Zec 3 | KswSKMB | STEP | ဒီးဒုးနဲၣ်ယၤလၢပှၤလုၢ်တၢ်အဒိၣ်စီၤယိၤရှူဆၢထၢၣ်လၢယွၤအကလူးအမဲာ်ညါ,ဒီးမုၣ်ကီၤလံၢ်ဆၢထၢၣ်လၢအစုထွဲဒ်သိးအကထီဒါအီၤလီၤ.

‏ Zechariah 3

1 ဒီးဒုးနဲၣ်ယၤလၢပှၤလုၢ်တၢ်အဒိၣ်စီၤယိၤရှူဆၢထၢၣ်လၢယွၤအကလူးအမဲာ်ညါ,ဒီးမုၣ်ကီၤလံၢ်ဆၢထၢၣ်လၢအစုထွဲဒ်သိးအကထီဒါအီၤလီၤ.

2 ဒီးယွၤစံးဘၣ်မုၣ်ကီၤလံၢ်,မ်ယွၤသိၣ်ဃီၣ်နၤတက့ၢ်.မုၣ်ကီၤလံၢ်ဧၢ,မ့ၢ်လံ,ယွၤလၢအဃုထၢယရူၤၡလ့ၣ်ဒၣ်လဲာ်န့ၣ်မ်အသိၣ်ဃီၣ်နၤတက့ၢ်.အဝဲအံၤမ့ၢ်မ့ၣ်ကဖးလၢတၢ်ထုးထီၣ်ကွံာ်လၢမ့ၣ်အူပူၤ,တမ့ၢ်ဘၣ်ဧါ.

3 ဒီးစီၤယိၤရှူကူသိးတၢ်အကူအသိးဘၣ်အၢ,ဒီးဆၢထၢၣ်လၢကလူးတဂၤန့ၣ်အမဲာ်ညါလီၤ.

4 ဒီးစံးဆၢဝဲ,ဒီးကတိၤတၢ်ဒီးပှၤတဖၣ်လၢအဆၢထၢၣ်လၢအမဲာ်ညါ,ဒီးစံးဝဲဒၣ်,ဟံးထီၣ်ကွံာ်တၢ်အကူအသိးလၢအဘၣ်အၢလၢအလိၤတက့ၢ်.ဒီးစံးဘၣ်အီၤ,ကွၢ်ကွၢ်,ယဒုးလဲၤပူၤကွံာ်နတၢ်အၢလၢနၤ,ဒီးယကဒုးကလံၤနၤလၢတၢ်ကူတၢ်သိးလၢအလုၢ်ဒိၣ်ပှ့ၤဒိၣ်လီၤ.

5 ဒီးယစံး,မ်အပာ်ခိၣ်သလုးအကဆှီလၢအခိၣ်တက့ၢ်.ဒီးအဝဲသ့ၣ်ပာ်ခိၣ်သလုးအကဆှီလၢအခိၣ်,ဒီးဒုးကူထီၣ်သိးထီၣ်အီၤလၢတၢ်အကူအသိးလီၤ.ဒီးယွၤအကလူးဆၢထၢၣ်ဝဲလီၤ. 6 ဒီးယွၤအကလူးအုၣ်အသးဒီးစီၤယိၤရှူ,ဒီးစံးဝဲဒၣ်, 7 တၢ်သုးမုၢ်ဂီၢ်မုၢ်အယွၤစံးဒ်အံၤ,နမ့ၢ်ပိာ်ယကျဲ,ဒီးနမ့ၢ်တိၢ်န့ၢ်ယတၢ်မၤလိာ်ဒီး,နကစံၣ်ညီၣ်ယဟံၣ်ဒီးနကပၢယဂၢၤတဖၣ်,ဒီးယကဟ့ၣ်နဟဲနုာ်လၢပှၤလၢအဆၢထၢၣ်ဖဲအံၤတဖၣ်အကျါလီၤ.

8 ပှၤလုၢ်တၢ်အခိၣ်စီၤယိၤရှူဧၢ,ကနၣ်တၢ်,နဲဒၣ်ဒီးနတံၤနသကိးလၢအဆ့ၣ်နီၤလၢနမဲာ်ညါတက့ၢ်.အဂ့ၢ်ဒ်အံၤ,မ့ၢ်ဝဲလၢတၢ်အပနီၣ်အပှၤကညီလီၤ.အဂ့ၢ်ဒ်အံၤ,ယကဒုးဟဲထီၣ်ယခ့ယပှၤ,တၢ်အဒ့အဖီလီၤ.

9 အဂ့ၢ်ဒ်အံၤ,ကွၢ်ကွၢ်,လၢၢ်လၢယပာ်လၢစီၤယိၤရှူအမဲာ်ညါတဖျၢၣ်န့ၣ်,အမဲာ်နွံတိၣ်အိၣ်လၢလၢၢ်တဖျၢၣ်န့ၣ်အလိၤလီၤ.ကွၢ်ကွၢ်,ယကကွဲးဝာ်အတၢ်ကွဲးဝာ်,ဒီးယကပာ်ကွံာ်ကီၢ်တဘ့ၣ်အတၢ်အၢန့ၣ်လၢမုၢ်တနံၤဃီလီၤ.တၢ်သုးမုၢ်ဂီၢ်မုၢ်အယွၤစံးဝဲဒၣ်.

10 တၢ်သုးမုၢ်ဂီၢ်မုၢ်အယွၤစံးဝဲဒၣ်,တၢ်လၢမုၢ်တနံၤန့ၣ်သုကိးဂၤဒဲးကကိးတဂၤပှၤလၢအဃၢၤ,လၢစပံးမုၢ်အဖီလာ်,ဒီးလၢသ့ၣ်ချၢၣ်ဒၢအဖီလာ်လီၤ.