Rom 9 | KswSKMB | STEP | ယသးလၢအသ့ၣ်ညါဒၣ်တၢ်အုၣ်အသးလၢယဂီၢ်လၢသးစီဆှံအပူၤ,လၢယတကတိၤကဘျံးကဘျၣ်ဘၣ်.ယစံးတၢ်မ့ၢ်တၢ်တီလၢခရံာ်အပူၤ,

‏ Romans 9

1 ယသးလၢအသ့ၣ်ညါဒၣ်တၢ်အုၣ်အသးလၢယဂီၢ်လၢသးစီဆှံအပူၤ,လၢယတကတိၤကဘျံးကဘျၣ်ဘၣ်.ယစံးတၢ်မ့ၢ်တၢ်တီလၢခရံာ်အပူၤ, 2 လၢယသးအုးဒိၣ်မး,ဒီးယသးကိၢ်တဘိယူၢ်ဃီလီၤ. 3 အဂ့ၢ်ဒ်အံၤ,ယဆၢသ့လၢယကစၢ်ဒၣ်ယဲကဘၣ်ဆိၣ်အၢကွံာ်လၢခရံာ်အပူၤ,လၢပှၤဒီဘူးဒီတံၢ်ဒီးယၤဒ်တၢ်ဖံးတၢ်ညၣ်အသိး,ယဒီပုၢ်ဝဲၢ်တဖၣ်အဂီၢ်လီၤ. 4 အဝဲသ့ၣ်တဖၣ်န့ၣ်မ့ၢ်ပှၤအံၣ်စရ့လးဖိ,ဒီးတၢ်ဘၣ်ဃးဒီးအီၤ,မ့ၢ်တၢ်ပာ်အီၤလၢဖိအလီၢ်,ဒီးတၢ်လၤကပီၤ,ဒီးတၢ်အၢၣ်လီၤအီလီၤတဖၣ်,ဒီးတၢ်ဟ့ၣ်လီၤတၢ်သိၣ်တၢ်သီ,ဒီးတၢ်မၤယွၤအတၢ်မၤ,ဒီးတၢ်စံးပာ်တဖၣ်န့ၣ်လီၤ. 5 ပၢ်သ့ၣ်တဖၣ်န့ၣ်,မ့ၢ်အဝဲသ့ၣ်အတၢ်,ဒီးဖဲဒၣ်တၢ်ဖံးတၢ်ညၣ်န့ၣ်ခရံာ်,လၢအမ့ၢ်တၢ်ခဲလၢာ်အဖီခိၣ်,ယွၤလၢအဘၣ်ဆိၣ်ဂ့ၤအစိၤစိၤအဃၣ်ဃၣ်တဂၤ,ဟဲလၢအီၤလီၤ.အၤမ့ၣ်.

