Rut 1 | KswSKMB | STEP | ဒီးလၢပှၤစံၣ်ညီၣ်ကွီၢ်တဖၣ်စံၣ်ညီၣ်တၢ်အမုၢ်နံၤတဖၣ်န့ၣ်တၢ်မၤအသးလၢတၢ်သၣ်ဝံၤလီၤဒိအိၣ်ထီၣ်လၢကီၢ်အပူၤန့ၣ်လီၤ.ဒီးမတၤတဂၤလၢဘ့ၤသလ့ဃ့ၣ်ယူဒၤအပူၤလဲၤတၢ်ဒ်သိးအကအိၣ်ဝဲဆိးဝဲလၢမိၤအးအကီၢ်ပူၤ,အဝဲဒၣ်,ဒီးအမါ,ဒီးအဖိခွါခံဂၤလီၤ.

‏ Ruth 1

1 ဒီးလၢပှၤစံၣ်ညီၣ်ကွီၢ်တဖၣ်စံၣ်ညီၣ်တၢ်အမုၢ်နံၤတဖၣ်န့ၣ်တၢ်မၤအသးလၢတၢ်သၣ်ဝံၤလီၤဒိအိၣ်ထီၣ်လၢကီၢ်အပူၤန့ၣ်လီၤ.ဒီးမတၤတဂၤလၢဘ့ၤသလ့ဃ့ၣ်ယူဒၤအပူၤလဲၤတၢ်ဒ်သိးအကအိၣ်ဝဲဆိးဝဲလၢမိၤအးအကီၢ်ပူၤ,အဝဲဒၣ်,ဒီးအမါ,ဒီးအဖိခွါခံဂၤလီၤ. 2 ဒီးပှၤတဂၤန့ၣ်အမံၤမ့ၢ်စီၤအလံၤမ့လ့း,ဒီးအမါအမံၤမ့ၢ်နီၢ်နၤဧမံ,ဒီးအဖိခွါခံဂၤအမံၤမ့ၢ်စီၤမၤဃလိၣ်,ဒီးစီၤကံးလယိၣ်လီၤ.အဝဲသ့ၣ်တဖၣ်န့ၣ်မ့ၢ်ပှၤအ့ဖရးသးဖိလၢဘ့ၤသလ့ဃ့ၣ်ယူဒၤလီၤ.ဒီးဟဲဝဲဆူမိၤအးအကီၢ်ပူၤ,ဒီးအိၣ်ဝဲဆိးဝဲဖဲန့ၣ်လီၤ.

3 ဒီးနီၢ်နၤဧမံအဝၤစီၤအလံၤမ့လ့းသံဝဲ,ဒီးအဝဲဒၣ်အိၣ်လီၤတဲာ်,ဒီးအဖိခွါခံဂၤလီၤ.

4 ဒီးအဝဲသ့ၣ်ဟံးန့ၢ်အမါလၢမိၤအးမုၣ်,ဒီးအဝဲတဂၤအမံၤမ့ၢ်နီၢ်ဧိးရပၤ,ဒီးအဝဲတဂၤအမံၤမ့ၢ်နီၢ်ရူၤသးလီၤ.ဒီးအိၣ်ဝဲဖဲန့ၣ်ဆံဆဲၣ်နံၣ်ဃၣ်ဃၣ်လီၤ.

5 ဒီးစီၤမၤဃလိၣ်ဒီးစီၤကံးလယိၣ်သံစ့ၢ်ကီးဝဲခံဂၤလၢာ်လီၤ.ဒီးပိာ်မုၣ်တဂၤန့ၣ်အိၣ်လီၤတဲာ်လၢအဖိခွါခံဂၤ,ဒီးအဝၤတဂၤအလီၢ်ခံန့ၣ်လီၤ. 6 ဒီးဂဲၤဆၢထၢၣ်ဒီးအဒဲၣ်တဖၣ်,ဒ်သိးအကက့ၤကဒါက့ၤလၢမိၤအးအကီၢ်ပူၤလီၤ.အဂ့ၢ်ဒ်အံၤ,နၢ်ဟူဝဲလၢမိၤအးအကီၢ်ပူၤန့ၣ်လၢယွၤအိၣ်သကိးလံအပှၤဂီၢ်မုၢ်,ဒီးဟ့ၣ်လီၤလံအီၤလၢကိၣ်လီၤ.

