Rom 1 | KswSKMB | STEP | ယ့ၣ်ရှူးခရံာ်အခ့အပှၤ,ပှၤတၢ်မၢဖိလၢအဘၣ်တၢ်ကိးအီၤ,ဒီးဘၣ်တၢ်နီၤဖးအီၤလၢယွၤအတၢ်သးခုအကစီၣ်အဂီၢ်,

‏ Romans 1

1 ယ့ၣ်ရှူးခရံာ်အခ့အပှၤ,ပှၤတၢ်မၢဖိလၢအဘၣ်တၢ်ကိးအီၤ,ဒီးဘၣ်တၢ်နီၤဖးအီၤလၢယွၤအတၢ်သးခုအကစီၣ်အဂီၢ်, 2 လၢအစံးပာ်ဝဲလၢအဝံတဖၣ်လၢလံာ်စီဆှံအပူၤ, 3 ဘၣ်ဃးဒီးအဖိခွါ,လၢဖဲအဘၣ်ဃးဒီးတၢ်ဖံးတၢ်ညၣ်န့ၣ်အိၣ်ဖျဲၣ်လၢစီၤဒၤဝံးအချံအသၣ်, 4 ဒီးဖဲအဘၣ်ဃးဒီးသးအစီအဆှံန့ၣ်တၢ်ပာ်ဖျါထီၣ်အီၤလၢအမ့ၢ်ယွၤအဖိခွါလၢတၢ်စိတၢ်ကမီၤလၢတၢ်ဂဲၤဆၢထၢၣ်က့ၤလၢတၢ်သံအဃိ,ပကစၢ်ယ့ၣ်ရှူးခရံာ်, 5 လၢပဒိးန့ၢ်တၢ်ဘျုးတၢ်ဖှိၣ်ဒီးတၢ်မၢဖိအလီၢ်လၢအီၤလၢပှၤကလုာ်တဖၣ်ခဲလၢာ်အတၢ်စူၢ်ဘၣ်ဃးဒီးတၢ်နာ်လၢအမံၤအဃိ, 6 လၢသုအိၣ်စ့ၢ်ကီးလၢအဝဲသ့ၣ်အကျါ,ပှၤဘၣ်တၢ်ကိးအီၤလၢယ့ၣ်ရှူးခရံာ်, 7 ယၤစီၤပီလူး,စံးဘၣ်ပှၤခဲလၢာ်,အိၣ်လၢဝ့ၢ်ရိမ့ၤအပူၤ,လၢယွၤအဲၣ်အီၤ,ပှၤစီဆှံလၢအဘၣ်တၢ်ကိးအီၤတဖၣ်,မ်တၢ်ဘျုးတၢ်ဖှိၣ်ဒီးတၢ်ဃူတၢ်ဖိးလၢပပၢ်ယွၤဒီးကစၢ်ယ့ၣ်ရှူးခရံာ်န့ၣ်,ဘၣ်သုဝဲတက့ၢ်.