6 ဘၣ်ဆၣ်ဒီးတမ့ၢ်ဒ်ယွၤအကလုၢ်ဟးဂီၤလံအသိးဘၣ်.အဂ့ၢ်ဒ်အံၤ,ပှၤဘၣ်ဃးဒီးအံၣ်စရ့လး,တမ့ၢ်ဘၣ်ပှၤအံၣ်စရ့လးဖိခဲလၢာ်ဘၣ်. 7 ဒီးမ့ၢ်စီၤအၤဘြၤဟၣ်အချံအသၣ်ဘၣ်ဆၣ်ဒီး,တမ့ၢ်ဘၣ်ဖိခဲလၢာ်ဘၣ်.မ့မ့ၢ်လၢစီၤအံၤစဲးအပူၤ,တၢ်ကကိးနချံနသၣ်လီၤ. ^{▼▼9:7 ၁မိၤ.၂၁း၁၂} 8 ဒ်ပစံးတၢ်အသိး,ဖိလၢအဘၣ်ဃးဒီးတၢ်ဖံးတၢ်ညၣ်န့ၣ်,တမ့ၢ်ဘၣ်ယွၤအဖိဘၣ်.မ့မ့ၢ်ဖိဘၣ်ဃးဒီးတၢ်စံးပာ်တဖၣ်န့ၣ်,တၢ်ပာ်ဝဲလၢအချံအသၣ်လီၤ. 9 အဂ့ၢ်ဒ်အံၤ,တၢ်စံးပာ်အတၢ်ကတိၤမ့ၢ်အအံၤ,ဖဲအကတီၢ်အံၤဘၣ်ဒီး,ယကဟဲ,ဒီးနီၢ်စၤရါကအိၣ်ဒီးအဖိခွါလီၤ. ^{▼▼9:9 ၁မိၤ.၁၈း၁၀,၁၄} 10 ဒီးထဲန့ၣ်ဧိၤတမ့ၢ်ဘၣ်.မ့မ့ၢ်တုၤနီၢ်ရံးဘကၤဒၢထီၣ်ဝဲလၢပှၤတဂၤ,ပပၢ်စီၤအံၤစဲးတဂၤန့ၣ်, 11 အဂ့ၢ်ဒ်အံၤ,လၢဖိသၣ်တချုးအိၣ်ဖျဲၣ်ဒံးဘၣ်,ဒီးတၢ်ဂ့ၤမ့ၢ်ဂ့ၤ,တၢ်အၢမ့ၢ်ဂ့ၤ,တချုးမၤဒံးဘၣ်ဒီး,ဒ်သိးယွၤအတၢ်ကူၣ်ပာ်ဒ်တၢ်ဃုထၢအသိးကအိၣ်ဝဲဆိးဝဲလၢတၢ်မၤအဃိတမ့ၢ်ဘၣ်.မ့ၢ်လၢပှၤလၢအကိးန့ၢ်တၢ်အဃိဒီး, 12 တၢ်စံးဘၣ်အီၤ,အဒိၣ်ကမၤအဆံးတဂၤအတၢ်လီၤ. ^{▼▼9:12 ၁မိၤ.၂၅း၂၃} 13 ဒ်တၢ်ကွဲးအသးအသိးန့ၣ်,

ယအဲၣ်စီၤယၤကိာ်,
မ့မ့ၢ်စီၤဧ့ၡီၤန့ၣ်,ယသးဟ့အီၤလီၤ. ^{▼▼9:13 မၤ.၁း၂}

14 မၤသးဒ်န့ၣ်ဒီးပကစံးဒ်လဲၣ်.တၢ်တတီတလိၤဘၣ်အိၣ်ဒီးယွၤန့ၣ်ဧါ.မ်အသုတမၤအသးဒ်န့ၣ်တဂ့ၤ. 15 အဂ့ၢ်ဒ်အံၤ,တၢ်စံးဘၣ်စီၤမိၤရှ့,ဖဲဒၣ်ယကသးကညီၤပှၤတဂၤဂၤန့ၣ်,ယသးကညီၤအီၤလီၤ.ဒီးဖဲဒၣ်ယကသးအိၣ်ပှၤတဂၤဂၤန့ၣ်,ယသးအိၣ်အီၤလီၤ. ^{▼▼9:15 ၂မိၤ.၃၃း၁၉} 16 မၤသးဒ်န့ၣ်ဒီး,လၢပှၤတိာ်တၢ်မ့ၢ်ဂ့ၤ,ဃ့ၢ်တၢ်မ့ၢ်ဂ့ၤ,တမ့ၢ်ဘၣ်,မ့ၢ်လၢယွၤလၢအသးကညီၤတၢ်လီၤ. 17 အဂ့ၢ်ဒ်အံၤ,တၢ်ကွဲးအသးစံးဘၣ်ဖၤရိၤ,လၢတၢ်အံၤတမံၤဒၣ်လဲာ်အဃိ,ယဒုးအိၣ်ထီၣ်နၤဒ်သိးယကဒုးနဲၣ်,ယစိယကမီၤလၢနၤ,ဒီးဒ်သိးယကဒုးဟူထီသါလီၤယမံၤလၢဟီၣ်ခိၣ်ဒီဘ့ၣ်ညါန့ၣ်လီၤ. ^{▼▼9:17 ၂မိၤ.၉း၁၆} 18 မၤသးဒ်န့ၣ်ဒီး,သးကညီၤပှၤဖဲဒၣ်အသး,ဒီးဖဲဒၣ်အသးန့ၣ်,မၤကိၤပှၤအသးလီၤ.

