‏ Romans 8

1မၤသးဒ်န့ၣ်ဒီးခဲကနံၣ်အံၤ,ပှၤလၢယ့ၣ်ရှူးခရံာ်အပူၤတဖၣ်န့ၣ်, 2တၢ်စံၣ်ညီၣ်ဃၣ်တအိၣ်ဘၣ်ဒီးအီၤဘၣ်.အဂ့ၢ်ဒ်အံၤ,သးအတၢ်သိၣ်တၢ်သီဘၣ်ဃးဒီးတၢ်မူလၢယ့ၣ်ရှူးခရံာ်အပူၤန့ၣ်,မၤထူၣ်ဖျဲးယၤလၢတၢ်သိၣ်တၢ်သီဘၣ်ဃးဒီးတၢ်ဒဲးဘးဒီးတၢ်သံန့ၣ်လီၤ. 3အဂ့ၢ်ဒ်အံၤ,တၢ်လၢတၢ်သိၣ်တၢ်သီမၤတသ့ဘၣ်,လၢအဂံၢ်အဘါစၢ်လၢတၢ်ဖံးတၢ်ညၣ်အဃိန့ၣ်,ယွၤမၢလီၤအဖိခွါဒၣ်ဝဲအိၣ်ဒီးတၢ်ဒဲးဘးအဖံးအညၣ်အက့ၢ်အဂီၤ,ဒီးလၢတၢ်ဒဲးဘးအဃိ,ဒီးစံၣ်ညီၣ်ဃၣ်တၢ်ဒဲးဘးလၢတၢ်ဖံးတၢ်ညၣ်အပူၤ, 4ဒ်သိးတၢ်သိၣ်တၢ်သီအတၢ်မၤလိာ်အတီအလိၤကလၢထီၣ်ပှဲၤထီၣ်လၢပဝဲဒၣ်အပူၤ,လၢအလဲၤတၢ်,ဖဲဒၣ်တၢ်ဖံးတၢ်ညၣ်တမ့ၢ်ဘၣ်,မ့ၢ်ဖဲဒၣ်သးန့ၣ်လီၤ. 5အဂ့ၢ်ဒ်အံၤ,ပှၤဘၣ်ဃးဒီးတၢ်ဖံးတၢ်ညၣ်တဖၣ်န့ၣ်,သးအိၣ်တၢ်ဖံးတၢ်ညၣ်အတၢ်လီၤ.မ့မ့ၢ်ပှၤဘၣ်ဃးဒီးသးတဖၣ်န့ၣ်,လၢသးန့ၣ်အတၢ်လီၤ. 6အဂ့ၢ်ဒ်အံၤ,တၢ်ဖံးတၢ်ညၣ်အသးအိၣ်တၢ်န့ၣ်မ့ၢ်တၢ်သံလီၤ.မ့မ့ၢ်သးအသးအိၣ်တၢ်န့ၣ်,မ့ၢ်တၢ်မူဒီးတၢ်ဃူတၢ်ဖိးလီၤ. 7အဂ့ၢ်ဒ်အံၤ,တၢ်ဖံးတၢ်ညၣ်အသးအိၣ်တၢ်န့ၣ်,မ့ၢ်တၢ်ထီဒါယွၤလီၤ.အဂ့ၢ်ဒ်အံၤ,တစူၢ်ဘၣ်ယွၤအတၢ်သိၣ်တၢ်သီဘၣ်.အဂ့ၢ်ဒ်အံၤ,စူၢ်ဝဲတကဲဘၣ်လီၤ. 8ဒီးပှၤအိၣ်လၢတၢ်ဖံးတၢ်ညၣ်အပူၤတဖၣ်န့ၣ်,မၤတၢ်ဘၣ်ယွၤအသးတသ့ဘၣ်.

9မ့မ့ၢ်သုဝဲသ့ၣ်အံၤ,ယွၤအသးမ့ၢ်အိၣ်ဝဲဆိးဝဲလၢသုပူၤဒီး,သုတအိၣ်ဘၣ်လၢတၢ်ဖံးတၢ်ညၣ်အပူၤဘၣ်,မ့ၢ်သုအိၣ်လၢသးန့ၣ်အပူၤလီၤ.ဒီးပှၤလၢအတအိၣ်ဘၣ်ဒီးခရံာ်အသးဘၣ်တဂၤဂၤန့ၣ်,တမ့ၢ်ဘၣ်ခရံာ်အတၢ်ဘၣ်. 10မ့မ့ၢ်ခရံာ်မ့ၢ်အိၣ်လၢသုပူၤဒီး,ပနီၢ်ခိသံလၢတၢ်ဒဲးဘးအဃိဘၣ်ဆၣ်ဒီး,ပသးမူလၢတၢ်တီတၢ်လိၤအဃိလီၤ. 11ဒီးပှၤလၢအဒုးဂဲၤဆၢထၢၣ်က့ၤယ့ၣ်ရှူးလၢတၢ်သံတဂၤ,အသးမ့ၢ်အိၣ်ဝဲဆိးဝဲလၢသုပူၤဒီး,ပှၤလၢအဒုးဂဲၤဆၢထၢၣ်က့ၤခရံာ်လၢတၢ်သံန့ၣ်,ကမၤမူထီၣ်က့ၤသုနီၢ်ခိလၢအသံသ့အံၤ,လၢအသးလၢအအိၣ်ဝဲဆိးဝဲလၢသုပူၤအဃိလီၤ.

