Rom 15 | KswSKMB | STEP | ဒီးပှၤအိၣ်ဒီးအဂံၢ်အဘါပဝဲဒၣ်အံၤ,ပဂ့ၤဝံပှၤလၢအဂံၢ်အဘါတအိၣ်ဘၣ်အတၢ်ဂံၢ်စၢ်ဘါစၢ်,ဒီးတလူၤဘၣ်ပသးဒၣ်ပဝဲဘၣ်.

‏ Romans 15

1 ဒီးပှၤအိၣ်ဒီးအဂံၢ်အဘါပဝဲဒၣ်အံၤ,ပဂ့ၤဝံပှၤလၢအဂံၢ်အဘါတအိၣ်ဘၣ်အတၢ်ဂံၢ်စၢ်ဘါစၢ်,ဒီးတလူၤဘၣ်ပသးဒၣ်ပဝဲဘၣ်. 2 မ်ပမၤဘၣ်ပှၤလၢပဃၢၤတဖၣ်အသးလၢတၢ်ဂ့ၤ,လၢအကထီၣ်ဝဲထီဝဲအဂီၢ်ကိးဂၤဒဲးတက့ၢ်. 3 အဂ့ၢ်ဒ်အံၤ,ခရံာ်န့ၣ်တလူၤဘၣ်အသးဒၣ်ဝဲဘၣ်.မ့မ့ၢ်ဒ်တၢ်ကွဲးအသးအသိးန့ၣ်,ပှၤလၢတၢ်ဒုၣ်ဒွဲၣ်နၤန့ၣ်,အတၢ်ဒုၣ်ဒွဲၣ်န့ၣ်ဘၣ်ယၤလီၤ. ^{▼▼15:3 စံး.၆၉း၉} 4 အဂ့ၢ်ဒ်အံၤ,ဖဲဒၣ်တၢ်ကွဲးအသးတဘီလၢ်လၢ်န့ၣ်,ဘၣ်ကွဲးအသးလၢပဘၣ်တၢ်သိၣ်တၢ်သီအဂီၢ်,ဒ်သိးတၢ်ဝံသးစူၤ,ဒီးတၢ်မၤမုာ်ဘၣ်ဃးဒီးတၢ်ကွဲးအသးတဖၣ်သတးဒီးပကအိၣ်ဒီးတၢ်မုၢ်လၢ်လီၤ. 5 ဒီးတၢ်ဝံသးစူၤဒီးတၢ်မၤမုာ်အကစၢ်မ်အဟ့ၣ်သုသးဆိကမိၣ်တၢ်တမံၤဃီသကိးသကိး,ဒ်ယ့ၣ်ရှူးခရံာ်အသိး, 6 ဒ်သိးသုကမၤလၤမၤကပီၤယွၤပကစၢ်ယ့ၣ်ရှူးခရံာ်အပၢ်,လၢသုသးတဖျၢၣ်ဃီ,ဒီးလၢသုထးခိၣ်တပူၤဃီန့ၣ်တက့ၢ်.

7 မၤသးဒ်န့ၣ်ဒီး,တူၢ်လိာ်လိာ်သုသးဒ်ခရံာ်တူၢ်လိာ်သုလၢယွၤအလၤကပီၤအဂီၢ်အသိးန့ၣ်တက့ၢ်. 8 အဂ့ၢ်ဒ်အံၤ,ယစံးလၢယ့ၣ်ရှူးခရံာ်ကဲထီၣ်လံလၢတၢ်ကူးတရံးအခ့အပှၤလၢယွၤအတၢ်မ့ၢ်တၢ်တီအဂီၢ်,ဒ်သိးအကမၤဂၢၢ်မၤကျၢၤတၢ်စံးပာ်လၢပၢ်သ့ၣ်တဖၣ်န့ၣ်လီၤ. 9 ဒီးဒ်သိးပှၤကလုာ်တဖၣ်ကမၤလၤကပီၤယွၤလၢအတၢ်သးကညီၤအဃိ,ဒ်တၢ်ကွဲးအသးအသိးန့ၣ်,

လၢတၢ်အံၤအဃိ,ယကအၢၣ်လီၤအီလီၤနၤလၢပှၤကလုာ်တဖၣ်အကျါ,ဒီးယကသးဝံၣ်ထီၣ်နမံၤလီၤ. ^{▼▼15:9 စံး.၁၈း၄၉}
10 ဒီးစံးကဒီးဝဲ,
ပှၤကလုာ်တဖၣ်ဧၢ,သးခုသကိးဒီးအပှၤဂီၢ်မုၢ်တက့ၢ်. ^{▼▼15:10 ၅မိၤ.၃၂း၄၃}
11 ဒီးမၤကဒီးတစု,
ပှၤကလုာ်ခဲလၢာ်သ့ၣ်ဧၢ,စံးထီၣ်ပတြၢၤယွၤတက့ၢ်.
ဒီးပှၤဂီၢ်မုၢ်ခဲလၢာ်သ့ၣ်ဧၢ,သးဝံၣ်ထီၣ်အီၤတက့ၢ်. ^{▼▼15:11 စံး.၁၁၇း၁}
12 ဒီးမၤကဒီးတစု,စီၤယၡါယၤစံးဝဲဒၣ်,
ယံးၡဲအဂံၢ်ကအိၣ်,
ဒီးပှၤကဂဲၤဆၢထၢၣ်ပၢဘၣ်ပှၤကလုာ်တဖၣ်လီၤ.
ဒီးပှၤကလုာ်တဖၣ်န့ၣ်,ကမုၢ်လၢ်တၢ်လၢအပူၤလီၤ. ^{▼▼15:12 ၡါ.၁၁း၁၀}