19 မ့မ့ၢ်ဒ်န့ၣ်ဒီးနကစံးဘၣ်ယၤ,ဘၣ်မနုၤလၢအပာ်ဒံးတၢ်ကမၣ်လဲၣ်.အဂ့ၢ်ဒ်အံၤ,မ့ၢ်မတၤတြီအသးန့ၣ်တဂၤလဲၣ်. 20 ဘၣ်ဆၣ်ဒီးပှၤကညီဧၢ,ပှၤလၢအကတိၤဆၢယွၤနဲဒၣ်အံၤ,နမ့ၢ်မတၤတဂၤလဲၣ်.တၢ်လၢအဘၣ်တ့န့ၣ်,မ့ၢ်အကစံးဘၣ်ပှၤလၢအတ့အီၤန့ၣ်,နမၤယၤဒ်အံၤဘၣ်မနုၤလဲၣ်,စ့ၢ်ကီးဧါ.

21 ပှၤလၢအတ့သပၢၤန့ၣ်,တ့သပၢၤလၢတၢ်လၤကပီၤအဂီၢ်,ဒီးတ့သပၢၤလၢတၢ်လၤကပီၤတအိၣ်ဘၣ်အဂီၢ်လၢဟီၣ်ခိၣ်တလိၣ်ဃီန့ၣ်,အစိအကမီၤအိၣ်ဝဲ,တမ့ၢ်ဘၣ်ဧါ. 22 ဒီးယွၤအသးမ့ၢ်အိၣ်လၢအကဒုးနဲၣ်အသးထီၣ်,ဒီးလီၣ်ဖျါထီၣ်အစိအကမီၤဒီး,မ့ၢ်ဝံသးစူၤဃဲးဃဲးတၢ်သးထီၣ်အသပၢၤလၢအကတီၤအသးလၢတၢ်ဟးဂီၤအဂီၢ်န့ၣ်, 23 ဒီးဒ်သိးအကလီၣ်ဖျါထီၣ်စ့ၢ်ကီးအလၤထူးအကပီၤတီၤလၢတၢ်သးကညီၤအသပၢၤလၢအကတီၤပာ်ဝဲလၢတၢ်လၤကပီၤအဂီၢ်, 24 ပဝဲဒၣ်အံၤ,လၢအကိးန့ၢ်ပှၤ,ထဲပှၤယူဒၤဖိအကျါဧိၤတမ့ၢ်ဘၣ်,မ့ၢ်ပှၤကလုာ်တဖၣ်စ့ၢ်ကီးဒီး,စံးတၢ်အလီၢ်အိၣ်ဒ်လဲၣ်. 25 ဒ်အစံးဝဲလၢစီၤဟိၤရှ့အပူၤအသိးစ့ၢ်ကီး,

ပှၤလၢအတမ့ၢ်ဘၣ်ယပှၤန့ၣ်,ယကကိးအီၤလၢယပှၤလီၤ.
ဒီးပိာ်မုၣ်လၢယတအဲၣ်ဘၣ်တဂၤန့ၣ်,ယကကိးအီၤလၢပိာ်မုၣ်လၢယအဲၣ်အီၤလီၤ. ^{▼▼9:25 ဟိၤ.၂း၂၃}

26 ဒီးတၢ်မၤအသးလၢအလီၢ်ဖဲတၢ်စံးဘၣ်အီၤ,သုတမ့ၢ်ဘၣ်ယပှၤဘၣ်န့ၣ်,ဖဲန့ၣ်တၢ်ကကိးက့ၤအီၤလၢယွၤလၢအမူဝဲတဂၤ,အဖိခွါတဖၣ်လီၤ. ^{▼▼9:26 ဟိၤ.၁း၁၀} 27 ဒီးစီၤယၡါယၤကိးပသူထီၣ်ဝဲလၢအံၣ်စရ့လးအဂ့ၢ်.

