Rev 21 | KswSKMB | STEP | ဒီးယထံၣ်မူခိၣ်အသီ,ဒီးဟီၣ်ခိၣ်အသီလီၤ.အဂ့ၢ်ဒ်အံၤ,မူခိၣ်လၢအခီၣ်ထံး,ဒီးဟီၣ်ခိၣ်လၢအခီၣ်ထံးန့ၣ်,ပူၤကွံာ်လီၤ.ဒီးပီၣ်လဲၣ်တအိၣ်လၢၤဘၣ်.

‏ Revelation of John 21

1 ဒီးယထံၣ်မူခိၣ်အသီ,ဒီးဟီၣ်ခိၣ်အသီလီၤ.အဂ့ၢ်ဒ်အံၤ,မူခိၣ်လၢအခီၣ်ထံး,ဒီးဟီၣ်ခိၣ်လၢအခီၣ်ထံးန့ၣ်,ပူၤကွံာ်လီၤ.ဒီးပီၣ်လဲၣ်တအိၣ်လၢၤဘၣ်.

2 ဒီးယထံၣ်ဝ့ၢ်စီဆှံ,ယရူၤၡလ့ၣ်အသီ,အိၣ်ကတဲာ်ကတီၤအသးဒ်တလးမူးပိာ်မုၣ်ကယၢကယဲအသးလၢအဝၤအဂီၢ်အသိးန့ၣ်,ဟဲလီၤလၢယွၤအအိၣ်လၢမူခိၣ်လီၤ. 3 ဒီးယနၢ်ဟူတၢ်ကလုၢ်သီၣ်ဖးဒိၣ်လၢမူခိၣ်စံးဝဲဒၣ်,ကွၢ်ကွၢ်,ယွၤအဒဲအိၣ်ဒီးပှၤကညီ,ဒီးကစၢ်ကအိၣ်ဝဲဆိးဝဲဒီးအီၤ,ဒီးအဝဲသ့ၣ်ကမ့ၢ်အပှၤဂီၢ်မုၢ်,ဒီးယွၤအကစၢ်ဒၣ်ဝဲကအိၣ်ဒီးအီၤ,ဒီးကကဲထီၣ်အကစၢ်လီၤ. 4 ဒီးယွၤကထွါကွံာ်အမဲာ်ထံခဲလၢာ်လၢအမဲာ်, ^{▼▼21:4 ၡါ.၂၅း၈}ဒီးတၢ်သံတအိၣ်လၢၤဘၣ်,ဒီးတၢ်သူၣ်အုးသးအုးတအိၣ်လၢၤဘၣ်,ဒီးတၢ်ဟီၣ်တၢ်ယၢၤတအိၣ်လၢၤဘၣ်,ဒီးတၢ်ဘှံးသူၣ်ဘှံးသးတအိၣ်လၢၤဘၣ်.အဂ့ၢ်ဒ်အံၤ,တၢ်အိၣ်လၢအခီၣ်ထံးတဖၣ်ပူၤကွံာ်လံ. 5 ဒီးပှၤဆ့ၣ်နီၤလၢလီၢ်ပစိာ်အဖီခိၣ်တဂၤန့ၣ်စံးဝဲဒၣ်,ကွၢ်ကွၢ်,ယမၤတၢ်အသီခဲလၢာ်လီၤ.ဒီးစံးဘၣ်ယၤ,ကွဲးတၢ်တက့ၢ်.အဂ့ၢ်ဒ်အံၤ,တၢ်ကတိၤအံၤမ့ၢ်အမ့ၢ်အတီ,ဒီးအကလုၢ်တီလီၤ.

