Song of Solomon 4
1ကွၢ်ကွၢ်,ယပှၤသးဘိဧၢ,နဃံနလၤ,ကွၢ်ကွၢ်,နဃံနလၤ,နအိၣ်ဒီးထိၣ်လွံၢ်အမဲာ်လၢနတၢ်ကျၢၢ်ဘၢမဲာ်အဖီလာ်လီၤ.နခိၣ်သူမၤသးဒ်မဲာ်တဲးလဲးတဖုလၢအကိာ်လီၤလၢကစၢၢ်ကံးလဧးအလိၤအသိးန့ၣ်လီၤ. 2နမဲမၤသးဒ်သိတဖုလၢအဆူၣ်တံာ်အသး,လၢအဟဲထီၣ်လၢလုၣ်ထံအလီၢ်,လၢကိးဒုဒဲးဖှံလီၤသဃံာ်,ဒီးအတူာ်ဖိတအိၣ်ဘၣ်လၢအကျါအသိးလီၤ. 3နပျုၤမၤသးဒ်ပျံၤဂီၤတဘိအသိးန့ၣ်လီၤ.နထးခိၣ်ဃံဝဲလၤဝဲ,နဘိးမၤသးဒ်သလဲသၣ်သ့ၣ်ဖးတခီလၢနနီၣ်ကျၢၢ်ဘၢမဲာ်အဖီလာ်, 4နကိာ်မၤသးဒ်စီၤဒၤဝံးအတၢးထီလၢအမၤဝဲလၢတၢ်စုကဝဲၤအဂီၢ်,ဖဲအကတီၤအဘ့ၣ်တကထိဘျးထီၣ်အသး,ပှၤအဆူၣ်အကတီၤခဲလၢာ်အသိးန့ၣ်လီၤ. 5နနုၢ်ခံတိၣ်မၤသးဒ်တၤဟိစဘံဖိသဃံာ်ခံဒုလၢအအီၣ်အဆၣ်လၢဖီဒ့ၣ်ညါအကျါအသိးလီၤ. 6တုၤမုၢ်နံၤခုၣ်လီၤဝဲ,ဒီးတၢ်အကဒုတဖၣ်ဃ့ၢ်ကွံာ်ဒီး,ယကလဲၤဆူမူရၣ်အကစၢၢ်,ဒီးလီၢ်ဘၣ်အတၢ်စိခိၣ်အအိၣ်လီၤ. 7နဃံနလၤဒီဂၤညါ,ယပှၤသးဘိဧၢ,တၢ်အမဲၣ်တအိၣ်ဘၣ်လၢနလိၤဘၣ်. 8ယမါဧၢ,ဟဲဒီးယၤလၢလဘၤနိၣ်အလိၤ,ဟဲဒီးယၤလၢလဘၤနိၣ်အလိၤ,ကွၢ်တၢ်လၢအမါနၤအဒီခိၣ်,လၢစနံၢ်,ဒီးဃ့ရမိၣ်အဒီခိၣ်,လၢခ့ယုၢ်အပူၤ,လၢခ့စံၣ်ပိၣ်အကစၢၢ်န့ၣ်တက့ၢ်. 9နဖီၣ်န့ၢ်ယသးယဒီပုၢ်ဝဲၢ်မုၣ်ဧၢ,ယမါဧၢ,လၢနမဲာ်တတိၣ်,လၢဖဲတဝီလၢနကိာ်လိၤလီၤ. 10ယဒီပုၢ်ဝဲၢ်မုၣ်ဧၢ,ယမါဧၢ,နတၢ်အဲၣ်မုာ်ဆံးဒိၣ်လဲၣ်.နတၢ်အဲၣ်ဂ့ၤန့ၢ်စပံးထံဆံးဒိၣ်လဲၣ်ဒီးနသိနၢမူဂ့ၤန့ၢ်ကယဲၢ်တၢ်နၢမူခဲလၢာ်ဆံးဒိၣ်လဲၣ်. 11ယမါဧၢ,တၢ်လီၤစီၤလၢနပျုၤဒ်ကနဲစီအခိၣ်ထံအသိးကနဲစီဒီးတၢ်နုၢ်ထံအိၣ်ဝဲလၢနပျ့ၤအဖီလာ်,ဒီးနကူနသိးအနၢမူန့ၣ်မၤသးဒ်လဘၤနိၣ်အနၢမူအသိးလီၤ. 12ယဒီပုၢ်ဝဲၢ်မုၣ်ဧၢ,ယမါဧၢ,နမ့ၢ်တၤသၣ်အလီၢ်ကရၢအသး,ထံထီၣ်ပၢၢ်ထိးဝးတံာ်အသး,ထံမူအိၣ်ဒီးအစဲဃာ်ပနီၣ်လီၤ. 13နတၢ်သူၣ်အသးန့ၣ်မ့ၢ်သ့ၣ်သလဲသၣ်တဖုအိၣ်ဒီးတၤသၣ်အဝံၣ်အဆၢအလီၢ်,ဒီးသ့ၣ်ဂီၤစုမ့ၢ်,ဒီးသ့ၣ်နၢ်ဒး, 14သ့ၣ်နၢ်ဒး,ဒီးသ့ၣ်ကၢ်ကိၣ်,လီၢ်ဟ့ၣ်,ဒီးကဒါရါ,ဒီးသ့ၣ်လီၢ်ဘၣ်ကိးကလုာ်ဒဲး,မူရၣ်,ဒီးအကၠီၣ်, 15ဒီးတၢ်နၢမူအခိၣ်ကျၢၢ်,တၤသၣ်အလီၢ်အထံထီၣ်ပၢၢ်,အထံမူတပူၤ,ထံကျိလၢအယွၤလီၤလၢလဘၤနိၣ်လီၤ. 16ကလံၤလၢကလံၤစိးဧၢ,ဖုသံနီၣ်တက့ၢ်,ဒီးနဲဒၣ်လၢကလံၤထံး,ဟဲတက့ၢ်.အူဘၣ်ယတၤသၣ်အလီၢ်န့ၣ်ဒ်သိးအတၢ်နၢမူကနၢမူထီၣ်တက့ၢ်.မ်ပှၤလၢယအဲၣ်အီၤတဂၤဟဲနုာ်လၢအတၤသၣ်အလီၢ်,ဒီးအီၣ်အတၤသၣ်န့ၣ်တက့ၢ်.
Copyright information for
KswSKMB