်သိၣ်တၢ်သီလီၤ.

151နအိၣ်ဘူး,ယွၤဧၢ,ဒီးနတၢ်မၤလိာ်တဖၣ်န့ၣ်မ့ၢ်အမ့ၢ်အတီခဲလၢာ်လီၤ.

152ယသ့ၣ်ညါလၢပျၢၤလၢနတၢ်အုၣ်အသးတဖၣ်အပူၤ,လၢနပာ်အီၤလီၤထူလီၤယိာ်လီၤ.

လ

153ကွၢ်ဆိကမိၣ်လၢ်ယတၢ်နးတၢ်ဖှီၣ်,ဒီးမၤပူၤမၤဖျဲးလၢ်ယၤတက့ၢ်.အဂ့ၢ်ဒ်အံၤ,နတၢ်သိၣ်တၢ်သီန့ၣ်ယတသးပ့ၤနီၣ်ဘၣ်.

154လိာ်ယကွီၢ်,ဒီးမၤပူၤမၤဖျဲးလၢ်ယၤတက့ၢ်.ဒ်နကလုၢ်ကထါအသိးန့ၣ်,မၤမူထီၣ်က့ၤလၢ်ယၤတက့ၢ်.

155တၢ်အုၣ်က့ၤခီၣ်က့ၤန့ၣ်အိၣ်ယံၤဝဲဒီးပှၤတတီတလိၤဘၣ်လီၤ.အဂ့ၢ်ဒ်အံၤ,အဝဲသ့ၣ်တဖၣ်န့ၣ်တဃုဘၣ်နတၢ်မၤလိာ်တဖၣ်ဘၣ်.

156ယွၤဧၢ,နသူၣ်အိၣ်သးအိၣ်တၢ်ဒိၣ်မးလီၤ.ဒ်နစံၣ်ညီၣ်တၢ်တဖၣ်အသိးန့ၣ်မၤမူထီၣ်က့ၤယၤတက့ၢ်.

157ပှၤလၢအမၤအၢမၤသီယၤ,ဒီးယဒုၣ်ယဒါန့ၣ်အိၣ်အါဂၤလီၤ.ယတဟးဆှဲးဘၣ်နတၢ်အုၣ်အသးတဖၣ်ဘၣ်.

158ယကွၢ်ပှၤလီတၢ်ဖိ,ဒီးယသးကိၢ်ထီၣ်လီၤ.အဂ့ၢ်ဒ်အံၤ,အဝဲသ့ၣ်တဖၣ်န့ၣ်တတိၢ်န့ၢ်ဘၣ်နကလုၢ်ကထါဘၣ်.

159ယအဲၣ်နတၢ်မၤလိာ်တဖၣ်ဒ်လဲၣ်ဒ်လဲၣ်န့ၣ်ကွၢ်ဆိကမိၣ်တက့ၢ်.ယွၤဧၢ,ဒ်နဘျုးနဖှိၣ်အသိးန့ၣ်မၤမူထီၣ်က့ၤလၢ်ယၤတက့ၢ်.

160နကလုၢ်ကထါအခီၣ်ထံးန့ၣ်မ့ၢ်အမ့ၢ်အတီလီၤ.ဒီးနတၢ်တီတၢ်လိၤအတၢ်စံၣ်ညီၣ်တဖၣ်န့ၣ်အိၣ်ဝဲလီၤစိၤလီၤထီကိးထံၣ်ဒဲးလီၤ.

ဝ

161ပဒိၣ်ဖးဒိၣ်မၤအၢမၤသီယၤကလီကလီလီၤ.ဘၣ်ဆၣ်ဒီးယသးပျံၤတၢ်လၢနကလုၢ်ကထါအဃိလီၤ.

162ယသူၣ်ဖှံသးညီလၢနကလုၢ်ကထါအဃိ,ဒ်ပှၤလၢအထံၣ်န့ၢ်တၢ်ဂုာ်န့ၢ်အါအါကလဲာ်အသိးန့ၣ်လီၤ.