12မၤသးဒ်န့ၣ်ဒီး,ပုၢ်သ့ၣ်ဝဲၢ်သ့ၣ်ဧၢ,ဒ်သိးပကမူဖဲဒၣ်တၢ်ဖံးတၢ်ညၣ်အံၤဒီး,ပကမၢ်တအိၣ်ဘၣ်လၢတၢ်ဖံးတၢ်ညၣ်အလိၤဘၣ်. 13အဂ့ၢ်ဒ်အံၤ,သုမ့ၢ်မၤဖဲဒၣ်တၢ်ဖံးတၢ်ညၣ်ဒီး,သုကသံလီၤ.မ့မ့ၢ်သုမ့ၢ်မၤသံသုနီၢ်ခိအတၢ်မၤလၢသးန့ၣ်ဒီး,သုကမူလီၤ. 14အဂ့ၢ်ဒ်အံၤ,ဖဲဒၣ်ပှၤလၢယွၤအသးဆှၢအီၤတဖၣ်န့ၣ်,မ့ၢ်ယွၤအဖိလီၤ. 15အဂ့ၢ်ဒ်အံၤ,သုတဒိးန့ၢ်ကုၢ်အသးဒ်သိးသုကဘၣ်ပျံၤဘၣ်ဖုးကဒီးန့ၣ်ဘၣ်.မ့ၢ်သုဒိးန့ၢ်ဖိအသးလၢပကိးထီၣ်အးဘၤပၢ်ဧၢ,လၢအီၤလီၤ. 16တၢ်လၢသးန့ၣ်,အကစၢ်ဒၣ်ဝဲအုၣ်ဃုာ်အသးဒီးပသးလၢပမ့ၢ်ယွၤအဖိတဖၣ်လီၤ. 17ဒီးပမ့မ့ၢ်အဖိဒီး,ပမ့ၢ်စ့ၢ်ကီးပှၤန့ၢ်ဘၣ်သါတၢ်,ယွၤအပှၤန့ၢ်ဘၣ်သါတၢ်,ပှၤန့ၢ်သါဃုာ်တၢ်ဒီးခရံာ်,ဒ်သိးပမ့ၢ်ဘၣ်ဃုာ်တၢ်နးတၢ်ဖှီၣ်ဒီးအီၤဒီး,ပကဘၣ်ဃုာ်တၢ်လၤကပီၤဒီးအီၤစ့ၢ်ကီးလီၤ.

