Rut 3 | KswSKMB | STEP | ဒီးအမံၤပှၢ်နီၢ်နၤဧမံစံးဘၣ်အီၤ,ယဖိမုၣ်ဧၢ,ယကဃုတၢ်အိၣ်ဘှံးလၢနဂီၢ်ဒ်သိးတၢ်ဂ့ၤကဘၣ်နၤန့ၣ်တမ့ၢ်ဘၣ်ဧါ.

‏ Ruth 3

1 ဒီးအမံၤပှၢ်နီၢ်နၤဧမံစံးဘၣ်အီၤ,ယဖိမုၣ်ဧၢ,ယကဃုတၢ်အိၣ်ဘှံးလၢနဂီၢ်ဒ်သိးတၢ်ဂ့ၤကဘၣ်နၤန့ၣ်တမ့ၢ်ဘၣ်ဧါ. 2 ဒီးခဲကနံၣ်အံၤပှၤလၢနအိၣ်ဒီးအဖိသၣ်ပိာ်မုၣ်တဖၣ်,စီၤဘိၤဧးတဂၤန့ၣ်မ့ၢ်ပဘူးပတံၢ်,တမ့ၢ်ဘၣ်ဧါကွၢ်ကွၢ်,ခဲမုၢ်နၤအံၤပညၢဘုမုယီၤလၢကြဲၢ်ပူၤန့ၣ်လီၤ. 3 ဒီးသ့စီနသး,ဒီးဖှူနသး,ဒီးကူသိးတၢ်,ဒီးလဲၤလီၤဆူကြဲၢ်ပူၤန့ၣ်တက့ၢ်.ဒီးပှၤကညီတဂၤန့ၣ်တချုးအအီၣ်တၢ်အီတၢ်ဝံၤဒီး,ဒုးသ့ၣ်ညါနကစၢ်လၢအီၤတဂ့ၤ. 4 ဒီးတုၤအမံလီၤဒီး,တၢ်ကမၤအသးလၢနဘၣ်တိၢ်နီၣ်အလီၢ်ဖဲအမံလီၤ.ဒီးနဘၣ်လဲၤနုာ်,ဒီးမၤဘ့ၣ်ဆ့အခီၣ်,ဒီးမံလီၤလီၤ.နဘၣ်မၤဒ်လဲၣ်ဒ်လဲၣ်န့ၣ်အဝဲဒၣ်ကဒုးနဲၣ်နၤလီၤ.

5 ဒီးအဝဲဒၣ်စံးဘၣ်အီၤ,ကယဲၢ်တၢ်လၢနစံးဘၣ်ယၤခဲလၢာ်န့ၣ်ယကမၤလီၤ. 6 ဒီးလဲၤလီၤဝဲဆူကြဲၢ်ပူၤန့ၣ်,ဒီးမၤတၢ်ဒ်ကယဲၢ်တၢ်လၢအမံၤပှၢ်ပိာ်မုၣ်မၤလိာ်အီၤအသိးန့ၣ်လီၤ.

7 ဒီးစီၤဘိၤဧးအီၣ်တၢ်,ဒီးအီတၢ်,ဒီးအသးမုာ်ထီၣ်က့ၤဝံၤဒီးလဲၤမံလီၤလၢဘုတပူအကတၢၢ်န့ၣ်လီၤ.ဒီးအဝဲဒၣ်ဟဲဝဲကဘဲးကဘဲး,ဒီးမၤဘ့ၣ်ဆ့အခီၣ်,ဒီးမံလီၤဝဲလီၤ.

8 ဒီးဖးဖီမုၢ်န့ၣ်တၢ်မၤအသးလၢပှၤကညီတဂၤန့ၣ်ပျံၤတၢ်,ဒီးဃၣ်အသး,ဒီးကွၢ်ကွၢ်,ပိာ်မုၣ်တဂၤမံလီၤလၢအခီၣ်ထံးန့ၣ်လီၤ. 9 ဒီးစံးဝဲဒၣ်,နမ့ၢ်မတၤတဂၤလဲၣ်,ဒီးစံးဆၢအီၤ,ယမ့ၢ်နကုၢ်ပိာ်မုၣ်နီၢ်ရူၤသးလီၤ.ဒါလီၤနယၣ်လၢယဖီခိၣ်န့ၣ်တက့ၢ်.အဂ့ၢ်ဒ်အံၤ,နမ့ၢ်ပှၤကြၢးပှ့ၤက့ၤတၢ်တဂၤလီၤ.

