Rom 7 | KswSKMB | STEP | ပုၢ်သ့ၣ်ဝဲၢ်သ့ၣ်ဧၢ,ဖဲပှၤကညီမူဝဲအဖၢမုၢ်န့ၣ်,တၢ်သိၣ်တၢ်သီကဲကစၢ်လၢအဖီခိၣ်န့ၣ်,သုတသ့ၣ်ညါဘၣ်ဧါ.အဂ့ၢ်ဒ်အံၤ,ယကတိၤတၢ်ဒီးပှၤလၢအသ့ၣ်ညါတၢ်သိၣ်တၢ်သီလီၤ.

‏ Romans 7

1 ပုၢ်သ့ၣ်ဝဲၢ်သ့ၣ်ဧၢ,ဖဲပှၤကညီမူဝဲအဖၢမုၢ်န့ၣ်,တၢ်သိၣ်တၢ်သီကဲကစၢ်လၢအဖီခိၣ်န့ၣ်,သုတသ့ၣ်ညါဘၣ်ဧါ.အဂ့ၢ်ဒ်အံၤ,ယကတိၤတၢ်ဒီးပှၤလၢအသ့ၣ်ညါတၢ်သိၣ်တၢ်သီလီၤ. 2 အဂ့ၢ်ဒ်အံၤ,ပိာ်မုၣ်အိၣ်ဒီးအဝၤန့ၣ်,ဖဲအဝၤမူဝဲအဖၢမုၢ်ဒီး,ဘၣ်စၢဃာ်ဝဲဒီးအဝၤလၢတၢ်သိၣ်တၢ်သီလီၤ.ဘၣ်ဆၣ်ဒီးအဝၤမ့ၢ်သံဒီး,ထူၣ်ဖျဲးဝဲဒီးအဝၤအတၢ်သိၣ်တၢ်သီလီၤ. 3 မၤသးဒ်န့ၣ်ဒီး,ဖဲအဝၤမူဝဲအဖၢမုၢ်န့ၣ်,မ့ၢ်ကဲထီၣ်ပိာ်ခွါတဂၤဒၣ်အတၢ်ဒီး,ကဘၣ်တၢ်ကိးအီၤလၢပှၤအဲၣ်ဘၢအဝၤလီၤ.မ့မ့ၢ်အဝၤမ့ၢ်သံဒီး,ထူၣ်ဖျဲးဝဲဒီးတၢ်သိၣ်တၢ်သီ,ဒီးမ့ၢ်ကဲထီၣ်ပိာ်ခွါတဂၤဒၣ်အတၢ်နာ်သက့ဒီး,တမ့ၢ်ဘၣ်ပှၤအဲၣ်ဘၢအဝၤဘၣ်.

4 ဒ်န့ၣ်အသိး,ယဒီပုၢ်ဝဲၢ်သ့ၣ်ဧၢ,သုဝဲဒၣ်အံၤ,သုသံသဒၣ်ကွံာ်တ့ၢ်စ့ၢ်ကီးတၢ်သိၣ်တၢ်သီလၢခရံာ်အနီၢ်ခိအဃိ,ဒ်သိးသုကကဲထီၣ်ပှၤတဂၤဒၣ်လၢအဂဲၤဆၢထၢၣ်က့ၤလၢတၢ်သံန့ၣ်အတၢ်,ဒ်သိးပကသၣ်ထီၣ်လၢယွၤအဂီၢ်လီၤ. 5 အဂ့ၢ်ဒ်အံၤ,လၢပအိၣ်လၢတၢ်ဖံးတၢ်ညၣ်အပူၤန့ၣ်,တၢ်ဒဲးဘးအတၢ်ဂဲၤလၢတၢ်သိၣ်တၢ်သီအဃိတဖၣ်န့ၣ်,မၤတၢ်လၢပဂီၤတဖၣ်အပူၤ,ဒ်သိးအကသၣ်ထီၣ်လၢတၢ်သံအဂီၢ်လီၤ. 6 မ့မ့ၢ်ခဲကနံၣ်အံၤ,ပသံသဒၣ်ကွံာ်တၢ်လၢအဟံးဃာ်ပှၤ,ဒီးပထူၣ်ဖျဲးဒီးတၢ်သိၣ်တၢ်သီသတးဒီး,ပကဲတၢ်အသီဘၣ်ဃးဒီးသးန့ၣ်အကုၢ်အပှၤ,ဒီးတမ့ၢ်ဘၣ်လၢတၢ်အလီၢ်လံၤဘၣ်ဃးဒီးလံာ်ဖျၢၣ်န့ၣ်ဘၣ်.

