Rev 11 | KswSKMB | STEP | ဒီးတၢ်ဟ့ၣ်လီၤယၤလၢတပိၢ်တဘိလီၤဂာ်လၢနီၣ်ထိးဘိ,ဒီးစံးဝဲဒၣ်,ဂဲၤဆၢထၢၣ်,ဒီးထိၣ်ယွၤအတၢ်လုၢ်ဟံၣ်,ဒီးတၢ်လုၢ်လီၢ်,ဒီးပှၤဘါတၢ်လၢအပူၤတက့ၢ်.

‏ Revelation of John 11

1 ဒီးတၢ်ဟ့ၣ်လီၤယၤလၢတပိၢ်တဘိလီၤဂာ်လၢနီၣ်ထိးဘိ,ဒီးစံးဝဲဒၣ်,ဂဲၤဆၢထၢၣ်,ဒီးထိၣ်ယွၤအတၢ်လုၢ်ဟံၣ်,ဒီးတၢ်လုၢ်လီၢ်,ဒီးပှၤဘါတၢ်လၢအပူၤတက့ၢ်. 2 ဒီးဂၢၤအိၣ်လၢတၢ်လုၢ်ဟံၣ်လၢခိန့ၣ်ပာ်ကွံာ်,ဒီးထိၣ်အီၤတဂ့ၤ.အဂ့ၢ်ဒ်အံၤ,တၢ်ဟ့ၣ်လီၤအီၤလၢပှၤကလုာ်တဖၣ်အစုပူၤ,ဒီးကယီၢ်တံၢ်ဝ့ၢ်စီဆှံန့ၣ်လွံၢ်ဆံခံလါလီၤ. 3 ဒီးယကဟ့ၣ်လီၤ(တၢ်စိတၢ်ကမီၤ)လၢယပှၤအုၣ်အသးခံဂၤန့ၣ်,ဒီးအဝဲသ့ၣ်ကူဒီးထၢၣ်တၢ်ကံးညာ်န့ၣ်ဒီး,ကကတိၤတၢ်လၢဝံအကျိာ်တကထိခံကယၤဃုဆံသီလီၤ. 4 အဝဲသ့ၣ်မ့ၢ်သ့ၣ်စၤယံးခံထံး,ဒီးမ့ၣ်အူဒၢခံဖျၢၣ်,လၢအဆၢထၢၣ်ဝဲလၢဟီၣ်ခိၣ်အကစၢ်တဂၤအမဲာ်ညါလီၤ. 5 ဒီးပှၤမ့ၢ်သါကမၤအၢအီၤတဂၤဂၤဒီး,မ့ၣ်အူဟဲထီၣ်လၢအဝဲသ့ၣ်အကိာ်ပူၤ,ဒီးအီၣ်ကွံာ်အဒုၣ်အဒါလီၤ.ဒီးပှၤမ့ၢ်သါကမၤအၢအီၤတဂၤဂၤဒီး,ကဘၣ်တၢ်မၤသံကွံာ်အီၤဒ်န့ၣ်အသိးလီၤ.

6 အဝဲသ့ၣ်အိၣ်ဒီးအစီအကမီၤလၢအကကးတံာ်ဃာ်မူခိၣ်ဒ်သိးတၢ်သုတဟဲစူၤတဂ့ၤ,ဖဲအမုၢ်နံၤလၢအကတိၤတၢ်လၢဝံအကျိာ်အဖၢမုၢ်လီၤ.ဒီးအိၣ်ဒီးအစိအကမီၤလၢထံအဖီခိၣ်,ဒ်သိးအကမၤထံကဲထီၣ်တၢ်သွံၣ်,ဒီးဒ်သိးအကကျီဟီၣ်ခိၣ်လၢတၢ်နးတၢ်ဖှီၣ်ထီရီၤတမံၤအဘျီအဘျီဖဲဒၣ်အသးလီၤ.

7 ဒီးအုၣ်အသးတုၤအလၢာ်ဝံၤဒီး,တၢ်ဒူတၢ်ဃိၤလၢအဟဲထီၣ်လၢတၢ်ယိာ်အပူၤတဒုန့ၣ်,ကဒုးတၢ်ဒီးအီၤ,ဒီးကမၤနၢၤအီၤ,ဒီးကမၤသံအီၤလီၤ. 8 ဒီးအစိၣ်ကအိၣ်လၢဝ့ၢ်ဖးဒိၣ်အကျဲလၢပှၤကိးဝဲအမံၤလၢသးအကျိာ်,လၢစဒိၣ်,ဒီးအဲၤကူပတူးန့ၣ်,ဖဲအဝဲသ့ၣ်အကစၢ်တဂၤဒိးသံအသးလၢထူၣ်စုညါအလိၤလီၤ. 9 ဒီးပှၤလၢပှၤဂီၢ်မုၢ်အကျါ,ဒီးပှၤအဒူၣ်,ဒီးပှၤကတိၤတၢ်အကျိာ်,ဒီးလၢပှၤကလုာ်ကလုာ်အကျါန့ၣ်,ကကွၢ်အစိၣ်သၢသီဒီးဖးဖီသီ,ဒီးတဒုးခူၣ်လီၤကွံာ်ဘၣ်အီၤလၢသွၣ်ခိၣ်ပူၤဘၣ်. 10 ဒီးပှၤလၢအအိၣ်ဝဲဆိးဝဲလၢဟီၣ်ခိၣ်ချၢကသူၣ်ခုသးခု,ဒီးကမုာ်လၤဝဲ,ဒီးကဟ့ၣ်လိာ်အသးလၢခိၣ်ဖးကဒဲကဒဲလီၤ.အဂ့ၢ်ဒ်အံၤ,ဝံခံဂၤန့ၣ်,မၤနးမၤဖှီၣ်ပှၤအိၣ်ဝဲဆိးဝဲလၢဟီၣ်ခိၣ်ချၢလီၤ.