163တၢ်ကတိၤကဘျံးကဘျၣ်န့ၣ်ယသးဟ့အီၤ,ဒီးယသးဘၣ်အၢအီၤလီၤ.မ့မ့ၢ်နတၢ်သိၣ်တၢ်သီန့ၣ်ယအဲၣ်အီၤလီၤ.

164တနံၤတနံၤနွံစုယစံးထီၣ်ပတြၢၤနၤလၢနတၢ်တီတၢ်လိၤအတၢ်စံၣ်ညီၣ်တဖၣ်အဃိလီၤ.

165ပှၤလၢအအဲၣ်နတၢ်သိၣ်တၢ်သီတဖၣ်န့ၣ်အိၣ်ဒီးတၢ်ဃူတၢ်ဖိးအါမးလီၤ.ဒီးတၢ်လီၤဃံၤအလီၢ်တအိၣ်ဘၣ်ဒီးအီၤဘၣ်.

166ယွၤဧၢ,ယကွၢ်လၢ်နတၢ်အုၣ်က့ၤခီၣ်က့ၤအကျဲဒီးယတိၢ်န့ၢ်ဖံးဃာ်နတၢ်မၤလိာ်တဖၣ်လီၤ.

167နတၢ်အုၣ်အသးတဖၣ်န့ၣ်ယတိၢ်န့ၢ်လၢယသး,ဒီးယအဲၣ်အီၤဒိၣ်ဒိၣ်ကလဲာ်လီၤ.

168ယတိၢ်န့ၢ်နတၢ်မၤလိာ်ဒီးနတၢ်အုၣ်အသးတဖၣ်လီၤ.အဂ့ၢ်ဒ်အံၤ,ယကျဲဧိၤကပူၤဧိၤအိၣ်ဝဲလၢနမဲာ်ညါခဲလၢာ်လီၤ.

သ

169မ်ယတၢ်ထုကဖၣ်ဟဲထီၣ်ဆူနအိၣ်တက့ၢ်.ယွၤဧၢ,ဒုးနၢ်ပၢၢ်ယၤဒ်နကလုၢ်ကထါအသိးန့ၣ်တက့ၢ်.

170မ်ယဃ့ကညးတၢ်ဟဲထီၣ်ဆူနအိၣ်တက့ၢ်.ဒီးမၤပူၤမၤဖျဲးယၤဒ်နကလုၢ်ကထါအသိးန့ၣ်တက့ၢ်.

171တုၤနသိၣ်လိယၤလၢနတၢ်မၤလိာ်တဖၣ်ဒီး,ယထးခိၣ်ကစံးထီၣ်ပတြၢၤတၢ်လီၤ.

172ယပျ့ၤကစံၣ်တဲၤတဲလီၤနကလုၢ်ကထါလီၤ.အဂ့ၢ်ဒ်အံၤ,နတၢ်မၤလိာ်တဖၣ်န့ၣ်မ့ၢ်အတီအလိၤခဲလၢာ်လီၤ.

173မ်နစုမၤစၢၤယၤတက့ၢ်.အဂ့ၢ်ဒ်အံၤ,ယဃုထၢနတၢ်မၤလိာ်တဖၣ်လီၤ.

174ယဆၢန့ၢ်နတၢ်အုၣ်က့ၤခီၣ်က့ၤ,ယွၤဧၢ,ဒီးနတၢ်သိၣ်တၢ်သီန့ၣ်မ့ၢ်ယတၢ်သူၣ်ဖှံသးညီလီၤ.

175မ်ယသးမူတက့ၢ်.ဒီးယကစံးထီၣ်ပတြၢၤနၤလီၤ.ဒီးမ်နစံၣ်ညီၣ်တၢ်တဖၣ်န့ၣ်မၤစၢၤယၤတက့ၢ်.

176ယဟးဖျိးကျဲဒ်သိလၢအဟါမၢ်တဒုအသိးလီၤ.ဃုန့ၢ်နခ့နပှၤတက့ၢ်.အဂ့ၢ်ဒ်အံၤ,ယတသးပ့ၤနီၣ်ဘၣ်နတၢ်မၤလိာ်တဖၣ်ဘၣ်လီၤ.