Ruth 2
1ဒီးနီၢ်နၤဧမံန့ၣ်အိၣ်ဒီးအဝၤအဘူးအတံၢ်တဂၤ,ပှၤအထူးအတီၤအါလၢစီၤအလံၤမ့လ့းအဟံၣ်ဖိအကျါ,ဒီးအမံၤမ့ၢ်စီၤဘိၤဧးလီၤ. 2ဒီးပှၤမိၤအးဖိနီၢ်ရူၤသးစံးဘၣ်နီၢ်နၤဧမံ,ဒုးလဲၤယၤဆူစံာ်ပူၤ,ဒီးထၢထီၣ်ဘုအစဲၤတဖၣ်လၢအလီၤတဲာ်ဖဲဒၣ်ပှၤအလီၢ်ခံတဂၤဂၤလၢယဘၣ်ဘျုးဘၣ်ဖှိၣ်လၢအမဲာ်န့ၣ်တက့ၢ်.ဒီးစံးဘၣ်အီၤ,လဲၤကၢ်နဲာ်,ယဖိမုၣ်ဧၢ. 3ဒီးလဲၤဝဲ,ဒီးဟဲနုာ်ဝဲ,ဒီးထၢထီၣ်တၢ်လၢပှၤကူးဘုအလီၢ်ခံ,ဒီးတၢ်မၤအသးလၢအဘၣ်လၢစံာ်အလီၢ်လၢအမ့ၢ်စီၤဘိၤဧးအတၢ်,လၢအမ့ၢ်လၢစီၤအလံၤမ့လ့းအပှၤဟံၣ်ဖိအကျါလီၤ. 4ဒီးကွၢ်ကွၢ်,စီၤဘိၤဧးဟဲဝဲလၢဘ့ၤသလ့ဃ့ၣ်,ဒီးစံးဘၣ်ပှၤကူးဘုတဖၣ်န့ၣ်မ်ယွၤအိၣ်ဒီးသုတက့ၢ်.ဒီးစံးဆၢဝဲဒၣ်,မ်ယွၤဆိၣ်ဂ့ၤနၤတက့ၢ်. 5ဒီးစီၤဘိၤဧးစံးလၢအခ့အပှၤတဂၤလၢအပာ်လၢပှၤကူးဘုဖိအဖီခိၣ်,ဒီးအဝဲဒၣ်န့ၣ်မ့ၢ်မတၤအဖိသၣ်ပိာ်မုၣ်လဲၣ်. 6ဒီးအခ့အပှၤလၢအအိၣ်လၢပှၤကူးဘုဖိအဖီခိၣ်တဂၤန့ၣ်စံးဆၢတၢ်,ဒီးစံးဝဲဒၣ်,မ့ၢ်ပှၤမိၤအးဖိအဖိသၣ်ပိာ်မုၣ်လၢအဟဲဒီးနီၢ်နၤဧမံလၢမိၤအးအကီၢ်ပူၤန့ၣ်လီၤ. 7ဒီးအဝဲဒၣ်စံး,ဒုးထၢထီၣ်ယၤလၢတၢ်လီၤတဲာ်,ဒီးထၢဖှိၣ်တၢ်လၢပှၤကူးဘုဖိအလီၢ်ခံ,ဒီးလၢဘုကဒိၣ်အကျါန့ၣ်တက့ၢ်.ဒီးဟဲဝဲ,ဒီးမ့တမ့ၢ်ဘၣ်အအိၣ်ဝဲတစိၢ်ဖိလၢဟံၣ်ပူၤဘၣ်ဒီး,အိၣ်ဝဲလၢမုၢ်ဂီၤလံၤလံၤတုၤခဲကနံၣ်အံၤလီၤ. 8ဒီးစီၤဘိၤဧးစံးဘၣ်နီၢ်ရူၤသးန့ၣ်,နတနၢ်ဟူဘၣ်ဧါ,ယဖိမုၣ်ဧၢ,လဲၤထၢထီၣ်တၢ်လီၤတဲာ်လၢစံာ်အဂၤအပူၤန့ၣ်တဂ့ၤ,ဒီးဟးထီၣ်စ့ၢ်ကီးဖဲအံၤတဂ့ၤ,ဒီးစဲဘူးဒီးယဖိသၣ်ပိာ်မုၣ်တဖၣ်ဖဲအံၤတက့ၢ်. 9မ်နမဲာ်အိၣ်လၢစံာ်လၢအဝဲသ့ၣ်ကူးဘုလၢအပူၤန့ၣ်,ဒီးလဲၤပိာ်အခံတက့ၢ်.