Titus 2
1မ့မ့ၢ်နဲဒၣ်အံၤကတိၤတၢ်လၢအကြၢးဒီးတၢ်သိၣ်တၢ်သီလၢအဂ့ၤအဘၣ်,ဒ်သိးပိာ်ခွါသးပှၢ်တဖၣ်ကမ့ၢ်ပှၤကီၤအသး,ပှၤပာ်အသးသပှၢ်သပှၢ်,ပှၤကဒုလီၤတံၢ်,ပှၤလၢအအိၣ်ဆူၣ်လၢတၢ်နာ်အပူၤ, 2လၢတၢ်အဲၣ်တၢ်ကွံအပူၤ,လၢတၢ်ဝံသးစူၤအပူၤန့ၣ်တက့ၢ်. 3ဒ်န့ၣ်အသိးဒ်သိးပိာ်မုၣ်သးပှၢ်တဖၣ်န့ၣ်,လၢအမၤတၢ်ဖံးတၢ်အပူၤကမ့ၢ်ပှၤဂ့ၤဝဲဘၣ်ဝဲဒီးတၢ်စီတၢ်ဆှံ,ဒီးတမ့ၢ်ဘၣ်ပှၤဒုၣ်ဒွဲၣ်တၢ်,တမ့ၢ်ဘၣ်ပှၤအီလုၣ်ကိစပံးထံဘၣ်,မ့ၢ်ပှၤသိၣ်တၢ်လၢအဂ့ၤ, 4ဒ်သိးအကသိၣ်က့ၤပိာ်မုၣ်လၢအသးစၢ်တဖၣ်လၢအကပာ်အသးသပှၢ်သပှၢ်,လၢအကမ့ၢ်ပှၤအဲၣ်အဝၤ,ပှၤအဲၣ်အဖိ, 5ပှၤကဒုလီၤတံၢ်,ပှၤစီဆှံ,ပှၤကွၢ်အဟံၣ်,ပှၤအသးဂ့ၤ,ပှၤစူၢ်အဝၤ,ဒ်သိးယွၤအကလုၢ်အကထါသုတဘၣ်တၢ်ဒုၣ်ဒွဲၣ်အီၤတဂ့ၤလီၤ. 6ဒ်န့ၣ်အသိးသဆၣ်ထီၣ်ပှၤပိာ်ခွါလၢအသးစၢ်တဖၣ်အခံ,ဒ်သိးအကပာ်အသးသပှၢ်သပှၢ်တက့ၢ်. 7ဒုးနဲၣ်နသးလၢတၢ်မၤဂ့ၤအဒိအတဲာ်လၢတၢ်ကိးမံၤဒဲးအပူၤ,လၢသိၣ်တၢ်သီတၢ်အပူၤန့ၣ်,ဒုးနဲၣ်တၢ်တအုၣ်တကျၣ်ဘၣ်,တၢ်ပာ်အသးသပှၢ်သပှၢ်, 8တၢ်ကတိၤအဂ့ၤအဘၣ်လၢပှၤပာ်တၢ်ကမၣ်လၢအီၤတသ့ဘၣ်,ဒ်သိးပှၤထီဒါတဖၣ်,စံးအၢပှၤအလီၢ်တအိၣ်ဘၣ်သတးဒီး,ကမဲာ်ဆှးန့ၣ်တက့ၢ်. 9သဆၣ်ထီၣ်တၢ်အကုၢ်အပှၤအခံဒ်သိးအကစူၢ်အကစၢ်တဖၣ်,ဒီးမၤတၢ်ဘၣ်အသးလၢတၢ်ခဲလၢာ်,ဒီးတဂ့ၢ်လိာ်ဘှီလိာ်ဘၣ်, 10ဒီးတဟံးန့ၢ်ခူသူၣ်တၢ်ဘၣ်,ဒီးကဒုးနဲၣ်အကလုၢ်တီကစီဒီလၢတၢ်ခဲလၢာ်,ဒ်သိးအကမၤကယၢကယဲတၢ်အုၣ်က့ၤခီၣ်က့ၤပှၤ,ယွၤအတၢ်သိၣ်တၢ်သီလၢတၢ်ခဲလၢာ်အပူၤတက့ၢ်. 11အဂ့ၢ်ဒ်အံၤ,ယွၤအဘျုးအဖှိၣ်ဘၣ်ဃးဒီးတၢ်အုၣ်က့ၤခီၣ်က့ၤလၢပှၤကညီခဲလၢာ်အဂီၢ်,အိၣ်ဖျါထီၣ်, 12ဒီးသိၣ်က့ၤသီက့ၤပှၤ,လၢပဘၣ်ညိကွံာ်တၢ်တယူးတယီၣ်ဘၣ်ယွၤ,ဒီးတၢ်သးကွံဘၣ်ဃးဒီးဟီၣ်ခိၣ်,ဒီးလၢပဘၣ်အိၣ်ပဘၣ်ဆိးလၢအအံၤတဃၣ်အိၣ်ဒီးတၢ်ပာ်ပသးသပှၢ်သပှၢ်,အိၣ်ဒီးပသူၣ်တီပသးလိၤ,ဒီးတၢ်ယူးယီၣ်ယွၤန့ၣ်, 13ဒီးလၢပဘၣ်ကွၢ်လၢ်တၢ်မုၢ်လၢ်လၢအဘၣ်တၢ်ဆိၣ်ဂ့ၤ,ဒီးတၢ်ဒိၣ်ယွၤဒီးတၢ်အုၣ်က့ၤခီၣ်က့ၤပှၤကစၢ်ယ့ၣ်ရှူးခရံာ်,အလၤကပီၤအတၢ်အိၣ်ဖျါန့ၣ်လီၤ. 14အဝဲဒၣ်န့ၣ်ဟ့ၣ်လီၤကွံာ်အသးလၢပဂီၢ်ဒ်သိးအကပှ့ၤက့ၤပှၤလၢတၢ်ဒဲးဘးခဲလၢာ်အပူၤ,ဒီးမၤကဆှီထီၣ်ပှၤတကလုာ်လီၤဆီဒၣ်တၢ်လၢအဂီၢ်ဒၣ်ဝဲ,လၢအသးဆူၣ်လၢတၢ်မၤဂ့ၤတၢ်အဂီၢ်လီၤ. 15တၢ်န့ၣ်တဖၣ်ကတိၤနဲ,ဒီးသဆၣ်ထီၣ်ပှၤအခံ,ဒီးသိၣ်ဃီၣ်တၢ်အိၣ်ဒီးတၢ်မၤလိာ်ခဲလၢာ်တက့ၢ်.မ်ပှၤသုတမၤတရီတပါနၤနီတဂၤတဂ့ၤ.
Copyright information for
KswSKMB