18အဂ့ၢ်ဒ်အံၤ,ယပာ်ယသးလၢတၢ်နးတၢ်ဖှီၣ်လၢအကတီၢ်,ဖဲအံၤ,တဂ့ၤ[ထိၣ်သတြီၤ]ဘၣ်ဒီးတၢ်လၤကပီၤဆူညါလၢအကအိၣ်ဖျါလၢပလိၤန့ၣ်ဘၣ်. 19အဂ့ၢ်ဒ်အံၤ,တၢ်ဘၣ်တ့န့ၣ်,အတၢ်ကွၢ်လၢ်သပှၢ်ပှၢ်န့ၣ်ကွၢ်လၢ်ယွၤအဖိခွါတဖၣ်အတၢ်အိၣ်ဖျါအကျဲလီၤ. 20အဂ့ၢ်ဒ်အံၤ,တၢ်ဘၣ်တ့န့ၣ်ဘၣ်တၢ်ပာ်အီၤလၢတၢ်ကလီကလီအဖီလာ်,ဖဲအသးတမ့ၢ်ဘၣ်,မ့ၢ်ဖဲပှၤအသးလၢအပာ်အီၤလၢတၢ်မုၢ်လၢ်အပူၤလီၤ. 21အဂ့ၢ်ဒ်အံၤ,တၢ်ဘၣ်တ့ဒၣ်လဲာ်န့ၣ်ကထူၣ်ဖျဲးဒီးတၢ်အုၣ်တၢ်ကျၣ်အတၢ်ကဲကုၢ်,ဒီးကလဲၤနုာ်ဆူယွၤအဖိတဖၣ်အတၢ်ထူၣ်ဖျဲးအလၤကပီၤအပူၤလီၤ. 22အဂ့ၢ်ဒ်အံၤ,ပသ့ၣ်ညါလၢတၢ်ဘၣ်တ့ခဲလၢာ်,ကအုကစွါဃုာ်ဒီးဆိးကဲးဃုာ်,တုၤခဲကနံၣ်အံၤလီၤ. 23ဒီးထဲန့ၣ်ဧိၤတမ့ၢ်ဘၣ်.မ့မ့ၢ်ပှၤအိၣ်ဒီးသးန့ၣ်အတၤသၣ်ဆိတဖၣ်,ပဝဲဒၣ်အံၤ,ပကစၢ်ဒၣ်ပဝဲဒၣ်လဲာ်,ပကအုကစွါစ့ၢ်ကီးလၢပသးကံၢ်ပူၤ,ဒီးကွၢ်လၢ်ဖိအလီၢ်,(ဒ်ပစံးတၢ်အသိး)ပနီၢ်ခိအတၢ်ထူၣ်ဖျဲးအကျဲန့ၣ်လီၤ. 24အဂ့ၢ်ဒ်အံၤ,ပတုၤလၢတၢ်အုၣ်က့ၤခီၣ်က့ၤပှၤလၢတၢ်မုၢ်လၢ်လီၤ.မ့မ့ၢ်တၢ်မုၢ်လၢ်လၢပထံၣ်ဘၣ်အီၤန့ၣ်,တမ့ၢ်ဘၣ်တၢ်မုၢ်လၢ်ဘၣ်.အဂ့ၢ်ဒ်အံၤ,တၢ်လၢပှၤတဂၤထံၣ်ဘၣ်အီၤန့ၣ်,ဘၣ်မနုၤလၢအမုၢ်လၢ်စ့ၢ်ကီးဝဲလဲၣ်. 25မ့မ့ၢ်တၢ်လၢပတထံၣ်ဘၣ်န့ၣ်,ပမ့ၢ်မုၢ်လၢ်ဒီး,ပကွၢ်လၢ်အကျဲလၢတၢ်ဝံသးစူၤလီၤ. 26ဒ်န့ၣ်အသိး,သးန့ၣ်မၤစၢၤပဂံၢ်စၢ်ပဘါစၢ်တဖၣ်လီၤ.အဂ့ၢ်ဒ်အံၤ,တၢ်လၢပဂ့ၤဃ့ဘါထုကဖၣ်တၢ်န့ၣ်,ပတသ့ၣ်ညါဘၣ်.မ့မ့ၢ်သးန့ၣ်အကစၢ်ဒၣ်ဝဲ,ဃ့န့ၢ်ပဂီၢ်အိၣ်ဒီးတၢ်ကအုကစွါလၢပစံးဘၣ်တဲဘၣ်တသ့ဘၣ်လီၤ. 27ဒီးပှၤလၢအဃုကွၢ်သးတဖၣ်န့ၣ်,သ့ၣ်ညါသးန့ၣ်အတၢ်ဆိကမိၣ်တၢ်လီၤ.အဂ့ၢ်ဒ်အံၤ,ဃ့န့ၢ်ပှၤစီဆှံအဂီၢ်ဖဲဒၣ်ယွၤအသးလီၤ.

28ဒီးပသ့ၣ်ညါလၢပှၤလၢအအဲၣ်ယွၤ,ပှၤလၢအဘၣ်တၢ်ကိးအီၤ,ဒ်တၢ်ကူၣ်ပာ်အသိးတဖၣ်န့ၣ်,တၢ်ခဲလၢာ်မၤဃုာ်အသး,လၢတၢ်ဂ့ၤအဂ့ၢ်လၢအဂီၢ်လီၤ. 29အဂ့ၢ်ဒ်အံၤ,ပှၤလၢအသ့ၣ်ညါပာ်ဝဲတဖၣ်န့ၣ်,စံၣ်ညီၣ်ပာ်စ့ၢ်ကီးဝဲလၢအကလီၤဂာ်ဒီးအဖိခွါအက့ၢ်အဂီၤ,ဒ်သိးအဝဲဒၣ်ကကဲထီၣ်ဝဲၢ်ကိလၢဒီပုၢ်ဝဲၢ်အါဂၤအကျါန့ၣ်လီၤ. 30ဒီးပှၤလၢအစံၣ်ညီၣ်ပာ်ဝဲတဖၣ်န့ၣ်,ကိးက့ၤစ့ၢ်ကီးဝဲ,ဒီးပှၤလၢအကိးက့ၤဝဲတဖၣ်န့ၣ်,ပာ်တီပာ်လိၤစ့ၢ်ကီးဝဲ,ဒီးပှၤလၢအပာ်တီပာ်လိၤဝဲတဖၣ်န့ၣ်,မၤလၤကပီၤစ့ၢ်ကီးဝဲလီၤ.

