Psalms 44
တၢ်အခိၣ်အဂီၢ်လၢစီၤကိးရးအဖိအသိၣ်တၢ်.
1ယွၤဧၢ,ပနၢ်ဟူလံလၢပနၢ်,ပပၢ်တဖၣ်စံၣ်တဲၤတဲလီၤပှၤလၢတၢ်မၤလၢနမၤလၢအဝဲသ့ၣ်အမုၢ်နံၤတဖၣ်န့ၣ်လၢပျၢၤလီၤ. 2နဟီထီၣ်ကွံာ်ပှၤကလုာ်တဖၣ်လၢနစု,ဒီးနသူၣ်လီၤဖျးလီၤအီၤနမၤဟးဂီၤပှၤဂီၢ်မုၢ်ဒီးမၤပြံပြါအီၤလီၤ. 3အဂ့ၢ်ဒ်အံၤ,တမ့ၢ်ဘၣ်အမၤန့ၢ်ကီၢ်န့ၣ်လၢအနးဒၣ်ဝဲဘၣ်,ဒီးတမ့ၢ်ဘၣ်အစုဒၣ်ဝဲအုၣ်က့ၤခီၣ်က့ၤအီၤဘၣ်.မ့ၢ်နစုထွဲဒီးနစုဒုၣ်ဒၣ်နဲ,ဒီးနမဲာ်အတၢ်ကပီၤလီၤ.အဂ့ၢ်ဒ်အံၤ,ဘၣ်နသးလၢအီၤလီၤ. 4နဲဒၣ်အံၤ,နမ့ၢ်ယစီၤပၤ,ယွၤဧၢ,မၤလိာ်တၢ်အုၣ်က့ၤခီၣ်က့ၤလၢစီၤယၤကိာ်အဂီၢ်တက့ၢ်. 5ပကဆီၣ်လီၤပဒုၣ်ပဒါလၢနၤ,ပကယီၢ်တံၢ်ပှၤလၢအဂဲၤဆၢထၢၣ်ထီဒါပှၤလၢနမံၤလီၤ. 6အဂ့ၢ်ဒ်အံၤ,ယတသန့ၤဘၣ်ယသးလၢယချံၣ်ဘၣ်,ဒီးယနးတအုၣ်က့ၤခီၣ်က့ၤယၤဘၣ်. 7မ့မ့ၢ်နအုၣ်က့ၤခီၣ်က့ၤပှၤလၢပဒုၣ်ပဒါအပူၤ,ဒီးပှၤလၢအသးဟ့နၤန့ၣ်နဒုးမဲာ်ဆှးအီၤလီၤ. 8ပပာ်ကဖၢလၢပသးသ့သ့တနံၤလၢယွၤအပူၤ,ဒီးကစံးထီၣ်ပတြၢၤနမံၤလီၤထူလီၤယိာ်လီၤ.စ့လၤ.
9မ့မ့ၢ်ခဲအံၤနညိကွံာ်ပှၤ,ဒီးဒုးမဲာ်ဆှးပှၤ,ဒီးနတလဲၤထီၣ်ဘၣ်ဒီးပသုးမုၢ်ဘၣ်. 10နဒုးဃၣ်ကဒါက့ၤပှၤလၢပဒုၣ်ပဒါအမဲာ်ညါ,ဒီးပှၤလၢအသးဟ့ပှၤတဖၣ်န့ၣ်ဂုာ်န့ၢ်တၢ်လၢအဂီၢ်ဒၣ်ဝဲလီၤ. 11နပာ်ပှၤဒ်သိတဖၣ်လၢတၢ်အီၣ်အဂီၢ်အသိးန့ၣ်ဒီးနမၤလီၤပြံလီၤပြါပှၤလၢပှၤကလုာ်တဖၣ်အကျါလီၤ. 12နဆါကွံာ်နပှၤဂီၢ်မုၢ်လၢတၢ်လၢအတမ့ၢ်ဘၣ်တၢ်ဘၣ်အဂီၢ်,ဒီးနတၢ်တအါထီၣ်ဘၣ်လၢအပှ့ၤဘၣ်. 