11 ဒီးသၢသီဒီးဖးဖီသီပူၤကွံာ်ဒီး,သးသမူလၢယွၤဟဲနုာ်လၢအပူၤဒီး,ဆၢထၢၣ်လၢအခီၣ်,ဒီးပှၤလၢအထံၣ်အီၤတဖၣ်ဘၣ်ပျံၤဘၣ်ဖုးဒိၣ်မးလီၤ. 12 ဒီးအဝဲသ့ၣ်နၢ်ဟူတၢ်အကလုၢ်သီၣ်ဖးဒိၣ်လၢမူခိၣ်ဒီးစံးဘၣ်အီၤ,ဟဲက့ၤထီၣ်ဖဲအံၤတက့ၢ်.ဒီးအဝဲသ့ၣ်လဲၤထီၣ်ဆူမူခိၣ်လၢတၢ်အၢၣ်အလိၤ,ဒီးအဒုၣ်အဒါထံၣ်အီၤလီၤ.

13 ဒီးတၢ်လၢနၣ်ရံၣ်အဝဲန့ၣ်အပူၤ,ဟီၣ်ခိၣ်ဟူးဝးဖးဒိၣ်လီၤ.ဒီးဝ့ၢ်ဆံဆဲၣ်ပူတပူလီၤပှီၢ်ကွံာ်,ဒီးပှၤအမံၤနွံကထိ,သံလၢဟီၣ်ခိၣ်ဟူးဝးအပူၤလီၤ.ဒီးပှၤအိၣ်လီၤတဲာ်တဖၣ်ပျံၤတၢ်,ဒီးစံးထီၣ်ပတြၢၤမူခိၣ်အယွၤလီၤ.

14 တၢ်နးတၢ်ဖှီၣ်လၢအပှဲၤထီၣ်ခံမံၤတမံၤန့ၣ်ပူၤကွံာ်လံ.ကွၢ်ကွၢ်,တၢ်နးတၢ်ဖှီၣ်လၢအပှဲၤထီၣ်သၢမံၤတမံၤ,ကဟဲချ့ချ့လီၤ.

15 ဒီးကလူးလၢအပှဲၤထီၣ်နွံဂၤတဂၤန့ၣ်အူထီၣ်ကွဲၤ,ဒီးတၢ်ကလုၢ်သီၣ်ဖးဒိၣ်တဖၣ်အိၣ်ဝဲလၢမူခိၣ်,ဒီးစံးဝဲဒၣ်,ဟီၣ်ခိၣ်အဘီအမုၢ်ကဲထီၣ်လၢပကစၢ်အတၢ်,ဒီးအခရံာ်အတၢ်,ဒီးကပၢဝဲလီၤထူလီၤယိာ်လီၤ. 16 ဒီးပှၤသူၣ်က့သးပှၢ်လၢအဆ့ၣ်နီၤလၢအလီၢ်ပစိာ်လၢယွၤအမဲာ်ညါခံဆံလွံၢ်ဂၤန့ၣ်,ထိၣ်လီၤပှီၤအသးဒီးဘူၣ်ထီၣ်ဘါထီၣ်ယွၤ, 17 ဒီးစံးဝဲဒၣ်,သ့တၢ်လၢာ်လၢအအိၣ်,ဒီးလၢအအိၣ်တ့ၢ်,ကစၢ်ယွၤဧၢ,ပစံးထီၣ်ပတြၢၤနဘျုးနဖှိၣ်လီၤ.အဂ့ၢ်ဒ်အံၤ,နဟံးန့ၢ်နစိဒိၣ်နကမီၤဒိၣ်,ဒီးနပၢတၢ်လီၤ. 18 ဒီးပှၤကလုာ်ကလုာ်အသးဒိၣ်ထီၣ်,ဒီးနတၢ်သးဒိၣ်ဟဲဝဲ,ဒီးပှၤသံတဖၣ်အဆၢအကတီၢ်ဘၣ်,ဒ်သိးအကဘၣ်တၢ်စံၣ်ညီၣ်အီၤ,ဒီးဒ်သိးတၢ်ကဟ့ၣ်လီၤအဘူးအလဲလၢနခ့နပှၤဝံတဖၣ်,ဒီးလၢပှၤစီဆှံတဖၣ်,ဒီးလၢပှၤလၢအပျံၤနမံၤဒီးဒိၣ်ဒီးဆံးတဖၣ်,ဒီးဒ်သိးအကမၤဟးဂီၤပှၤလၢအမၤဟးဂီၤဟီၣ်ခိၣ်န့ၣ်လီၤ.

19 ဒီးယွၤအတၢ်လုၢ်ဟံၣ်အိးထီၣ်အသးလၢမူခိၣ်,ဒီးတၢ်အၢၣ်လီၤအီလီၤအတလါအိၣ်ဖျါထီၣ်လၢတၢ်လုၢ်ဟံၣ်ပူၤ,ဒီးလီဝၢ်အဒံးတဖၣ်,ဒီးတၢ်ကလုၢ်သီၣ်တဖၣ်,ဒီးလီသီၣ်တဖၣ်,ဒီးဟီၣ်ခိၣ်ဟူးဝး,ဒီးတၢ်ဟဲစူၤလီၤသူၣ်အဖျၢၣ်ဖးဒိၣ်အိၣ်ဝဲလီၤ.