Song of Solomon 3
1လၢမုၢ်နၤလၢယလီၢ်မံအပူၤန့ၣ်ယဃုပှၤလၢယသးအဲၣ်အီၤလီၤ. 2ယဃုအီၤ,ဒီးယတထံၣ်န့ၢ်ဘၣ်အီၤဘၣ်.ယကဂဲၤဆၢထၢၣ်,ဒီးလဲၤဝ့ၤဝီၤတၢ်လၢဝ့ၢ်ပူၤ,လၢကျဲပူၤလၢကျဲမုၢ်ဖးလဲၢ်အပူၤန့ၣ်ယကဃုပှၤလၢယသးအဲၣ်အီၤလီၤ. 3ယဃုအီၤ,ဒီးယတထံၣ်န့ၢ်ဘၣ်အီၤဘၣ်.ပှၤပၢၤတၢ်ဖိလၢအလဲၤဝ့ၤဝီၤတၢ်လၢဝ့ၢ်ပူၤတဖၣ်န့ၣ်ထံၣ်န့ၢ်ယၤလီၤ.ဒီးယစံးဘၣ်အီၤ,ပှၤလၢယသးအဲၣ်အီၤတဂၤန့ၣ်သုထံၣ်ဘၣ်အီၤစ့ၢ်ကီးဧါ. 4ယလဲၤပူၤကွံာ်အီၤတစဲး,ဒီးယထံၣ်န့ၢ်ပှၤလၢယသးအဲၣ်အီၤ,ယဟံးဃာ်အီၤ,ယတပျၢ်ဘၣ်အီၤတုၤယဆှၢအီၤဆူယမိၢ်အဟံၣ်ပူၤ,ဆူပှၤလၢအဆံးစၢ်န့ၢ်ယၤတဂၤအဒၢးပူၤလီၤ. 5ယဒုးဆိၣ်သု,ယရူၤၡလ့ၣ်အဖိမုၣ်သ့ၣ်ဧၢ,လၢတၤဟိစဘံ,ဒီးတၤဟိမိၢ်လၢပှၢ်လၢ်ကျါအမဲာ်ညါ,လၢသုသုတထိၣ်ဂဲၤ,ဒီးလၢအတချုးဘၣ်ဒံးဘၣ်အသးန့ၣ်လၢသုသုတမၤဖုသံနီၣ်ထီၣ်ပှၤလၢယအဲၣ်အီၤတဂ့ၤ. 6ပှၤလၢအဟဲထီၣ်လၢပှၢ်မုၢ်ကနၢဒ်မ့ၣ်အူခုၣ်အထူၣ်တဖၣ်အသိး,လၢအနၢမူဝဲဒီးမူရၣ်,ဒီးလီၢ်ဘၣ်,ဒီးပှၤကၤတၢ်ဖိအတၢ်နၢမူအကမူၣ်န့ၣ်မ့ၢ်မတၤတဂၤလဲၣ်. 7ကွၢ်ကွၢ်,မ့ၢ်လၢစီၤၡလိၤမိၤအခးဒုးခိၣ်န့ၣ်လီၤ.ပှၤအဆူၣ်လၢအံၣ်စရ့လးအပှၤအဆူၣ်အကျါဃုဆံအိၣ်ဝးတရံးအီၤလီၤ. 8ဟံးဃာ်နးခဲလၢာ်,ကတဲာ်ကတီၤလၢဒုးသုးအဂီၢ်လီၤ.လၢတၢ်ပျံၤအလီၢ်လၢမုၢ်နၤအဃိန့ၣ်ပှၤအိၣ်ဝဲဒီးအနးလၢအကံၣ်ဒုၣ်အလိၤကိးဂၤဒဲးလီၤ. 9စီၤၡလိၤမိၤမၤန့ၢ်အဂီၢ်ဒၣ်ဝဲလၢခးဒုးခိၣ်န့ၣ်လၢလဘၤနိၣ်အသ့ၣ်လီၤ. 10မၤအထူၣ်လၢစ့,အဃီလၢထူ,အလီၢ်ဆ့ၣ်နီၤလၢတၢ်လုးတကုာ်,ဒီးအပူၤန့ၣ်ဒါဝဲလၢတၢ်အဲၣ်လၢယရူၤၡလ့ၣ်အဖိမုၣ်တဖၣ်လီၤ. 11စံယိၣ်ဖိမုၣ်သ့ၣ်ဧၢ,လဲၤထီၣ်,ကွၢ်စီၤၡလိၤမိၤအိၣ်ဒီးအခိၣ်သလုးခိၣ်သလုးလၢအမိၢ်ဒုးကုာ်အီၤမုၢ်တနံၤလၢအန့ၢ်မါ,မုၢ်တနံၤလၢအသးခုန့ၣ်တက့ၢ်.
Copyright information for
KswSKMB