Song of Solomon 6
1ပှၤလၢအဃံကတၢၢ်အလၤကတၢၢ်လၢပိာ်မုၣ်အကျါတဂၤဧၢ,ပှၤလၢနအဲၣ်အီၤမ့ၢ်အလဲၤဆူလဲၣ်.ဒ်သိးပကဃုအီၤဒီးနၤဒီး,ပှၤလၢအနဲၣ်အီၤန့ၣ်မ့ၢ်အဃၣ်အသးဒီးလဲၤဝဲဆူလဲၣ်. 2ပှၤလၢယအဲၣ်အီၤတဂၤန့ၣ်လဲၤလီၤဆူအတၤသၣ်အလီၢ်ပူၤ,ဆူဟီၣ်ခိၣ်အကဝီၤအိၣ်ဒီးသ့ၣ်နၢမူဘိစ့ၣ်,ဒ်သိးအကဒုးအီၣ်တၢ်အဆၣ်လၢတၤသၣ်အလီၢ်ပူၤ,ဒီးဒ်သိးအကဒဲးဖီဒ့ၣ်ညါလီၤ. 3ယမ့ၢ်ပှၤလၢယအဲၣ်အီၤတဂၤအတၢ်,ဒီးပှၤလၢယအဲၣ်အီၤမ့ၢ်ယတၢ်လီၤ. 4ဒုးအီၣ်တၢ်အဆၣ်လၢဖီဒ့ၣ်ညါအကျါလီၤ.ယပှၤသးဘိဧၢ,နဃံနလၤဒ်တံးရစၣ်အသိး,နအိၣ်ဖျါမုာ်ဒ်ယရူၤၡလ့ၣ်အသိး,နမ့ၢ်ပျံၤတၢ်အလီၢ်ဒ်ပှၤသုးမုၢ်အိၣ်ဒီးသုးအလၣ်အသိးန့ၣ်လီၤ.ဃၣ်ကဒါက့ၤနမဲာ်လၢယလိၤတက့ၢ်.အဂ့ၢ်ဒ်အံၤ,မၤဃၣ်ယၤလီၤ. 5နခိၣ်သူမၤသးဒ်မဲာ်တဲးလဲးတဖုလၢအကိာ်လီၤလၢကစၢၢ်ကံးလဧးအသိးန့ၣ်, 6နမဲာ်မၤသးဒ်သိတဖုလၢအဟဲထီၣ်လၢလုၣ်ထံအလီၢ်,လၢအဖှံလီၤသဃံာ်ကိးဒုဒဲး,ဒီးအတူာ်ဖိတအိၣ်ဘၣ်,လၢအကျါအသိးန့ၣ်လီၤ. 7နဘိးမၤသးဒ်သလဲသၣ်သ့ၣ်ဖးတခီလၢနနီၣ်ကျၢၢ်ဘၢမဲာ်အဖီလာ်အသိးန့ၣ်လီၤ. 8နီၣ်ပၤမုၣ်အိၣ်ဝဲဃုဆံ,ဒီးပှၤသံၣ်မါအိၣ်ဝဲဃိးဆံ,ဒီးပှၤမုၣ်ကနီၤပဂံၢ်တသ့ဘၣ်လီၤ. 9မ့မ့ၢ်ယထိၣ်လွံၢ်,ယပှၤအလၢအပှဲၤတဂၤန့ၣ်မ့ၢ်ပှၤတဂၤဃီ,မ့ၢ်အမိၢ်အပှၤတဂၤဃီ,မ့ၢ်ပှၤလၢအဆံးစၢ်အီၤအပှၤဃုထၢဖိလီၤ.ပှၤဖိမုၣ်ထံၣ်ဘၣ်အီၤ,ဒီးဆိၣ်ဂ့ၤအီၤလီၤ.နီၢ်ပၤမုၣ်ဒီးပှၤသံၣ်မါတဖၣ်ထံၣ်ဝဲ,ဒီးစံးထီၣ်ပတြၢၤအီၤလီၤ. 10ပှၤလၢအကွၢ်ထီၣ်ဒ်မုၢ်ဆ့ၣ်အသိး,အဃံအလၤဒ်လါအသိး,ကပြုၢ်ကပြီၤဝဲဒ်မုၢ်အသိး,ဒီးမ့ၢ်တၢ်ပျံၤအလီၢ်ဒ်ပှၤသုးမုၢ်အိၣ်ဝဲဒီးသုးအလၣ်အသိးန့ၣ်မ့ၢ်မတၤတဂၤလဲၣ်. 11ယလဲၤလီၤဆူတၤသၣ်အိၣ်ဒီးအကုကိၤအလီၢ်,ဒ်သိးယကကွၢ်ကစၢၢ်ကဆူးအတၤသၣ်,စပံးမုၢ်ကဆှိးထီၣ်ဧါ,သ့ၣ်သလဲသၣ်ဖျိထီၣ်ဧါန့ၣ်,ဒ်သိးယကထံၣ်ဘၣ်လီၤ. 12ယတချုးသ့ၣ်ညါဒံးဘၣ်ဒီး,ယသးပာ်ယၤဒ်ဧးမံၤနဒးအလ့ၣ်ကဟၣ်အသိးန့ၣ်လီၤ.ဟဲက့ၤ,ဟဲက့ၤ,ပှၤရှူလမးဖိဧၢ,ဟဲက့ၤ,ဟဲက့ၤ,ဒ်သိးပကကွၢ်နၤတက့ၢ်. 13သုကကွၢ်ဘၣ်ပှၤရှူလမးဖိဒ်မၤဃန့ၤအဂဲၤကလံၣ်အသိးန့ၣ်မ့ၢ်အဘၣ်မနုၤလဲၣ်.
Copyright information for
KswSKMB