Rom 12 | KswSKMB | STEP | မၤသးဒ်န့ၣ်ဒီး,ပုၢ်သ့ၣ်ဝဲၢ်သ့ၣ်ဧၢ,ယဃ့ကညးသုလၢယွၤအတၢ်သးကညီၤတဖၣ်အဃိ,ဒ်သိးသုကပာ်သုနီၢ်ခိလၢတၢ်လုၢ်မူစီဆှံ,တၢ်ဘၣ်ယွၤအသး,လၢအမ့ၢ်သုတၢ်မၤအဂ့ၤအဘၣ်လီၤ.

‏ Romans 12

1 မၤသးဒ်န့ၣ်ဒီး,ပုၢ်သ့ၣ်ဝဲၢ်သ့ၣ်ဧၢ,ယဃ့ကညးသုလၢယွၤအတၢ်သးကညီၤတဖၣ်အဃိ,ဒ်သိးသုကပာ်သုနီၢ်ခိလၢတၢ်လုၢ်မူစီဆှံ,တၢ်ဘၣ်ယွၤအသး,လၢအမ့ၢ်သုတၢ်မၤအဂ့ၤအဘၣ်လီၤ. 2 ဒီးသုတအိၣ်ဒီးပှၤအအံၤတဃၣ်ဖိအက့ၢ်အဂီၤတဂ့ၤ,မ့မ့ၢ်လဲလိာ်သုက့ၢ်သုဂီၤလၢတၢ်မၤက့ၤသုသးသီ,ဒ်သိးသုကမၤကွၢ်ယွၤအတၢ်ဘၣ်အသးလၢအမ့ၢ်တၢ်ဂ့ၤ,ဒီးတၢ်လၢပဂ့ၤအဲၣ်ဒိး,ဒီးတၢ်လၢတၢ်ပှဲၤမ့ၢ်တၢ်ဒ်လဲၣ်ဒ်လဲၣ်န့ၣ်တက့ၢ်.

3 အဂ့ၢ်ဒ်အံၤ,မ့ၢ်တၢ်ဘျုးတၢ်ဖှိၣ်လၢတၢ်ဟ့ၣ်ယၤသတးဒီး,ယစံးဘၣ်ကယဲၢ်ပှၤအိၣ်လၢသုကျါကိးအဂၤဒဲး,လၢအသုတပာ်အသးထီန့ၢ်အဂ့ၤပာ်ဝဲန့ၣ်တဂ့ၤ.မ့မ့ၢ်ဒ်ယွၤဟ့ၣ်နီၤတၢ်နာ်လၢပှၤတဂၤဒီးတဂၤအသိးန့ၣ်,ပာ်သုသးဖဲအဘၣ်အဘၣ်တက့ၢ်. 4 အဂ့ၢ်ဒ်အံၤ,ဒ်ပနီၢ်ခိတဂၤအံၤ,အဂီၤအိၣ်အါမံၤ,ဒီးအဂီၤခဲလၢာ်တမၤဘၣ်တၢ်တမံၤဃီဘၣ်အသိးန့ၣ်, 5 ပဝဲဒၣ်အါဂၤအံၤ,ပမ့ၢ်ပနီၢ်တဂၤဃီလၢခရံာ်အပူၤ,ဒီးပမ့ၢ်ပဂီၤသကိးပဂီၤဒ်န့ၣ်အသိးလီၤ. 6 ဒီးဒ်တၢ်ဟ့ၣ်လီၤတၢ်ဘျုးတၢ်ဖှိၣ်လၢပှၤအသိးန့ၣ်,ပအိၣ်ဒီးတၢ်ဟ့ၣ်လီၤဆီတဂၤတမံၤ,တဂၤတမံၤလီၤ.မ့မ့ၢ်ဝံအတၢ်ဒီး,ဒ်တၢ်နာ်အိၣ်ဝဲအသိးန့ၣ်မ်အမၤဝံအတၢ်တက့ၢ်. 7 မ့မ့ၢ်အခ့အပှၤအတၢ်ဒီး,မ်အမၤအခ့အပှၤအတၢ်တက့ၢ်.မ့မ့ၢ်ပှၤလၢအသိၣ်က့ၤသီက့ၤတၢ်ဒီး,မ်အသိၣ်က့ၤသီက့ၤတၢ်တက့ၢ်. 8 မ့မ့ၢ်ပှၤလၢအသဆၣ်ထီၣ်ပှၤအခံဒီး,မ်အသဆၣ်ထီၣ်ပှၤအခံတက့ၢ်.မ့မ့ၢ်ပှၤလၢအဟ့ၣ်နီၤတၢ်ဒီး,မ်အဟ့ၣ်နီၤတၢ်တီတီတက့ၢ်.မ့မ့ၢ်ပှၤလၢအကွၢ်တၢ်ဒီး,မ်အကွၢ်တၢ်သပှၢ်ပှၢ်တက့ၢ်.မ့မ့ၢ်ပှၤလၢအသးကညီၤတၢ်ဒီး,မ်အသးကညီၤတၢ်လၢအသူၣ်ခုအသးခုတက့ၢ်.