13 ဒီးမ်တၢ်မုၢ်လၢ်အကစၢ်,မၤပှဲၤသုဒီးကယဲၢ်တၢ်သးခုဒီးတၢ်ဃူတၢ်ဖိးလၢတၢ်နာ်အဃိ,ဒ်သိးသုကအါထီၣ်လၢတၢ်မုၢ်လၢ်,လၢသးစီဆှံအစိအကမီၤန့ၣ်တက့ၢ်.

14 ဒီးပုၢ်သ့ၣ်ဝဲၢ်သ့ၣ်ဧၢ,ယနာ်ယကစၢ်ဒၣ်ယဲလၢသုဂ့ၢ်လၢသုလၢထီၣ်ပှဲၤထီၣ်ဒီးတၢ်သ့ၣ်ညါခဲလၢာ်ဒီး,သုသိၣ်က့ၤသီက့ၤလိာ်သုသးစ့ၢ်ကီးဒီးသုပှဲၤထီၣ်ဒီးတၢ်ဂ့ၤလီၤ. 15 ယပာ်ယသးခူတလ့ၢ်အါတက့ၢ်ဒီး,ကွဲးန့ၢ်သု,ပုၢ်သ့ၣ်ဝဲၢ်သ့ၣ်ဧၢ,တနီၤမ့ၢ်တၢ်ဒုးသ့ၣ်နီၣ်ထီၣ်က့ၤသုလၢယွၤဟ့ၣ်ယၤအဘျုးအဖှိၣ်ဒ်သိးယကကဲယ့ၣ်ရှူးခရံာ်အခ့အပှၤလၢပှၤကလုာ်တဖၣ်အဂီၢ်, 16 ဒီးဒ်သိးယတၢ်ပာ်ထီၣ်ပှၤကလုာ်တဖၣ်,ဒ်ပှၤလုၢ်တၢ်အဒိၣ်လၢယွၤအတၢ်သးခုအကစီၣ်န့ၣ်,ကကဲလၢတၢ်ဘၣ်အသးလၢသးစီဆှံမၤစီဆှံထီၣ်အီၤအဃိလီၤ. 17 မၤသးဒ်န့ၣ်ဒီး,ယပာ်ယသးကဖၢလၢလၢယ့ၣ်ရှူးခရံာ်အပူၤလၢတၢ်ဘၣ်ဃးဒီးယွၤ,အလီၢ်အိၣ်ဝဲလီၤ. 18 အဂ့ၢ်ဒ်အံၤ,တၢ်လၢခရံာ်တမၤဘၣ်လၢယၤလၢတၢ်ကတိၤ,ဒီးလၢတၢ်မၤအပူၤလၢတၢ်အပနီၣ်ဒီးတၢ်လီၤလးအစိအကမီၤအပူၤ,ဒီးလၢယွၤအသးအစိအကမီၤအပူၤဒ်သိးအကမၢပှၤကလုာ်တဖၣ်စူၢ်တၢ်အဂီၢ်ဒီး,ယကတိၤလၢအဂ့ၢ်တဘူၣ်ဘၣ်. 19 ဒ်န့ၣ်အသိး,လၢယရူၤၡလ့ၣ်,ဒီးတၢ်အိၣ်ဝးတရံးပၢၢ်လၢအံးလူၤရံကူးတဖၣ်,ယစံၣ်တဲၤတဲလီၤလံခရံာ်အတၢ်သးခုအကစီၣ်လၢလၢပှဲၤပှဲၤလံ. 20 ဒ်န့ၣ်အသိး,ယဂုာ်စံၣ်တဲၤတဲလီၤတၢ်သးခုအကစီၣ်ဖဲပှၤတပှ့ၤဘၣ်ခရံာ်အမံၤဘၣ်အလီၢ်ဒ်သိးယသုတမၤထီၣ်တၢ်လၢပှၤဂၤပာ်တၢ်အခီၣ်ထံးအဖီခိၣ်တဂ့ၤအဂီၢ်လီၤ. 21 မ့မ့ၢ်ဒ်တၢ်ကွဲးအသးအသိးန့ၣ်,