7 ဒီးဟးထီၣ်ကွံာ်ဝဲလၢအလီၢ်ဖဲအအိၣ်ဝဲ,ဒီးအဒဲၣ်ခံဂၤအိၣ်ဒီးအီၤ,ဒီးလဲၤပိာ်ကျဲဒ်သိးအကက့ၤကဒါက့ၤဆူကီၢ်ယူဒၤလီၤ.

8 ဒီးနီၢ်နၤဧမံန့ၣ်စံးဘၣ်အဒဲၣ်ခံဂၤ,လဲၤတၢ်,က့ၤကဒါက့ၤတဂၤဆူအမိၢ်အဟံၣ်တဂၤဆူအမိၢ်အဟံၣ်တက့ၢ်.မ်ယွၤမၤသုဒီးတၢ်ဘျုးတၢ်ဖှိၣ်ဒ်သုမၤပှၤအသံတ့ၢ်တဖၣ်ဒီးယၤအသိးန့ၣ်တက့ၢ်. 9 မ်ယွၤဟ့ၣ်သုထံၣ်န့ၢ်တၢ်အိၣ်ဘှံးတဂၤလၢအဝၤအဟံၣ်ပူၤတဂၤလၢအဝၤအဟံၣ်ပူၤန့ၣ်တက့ၢ်.ဒီးနၢမူအီၤ,ဒီးအဝဲသ့ၣ်ထုထီၣ်အကလုၢ်ဒီးဟီၣ်ဝဲလီၤ. 10 ဒီးစံးဘၣ်အီၤပကက့ၤဒီးနၤသပှၢ်တၢၢ်ဆူနပှၤတကလုာ်အအိၣ်န့ၣ်လီၤ.

11 ဒီးနီၢ်နၤဧမံစံးဝဲဒၣ်,က့ၤကဒါက့ၤ,ယဖိမုၣ်သ့ၣ်ဧၢ,သုကလဲၤဒီးယၤဘၣ်မနုၤလဲၣ်.ဖိခွါတဖၣ်လၢယဒၢလီၢ်ပူၤလၢအကကဲထီၣ်သုဝၤတဖၣ်န့ၣ်အိၣ်ဒံးစ့ၢ်ကီးဧါ. 12 က့ၤကဒါက့ၤ,ယဖိမုၣ်သ့ၣ်ဧၢ,အဂ့ၢ်ဒ်အံၤ,န့ၢ်ဝၤန့ၣ်ယသးပှၢ်ကဲၣ်ဆိးလီၤ.ယမ့ၢ်စံး,ယအိၣ်ဒီးတၢ်မုၢ်လၢ်,ယမ့ၢ်န့ၢ်ဝၤခဲမုၢ်နၤ,ဒီးဆံးစၢ်ဖိခွါတဖၣ်ဒီး, 13 သုကအိၣ်ခိးတုၤအဒိၣ်ထီၣ်စ့ၢ်ကီးဧါ.သုတန့ၢ်ဝၤဒီးသုကအိၣ်ကမဲလၢအဂီၢ်တုၤအဒိၣ်န့ၣ်စ့ၢ်ကီးဧါ.တမ့ၢ်ဘၣ်,ယဖိမုၣ်သ့ၣ်ဧၢ,အဂ့ၢ်ဒ်အံၤ,ယဘၣ်တၢ်သးအုးလၢသုဂီၢ်နးနးကလဲာ်လီၤ.အဂ့ၢ်ဒ်အံၤ,ယွၤအစုယူာ်ထီၣ်အသးလၢယလိၤလီၤ.

14 ဒီးအဝဲသ့ၣ်ထုထီၣ်အကလုၢ်,ဒီးဟီၣ်ကဒီးဝဲလီၤ.ဒီးနီၢ်ဧိးရပၤနၢမူအမံၤပှၢ်ပိာ်မုၣ်လီၤ.မ့မ့ၢ်နီၢ်ရူၤသးတဂၤစဲဘူးဒီးအီၤလီၤ.