9 တၢ်အဲၣ်တၢ်ကွံန့ၣ်,မ်အပူၤဖျဲးဒီးတၢ်လီတၢ်ဝ့ၤန့ၣ်တက့ၢ်.သးဟ့တၢ်အၢတက့ၢ်.အိၣ်စဲဘူးဒီးတၢ်ဂ့ၤတက့ၢ်. 10 လၢဒီပုၢ်ဝဲၢ်အဲၣ်လိာ်ကွံလိာ်အသးန့ၣ်,အဲၣ်လိာ်ကွံလိာ်သုသးဒ်ဒီပုၢ်ဝဲၢ်တံၢ်တံၢ်အသိးန့ၣ်တက့ၢ်.လၢတၢ်ယူးယီၣ်န့ၣ်,လဲၤလၢညါလိာ်သုသးတက့ၢ်. 11 လၢတၢ်မၤသပှၢ်ပှၢ်န့ၣ်,သုတဝံသးကၢၣ်တဂ့ၤ.လၢသူၣ်လၢသးအဂ့ၢ်န့ၣ်ဂဲၤလိာ်သုသးတက့ၢ်.လၢကစၢ်အဂ့ၢ်န့ၣ်မၤအတၢ်တက့ၢ်. 12 လၢတၢ်မုၢ်လၢ်အပူၤန့ၣ်သးခုတက့ၢ်လၢတၢ်နးတၢ်ဖှီၣ်အပူၤန့ၣ်ဝံသးစူၤတက့ၢ်.လၢတၢ်ထုကဖၣ်အဂ့ၢ်န့ၣ်မၤသပှၢ်ပှၢ်တက့ၢ်. 13 ပှၤစီဆှံလၢအဘၣ်တၢ်ဖှီၣ်တၢ်ယာ်န့ၣ်,ဟ့ၣ်နီၤတၢ်လၢအီၤတက့ၢ်.ပှၤတမှံၤန့ၣ်လုၢ်အီၣ်လုၢ်အီအီၤသပှၢ်ပှၢ်တက့ၢ်. 14 ပှၤလၢအမၤအၢမၤနးသုတဖၣ်န့ၣ်,ဆိၣ်ဂ့ၤအီၤတက့ၢ်.ဆိၣ်ဂ့ၤတၢ်တက့ၢ်,ဒီးဆိၣ်အၢတၢ်တဂ့ၤ. 15 ပှၤလၢအသးခုတဖၣ်န့ၣ်,သးခုဃုာ်ဒီးအီၤတက့ၢ်.ပှၤလၢအဟီၣ်တဖၣ်န့ၣ်,ဟီၣ်ဃုာ်ဒီးအီၤတက့ၢ်. 16 ဆိကမိၣ်တၢ်တမံၤဃီလၢသုသးသကိးသကိးတက့ၢ်.ဆိကမိၣ်တၢ်ထီၣ်ထီတဖၣ်တဂ့ၤ.မ့မ့ၢ်ဒိးတၢ်ဆှၢသုသးလၢတၢ်ဘၣ်ဆီၣ်လီၤန့ၣ်တက့ၢ်.သုတပာ်ဒၣ်သုသးလၢတၢ်ကူၣ်ဘၣ်ကူၣ်သ့တဂ့ၤ. 17 သုတမၤဆၢတၢ်အၢလၢတၢ်အၢ,လၢပှၤနီတဂၤတဂ့ၤ.ဃုတၢ်အဂ့ၤအဘၣ်လၢပှၤခဲလၢာ်အမဲာ်ညါတက့ၢ်. 18 ဖဲသုသ့န့ၣ်,မ့ၢ်သ့ဒီး,အိၣ်ဃူလိာ်ဖိးလိာ်သုသးဒီးပှၤကိးဂၤဒဲးတက့ၢ်. 19 ပှၤလၢယအဲၣ်အီၤသ့ၣ်ဧၢ,သုတမၤကၣ်တၢ်လၢသုဂီၢ်ဒၣ်သုဝဲတဂ့ၤ.မ့မ့ၢ်ပျဲတၢ်သးဒိၣ်တက့ၢ်.အဂ့ၢ်ဒ်အံၤ,တၢ်ကွဲးအသးစံးဝဲဒၣ်,တၢ်မၤကၣ်တၢ်န့ၣ်,အိၣ်ဒီးယၤလီၤ,ယကဟ့ၣ်ကၣ်တၢ်ယဲလီၤ,ယွၤစံးဝဲဒၣ်. ^{▼▼12:19 ၅မိၤ.၃၂း၃၅} 20 မၤသးဒ်န့ၣ်ဒီး,

နဒုၣ်နဒါန့ၣ်တၢ်မ့ၢ်သၣ်ဝံၤအသးဒီး,ဒုးအီၣ်အီၤတက့ၢ်.
တၢ်မ့ၢ်သူအသးလၢထံဒီး,ဒုးအီအီၤတက့ၢ်.
အဂ့ၢ်ဒ်အံၤ,နမ့ၢ်မၤဒ်န့ၣ်ဒီး,နကပာ်ဖှိၣ်မ့ၣ်အူကဖးလၢအခိၣ်လီၤ. ^{▼▼12:20 ကတိၤ.၂၅း၂၁}

21 သုတဒိးတၢ်မၤနၢၤသုလၢတၢ်အၢတၢ်သီတဂ့ၤ.မ့မ့ၢ်မၤနၢၤတၢ်အၢလၢတၢ်ဂ့ၤန့ၣ်တက့ၢ်.