8 တၢ်အဆိအံၤ,ယစံးထီၣ်ပတြၢၤယကစၢ်ယွၤအဘျုးအဖှိၣ်,လၢယ့ၣ်ရှူးခရံာ်အဃိ,လၢသုဝဲခဲလၢာ်အဂ့ၢ်လီၤ.အဂ့ၢ်ဒ်အံၤ,သုတၢ်နာ်န့ၣ်ဟူထီသါလီၤလၢဟီၣ်ခိၣ်ဒီဘ့ၣ်ညါလီၤ. 9 အဂ့ၢ်ဒ်အံၤ,ယွၤလၢယမၤအတၢ်လၢယသး,လၢအဖိခွါအတၢ်သးခုအကစီၣ်အပူၤတဂၤန့ၣ်,မ့ၢ်တၢ်အုၣ်အသးလၢယဂီၢ်လၢယသ့ၣ်နီၣ်ထီၣ်သုတထံၣ်ဃီ, 10 ဒီးယဃ့လၢယတၢ်ထုကဖၣ်အပူၤတထံၣ်ဃီဒ်သိးမ့ၢ်သ့ဒီး,ခဲကနံၣ်အံၤ,မ့ၢ်ဘၣ်ယွၤအသးဒီး,ယကလဲၤခုၣ်ခုၣ်မုာ်မုာ်ဆူသုအိၣ်လီၤ. 11 အဂ့ၢ်ဒ်အံၤ,တၢ်မိၣ်ထံၣ်ဘၣ်ယသးလၢသု,ဒ်သိးယကဟ့ၣ်သုလၢတၢ်ဘျုးတမံၤမံၤဘၣ်ဃးဒီးသးန့ၣ်ဒ်သိးသုကအိၣ်ဂၢၢ်ဆိးကျၢၤလီၤ. 12 ဒ်ပစံးတၢ်အသိး,တၢ်စူၢ်တၢ်နာ်လၢသုဒီးယၤယၢ်ခီယၢ်ခီသတးဒီး,ယကဘၣ်တၢ်မၤမုာ်ထီၣ်ယသးသကိးဒီးသုလၢသုကျါလီၤ.

13 ဒီးဒီပုၢ်ဝဲၢ်သ့ၣ်ဧၢ,တဘၣ်ဘၣ်ယသးလၢသုတသ့ၣ်ညါဘၣ်လၢယပာ်ယသးအါဘျီလၢယကလဲၤဆူသုအိၣ်,ဒ်သိးယကန့ၢ်ဘၣ်တၤသၣ်တမံၤမံၤလၢသုကျါ,ဒ်လၢပှၤကလုာ်အဂုၤအဂၤတဖၣ်အကျါအသိးန့ၣ်ဘၣ်.ဘၣ်ဆၣ်ဒီး,တၢ်တြီယၤတုၤခဲကနံၣ်အံၤလီၤ. 14 ပှၤဟ့းလ့ၣ်ဖိမ့ၢ်ဂ့ၤ,ပှၤပှၢ်လၢ်ကျါဖိမ့ၢ်ဂ့ၤ,ပှၤကူၣ်တၢ်သ့မ့ၢ်ဂ့ၤ,ပှၤကူၣ်တၢ်တသ့ဘၣ်မ့ၢ်ဂ့ၤ,ယကမၢ်အိၣ်လၢအလိၤလီၤ. 15 မၤသးဒ်န့ၣ်ဒီး,ဖဲယသ့ဒီးယသးအိၣ်လၢယကစံၣ်တဲၤတဲလီၤတၢ်သးခုအကစီၣ်လၢသုဝဲသ့ၣ်လၢအအိၣ်လၢရိမ့ၤအပူၤစ့ၢ်ကီးလီၤ. 16 အဂ့ၢ်ဒ်အံၤ,ယမဲာ်တဆှးဘၣ်လၢခရံာ်အတၢ်သးခုအကစီၣ်ဘၣ်.အဂ့ၢ်ဒ်အံၤ,မ့ၢ်ယွၤအစိအကမီၤလၢတၢ်အုၣ်က့ၤခီၣ်က့ၤကယဲၢ်ပှၤလၢအစူၢ်က့ၤနာ်က့ၤတၢ်ကိးဂၤဒဲးအဂီၢ်,ပှၤယူဒၤဖိလၢအဆိ,ဒီးပှၤဟ့းလ့ၣ်ဖိစ့ၢ်ကီးလီၤ. 17 အဂ့ၢ်ဒ်အံၤ,ယွၤအတၢ်တီတၢ်လိၤအိၣ်ဖျါထီၣ်လၢအပူၤ,လၢတၢ်နာ်ဆူတၢ်နာ်လီၤ.ဒ်တၢ်ကွဲးအသးအသိးန့ၣ်,ပှၤတီပှၤလိၤကမူဝဲလၢတၢ်နာ်လီၤ. ^{▼▼1:17 ဃဘး.၂း၄}