ယမၤလိာ်လံပှၤဖိၣ်သၣ်ခွါတဖၣ်ဒ်သိးအသုတထိးနၤတဂ့ၤန့ၣ်တမ့ၢ်ဘၣ်ဧါ.ဒီးတုၤတၢ်သူနသးထံဒီး,လဲၤလီၤဆူသပၢၤတဖၣ်အအိၣ်,ဒီးအီတၢ်လၢဖိၣ်သၣ်ခွါတဖၣ်ဒၢၣ်တ့ၢ်န့ၣ်တက့ၢ်. 10ဒီးထိၣ်လီၤပှီၤအသး,ဒီးဆုးလီၤအခိၣ်ပၢၢ်လၢဟီၣ်ခိၣ်,ဒီးစံးဘၣ်အီၤ,ယဘၣ်ဘျုးလၢနမဲာ်လၢနကပာ်သ့ၣ်ညါနသးလၢယၤမ့ၢ်အဘၣ်မနုၤလဲၣ်.ဒီးယဲဒၣ်အံၤယမ့ၢ်ပှၤတခီဘီမုၢ်ဖိလီၤ. 11ဒီးစီၤဘိၤဧးစံးဆၢအီၤ,ဒီးစံးဝဲဒၣ်,လၢနဝၤသံအလီၢ်ခံန့ၣ်တၢ်လၢနမၤနမံၤပှၢ်ပိာ်မုၣ်ခဲလၢာ်န့ၣ်,ဒီးလၢနလဲၤသဒၣ်နမိၢ်ဒီးနပၢ်,ဒီးကီၢ်တဘ့ၣ်လၢနအိၣ်ဖျဲၣ်လၢအပူၤ,ဒီးဟဲတုၤလၢပှၤတကလုာ်အကျါလၢနတသ့ၣ်ညါဘၣ်လၢထံးန့ၣ်ပှၤဒုးနဲၣ်ယၤလီၤတံၢ်လီၤဆဲးလီၤ. 12မ်ယွၤဟ့ၣ်ကၣ်နမၤတၢ်တက့ၢ်.ဒီးမ်နကန့ၢ်ဘၣ်တၢ်အဘူးအလဲလၢယွၤ,အံၣ်စရ့လးအကစၢ်လၢနဟဲအိၣ်သဒၢလၢအဒံးဆ့ဖီလာ်န့ၣ်တက့ၢ်. 13တုၤနုၤတစုအဝဲဒၣ်စံး,မ်ယဘၣ်ဘျုးလၢနမဲာ်တက့ၢ်,ယကစၢ်ဧၢ,အဂ့ၢ်ဒ်အံၤ,နမၤမုာ်ထီၣ်က့ၤယၤဒီးယတဒ်သိးဘၣ်ဒီးနကုၢ်ပိာ်မုၣ်တဖၣ်နာ်သက့ဒီး,နကတိၤတ့ၢ်ဒီးနကုၢ်ပိာ်မုၣ်မုာ်မုာ်ခုၣ်ခုၣ်လံလီၤ. 14ဒီးစီၤဘိၤဧးစံးဘၣ်အီၤ,အီၣ်တၢ်အကတီၢ်န့ၣ်ဟဲဖဲအံၤ,ဒီးအီၣ်တၢ်လၢကိၣ်န့ၣ်,ဒီးဘျၢနတၢ်တမီလၢတၤဆံၣ်ထံအပူၤန့ၣ်တက့ၢ်.ဒီးပိာ်မုၣ်န့ၣ်ဆ့ၣ်နီၤလၢပှၤကူးဘုဖိအဃၢၤ,ဒီးအဝဲသ့ၣ်ယူာ်ဃီၤဘုဝဲာ်အသးဆူအအိၣ်,ဒီးအဝဲဒၣ်အီၣ်ဝဲ,ဒီးဘျဲးအီၣ်,ဒီးတၢ်အိၣ်ဘျဲၣ်ဝဲလီၤ. 15ဒီးတုၤအဂဲၤဆၢထၢၣ်ဒ်သိးအကထၢထီၣ်တၢ်လီၤတဲာ်ဒီး,စီၤဘိၤဧးမၤလိာ်အပှၤဖိၣ်သၣ်ခွါတဖၣ်,ဒီးစံးဝဲဒၣ်,ပျဲအကထၢထီၣ်တၢ်လီၤတဲာ်လၢဘုကဒိၣ်အကျါန့ၣ်ဒၣ်လဲာ်,ဒီးဒုၣ်ဒွဲၣ်အီၤတဂ့ၤ. 