15 ဒီးအဝဲဒၣ်စံးဘၣ်အီၤ,ကွၢ်ကွၢ်,နခံနဲမုၣ်တဂၤက့ၤက့ၤလံဆူအပှၤတကလုာ်ဒၣ်ဝဲ,ဒီးဆူအကစၢ်တဖၣ်အအိၣ်လံ.က့ၤပိာ်နခံနဲမုၣ်အခံတက့ၢ်.

16 ဒီးနီၢ်ရူၤသးစံးဝဲဒၣ်,ဃ့ကညးယၤဒ်သိးယကလဲၤသဒၣ်နၤ,ဒ်သိးယသုတပိာ်နခံတဂ့ၤန့ၣ်တဂ့ၤ.အဂ့ၢ်ဒ်အံၤ,ဖဲနလဲၤတၢ်ယကလဲၤယဲ,ဒီးဖဲနမံ,ယကမံယဲ,နပှၤတကလုာ်န့ၣ်ကကဲထီၣ်ယပှၤတကလုာ်ဒီးနကစၢ်န့ၣ်ကကဲထီၣ်ယကစၢ်လီၤ. 17 ဖဲနသံ,ယကသံယဲ,ဒီးယကဘၣ်တၢ်ခူၣ်လီၤကွံာ်ယၤဖဲန့ၣ်လီၤ.တၢ်လၢအတမ့ၢ်ဘၣ်တၢ်သံန့ၣ်မ့ၢ်မၤလီၤမုၢ်လီၤဖးယၤဒီးနၤဒီး,မ်ယွၤမၤယၤဒ်န့ၣ်ဒီးအါန့ၢ်အန့ၣ်တက့ၢ်.

18 ဒီးအဝဲဒၣ်ထံၣ်ဘၣ်ဝဲလၢအသးအိၣ်နီၢ်နီၢ်လၢအကလဲၤတၢ်ဒီးအီၤ,ဒီးကတိၤတၢ်ဒီးအီၤန့ၣ်ဆိတ့ၢ်ဝဲလီၤ.

19 ဒီးပှၤခံဂၤန့ၣ်လဲၤတၢ်ဆူဘ့ၤသလ့ဃ့ၣ်လီၤ.ဒီးတုၤအတုၤလၢဘ့ၤသလ့ဃ့ၣ်ဒီး,တၢ်မၤအသးလၢဝ့ၢ်ဖိတၢထီၣ်တၢလီၤဝးတရံးအီၤဒီဝ့ၢ်ညါလီၤ.ဒီးစံးဝဲဒၣ်,အဝဲအံၤမ့ၢ်နီၢ်နၤဧမံန့ၣ်စ့ၢ်ကီးဧါ.

20 ဒီးစံးဆၢအီၤ,ကိးယၤလၢနီၢ်နၤဧမံတဂ့ၤ,ကိးယၤလၢနီၢ်မၤရၤတက့ၢ်.အဂ့ၢ်ဒ်အံၤ,တၢ်သ့တၢ်လၢာ်မၤယၤနးနးကလဲာ်လီၤ. 21 ယလဲၤထီၣ်အိၣ်ပှဲၤ,ဒီးယွၤဒုးဟဲက့ၤယၤအိၣ်ကလီလီၤ.သုကိးယၤလၢနီၢ်နၤဧမံန့ၣ်မ့ၢ်အဘၣ်မနုၤလဲၣ်.ဒီးယွၤအုၣ်အသးထီဒါယၤ,ဒီးတၢ်သ့တၢ်လၢာ်မၤအၢယၤလီၤ.

22 ဒီးနီၢ်နၤဧမံက့ၤက့ၤ,ဒီးပှၤမိၤအးဖိ,အဒဲၣ်နီၢ်ရူၤသးအိၣ်ဒီးအီၤလၢအဟဲက့ၤလၢမိၤအးအကီၢ်ပူၤန့ၣ်လီၤ.ဒီးလၢတၢ်ကူးသီဘုမုယီၤအကတီၢ်န့ၣ်တုၤဝဲလၢဘ့ၤသလ့ဃ့ၣ်အပူၤန့ၣ်လီၤ.