31မၤသးဒ်န့ၣ်ဒီး,ပကစံးလၢတၢ်န့ၣ်တဖၣ်ဒ်လဲၣ်.ယွၤမ့ၢ်အိၣ်လၢပဂီၢ်ဒီး,မ့ၢ်မတၤကထီဒါပှၤတဂၤလဲၣ်. 32ပှၤလၢအတသးလီဘၣ်အဖိခွါဒၣ်ဝဲဘၣ်,ဒီးဟ့ၣ်လီၤကွံာ်အီၤလၢပဝဲဒၣ်ခဲလၢာ်အဂီၢ်န့ၣ်,တဟ့ၣ်ကလီဃုာ်ဒီးအီၤလၢပတၢ်ခဲလၢာ်စ့ၢ်ကီးဘၣ်ဒီး,ကအိၣ်ဝဲဒ်လဲၣ်. 33မ့ၢ်မတၤကပာ်တၢ်ကမၣ်လၢပှၤလၢယွၤဃုထၢအီၤအလိၤတဂၤလဲၣ်.ပှၤလၢအပာ်တီပာ်လိၤတၢ်န့ၣ်မ့ၢ်ယွၤလီၤ. 34မ့ၢ်မတၤကစံၣ်ညီၣ်ဃၣ်တၢ်တဂၤလဲၣ်.ပှၤလၢအဒိးသံအသးလၢပဂီၢ်န့ၣ်,မ့ၢ်ခရံာ်လီၤ.လၢန့ၣ်အခိၣ်တလိာ်,ဂဲၤဆၢထၢၣ်က့ၤဝဲ,ဒီးဆ့ၣ်နီၤဝဲလၢယွၤအစုထွဲ,ဒီးဃ့တၢ်လၢပဂီၢ်လီၤ. 35မ့ၢ်မတၤကမၤလီၤဖးပှၤဒီးခရံာ်အတၢ်အဲၣ်တၢ်ကွံတဂၤလဲၣ်.မ့ၢ်တၢ်နးတၢ်ဖှီၣ်,တၢ်ကိၢ်တၢ်ဂီၤ,တၢ်မၤအၢမၤနးပှၤ,တၢ်သၣ်ဝံၤပသး,တၢ်အိၣ်ဘ့ၣ်ဆ့,တၢ်ပျံၤတၢ်ဖုး,ဃဲာ်ဧိၤနးဧိၤဧါ. 36(ဒ်တၢ်ကွဲးအသးအသိးန့ၣ်),ပဝဲဒၣ်အံၤ,ပဘၣ်တၢ်မၤသံပှၤလၢနဃိသ့သ့တနံၤလီၤ.တၢ်ပာ်ပှၤဒ်သိလၢအကဘၣ်တၢ်မၤသံအီၤအသိးန့ၣ်လီၤ. ▼

▼8:36 စံး.၄၄း၂၂

37မ့မ့ၢ်လၢတၢ်န့ၣ်တဖၣ်ခဲလၢာ်အပူၤ,ပမ့ၢ်ပှၤလၢအမၤနၢၤတၢ်လၢလၢပှဲၤပှဲၤ,လၢပှၤလၢအအဲၣ်ပှၤအဃိလီၤ. 38အဂ့ၢ်ဒ်အံၤ,ယနာ်လၢတၢ်သံမ့ၢ်ဂ့ၤ,တၢ်မူမ့ၢ်ဂ့ၤ,ကလူးမ့ၢ်ဂ့ၤ,တၢ်အဒိၣ်အခိၣ်မ့ၢ်ဂ့ၤ,တၢ်အစိအကမီၤမ့ၢ်ဂ့ၤ,တၢ်အိၣ်မ့ၢ်ဂ့ၤ,တၢ်လၢအကအိၣ်မ့ၢ်ဂ့ၤ, 39တၢ်လၢထးခီမ့ၢ်ဂ့ၤ,တၢ်လၢလာ်ခီမ့ၢ်ဂ့ၤ,တၢ်ဘၣ်တ့အဂုၤအဂၤမ့ၢ်ဂ့ၤ,မၤလီၤဖးပှၤဒီးယွၤအတၢ်အဲၣ်တၢ်ကွံလၢအအိၣ်လၢပကစၢ်ယ့ၣ်ရှူးခရံာ်အပူၤ,တသ့ဘၣ်လီၤ.