7 မၤသးဒ်န့ၣ်ဒီး,ပကစံးဒ်လဲၣ်.တၢ်သိၣ်တၢ်သီန့ၣ်မ့ၢ်တၢ်ဒဲးဘးဧါ.မ်အသုတမၤအသးဒ်န့ၣ်တဂ့ၤ.မ့တမ့ၢ်ဘၣ်တၢ်သိၣ်တၢ်သီဒီး,ယတသ့ၣ်ညါဘၣ်တၢ်ဒဲးဘးဘၣ်.အဂ့ၢ်ဒ်အံၤ,တၢ်သိၣ်တၢ်သီမ့ၢ်တစံးဘၣ်ဝဲ,သုတသးကွံတၢ်တဂ့ၤန့ၣ်ဒီး,ယတသ့ၣ်ညါဘၣ်တၢ်သးကွံဘၣ်. 8 ဘၣ်ဆၣ်ဒီးတၢ်ဒဲးဘးဟံးန့ၢ်အလီၢ်လၢတၢ်မၤလိာ်,ဒီးမၤအိၣ်ထီၣ်ကယဲၢ်တၢ်သးကွံလၢယပူၤလီၤ.အဂ့ၢ်ဒ်အံၤ,ဖဲတၢ်သိၣ်တၢ်သီတအိၣ်ဘၣ်ဒီး,တၢ်ဒဲးဘးသံဝဲလီၤ.

9 လၢထံးလၢသီန့ၣ်,တၢ်သိၣ်တၢ်သီတအိၣ်ဘၣ်ဒီး,ယမူယဲလီၤ.ဘၣ်ဆၣ်ဒီးတုၤတၢ်မၤလိာ်ဟဲထီၣ်ဒီး,တၢ်ဒဲးဘးမူထီၣ်ဝဲ,ဒီးယသံယဲလီၤ. 10 ဒီးတၢ်မၤလိာ်ဘၣ်ဃးဒီးတၢ်မူန့ၣ်,ယထံၣ်န့ၢ်လၢအဘၣ်ဃးဒီးတၢ်သံလၢယဂီၢ်လီၤ. 11 အဂ့ၢ်ဒ်အံၤ,တၢ်ဒဲးဘးဟံးန့ၢ်အလီၢ်လၢတၢ်မၤလိာ်,ဒီးလီန့ၢ်ယၤ,ဒီးမၤသံကွံာ်ယၤလၢအီၤလီၤ.

12 မၤသးဒ်န့ၣ်ဒီးတၢ်သိၣ်တၢ်သီန့ၣ်,မ့ၢ်အစီအဆှံဒီးတၢ်မၤလိာ်န့ၣ်မ့ၢ်အစီအဆှံဒီးအတီအလိၤဒီးအဂ့ၤအဝါလီၤ.

13 မၤသးဒ်န့ၣ်ဒီးတၢ်အဂ့ၤအဝါန့ၣ်,မ့ၢ်အကဲထီၣ်တၢ်သံလၢယဂီၢ်န့ၣ်ဧါမ်အသုတမၤအသးဒ်န့ၣ်တဂ့ၤ.မ့မ့ၢ်တၢ်ဒဲးဘး,ဒ်သိးအကအိၣ်ဖျါလၢအမ့ၢ်တၢ်ဒဲးဘးဒီးမၤသံယၤလၢတၢ်ဂ့ၤ,ဒ်သိးတၢ်ဒဲးဘးကကဲထီၣ်တၢ်ဒဲးဘးအဒိၣ်အမုၢ်,လၢတၢ်မၤလိာ်အဃိလီၤ.

14 အဂ့ၢ်ဒ်အံၤ,ပသ့ၣ်ညါလၢတၢ်သိၣ်တၢ်သီဘၣ်ဃးဒီးသးန့ၣ်လီၤ.မ့မ့ၢ်ယဲဒၣ်အံၤ,ယဘၣ်ဃးဒီးတၢ်ဖံးတၢ်ညၣ်,ယဘၣ်တၢ်ဆါကွံာ်ယၤဆူတၢ်ဒဲးဘးအစုပူၤလီၤ.

