Rom 6 | KswSKMB | STEP | မၤသးဒ်န့ၣ်ဒီးပကစံးဒ်လဲၣ်,မ့ၢ်ပကအိၣ်ဆိးလၢတၢ်ဒဲးဘးအပူၤ,ဒ်သိးတၢ်ဘျုးတၢ်ဖှိၣ်ကအါထီၣ်န့ၣ်ဧါ.

‏ Romans 6

1 မၤသးဒ်န့ၣ်ဒီးပကစံးဒ်လဲၣ်,မ့ၢ်ပကအိၣ်ဆိးလၢတၢ်ဒဲးဘးအပူၤ,ဒ်သိးတၢ်ဘျုးတၢ်ဖှိၣ်ကအါထီၣ်န့ၣ်ဧါ. 2 မ်အသုတမၤအသးဒ်န့ၣ်တဂ့ၤ.ပှၤလၢအသံသဒၣ်ကွံာ်တၢ်ဒဲးဘး,ပဝဲဒၣ်အံၤ,မ့ၢ်ပကမူဒံးလၢအပူၤဒ်လဲၣ်. 3 ဖဲဒၣ်ပှၤလၢအဒိးဘျၢ ^{▼▼6:3 လၢဟ့းလ့ၣ်အကျိာ်"ဘးပတံစၢ်."}အသးဆူယ့ၣ်ရှူးခရံာ်အပူၤ,ပဝဲဒၣ်အံၤ,ပဒိးဘျၢ ^{▼▼6:3 လၢဟ့းလ့ၣ်အကျိာ်"ဘးပတံစၢ်."}ပသးဆူအတၢ်သံအပူၤန့ၣ်,သုတသ့ၣ်ညါဘၣ်ဧါ. 4 မၤသးဒ်န့ၣ်ဒီး,ပဘၣ်တၢ်ခူၣ်လီၤဃုာ်ဒီးအီၤဆူတၢ်သံအပူၤလၢတၢ်ဘျၢ ^{▼▼6:4 လၢဟ့းလ့ၣ်အကျိာ်"ဘးပတံစၢ်."}အဃိ,ဒ်သိး,ဒ်ခရံာ်ဂဲၤဆၢထၢၣ်က့ၤလၢတၢ်သံအပူၤလၢပၢ်အလၤကပီၤအသိးန့ၣ်,ပကလဲၤတၢ်ပဝဲဒၣ်လၢတၢ်မူအသီ,ဒ်န့ၣ်အသိးစ့ၢ်ကီးလီၤ. 5 အဂ့ၢ်ဒ်အံၤ,ပမ့ၢ်ဘၣ်ဃးဒီးအီၤလၢတၢ်လီၤဂာ်လၢအတၢ်သံန့ၣ်ဒီး,ပကဘၣ်ဃးဒီးအီၤလၢအတၢ်ဂဲၤဆၢထၢၣ်က့ၤစ့ၢ်ကီးလီၤ. 6 တၢ်အံၤပသ့ၣ်ညါလၢ,ပပှၤလီၢ်လံၤန့ၣ်ဘၣ်တၢ်ပျၤထီဃုာ်ဒီးအီၤလၢထူၣ်စုညါအလိၤ,ဒ်သိးတၢ်ဒဲးဘးအနီၢ်ခိကဟးဂီၤ,ဒ်သိးပသုတကဲလၢၤလၢတၢ်ဒဲးဘးအကုၢ်အပှၤတဂ့ၤန့ၣ်လီၤ. 7 အဂ့ၢ်ဒ်အံၤ,ပှၤလၢအသံန့ၣ်,ဘၣ်ပာ်တီပာ်လိၤကွံာ်အီၤလၢတၢ်ဒဲးဘးလီၤ. 8 ဒီးပမ့ၢ်သံဃုာ်တ့ၢ်ဒီးခရံာ်ဒီး,ပနာ်လၢပကမူဃုာ်စ့ၢ်ကီးဒီးအီၤလီၤ. 9 ပသ့ၣ်ညါလၢခရံာ်ဂဲၤဆၢထၢၣ်က့ၤလၢတၢ်သံဒီး,တသံလၢၤဘၣ်ဝဲဘၣ်.တၢ်သံတကဲလၢၤဘၣ်ကစၢ်လၢအဖီခိၣ်ဘၣ်. 10 အဂ့ၢ်ဒ်အံၤ,တၢ်လၢအသံဝဲန့ၣ်,သံဝဲလၢတၢ်ဒဲးဘးအဃိတစုဧိၤလီၤ.မ့မ့ၢ်တၢ်လၢအမူဝဲန့ၣ်,မ့ၢ်အမူလၢယွၤအဂီၢ်လီၤ. 11 ဒ်န့ၣ်အသိး,ပာ်သုသးလၢဖဲဒၣ်အဘၣ်ဃးဒီးတၢ်ဒဲးဘးန့ၣ်သုမ့ၢ်ပှၤသံ,မ့မ့ၢ်ဖဲအဘၣ်ဃးဒီးယွၤန့ၣ်သုမ့ၢ်ပှၤမူလၢယ့ၣ်ရှူးခရံာ်အပူၤန့ၣ်တက့ၢ်.