13နပာ်ပှၤလၢတၢ်ဒုၣ်ဒွဲၣ်အလီၢ်လၢပှၤအိၣ်လၢပဃၢၤအဂီၢ်,တၢ်ကတိၤဒိအလီၢ်,ဒီးတၢ်နံၤဘၣ်ဖၣ်လဲအလီၢ်လၢပှၤလၢအအိၣ်ဝးတရံးပှၤအဂီၢ်လီၤ. 14နပာ်ပှၤလၢတၢ်ကတိၤဒိလၢပှၤကလုာ်တဖၣ်အကျါ,တၢ်ကျၢၢ်ကျာ်အခိၣ်အလီၢ်လၢပှၤဂီၢ်မုၢ်အကျါလီၤ. 15ယတၢ်မဲာ်ဆှးအိၣ်ဝဲလၢယမဲာ်ညါကိးမုၢ်နံၤမုၢ်နၤဒဲး,ဒီးယမဲာ်ဆှးလုၣ်ဘၢယၤ, 16လၢပှၤလၢအဒုၣ်ဒွဲၣ်တၢ်ဒီးပယွဲပရးတၢ်အကလုၢ်အဃိ,လၢတၢ်အဒုၣ်အဒါယဒီးပှၤမၤဆၢတၢ်အၢအဃိန့ၣ်လီၤ. 17ကယဲၢ်တၢ်ခဲလၢာ်န့ၣ်ဘၣ်ပှၤ,ဒီးပတသးပ့ၤနီၣ်ဘၣ်နၤဘၣ်,ဒီးပတမၤနတၢ်အၢၣ်လီၤအီလီၤဒီးတၢ်လီတၢ်ဝ့ၤဘၣ်. 18ပသးတဂုၤက့ၤအခံဘၣ်,ဒီးပထွဲတၢ်တလဲၤကပၤလၢနကျဲဘၣ်. 19မ့ၢ်နာ်သက့ဒ်န့ၣ်ဒီးနမၤလီၤကလဲပှၤလၢထွံၣ်ဟီၣ်ခိၣ်အလီၢ်ပူၤ,ဒီးလုၣ်ဘၢပှၤဒီးတၢ်သံအကဒုလီၤ. 20ပမ့ၢ်သးပ့ၤနီၣ်ပကစၢ်အမံၤ,ဒီးယူာ်ထီၣ်ပစုဆူတခီဘီမုၢ်ဖိအကစၢ်ဒီး, 21ကစၢ်ကဃုန့ၢ်အဝဲန့ၣ်တမ့ၢ်ဘၣ်ဧါ.အဂ့ၢ်ဒ်အံၤ,သ့ၣ်ညါဝဲလၢပသးအတၢ်ခူသူၣ်တဖၣ်န့ၣ်လီၤ. 22အဂ့ၢ်ဒ်အံၤ,ပဘၣ်တၢ်မၤသံပှၤသ့သ့တနံၤလၢနဃိ,တၢ်ပာ်ပှၤဒ်သိလၢတၢ်ကမၤသံအီၤအသိးန့ၣ်လီၤ. 23ဖုသံနီၣ်တက့ၢ်,ဘၣ်မနုၤလၢနမံလဲၣ်,ယွၤဧၢ,ဂဲၤဆၢထၢၣ်တက့ၢ်,ညိကွံာ်ပှၤလီၤထူလီၤယိာ်တဂ့ၤ. 24ဘၣ်မနုၤလၢနပာ်တဒၢနမဲာ်,ဒီးသးပ့ၤနီၣ်ပတၢ်နးတၢ်ဖှီၣ်,ဒီးတၢ်မၤအၢပှၤန့ၣ်လဲၣ်. 25အဂ့ၢ်ဒ်အံၤ,ပသးသကူးဝဲတုၤလီၤလၢဟီၣ်ခိၣ်အကမူၣ်လီၤ.ပဟၢဖၢစဲဘူးဒီးဟီၣ်ခိၣ်လီၤ. 26ဂဲၤဆၢထၢၣ်မၤစၢၤပှၤ,ဒီးပှ့ၤက့ၤပှၤလၢနဘျုးနဖှိၣ်အဃိတက့ၢ်.
Copyright information for
KswSKMB