6 ဒီးစံးဘၣ်ယၤ,တၢ်မၤလံအသးလံ.ယမ့ၢ်က,ဒီးဧ,အခိၣ်ထံးဒီးအကတၢၢ်လီၤ.ပှၤလၢတၢ်သူအသးလၢထံ,ယကဟ့ၣ်ကလီအီၤလၢထံမူထီၣ်ပၢၢ်န့ၣ်လီၤ. 7 ပှၤလၢအမၤနၢၤတၢ်န့ၣ်,ကန့ၢ်ဘၣ်သါတၢ်တဖၣ်အံၤ,ဒီးယကမ့ၢ်အကစၢ်,ဒီးအဝဲဒၣ်ကမ့ၢ်ယဖိခွါလီၤ. 8 မ့မ့ၢ်ပှၤပျံၤတၢ်,ဒီးပှၤတနာ်ဘၣ်တၢ်ဘၣ်,ဒီးပှၤမၤတၢ်သးဘၣ်အၢဒီးပှၤမၤသံပှၤကညီ,ဒီးပှၤမၤကမၣ်မုၣ်ကမၣ်ခွါ,ဒီးပှၤဟိၣ်တၢ်ယီတၢ်,ဒီးပှၤဘါတၢ်ဂီၤ,ဒီးကယဲၢ်ပှၤလၢအကတိၤတၢ်ကဘျံးကဘျၣ်တဖၣ်န့ၣ်,ကန့ၢ်ဘၣ်အဂီၢ်လၢနိၣ်မ့ၣ်အူဒီးကးအီၣ်တၢ်အပူၤလီၤ.အဝဲန့ၣ်မ့ၢ်တၢ်သံပှဲၤထီၣ်ခံစုတစုလီၤ. 9 ဒီးကလူးအိၣ်ဝဲလၢနွံဂၤအကျါ,လၢအအိၣ်ဒီးလီခီနွံဖျၢၣ်ပှဲၤဝဲဒီးတၢ်နးတၢ်ဖှီၣ်အကတၢၢ်နွံမံၤတဂၤဟဲဝဲ,ဒီးကတိၤတၢ်ဒီးယၤ,ဒီးစံးဝဲဒၣ်,ဟဲဃီၤတက့ၢ်.ယကဒုးနဲၣ်နၤလၢတလးမူးပိာ်မုၣ်,သိဖိအမါန့ၣ်လီၤ. 10 ဒီးစိာ်ထီၣ်ယၤလၢသးအပူၤ,ဆူကစၢၢ်ဖးဒိၣ်ဖးထီအလိၤ,ဒီးဒုးနဲၣ်ယၤလၢဝ့ၢ်စီဆှံယရူၤၡလ့ၣ်,ဟဲလီၤလၢယွၤအအိၣ်လၢမူခိၣ်, 11 အိၣ်ဝဲဒီးယွၤအလၤအကပီၤ,ဒီးအတၢ်ကပီၤလီၤဂာ်လၢတၢ်မျၢ်လၢအလုၢ်ဒိၣ်ပှ့ၤဒိၣ်ကတၢၢ်,မၤသးဒ်နကၤသွဲး,ဒ်တၢ်မျၢ်လၢအဆှံဝဲဒ်လၢၢ်ဖျါကလၤအသိးန့ၣ်လီၤ. 12 ဒီးအိၣ်ဒီးအခိၣ်ဒူဖးဒိၣ်,ဒီးဖးထီ,ဒီးအတြဲၤတဆံခံဘ့ၣ်,ဒီးကလူးတဆံခံဂၤအိၣ်လၢတြဲၤအခီၣ်ထံး,ဒီးတၢ်အမံၤကွဲးအသးလၢအလိၤလၢအမ့ၢ်ပှၤအံၣ်စရ့လးဖိတဆံခံဒူၣ်အမံၤလီၤ. 13 ဒီးတြဲၤအိၣ်လၢမုၢ်ထီၣ်တခီသၢဘ့ၣ်,ဒီးတြဲၤအိၣ်လၢကလံၤစိးတခီသၢဘ့ၣ်,ဒီးတြဲၤအိၣ်လၢကလံၤထံးတခီသၢဘ့ၣ်,ဒီးတြဲၤအိၣ်လၢမုၢ်နုာ်တခီသၢဘ့ၣ်လီၤ. 14 ဒီးဝ့ၢ်အခိၣ်ဒူန့ၣ်,အိၣ်ဒီးအခီၣ်ထံးတဆံခံတီၤ,ဒီးသိဖိအပှၤတၢ်မၢဖိတဆံခံဂၤအမံၤအိၣ်လၢအလိၤလီၤ.

15 ဒီးပှၤလၢအကတိၤတၢ်ဒီးယၤ,အိၣ်ဒီးနီၣ်ထိၣ်ထူတဘိဒ်သိးအကထိၣ်ဝ့ၢ်,ဒီးအတြဲၤ,ဒီးအခိၣ်ဒူလီၤ. 16 ဒီးဝ့ၢ်အိၣ်လွံၢ်ခီ,ဒီးအထီ,ဒီးအဒီၣ်ဃီၤန့ၣ်,အိၣ်ဝဲတုၤသိးသိးလီၤ.ဒီးထိၣ်ဝ့ၢ်လၢနီၣ်ထိၣ်ဘိ,ဒီးအထီ,ဒီးအဒီၣ်ဃီၤ,ဒီးအကစီၤထီၣ်မ့ၢ်စတၤဒံအူၢ်တကလးခံကထိဒ်သိးသိးလီၤ.