18 အဂ့ၢ်ဒ်အံၤ,ယွၤအတၢ်သးဒိၣ်ထီၣ်ဖျါထီၣ်လၢမူခိၣ်ထီဒါပှၤလၢအဟံးဃာ်တၢ်မ့ၢ်တၢ်တီလၢတၢ်တတီတလိၤဘၣ်အပူၤ,အတၢ်တယူးတယီၣ်ဘၣ်ယွၤ,ဒီးအတၢ်တတီတလိၤဘၣ်ခဲလၢာ်န့ၣ်လီၤ. 19 အဂ့ၢ်ဒ်အံၤ,တၢ်သ့ၣ်ညါယွၤအိၣ်ဖျါလၢအပူၤလီၤ.အဂ့ၢ်ဒ်အံၤ,ယွၤမၤဖျါထီၣ်အီၤလၢအဝဲသ့ၣ်လီၤ. 20 အဂ့ၢ်ဒ်အံၤ,လၢဟီၣ်ခိၣ်ဘၣ်တၢ်တ့လီၤအီၤလံၤလံၤန့ၣ်,ပှၤထံၣ်ဘၣ်အတၢ်တအိၣ်ဖျါဘၣ်တဖၣ်ထံထံဆးဆး,ဒ်ပစံးတၢ်အသိး,အစိထူအကမီၤယိာ်ဒီးအတၢ်ပှိၤတၢ်ပှီၢ်လီၤ.အဂ့ၢ်ဒ်အံၤ,သ့ၣ်ညါအီၤလၢတၢ်မၤအသးတဖၣ်အဃိ,ဒ်သိးအကတိၤပူၤဖျဲးအသးအလီၢ်သုတအိၣ်တဂ့ၤလီၤ. 21 အဂ့ၢ်ဒ်အံၤ,သ့ၣ်ညါယွၤနာ်သက့ဒီး,တမၤလၤမၤကပီၤဘၣ်အီၤဒ်ယွၤအသိးဘၣ်,ဒီးတစံးထီၣ်ပတြၢၤဘၣ်အဘျုးအဖှိၣ်ဘၣ်,မ့ၢ်အကူၣ်ထီၣ်ဖးလီၤကလီကလီတၢ်,ဒီးအသူၣ်ဟးဂူာ်အသးဟးဂီၤန့ၣ်,ခံးလီၤဝဲလီၤ. 22 စံးလီၤအသးလၢပှၤကူၣ်တၢ်သ့,ဒီးကဲထီၣ်ဝဲလၢပှၤဟးဂီၤဖိလီၤ. 23 ဒီးယွၤလၢအတအုၣ်သံဘၣ်တဂၤအလၤကပီၤန့ၣ်,ပာ်လဲလိာ်ဝဲလၢတၢ်ဂီၤလီၤဂာ်လၢပှၤကညီအုၣ်သံ,ဒီးထိၣ်ဧိၤလံၣ်ဧိၤ,ဒီးတၢ်အိၣ်ဒီးအခီၣ်လွံၢ်ခီ,ဒီးတၢ်စွါတၢ်စွဲတဖၣ်လီၤ.

24 မ်ဒ်န့ၣ်ဒီးယွၤဟ့ၣ်လီၤကွံာ်အီၤအိၣ်ဒီးအသးကလုာ်ကလိၤဆူတၢ်တကဆှီဘၣ်အပူၤ,ဒ်သိးအကမၤဟးဂီၤလိာ်အနီၢ်ခိဒၣ်ဝဲအလၤအကပီၤလီၤ. 25 ဒီးပာ်လဲလိာ်ယွၤအတၢ်မ့ၢ်တၢ်တီလၢတၢ်ကဘျံးကဘျၣ်,ဒီးဘူၣ်ထီၣ်ဘါထီၣ်တၢ်လၢအဘၣ်တၢ်တ့အီၤန့ၣ်,ဒီးမၤဝဲအတၢ်,အါန့ၢ်ပှၤလၢအတ့တၢ်လၢအဘၣ်တၢ်ဆိၣ်ဂ့ၤအစိၤစိၤဃၣ်ဃၣ်တဂၤအတၢ်တက့ၢ်လီၤ.အၤမ့ၣ်.