15 အဂ့ၢ်ဒ်အံၤ,တၢ်လၢယမၤန့ၣ်,ယတသ့ၣ်ညါဘၣ်.အဂ့ၢ်ဒ်အံၤ,တၢ်လၢယဆၢန့ၣ်ယတမၤဘၣ်.မ့မ့ၢ်တၢ်လၢယသးဟ့န့ၣ်ယမၤလီၤ. 16 ဘၣ်ဆၣ်ဒီးယမ့ၢ်မၤတၢ်လၢယတဆၢဘၣ်န့ၣ်ဒီး,ယအၢၣ်လီၤအီလီၤလၢတၢ်သိၣ်တၢ်သီမ့ၢ်တၢ်ဂ့ၤတၢ်ဝါလီၤ. 17 ဒီးခဲကနံၣ်အံၤ,တမ့ၢ်လၢၤဘၣ်ယၤလၢအမၤတၢ်န့ၣ်ဘၣ်.မ့ၢ်တၢ်ဒဲးဘးလၢအအိၣ်ဝဲဆိးဝဲလၢယပူၤလီၤ.

18 အဂ့ၢ်ဒ်အံၤ,ယသ့ၣ်ညါလၢတၢ်ဂ့ၤတအိၣ်တဆိးဘၣ်လၢယပူၤ,ဒ်ပစံးတၢ်အသိး,လၢယဖံးယညၣ်အပူၤလီၤ.အဂ့ၢ်ဒ်အံၤ,ဆၢတၢ်ဂ့ၤန့ၣ်,အိၣ်ဒီးယၤလီၤ.မ့မ့ၢ်မၤတၢ်ဂ့ၤန့ၣ်,ယတထံၣ်န့ၢ်ဘၣ်. 19 အဂ့ၢ်ဒ်အံၤ,တၢ်ဂ့ၤလၢယဆၢန့ၣ်,ယတမၤဘၣ်,မ့မ့ၢ်တၢ်အၢလၢယတဆၢဘၣ်န့ၣ်,ယမၤလီၤ. 20 ဘၣ်ဆၣ်ဒီးတၢ်လၢယတဆၢဘၣ်န့ၣ်,ယမ့ၢ်မၤဒီး,တမ့ၢ်လၢၤဘၣ်ယမၤယဲဘၣ်,မ့ၢ်တၢ်ဒဲးဘးလၢအအိၣ်ဝဲဆိးဝဲလၢယပူၤလီၤ.

21 မၤသးဒ်န့ၣ်ဒီး,ယထံၣ်န့ၢ်တၢ်သိၣ်တၢ်သီတမံၤအံၤ,တုၤယဆၢမၤတၢ်ဂ့ၤဒီး,တၢ်အၢအိၣ်ဒီးယၤလီၤ. 22 အဂ့ၢ်ဒ်အံၤ,ဖဲဒၣ်ပှၤလၢညါခီ,ယမုာ်လၤလၢယွၤအတၢ်သိၣ်တၢ်သီလီၤ. 23 ဘၣ်ဆၣ်ဒီးယထံၣ်တၢ်သိၣ်တၢ်သီအဂၤ,အိၣ်လၢယဂီၤတဖၣ်အပူၤ,လၢအဒုးလိာ်ယၤလိာ်အသးဒီးယသးအတၢ်သိၣ်တၢ်သီ,ဒီးဒုးကဲကုၢ်ယၤလၢတၢ်ဒဲးဘးအတၢ်သိၣ်တၢ်သီအိၣ်လၢယဂီၤတဖၣ်အပူၤလီၤ. 24 ပှၤအဖှီၣ်ယၤအံၤဧၢ,မ့ၢ်မတၤကထုးထီၣ်ကွံာ်ယၤလၢတၢ်သံအံၤအကစၢ်မိၢ်ပှၢ်တဂၤလဲၣ်. 25 ယစံးထီၣ်ပတြၢၤယွၤအဘျုးအဖှိၣ်လၢပကစၢ်ယ့ၣ်ရှူးခရံာ်အဃိလီၤ.မၤသးဒ်န့ၣ်ဒီးယကစၢ်ဒၣ်ယဲအံၤ,လၢသးန့ၣ်,ယမ့ၢ်ယွၤအတၢ်သိၣ်တၢ်သီအကုၢ်အပှၤလီၤ.မ့မ့ၢ်လၢတၢ်ဖံးတၢ်ညၣ်န့ၣ်,ယမ့ၢ်တၢ်ဒဲးဘးအတၢ်သိၣ်တၢ်သီအကုၢ်အပှၤလီၤ.