17 ဒီးထိၣ်ဝဲလၢအခိၣ်ဒူ,ဒီးမ့ၢ်အပျၢ်တကယၤလွံၢ်ဆံလွံၢ်ပျၢ်လီၤ.အပျၢ်မ့ၢ်ပှၤကညီအပျၢ်,ဒ်ပစံးတၢ်အသိး,ကလူးန့ၣ်အပျၢ်လီၤ. 18 ဒီးအခိၣ်ဒူန့ၣ်သူၣ်ထီၣ်ဝဲလၢတၢ်မျၢ်နကၤသွဲး,ဒီးဝ့ၢ်န့ၣ်မ့ၢ်ထူအစီ,လီၤဂာ်လၢယွၤခၣ်စိးဆှံဝဲအသိးလီၤ. 19 ဒီးဝ့ၢ်ခိၣ်ဒူအခီၣ်ထံးတဖၣ်,အိၣ်ကယၢအသးလၢတၢ်မျၢ်အကလုာ်ကလုာ်လီၤ.အခီၣ်ထံးဆိတတီၤန့ၣ်မ့ၢ်တၢ်မျၢ်နကၤသွဲး,ခံတီၤတတီၤမ့ၢ်တၢ်မျၢ်နံၤလါ,သၢတီၤတတီၤမ့ၢ်မဟူယၤဝါ,လွံၢ်တီၤတတီၤမ့ၢ်တၢ်မျၢ်မၠး, 20 ယဲၢ်တီၤတတီၤမ့ၢ်မဟူယၤတိၤအသး,ဃုတီၤတတီၤမ့ၢ်မဟူယၤဂီၤ,နွံတီၤတတီၤမ့ၢ်တၢ်မျၢ်ဘီလါဃိးတီၤတတီၤမ့ၢ်တၢ်မျၢ်လါဟ့,ခွံတီၤတတီၤမ့ၢ်တၢ်မျၢ်ဘီအူးသပးယၢ်,တဆံတီၤတတီၤမ့ၢ်တၢ်မျၢ်ဘီဟ့,တဆံတၢတီၤတတီၤမ့ၢ်တၢ်မျၢ်လါဂီၤ,တဆံခံတီၤတတီၤမ့ၢ်တၢ်မျၢ်သကီၤဖီလီၤ. 21 ဒီးတြဲၤတဆံခံဘ့ၣ်န့ၣ်,မ့ၢ်တၢ်မျၢ်ပလဲတဆံခံဘ့ၣ်လီၤ.တြဲၤတဘ့ၣ်တၢ်မျၢ်ပလဲတဘ့ၣ်,တြဲၤတဘ့ၣ်တၢ်မျၢ်ပလဲတဘ့ၣ်လီၤ.ဒီးဝ့ၢ်အကျဲန့ၣ်,မ့ၢ်ထူအစီ,ဒ်ယွၤခၣ်စိးဖျါကလၤအသိးန့ၣ်လီၤ.

22 ဒီးယတထံၣ်ဘၣ်တၢ်လုၢ်ဟံၣ်လၢအပူၤဘၣ်.အဂ့ၢ်ဒ်အံၤ,ကစၢ်ယွၤလၢအသ့တၢ်လၢာ်,ဒီးသိဖိန့ၣ်,မ့ၢ်အတၢ်လုၢ်ဟံၣ်လီၤ.

23 ဒီးမုၢ်မ့ၢ်ဂ့ၤ,လါမ့ၢ်ဂ့ၤ,ကပီၤထီၣ်လၢဝ့ၢ်ပူၤအလီၢ်တအိၣ်ဘၣ်.အဂ့ၢ်ဒ်အံၤ,ယွၤအလၤအကပီၤန့ၣ်,ကပီၤထီၣ်န့ၢ်အီၤ,ဒီးအမ့ၣ်အူဒၢန့ၣ်မ့ၢ်သိဖိလီၤ. 24 ဒီးပှၤကလုာ်တဖၣ်ကလဲၤတၢ်လၢအတၢ်ကပီၤအကျါ,ဒီးဟီၣ်ခိၣ်အစီၤပၤတဖၣ်ဟဲစိာ်အလၤကပီၤဆူအပူၤလီၤ. 25 ဒီးတြဲၤတကးတံာ်ဃာ်ဘၣ်အသးလၢမုၢ်ဆါခီဘၣ်.အဂ့ၢ်ဒ်အံၤ,ဖဲန့ၣ်မုၢ်နၤတအိၣ်ဘၣ်ဝဲဘၣ်. 26 ဒီးကဟဲစိာ်ဝဲပှၤကလုာ်ကလုာ်အလၤကပီၤ,ဒီးအတၢ်ယူးတၢ်ယီၣ်ဆူအပူၤလီၤ. 27 ဒီးတၢ်တကဆှီဘၣ်,ဒီးတၢ်လၢအမၤတၢ်သးဘၣ်အၢဒီးတၢ်ကတိၤကဘျံးကဘျၣ်န့ၣ်,တလဲၤနုာ်ဘၣ်ဝဲနီတမံၤဘၣ်.ကလဲၤနုာ်ထဲပှၤလၢအမံၤကွဲးအသးလၢသိဖိအလံာ်မူအပူၤတဖၣ်ဧိၤန့ၣ်လီၤ.