Psalms 139
စီၤဒၤဝံးအထါလၢတၢ်အခိၣ်အဂီၢ်.
1ယွၤဧၢ,ဃုကွၢ်ထံယၤ,ဒီးနသ့ၣ်ညါယၤလီၤ. 2ယဆ့ၣ်နီၤ,ဒီးယဂဲၤဆၢထၢၣ်န့ၣ်နသ့ၣ်ညါလီၤ.နနၢ်ပၢၢ်ယတၢ်ဆိကမိၣ်လၢအယံၤလီၤ. 3ယကျဲ,ဒီးယမံလီၤအလီၢ်န့ၣ်နကွၢ်နီၣ်,ဒီးနသ့ၣ်ညါယကျဲဧိၤကပူၤဧိၤခဲလၢာ်လီၤ. 4အဂ့ၢ်ဒ်အံၤ,ကွၢ်ကွၢ်,ယွၤဧၢ,တၢ်ကတိၤလၢယပျ့ၤအလိၤလၢနတသ့ၣ်ညါဘၣ်န့ၣ်တအိၣ်ဘၣ်နီတထံၣ်ဘၣ်. 5လၢယလီၢ်ခံဂ့ၤဂ့ၤ,လၢယမဲာ်ညါဂ့ၤဂ့ၤ,နတနံးယၤ,ဒီးနပာ်နစုလၢယလိၤလီၤ. 6တၢ်သ့ၣ်ညါဒ်န့ၣ်အသိးလီၤလးဒိၣ်ကဲာ်ဆိးလၢယဂီၢ်လီၤ.အိၣ်ထီၣ်ထီဝဲန့ၣ်ယထီၣ်ဘးတသ့ဘၣ်. 7ယကလဲၤပူၤကွံာ်လၢနသးဆူလဲၣ်.ဒီးယကဃ့ၢ်ပူၤကွံာ်လၢနမဲာ်ညါဆူလဲၣ်. 8ယမ့ၢ်လဲၤထီၣ်ဘးလၢမူခိၣ်ဒီး,နအိၣ်ဖဲန့ၣ်လီၤ.ယမ့ၢ်ဒါလီၤယလီၢ်မံလၢပျုၤပူၤဒီးကွၢ်ကွၢ်,နအိၣ်ဖဲန့ၣ်လီၤ. 9ယမ့ၢ်ဟံးန့ၢ်မုၢ်ဂီၤအဒံးဆ့,ဒီးအိၣ်လၢပီၣ်လဲၣ်အကတၢၢ်ဒီး, 10နစုကဆှၢယၤဖဲန့ၣ်စ့ၢ်ကီး,ဒီးနစုထွဲကဟံးဃာ်ယၤလီၤ. 11ယမ့ၢ်စံး,မ့ၢ်မးတၢ်ခံးကမၤဘံၣ်မၤဘၢယၤဒီး,မုၢ်နၤကဲထီၣ်တၢ်ကပီၤဝးတရံးယၤလီၤ. 12တၢ်ခံးလၢနမဲာ်ညါန့ၣ်တခံးဘၣ်ဝဲဘၣ်,ဒီးမုၢ်နၤကပီၤထီၣ်ဒ်မုၢ်ဆါအသိးန့ၣ်လီၤ.တၢ်ခံးမၤသးဒီးနၤဒ်တၢ်ကပီၤအသိးန့ၣ်လီၤ. 13အဂ့ၢ်ဒ်အံၤ,နအိၣ်ဒီးယကလ့ၢ်တဖၣ်,နဒုးကဲထီၣ်ယၤလၢယမိၢ်အဟၢဖၢပူၤလီၤ. 14တၢ်တ့လီၤယၤအိၣ်ဒီးပျံၤတၢ်အလီၢ်,ဒီးကမၢကမၣ်တၢ်အလီၢ်လီၤ.မၤသးဒ်န့ၣ်ဒီးယကစံးထီၣ်ပတြၢၤနၤလီၤ.နတၢ်မၤတဖၣ်လီၤလးဝဲန့ၣ်ယသ့ၣ်ညါသပှၢ်ပှၢ်လီၤ. 15ဖဲတၢ်တ့လီၤယၤလၢတၢ်တဒၢ,ဖဲတၢ်တ့ယၤလၢဟီၣ်ခိၣ်အယိာ်ပူၤန့ၣ်ယက့ၢ်ယဂီၤတအိၣ်ခူသူၣ်ဘၣ်ဒီးနၤဘၣ်. 16ယတၢ်တလိၣ်န့ၣ်နမဲာ်ထံၣ်အီၤလီၤ.ဒီးဘၣ်ကွဲးအသးလၢနလံာ်ပူၤခဲလၢာ်မုၢ်နံၤတဖၣ်လၢအကကဲထီၣ်ဒီးတအိၣ်ဒံးဘၣ်နီတနံၤဘၣ်. 17ဒီးကစၢ်ဧၢ,နတၢ်ဆိကမိၣ်န့ၣ်မ့ၢ်တၢ်လုၢ်ဒိၣ်ပှ့ၤဒိၣ်ဒီးယၤဆံးဒိၣ်လဲၣ်,အတၢ်ဂံၢ်မ့ၢ်ဆံးအါလဲၣ်. 18ယမ့ၢ်ဂံၢ်အီၤ,ဒီးအိၣ်ဝဲအါန့ၢ်မဲးအဖျၢၣ်တက့ၢ်လီၤ.ယဖုသံနီၣ်,ဒီးယကအိၣ်ဒံးဒီးနၤလီၤ. 19ကစၢ်ဧၢ,မ့ၢ်မးနကမၤသံကွံာ်ပှၤတတီတလိၤဒီး,ပှၤဘၣ်အၢဒီးတၢ်သွံၣ်သ့ၣ်ဧၢ,ဟးဖးဒီးယၤတက့ၢ်. 20အဂ့ၢ်ဒ်အံၤ,အဝဲသ့ၣ်ကတိၤထီဒါနၤကြီကြီဒၣ်တၢ်,ဒီးနဒုၣ်နဒါပှ့ၤဘၣ်နမံၤကလီကလီလီၤ. 21ယွၤဧၢ,ပှၤလၢအသးဟ့နၤတဖၣ်န့ၣ်ယသးဟ့အီၤတမ့ၢ်ဘၣ်ဧါ,ဒီးယသးဘၣ်အၢပှၤလၢအထီဒါနၤ,တမ့ၢ်ဘၣ်ဧါ. 22ယသးဟ့အီၤသပှၢ်တၢၢ်,ယပာ်အီၤလၢယဒုၣ်ယဒါလီၤ. 23ကစၢ်ဧၢ,ဃုကွၢ်ယၤ,ဒီးသ့ၣ်ညါယသးတက့ၢ်.မၤကွၢ်ယၤ,ဒီးသ့ၣ်ညါယတၢ်ဆိကမိၣ်တက့ၢ်. 24ဒီးကျဲအအၢလၢယပူၤမ့ၢ်အအိၣ်,တအိၣ်လဲၣ်န့ၣ်ကွၢ်,ဒီးဆှၢယၤလၢကျဲအထူအယိာ်အပူၤတက့ၢ်.
Copyright information for
KswSKMB