Psalms 135
1စံးထီၣ်ပတြၢၤယွၤတက့ၢ်.စံးထီၣ်ပတြၢၤယွၤအမံၤတက့ၢ်. 2ယွၤအခ့အပှၤလၢအဆၢထၢၣ်လၢယွၤအဟံၣ်ပူၤ,လၢပကစၢ်အဟံၣ်အဂၢၤပူၤသ့ၣ်ဧၢ,စံးထီၣ်ပတြၢၤတၢ်တက့ၢ်. 3စံးထီၣ်ပတြၢၤယွၤတက့ၢ်.အဂ့ၢ်ဒ်အံၤ,ယွၤဂ့ၤဝဲလီၤ.သးဝံၣ်ထီၣ်အမံၤတက့ၢ်.အဂ့ၢ်ဒ်အံၤ,မုာ်ဝဲလီၤ. 4အဂ့ၢ်ဒ်အံၤ,ယွၤဃုထၢယၤကိာ်လၢအဂီၢ်ဒၣ်ဝဲ,အံၣ်စရ့လးလၢအတၢ်လုၢ်ဒိၣ်ပှ့ၤဒိၣ်လီၤဆီဒၣ်တၢ်လီၤ. 5အဂ့ၢ်ဒ်အံၤ,ယသ့ၣ်ညါလၢယွၤမ့ၢ်တၢ်အဒိၣ်,ဒီးပကစၢ်ဒိၣ်န့ၢ်ကယဲၢ်ကစၢ်ခဲလၢာ်တက့ၢ်လီၤ. 6ယွၤမၤဝဲကယဲၢ်တၢ်ဘၣ်အသးလၢမူခိၣ်အပူၤ,ဒီးလၢဟီၣ်ခိၣ်ချၢ,ဒီးလၢပီၣ်လဲၣ်ပူၤ,ဒီးလၢထံယိာ်ပူၤခဲလၢာ်လီၤ. 7အဝဲဒၣ်န့ၣ်ဒုးခုၣ်ထီၣ်တၢ်ဘှ့ၣ်လၢဟီၣ်ခိၣ်အကတၢၢ်တဖၣ်,ဒီးတ့လီၤလီဝၢ်အဒံးလၢတၢ်စူၤအဂီၢ်,ဒီးဒုးဟဲကလံၤလၢတၢ်ပာ်ဖှိၣ်အလီၢ်ပူၤန့ၣ်လီၤ. 8အဝဲဒၣ်န့ၣ်ကျီသံကွံာ်ပှၤအဲၤကူပတူးဖိအဝဲၢ်ကိလၢပှၤကညီပၢၢ်လၢဆၣ်ဖိကီၢ်ဖိအဒၢလီၤ. 9မၢလီၤတၢ်ပနီၣ်လီၤလး,ဒီးတၢ်လီၤလိၢ်လီၤလးလၢနကျါ,အဲၤကူပတူးဧၢ,လၢဖၤရိၤ,ဒီးအခ့အပှၤအကျါလီၤ. 10ကျီသံကွံာ်ပှၤအါကလုာ်,ဒီးမၤသံစီၤပၤဖးဒိၣ်သ့ၣ်တဖၣ်, 11ပှၤအမိၢ်ဖိအစီၤပၤစံဃိၣ်,ဒီးဘၤၡၣ်အစီၤပၤဧိာ်,ဒီးကနၤဧၣ်အဘီအမုၢ်ခဲလၢာ်, 12ဒီးဟ့ၣ်လီၤအထံအကီၢ်လၢတၢ်န့ၢ်သါ,လၢတၢ်န့ၢ်သါလၢအပှၤဂီၢ်မုၢ်အံၣ်စရ့လးအဂီၢ်လီၤ. 13ယွၤဧၢ,နမံၤအိၣ်ဝဲလီၤစိၤလီၤထီလီၤ.ယွၤဧၢ,တၢ်သ့ၣ်နီၣ်ထီၣ်က့ၤနၤအံၤ,အိၣ်ဝဲအစိၤစိၤအဃၣ်ဃၣ်လီၤ. 14အဂ့ၢ်ဒ်အံၤ,ယွၤကစံၣ်ညီၣ်အပှၤဂီၢ်မုၢ်,ဒီးကသ့ၣ်နီၣ်လီၤက့ၤအသးလၢအခ့အပှၤအဂ့ၢ်လီၤ. 15ပှၤကလုာ်တဖၣ်အတၢ်ဂီၤတၢ်ဖီၣ်န့ၣ်မ့ၢ်ကျိၣ်ဧိၤစ့ဧိၤ,ဒီးထူဧိၤလွဲဧိၤ,ပှၤကညီအတၢ်မၤလၢအစုလီၤ. 16အိၣ်ဒီးအထးခိၣ်,ဒီးတကတိၤဘၣ်တၢ်ဘၣ်.အိၣ်ဒီးအမဲာ်,ဒီးတထံၣ်ဘၣ်တၢ်ဘၣ်. 17အိၣ်ဒီးအနၢ်,ဒီးတနၢ်ဟူဘၣ်တၢ်ဘၣ်.ဒီးအသါတအိၣ်ဘၣ်လၢအထးခိၣ်ပူၤဘၣ်. 18ပှၤလၢအတ့အီၤတဖၣ်,ကယဲၢ်ပှၤလၢအသန့ၤအသးလၢအီၤခဲလၢာ်န့ၣ်လီၤဂာ်လၢအီၤလီၤ. 19အံၣ်စရ့လးအပှၤဟံၣ်ဖိသ့ၣ်ဧၢ,စံးထီၣ်ပတြၢၤယွၤတက့ၢ်.စီၤအၤဟရိၣ်အပှၤဟံၣ်ဖိသ့ၣ်ဧၢ,စံးထီၣ်ပတြၢၤယွၤတက့ၢ်. 20စီၤလ့ၤဝံအပှၤဟံၣ်ဖိသ့ၣ်ဧၢ,စံးထီၣ်ပတြၢၤယွၤတက့ၢ်.ပှၤလၢအပျံၤယွၤသ့ၣ်ဧၢ,စံးထီၣ်ပတြၢၤယွၤတက့ၢ်. 21ယွၤလၢအအိၣ်ဝဲဆိးဝဲလၢယရူၤၡလ့ၣ်အပူၤန့ၣ်စံးထီၣ်ပတြၢၤအီၤလၢစံယိၣ်အပူၤတက့ၢ်.စံးထီၣ်ပတြၢၤယွၤတက့ၢ်.
Copyright information for
KswSKMB