10 ဒီးအဝဲဒၣ်စံးဝဲဒၣ်,ယဖိမုၣ်ဧၢ,မ်နဘၣ်တၢ်ဆိၣ်ဂ့ၤလၢယွၤတက့ၢ်.နမၤဘျုးမၤဖှိၣ်တၢ်လၢအခံကတၢၢ်ဂ့ၤန့ၢ်လၢအခီၣ်ထံးန့ၣ်တက့ၢ်လီၤ.အဂ့ၢ်ဒ်အံၤ,ပှၤဖှီၣ်မ့ၢ်ဂ့ၤ,ပှၤထူးပှၤတီၤမ့ၢ်ဂ့ၤ,နတပိာ်ဘၣ်ဖိၣ်သၣ်ခွါအခံဘၣ်, 11 ဒီးခဲကနံၣ်အံၤယဖိမုၣ်ဧၢ,ဘၣ်ယိၣ်တၢ်တဂ့ၤ,ကယဲၢ်တၢ်လၢနစံးဘၣ်ယၤခဲလၢာ်န့ၣ်ယကမၤနၤလီၤ.အဂ့ၢ်ဒ်အံၤ,ယပှၤဂီၢ်မုၢ်အပှၤပဲတရီသ့ၣ်ညါဝဲလၢနမ့ၢ်ပိာ်မုၣ်အဂ့ၤအဝါလီၤ. 12 ဒီးခဲကနံၣ်အံၤယမ့ၢ်ပှၤကြၢးပှ့ၤက့ၤတၢ်လၢနဂီၢ်တဂၤန့ၣ်မ့ၢ်လံ,ဘၣ်ဆၣ်ဒီးပှၤပှ့ၤက့ၤတၢ်ဘူးန့ၢ်ယၤတက့ၢ်အိၣ်ဝဲတဂၤလီၤ.

13 အိၣ်သီတနၤကျၢၤအံၤတက့ၢ်.ဒီးမုၢ်ဆ့ၣ်ထီၣ်န့ၣ်တၢ်ကမၤအသးလၢပှၤတဂၤန့ၣ်မ့ၢ်မၤနၤလၢပှၤပှ့ၤက့ၤတၢ်တဂၤအတၢ်မၤဒီး,ဂ့ၤလံ.ကမၤဒၣ်ဝဲပှၤပှ့ၤက့ၤတၢ်တဂၤအတၢ်မၤန့ၣ်တက့ၢ်.မ့မ့ၢ်အဝဲဒၣ်မ့ၢ်တမၤဘၣ်နၤလၢပှၤပှ့ၤက့ၤတၢ်တဂၤအတၢ်မၤဘၣ်ဒီး,ယဲဒၣ်အံၤယကမၤနၤလၢပှၤပှ့ၤက့ၤတၢ်တဂၤအတၢ်မၤန့ၣ်လီၤ.ယွၤမူဝဲ,မံလီၤတုၤမုၢ်ဂီၤန့ၣ်တက့ၢ်.

14 ဒီးမံလီၤလၢအခီၣ်ထံးတုၤမုၢ်ဆ့ၣ်ထီၣ်,ဒီးပှၤတချုးသ့ၣ်ညါလိာ်အသးသ့ဒံးဘၣ်ဒီး,ဂဲၤဆၢထၢၣ်ဝဲလီၤ.အဂ့ၢ်ဒ်အံၤ,အဝဲဒၣ်စံး,မ်ပှၤသုတသ့ၣ်ညါလၢပိာ်မုၣ်တဂၤဟဲနုာ်လၢကြဲၢ်ပူၤတဂ့ၤ. 15 ဒီးစံးဝဲဒၣ်,ဟဲစိာ်ယၣ်တဘ့ၣ်န့ၣ်လၢအအိၣ်လၢနလိၤ,ဒီးဟံးဃာ်အီၤတက့ၢ်.ဒီးဟံးဃာ်ဝဲ,ဒီးအဝဲဒၣ်ဃီၣ်ဘုမုယီၤနီၣ်ဃီၣ်ဃုဖျၢၣ်လီၤ.ဒီးပာ်ဝဲလၢအလိၤ,ဒီးအဝဲဒၣ်က့ၤက့ၤဆူဝ့ၢ်ပူၤလီၤ.

16 ဒီးလဲၤဆူအမံၤပှၢ်အအိၣ်,ဒီးအဝဲဒၣ်စံးဘၣ်အီၤ,ယဖိမုၣ်ဧၢ,နမ့ၢ်မတၤတဂၤလဲၣ်.ဒီးအဝဲဒၣ်စံးဘၣ်တဲဘၣ်အီၤလၢကယဲၢ်တၢ်လၢပှၤကညီတဂၤန့ၣ်မၤအီၤခဲလၢာ်လီၤ. 17 ဒီးစံးဝဲဒၣ်,ဘုမုယီၤနီၣ်ဃီၣ်ဃုဖျၢၣ်အံၤဟ့ၣ်လီၤယၤလီၤ.အဂ့ၢ်ဒ်အံၤ,စံးဘၣ်ယၤ,က့ၤကလီဆူနမံၤပှၢ်ပိာ်မုၣ်အအိၣ်တဂ့ၤ.

18 ဒီးစံးဝဲဒၣ်,ယဖိမုၣ်ဧၢ,ဆ့ၣ်နီၤတုၤနသ့ၣ်ညါလၢတၢ်တမံၤအံၤကမၤအသးဒ်လဲၣ်ဒ်လဲၣ်န့ၣ်တက့ၢ်.အဂ့ၢ်ဒ်အံၤ,ပှၤကညီတဂၤန့ၣ်တအိၣ်ဘှံးဘၣ်တုၤအမၤဝံၤတၢ်တမံၤအံၤလၢခဲမုၢ်ဆါအံၤဘၣ်လီၤ.