26 မ်ဒ်န့ၣ်ဒီးယွၤဟ့ၣ်လီၤကွံာ်အီၤအိၣ်ဒီးအသးကွံတၢ်လၢအလၤကပီၤတအိၣ်ဘၣ်န့ၣ်လီၤ.အဂ့ၢ်ဒ်အံၤ,ပိာ်မုၣ်တဖၣ်မၤတၢ်အလုၢ်အလၢ်န့ၣ်,ပာ်လဲလိာ်ဝဲဒီးတၢ်လၢအထီဒါတၢ်အလုၢ်အလၢ်လီၤ. 27 ဒ်န့ၣ်အသိးပိာ်ခွါမၤပိာ်မုၣ်ဒ်တၢ်အလုၢ်အလၢ်အသိးန့ၣ်ညိကွံာ်ဝဲ,ဒီးအသးကတၢလိာ်အသးပိာ်ခွါသကိးပိာ်ခွါ,ဒီးမၤတၢ်မဲာ်ဆှး,ဒီးအတၢ်ဒဲးဘးအဘူးအလဲလၢအကြၢးဒီးအီၤန့ၣ်,ဒိးန့ၢ်ဝဲလၢအပူၤဒၣ်ဝဲလီၤ.

28 ဒီးမ့ၢ်တၢ်တမိၣ်အိၣ်ဘၣ်အသးဒီးတၢ်သ့ၣ်ညါယွၤသတးဒီး,ယွၤဟ့ၣ်လီၤကွံာ်အီၤဆူတၢ်သူၣ်အၢသးသီအပူၤ,ဒ်သိးအကမၤတၢ်တဘၣ်တပှိၤဘၣ်လီၤ. 29 လၢထီၣ်ပှဲၤထီၣ်ဝဲဒီးကယဲၢ်တၢ်တတီတလိၤ,တၢ်မၤကမၣ်မုၣ်ကမၣ်ခွါ,တၢ်သးဆဲးအဲး,တၢ်သူၣ်ကွံသးကွံ,တၢ်မၤအၢမၤသီန့ၣ်လီၤ.လၢပှဲၤဝဲဒီးတၢ်သးက့ၣ်,တၢ်မၤသံပှၤကညီ,တၢ်အ့ၣ်လိာ်ဆိးက့လိာ်,တၢ်လီတၢ်ဝ့ၤ,တၢ်သူၣ်ဟ့သးဟ့, 30 မ့ၢ်ပှၤသီၣ်ဝံသဲကလၤ,ပှၤစံးအၢတၢ်,ပှၤသးဟ့ယွၤ,ပှၤဒုၣ်ဒွဲၣ်တၢ်,ပှၤပာ်ထီၣ်ထီအသး,ပာ်အသးကဖၢလၢ,ပှၤမၤအိၣ်ထီၣ်တၢ်အၢတၢ်သီ,ပှၤတစူၢ်ဘၣ်အမိၢ်အပၢ်ဘၣ်. 31 ပှၤအသးကီ,ပှၤတမၤတီဘၣ်အကလုၢ်ဘၣ်,ပှၤတအဲၣ်ဘၣ်အဘူးအတံၢ်ဘၣ်,ပှၤအသူၣ်တကၢ်အသးတလီၤဘၣ်,ပှၤတသးကညီၤဘၣ်တၢ်ဘၣ်. 32 အဝဲသ့ၣ်တဖၣ်သ့ၣ်ညါလီၤတံၢ်လီၤဆဲး,ယွၤအတၢ်စံၣ်ညီၣ်,လၢပှၤမၤတၢ်ဒ်န့ၣ်သိးဂ့ၤသံဘၣ်ဆၣ်ဒီး,မၤတၢ်န့ၣ်တဖၣ်,အခိၣ်တလိာ်ဘၣ်အသးလၢပှၤလၢအမၤဝဲတဖၣ်စ့ၢ်ကီးလီၤ.