Psa 143 | KswSKMB | STEP | စီၤဒၤဝံးအထါ. ယွၤဧၢ,ကနၣ်ယဘါထုကဖၣ်တၢ်,ဒိကနၣ်ယဃ့ကညးတၢ်တက့ၢ်.ဒ်နမၤတီနကလုၢ်အသိး,ဒ်နတီနလိၤအသိးန့ၣ်စံးဆၢယၤတက့ၢ်.

‏ Psalms 143

စီၤဒၤဝံးအထါ.

1 ယွၤဧၢ,ကနၣ်ယဘါထုကဖၣ်တၢ်,ဒိကနၣ်ယဃ့ကညးတၢ်တက့ၢ်.ဒ်နမၤတီနကလုၢ်အသိး,ဒ်နတီနလိၤအသိးန့ၣ်စံးဆၢယၤတက့ၢ်. 2 ဒီးလိာ်ကွီၢ်ဒီးနခ့နပှၤတဂ့ၤ.အဂ့ၢ်ဒ်အံၤ,ပှၤအမူလၢအတီအလိၤလၢနမဲာ်ညါန့ၣ်တအိၣ်ဘၣ်နီတဂၤဘၣ်. 3 အဂ့ၢ်ဒ်အံၤ,တၢ်အဒုၣ်အဒါမၤအၢမၤသီယသး,ကျီကွံာ်ယသးသမူပၢၢ်လၢဟီၣ်ခိၣ်အလိၤ,ဒုးအိၣ်ယၤလၢတၢ်ခံးကျါ,ဒ်ပှၤလၢအသံဃဲးဃဲးတ့ၢ်အသိးန့ၣ်လီၤ.

4 ဒီးယသးလၢယပူၤအံၤလီၤဘှံးလီၤတီၤ,ယသးလၢယသးကံၢ်ပူၤဟးဂီၤဝဲလီၤ. 5 ယသ့ၣ်နီၣ်ထီၣ်က့ၤမုၢ်နံၤလၢပျၢၤ,ယဆိကမိၣ်လၢနမၤတၢ်ခဲလၢာ်အဂ့ၢ်အကျိၤ,ယဆိကမိၣ်ဆိကမးတၢ်လၢနစုအတၢ်မၤအဂ့ၢ်အကျိၤလီၤ. 6 ယယူာ်ထီၣ်ယစုဆူနအိၣ်,ယသးအံၤသူအသးလၢနၤဒ်ဟီၣ်ခိၣ်အဃ့အသိးန့ၣ်လီၤ.
စ့လၤ.

7 ယွၤဧၢ,မၤချ့ချ့ဒီးစံးဆၢယၤတက့ၢ်.ယသးကလၢာ်လီၤ.ဒ်သိးယသုတကဲထီၣ်ဒ်ပှၤလၢအလဲၤလီၤဆူတၢ်ပူၤတဂ့ၤဒီး,ပာ်တဒၢနမဲာ်ဒီးယၤတဂ့ၤ.

8 ဒုးနၢ်ဟူယၤလၢနဘျုးနဖှိၣ်လၢဂီၤဂီၤတက့ၢ်.အဂ့ၢ်ဒ်အံၤ,ယသန့ၤယသးလၢနၤလီၤ.ကျဲလၢယဂ့ၤပိာ်တဘိန့ၣ်ဒုးသ့ၣ်ညါယၤတက့ၢ်.အဂ့ၢ်ဒ်အံၤ,ယစိာ်ထီၣ်ယသးဆူနအိၣ်လီၤ.

9 ယွၤဧၢ,မၤပူၤမၤဖျဲးယၤလၢယဒုၣ်ယဒါတက့ၢ်.ယပာ်တဒၢယသးလၢနပူၤလီၤ. 10 ဒ်သိးယကမၤတၢ်လၢအဘၣ်နသးဒီး,သိၣ်လိယၤတက့ၢ်.အဂ့ၢ်ဒ်အံၤ,နမ့ၢ်ယကစၢ်လီၤ.မ်နသးလၢအဂ့ၤန့ၣ်ဆှၢယၤဆူကီၢ်အတီအလိၤတက့ၢ်.

11 ယွၤဧၢ,မၤမူထီၣ်က့ၤယၤလၢနမံၤအဃိန့ၣ်တက့ၢ်.လၢနတၢ်တီတၢ်လိၤအဃိန့ၣ်မၤပူၤမၤဖျဲးယသးလၢတၢ်ကိၢ်တၢ်ဂီၤတက့ၢ်. 12 ဒီးမ့ၢ်နဘျုးနဖှိၣ်ဒီး,ဒီၣ်တဲာ်ကွံာ်ယဒုၣ်ယဒါ,ဒီးမၤဟးဂီၤကယဲၢ်ပှၤလၢအမၤအၢယသးခဲလၢာ်တက့ၢ်.အဂ့ၢ်ဒ်အံၤ,ယမ့ၢ်နခ့နပှၤလီၤ.