Psalms 27
လၢစီၤဒၤဝံး.
1ယွၤမ့ၢ်ယတၢ်ကပီၤ,ဒီးတၢ်အုၣ်က့ၤခီၣ်က့ၤယၤလီၤ,ယကပျံၤမတၤတဂၤလဲၣ်.ယွၤမ့ၢ်ယသးသမူအဂံၢ်အဘါလီၤ,ယကပျံၤမတၤတဂၤလဲၣ်. 2တုၤပှၤတတီတလိၤဟဲသဂၢၢ်ယၤ,ဒ်သိးအကအီၣ်ကွံာ်ယဖံးယညၣ်ဒီး,(ပှၤမၤကိၢ်မၤဂီၤယၤ,ယဒုၣ်ယဒါတဖၣ်),အခီၣ်ဘၣ်တိၢ်ဒီးလီၤဃံၤဝဲလီၤ. 3ပှၤသုးမုၢ်တဖုမ့ၢ်သူၣ်ဒဲထီဒါယၤဘၣ်ဆၣ်ဒီး,ယသးတပျံၤဘၣ်.တၢ်ဒုးတၢ်ယၤမ့ၢ်ဂဲၤဆၢထၢၣ်ထီဒါယၤနာ်သက့ဒီး,လၢတၢ်အံၤအပူၤဒၣ်လဲာ်,ယသးတဟးဂီၤဘၣ်. 4ယဃ့တ့ၢ်တၢ်တမံၤလၢယွၤလီၤ.တၢ်န့ၣ်တမံၤယကဃု,ဒ်သိးယကအိၣ်ကဆိးလၢယွၤအဟံၣ်ပူၤတစိၤဒၣ်ယၤ,လၢယကကွၢ်တၢ်ဃံတၢ်လၤဘၣ်ဃးဒီးယွၤ,ဒီးသံကွၢ်တၢ်လၢအနူၢ်ပူၤလီၤ. 5အဂ့ၢ်ဒ်အံၤ,လၢမုၢ်နံၤမုၢ်နၤအအၢအသီန့ၣ်ကမၤဘံၣ်ယၤလၢအတကူးပူၤ,ပာ်ခူသူၣ်ယၤလၢအလီၢ်ခူသူၣ်လၢအဒဲပူၤလီၤ.ကပာ်ထီၣ်ထီယၤလၢလၢၢ်တဖျၢၣ်အဖီခိၣ်လီၤ. 6ဒီးခဲကနံၣ်အံၤ,ယခိၣ်ကအိၣ်ထီၣ်ထီလၢယဒုၣ်ယဒါဝးတရံးယၤအဖီခိၣ်,ဒီးယကလုၢ်တၢ်သူၣ်ဖှံသးညီအတၢ်လုၢ်လၢအဒဲပူၤ,ယကအုၣ်တၢ်,ဒီးယကသးဝံၣ်ယွၤလီၤ. 7တုၤယကိးထီၣ်လၢယကလုၢ်ဒီးယကနၣ်တက့ၢ်,ယွၤဧၢ,ဒီးသးကညီၤယၤ,ဒီးစံးဆၢယၤတက့ၢ်. 8တုၤနစံး,ဃုယမဲာ်တက့ၢ်ဒီး,ယသးစံးဘၣ်နၤ,နမဲာ်န့ၣ်ယွၤဧၢ,ယကဃုလီၤ. 9ပာ်တဒၢနမဲာ်လၢယၤတဂ့ၤ,ဟီထီၣ်ကွံာ်နခ့နပှၤလၢနသးထီၣ်တဂ့ၤ.နမ့ၢ်တ့ၢ်တၢ်မၤစၢၤယၤလီၤ.စူးကွံာ်ညိကွံာ်ဒီးလဲၤသဒၣ်ယၤတဂ့ၤ,တၢ်အုၣ်က့ၤခီၣ်က့ၤယၤအကစၢ်ဧၢ. 10တုၤယမိၢ်ဒီးယပၢ်လဲၤသဒၣ်ယၤဒီးယွၤကဟံးန့ၢ်ထီၣ်ယၤလီၤ. 11ယွၤဧၢ,ဒုးနဲၣ်ယၤလၢနကျဲ,ဒီးဆှၢယၤလၢကျဲလိၤတဘိအပူၤလၢယဒုၣ်ယဒါအဃိန့ၣ်တက့ၢ်. 12ဟ့ၣ်လီၤကွံာ်ယၤဖဲယဒုၣ်ယဒါအသးတဂ့ၤ.အဂ့ၢ်ဒ်အံၤ,ပှၤအုၣ်အသးလၢတၢ်ကဘျံးကဘျၣ်,ဒီးသါထီၣ်တၢ်မၤအၢတဖၣ်န့ၣ်ဂဲၤဆၢထၢၣ်ထီဒါလံယၤလံ. 13ယမ့ၢ်တနာ်ဘၣ်လၢယကထံၣ်ဘၣ်ယွၤအတၢ်ဂ့ၤလၢတၢ်မူအကီၢ်ပူၤဒီး,ယအိၣ်တကဲဘၣ်. 14မုၢ်လၢ်တၢ်လၢယွၤတက့ၢ်.ပာ်ဆူၣ်နဂံၢ်နဘါတက့ၢ်.ဒီးမ်အဒုးဆူၣ်ထီၣ်နသးအဂံၢ်အဘါတက့ၢ်.ဒီးမုၢ်လၢ်တၢ်လၢယွၤတက့ၢ်.
Copyright information for
KswSKMB