ပှၤလၢတၢ်တစံးဘၣ်အီၤလၢအဂ့ၢ်တဖၣ်န့ၣ်,ကထံၣ်ဝဲ,
ဒီးပှၤလၢအတနၢ်ဟူဘၣ်တဖၣ်န့ၣ်,အနၢ်ကပၢၢ်တၢ်လီၤ. ^{▼▼15:21 ၡါ.၅၂း၁၅}

22 လၢတၢ်န့ၣ်အဃိ,တၢ်တြီယလဲၤတၢ်ဆူသုအိၣ်အါမံၤလီၤ. 23 မ့မ့ၢ်ခဲကနံၣ်အံၤ,ယအိၣ်လၢကီၢ်တဖၣ်အံၤ,အလီၢ်တအိၣ်လၢၤဘၣ်,ဒီးတၢ်မိၣ်လဲၤအိၣ်သကိးတ့ၢ်ယသးဒီးသုအါနံၣ်အါလါသတးဒီး, 24 တုၤယလဲၤဆူစပၤနံဒီး,ယမုၢ်လၢ်လၢယကထံၣ်ဘၣ်သုလၢယလဲၤတၢ်အဖၢမုၢ်,ဒီးယရ့လိာ်ယသးဒီးသုဘျဲးရ့လိာ်ဒိၣ်ဒိၣ်ဆံးဆံးဒီး,သုကဆှၢယၤဆူန့ၣ်လီၤ.

25 မ့မ့ၢ်ခဲကနံၣ်အံၤ,ဒ်သိးယကမၤပှၤစီဆှံသ့ၣ်တဖၣ်အတၢ်ဒီး,ယလဲၤဆူယရူၤၡလ့ၣ်လီၤ. 26 အဂ့ၢ်ဒ်အံၤ,ဘၣ်ပှၤမၤက့းဒနံဖိဒီးပှၤအဃါယၤဖိတဖၣ်အသးလၢအကဟ့ၣ်ယုၢ်အတၢ်ဆူပှၤစီဆှံဘၣ်ဖှီၣ်ဘၣ်ယာ်လၢယရူၤၡလ့ၣ်အပူၤလီၤ. 27 ဘၣ်အသးန့ၣ်အဂ့ၢ်ဒ်အံၤ,အကမၢ်အိၣ်မးလၢအလိၤလီၤ.အဂ့ၢ်ဒ်အံၤ,ပှၤကလုာ်တဖၣ်န့ၣ်မ့ၢ်န့ၢ်ဃုာ်အဝဲသ့ၣ်အတၢ်ဘၣ်ဃးဒီးသးန့ၣ်ဒီး,အကမၢ်အိၣ်လၢအကမၤက့ၤအဝဲသ့ၣ်အဂီၢ်လၢတၢ်ဘၣ်ဃးဒီးတၢ်ဖံးတၢ်ညၣ်လီၤ. 28 မၤသးဒ်န့ၣ်ဒီးယမၤတၢ်အံၤ,ဒီးစဲပနီၣ်ဃာ်အဝဲသ့ၣ်အဂီၢ်လၢတၤသၣ်အံၤဝံၤဒီး,ယကလဲၤလၢသုအိၣ်ဆူစပၤနံလီၤ. 29 ဒီးတုၤယလဲၤဆူသုအိၣ်ဒီး,ယသ့ၣ်ညါလၢယကလဲၤလၢခရံာ်အတၢ်ဆိၣ်ဂ့ၤအတၢ်လၢတၢ်ပှဲၤအပူၤလီၤ.

30 ဒီးပုၢ်သ့ၣ်ဝဲၢ်သ့ၣ်ဧၢ,ဒ်သိးတၢ်ကထုးထီၣ်ကွံာ်ယၤလၢပှၤတစူၢ်တနာ်ဘၣ်,လၢကီၢ်ယူဒၤ,အစုပူၤ, 31 ဒီးဒ်သိးယလဲၤမၤတၢ်ဆူယရူၤၡလ့ၣ်အံၤ,ကဘၣ်ပှၤစီဆှံအအသး, 32 ဒီးဒ်သိးမ့ၢ်ဘၣ်ယွၤအသးဒီး,ယကလဲၤဒီးယသူၣ်ခုသးခုဆူသုအိၣ်,ဒီးဒိးတၢ်ခုၣ်တၢ်မုာ်ဒီးသုဒီး,ယဃ့ကညးသုလၢပကစၢ်ယ့ၣ်ရှူးခရံာ်အဃိ,ဒီးတၢ်အဲၣ်ဘၣ်ဃးဒီးသးန့ၣ်အဃိ,ဒ်သိးသုကဂုာ်ဃုာ်ဒီးယၤလၢတၢ်ဘါထုကဖၣ်အပူၤ,လၢယဂီၢ်လၢယွၤသပှၢ်ပှၢ်လီၤ. 33 ဒီးတၢ်ဃူတၢ်ဖိးအကစၢ်န့ၣ်,မ်အအိၣ်ဒီးသုခဲလၢာ်တက့ၢ်.အၤမ့ၣ်.