16ဒီးမၤပြံပြါဘုအစဲၤတနီၤနီၤလၢအဂီၢ်,ဒီးပာ်လီၤတဲာ်ဒ်သိးအထၢထီၣ်ဝဲ,ဒီးတြီအီၤတဂ့ၤ. 17ဒီးအဝဲဒၣ်ထၢထီၣ်တၢ်လီၤတဲာ်လၢစံာ်ပူၤတုၤမုၢ်ဟါ,ဒီးတီၢ်လီၤတၢ်လၢအထၢထီၣ်ဝဲ,ဒီးအိၣ်ဝဲဘုမုယီၤတအ့ဖးဃၣ်ဃၣ်လီၤ. 18ဒီးဟံးထီၣ်ဝဲ,ဒီးက့ၤက့ၤဝဲဆူဝ့ၢ်ပူၤ,ဒီးအမံၤပှၢ်ပိာ်မုၣ်န့ၣ်ထံၣ်ဘၣ်တၢ်လၢအထၢထီၣ်လီၤ.ဒီးလၢအအီၣ်ဘျဲးအီၣ်ဝဲအလီၢ်ခံန့ၣ်,ဟဲစိာ်ဝဲ,ဒီးဟ့ၣ်အမံၤပှၢ်လၢတၢ်လၢအအိၣ်ဘျဲၣ်ဝဲန့ၣ်လီၤ. 19ဒီးအမံၤပှၢ်ပိာ်မုၣ်စံးဘၣ်အီၤ,နထၢထီၣ်ဘုလီၤတဲာ်လၢမဆါတနံၤအံၤဖဲလဲၣ်ပူၤလဲၣ်.ဒီးနမၤတၢ်ဖဲလဲၣ်ပူၤလဲၣ်.ပှၤလၢအပာ်သ့ၣ်ညါအသးလၢနၤတဂၤန့ၣ်မ်အဘၣ်တၢ်ဆိၣ်ဂ့ၤတက့ၢ်.ဒီးဒုးနဲၣ်အမံၤပှၢ်ပိာ်မုၣ်လၢပှၤလၢအမၤအတၢ်မ့ၢ်မတၤမတၤ,ဒီးစံးဝဲဒၣ်,ပှၤလၢယမၤအတၢ်လၢမုၢ်မဆါတနံၤအံၤတဂၤအမံၤမ့ၢ်စီၤဘိၤဧးလီၤ. 20ဒီးနီၢ်နၤဧမံစံးဘၣ်အဒဲၣ်,ပှၤလၢအတလဲၤသဒၣ်အဘျုးအဖှိၣ်ဒီးပှၤမူဝဲဒီးပှၤသံဝဲတဂၤန့ၣ်မ်အဘၣ်တၢ်ဆိၣ်ဂ့ၤလၢယွၤတက့ၢ်.ဒီးနီၢ်နၤဧမံစံးဘၣ်အီၤ,ပှၤကညီတဂၤန့ၣ်မ့ၢ်ပဘူးပတံၢ်တဂၤ,ပှၤလၢအပှ့ၤက့ၤတၢ်လၢပဂီၢ်ကြၢးတဂၤလီၤ. 21ဒီးပှၤမိၤအးဖိနီၢ်ရူၤသးစံးဝဲဒၣ်,အဝဲဒၣ်စံးဘၣ်စ့ၢ်ကီးယၤ,နဘၣ်အိၣ်ဘူးဒီးယပှၤဖိၣ်သၣ်ခွါတဖၣ်တုၤအကူးယဘုလၢာ်လီၤ. 22ဒီးနီၢ်နၤဧမံစံးဘၣ်အဒဲၣ်နီၢ်ရူၤသး,ယဖိမုၣ်ဧၢ,ဂ့ၤလၢနလဲၤထီၣ်ဒီးအဖိသၣ်ပိာ်မုၣ်တဖၣ်,လၢအသုတဘၣ်သဃိာ်ဒီးနၤလၢစံာ်အဂၤတပူၤတဂ့ၤ. 23ဒီးစဲဘူးဝဲဒီးစီၤဘိၤဧးအဖိသၣ်ပိာ်မုၣ်တဖၣ်ဒ်သိးအကထၢထီၣ်ဘုလီၤတဲာ်တုၤကူးဘုမုယီၤအကတီၢ်လၢာ်ဝဲ,ဒီးတုၤဘုကၠူၣ်အကတီၢ်လၢာ်ဝဲလီၤ.ဒီးအိၣ်ဝဲဆိးဝဲဒီးအမံၤပှၢ်ပိာ်မုၣ်လီၤ.
Copyright information for
KswSKMB