ပှၤအံၣ်စရ့လးဖိအတၢ်ဂံၢ်အါနာ်သက့ဒ်ပီၣ်လဲၣ်အမဲးအဟီၣ်အသိးဘၣ်ဆၣ်ဒီး,တၢ်အဘျဲၣ်ကတုၤလၢတၢ်အုၣ်က့ၤခီၣ်က့ၤအီၤလီၤ.
28 အဂ့ၢ်ဒ်အံၤ,ကမၤဝံၤထီၣ်အတၢ်ဒီး,
ဒီၣ်တဲာ်ကွံာ်ဝဲလၢတၢ်တီတၢ်လိၤလီၤ.
အဂ့ၢ်ဒ်အံၤ,ကစၢ်ကမၤတၢ်အဂ့ၢ်ဒီၣ်တဲာ်အသးလၢဟီၣ်ခိၣ်ချၢလီၤ. ^{▼▼9:28 ၡါ.၁၀း၂၂}
29 ဒီးဒ်စီၤယၡါယၤစံးတ့ၢ်ဝဲလံအသိး,
တၢ်သုးမုၢ်ဂီၢ်မုၢ်အကစၢ်မ့ၢ်တဒုးအိၣ်လီၤတဲာ်ဘၣ်ပှၤလၢတၢ်အချံဒီး,ပကကဲထီၣ်က့ၤဒ်စဒိၣ်အသိး,
ဒီးပကလီၤဂာ်တ့ၢ်လၢဂမိရၤလီၤ. ^{▼▼9:29 ၡါ.၁း၉}

30 မၤသးဒ်န့ၣ်ဒီးပကစံးဒ်လဲၣ်.ပှၤကလုာ်တဖၣ်လၢအတလူၤဘၣ်တၢ်တီတၢ်လိၤဘၣ်န့ၣ်,န့ၢ်ဘၣ်တၢ်တီတၢ်လိၤ,ဒ်ပစံးတၢ်အသိး,မ့ၢ်တၢ်တီတၢ်လိၤဘၣ်ဃးဒီးတၢ်နာ်လီၤ. 31 မ့မ့ၢ်အံၣ်စရ့လးလၢအလူၤတၢ်တီတၢ်လိၤအတၢ်သိၣ်တၢ်သီန့ၣ်,တချုးန့ၢ်ဘၣ်တၢ်တီတၢ်လိၤအတၢ်သိၣ်တၢ်သီဘၣ်. 32 မ့ၢ်အဂ့ၢ်ဒ်လဲၣ်.အဂ့ၢ်ဒ်အံၤ,လူၤဝဲလၢတၢ်နာ်တမ့ၢ်ဘၣ်.မ့ၢ်လၢတၢ်မၤဘၣ်ဃးဒီးတၢ်သိၣ်တၢ်သီလီၤ.အဂ့ၢ်ဒ်အံၤ,လၢၢ်တၢ်ဘၣ်တိၢ်တဖျၢၣ်န့ၣ်,ပှၤတဖၣ်ဘၣ်တိၢ်လၢအီၤ,

33 ဒ်တၢ်ကွဲးအသးအသိးန့ၣ်,ကွၢ်ကွၢ်,ယပာ်လီၤလၢၢ်တၢ်ဘၣ်တိၢ်တဖျၢၣ်,ဒီးလၢၢ်တၢ်လီၤဃံၤတဖျၢၣ်လၢစံယိၣ်အပူၤလီၤ.ဒီးကယဲၢ်ပှၤလၢအစူၢ်က့ၤနာ်က့ၤအီၤတဂၤလၢ်လၢ်န့ၣ်,အမဲာ်တဆှးဘၣ်ဝဲဘၣ်. ^{▼▼9:33 ၡါ.၈း၁၄,၂၈း၁၆.}