12 မၤသးဒ်န့ၣ်ဒီးသုတဒုးပၢတၢ်ဒဲးဘးလၢသုနီၢ်ခိနီၢ်ကစၢ်လၢအသံသ့အံၤအပူၤ,ဒ်သိးသုကစူၢ်အတၢ်သးကွံန့ၣ်တဂ့ၤ. 13 ဒီးသုတပာ်လၢၤသုဂီၤတဖၣ်လၢတၢ်တတီတလိၤဘၣ်အစုကဝဲၤလၢတၢ်ဒဲးဘးအဂီၢ်တဂ့ၤ.မ့မ့ၢ်ပာ်လီၤဒၣ်သုသးလၢယွၤအဂီၢ်,ဒ်ပှၤမူထီၣ်လၢတၢ်သံအသိး,ဒီးသုဂီၤတဖၣ်လၢတၢ်တီတၢ်လိၤအစုကဝဲၤ,လၢယွၤအဂီၢ်တက့ၢ်. 14 အဂ့ၢ်ဒ်အံၤ,တၢ်ဒဲးဘးတကဲလၢၤဘၣ်သုကစၢ်ဘၣ်.အဂ့ၢ်ဒ်အံၤ,သုတအိၣ်လၢၤဘၣ်လၢတၢ်သိၣ်တၢ်သီအဖီလာ်ဘၣ်,မ့ၢ်သုအိၣ်လၢတၢ်ဘျုးတၢ်ဖှိၣ်အဖီလာ်လီၤ.

15 မၤသးဒ်န့ၣ်ဒီး,မ့ၢ်ဒ်လဲၣ်.မ့ၢ်ပတအိၣ်ဘၣ်လၢတၢ်သိၣ်တၢ်သီအဖီလာ်ဘၣ်,မ့ၢ်ပအိၣ်လၢတၢ်ဘျုးတၢ်ဖှိၣ်အဖီလာ်ဒီး,ပကမၤတၢ်ဒဲးဘးစ့ၢ်ကီးဧါ.မ်အသုတမၤအသးဒ်န့ၣ်တဂ့ၤ. 16 သုသ့ၣ်ညါလၢသုမ့ၢ်ပာ်လီၤသုသးလၢတၢ်အကုၢ်အပှၤလၢသုကစူၢ်တၢ်အဂ့ၢ်,တၢ်ဒဲးဘးဘၣ်ဃးဒီးတၢ်သံမ့ၢ်ဂ့ၤ,တၢ်စူၢ်ဘၣ်ဃးဒီးတၢ်တီတၢ်လိၤမ့ၢ်ဂ့ၤဒီး,ပှၤလၢသုစူၢ်အီၤန့ၣ်သုမ့ၢ်အကုၢ်အပှၤ,တမ့ၢ်ဘၣ်ဧါ. 17 မ့မ့ၢ်သုဝဲဒၣ်အံၤ,သုမ့ၢ်တ့ၢ်တၢ်ဒဲးဘးအကုၢ်အပှၤဘၣ်ဆၣ်ဒီး,မ့ၢ်သုစူၢ်တၢ်မ့ၢ်တၢ်တီအက့ၢ်အဂီၤ,လၢတၢ်ဟ့ၣ်လီၤသုန့ၣ်,လၢသုသူၣ်သုသးအဃိဒီး,မ်ယွၤအဘျုးအဖှိၣ်ဘၣ်တၢ်စံးထီၣ်ပတြၢၤတက့ၢ်. 18 ဒီးသုထူၣ်ဖျဲးဒီးတၢ်ဒဲးဘးဒီး,သုကဲထီၣ်တၢ်တီတၢ်လိၤအကုၢ်အပှၤလီၤ.

19 ယကတိၤတၢ်ဒ်ပှၤကညီအသိးလၢသုဖံးသုညၣ်အဂံၢ်စၢ်ဘါစၢ်အဃိ,အဂ့ၢ်ဒ်အံၤ,ဒ်သုပာ်တ့ၢ်သုဂီၤတဖၣ်လၢတၢ်ကလုာ်ကလိၤ,ဒီးတၢ်တတီတလိၤဘၣ်အကုၢ်အပှၤ,လၢတၢ်တတီတလိၤအဂီၢ်အသိးန့ၣ်,ခဲကနံၣ်အံၤပာ်သုဂီၤတဖၣ်လၢတၢ်တီတၢ်လိၤအကုၢ်အပှၤလၢတၢ်စီဆှံအဂီၢ်,ဒ်န့ၣ်အသိးတက့ၢ်. 20 အဂ့ၢ်ဒ်အံၤ,ဖဲသုမ့ၢ်တၢ်ဒဲးဘးအကုၢ်အပှၤန့ၣ်ဒီး,သုထူၣ်ဖျဲးဒီးတၢ်တီတၢ်လိၤလီၤ. 21 မၤသးဒ်န့ၣ်ဒီး,လၢတၢ်လၢသုမဲာ်ဆှးလၢအဃိခဲကနံၣ်အံၤအပူၤန့ၣ်,အခါဖဲန့ၣ်သုအိၣ်ဒီးတၤသၣ်မနုၤလဲၣ်.အဂ့ၢ်ဒ်အံၤ,တၢ်န့ၣ်တဖၣ်အကတၢၢ်မ့ၢ်တၢ်သံလီၤ. 22 မ့မ့ၢ်ခဲကနံၣ်အံၤ,သုထူၣ်ဖျဲးဒီးတၢ်ဒဲးဘးဒီး,သုကဲထီၣ်ယွၤအကုၢ်အပှၤဒီးသုအိၣ်ဒီးသုတၤသၣ်ဘၣ်ဃးဒီးတၢ်စီဆှံ,ဒီးအကတၢၢ်န့ၣ်မ့ၢ်တၢ်မူအထူအယိာ်လီၤ. 23 အဂ့ၢ်ဒ်အံၤ,တၢ်ဒဲးဘးအဘူးအလဲမ့ၢ်တၢ်သံလီၤ.မ့မ့ၢ်ယွၤအတၢ်ဟ့ၣ်န့ၣ်,မ့ၢ်တၢ်မူအထူအယိာ်လၢပကစၢ်ယ့ၣ်ရှူးခရံာ်အဃိန့ၣ်လီၤ.