Zep 1 | KswSKMB | STEP | ယွၤအကလုၢ်လၢအဘၣ်စီၤစဖါနယၤ,စီၤကူၤၡံအဖိဖိခွါ,စီၤကဒါလယၤအဖိခွါ,စီၤအမၤရယၤအဖိခွါ,စီၤဃံးစကံယၤအဖိခွါလၢယူဒၤအစီၤပၤစီၤအၤမိၣ်အဖိခွါ,စီၤယိၤၡံယၤအမုၢ်နံၤတဖၣ်အပူၤန့ၣ်,

‏ Zephaniah 1

1 ယွၤအကလုၢ်လၢအဘၣ်စီၤစဖါနယၤ,စီၤကူၤၡံအဖိဖိခွါ,စီၤကဒါလယၤအဖိခွါ,စီၤအမၤရယၤအဖိခွါ,စီၤဃံးစကံယၤအဖိခွါလၢယူဒၤအစီၤပၤစီၤအၤမိၣ်အဖိခွါ,စီၤယိၤၡံယၤအမုၢ်နံၤတဖၣ်အပူၤန့ၣ်,

2 ယကမၤလၢာ်ကွံာ်ကယဲၢ်တၢ်အိၣ်လၢထံဧိၤကီၢ်ဧိၤအပူၤ,ယွၤစံးဝဲဒၣ်, 3 ယကမၤလၢာ်ပှၤကညီဒီးဆၣ်ဖိကီၢ်ဖိ,ယကမၤလၢာ်ထိၣ်ဧိၤလံၣ်ဧိၤလၢမူကပိာ်လိၤ,ဒီးဒ့ၣ်ဧိၤညၣ်ဧိၤလၢပီၣ်လဲၣ်ပူၤ,ဒီးခီၣ်ဘၣ်တိၢ်အလီၢ်အိၣ်ဒီးပှၤတတီတလိၤ,ဒီးယကမၤစီၢ်ကွံာ်ပှၤကညီလၢထံဧိၤကီၢ်ဧိၤအပူၤန့ၣ်လီၤ,ယွၤစံးဝဲဒၣ်.

4 ဒီးယကယူာ်ထီၣ်ယစုထီဒါယူဒၤ,ဒီးကယဲၢ်ပှၤယရူၤၡလ့ၣ်ဖိ,ဒီးယကဒီၣ်တဲာ်ကွံာ်တၢ်အိၣ်လီၤတဲာ်ဘၣ်ဃးဒီးဘဧၤလးလၢအလီၢ်ဖဲအံၤ,တၢ်ဂီၤအပှၤလုၢ်တၢ်အဒိၣ်အမံၤ,ဒီးပှၤလုၢ်တၢ်အဒိၣ်တဂၤ, 5 ဒီးပှၤလၢအဘါထီၣ်မူခိၣ်အတၢ်သုးမုၢ်ဂီၢ်မုၢ်လၢဟံၣ်ခိၣ်,ဒီးပှၤလၢအဘါတၢ်ဒီးဆိၣ်တၢ်လၢယွၤအမဲာ်ညါ,ဒီးပှၤလၢအဆိၣ်တၢ်လၢအတၢ်ဂီၤမလိာ်အမဲာ်ညါ, 6 ဒီးပှၤလၢအဃၣ်ကွံာ်အသးလၢယွၤ,ဒီးတဃုဘၣ်ယွၤ,ဒီးတသံကွၢ်ဘၣ်အီၤဘၣ်လီၤ.

7 အိၣ်ဘှီၣ်ကလာ်လၢကစၢ်ယွၤအမဲာ်ညါတက့ၢ်.အဂ့ၢ်ဒ်အံၤ,ယွၤအမုၢ်တနံၤအိၣ်ဘူးထီၣ်လံ.အဂ့ၢ်ဒ်အံၤ,ယွၤကတဲာ်ကတီၤလံတၢ်လုၢ်,ပာ်စီဆှံလံပှၤလၢအကိးဝဲတဖၣ်န့ၣ်လံ.

8 ဒီးမုၢ်တနံၤလၢယွၤကလုၢ်တၢ်န့ၣ်တၢ်ကမၤအသးလၢယကအိၣ်သကိးပှၤအခိၣ်,ဒီးစီၤပၤအဖိအလံၤ,ဒီးကယဲၢ်ပှၤလၢအကူအသိးဒီးပှၤတခီဘီမုၢ်ဖိအကူအသိးလီၤ.

9 ဒီးတၢ်လၢမုၢ်တနံၤန့ၣ်ယကအိၣ်သကိးကယဲၢ်ပှၤလၢအစံၣ်ကပာ်ကျဲစၢၤအကျိၤထံး,ပှၤလၢအမၤပှဲၤအကစၢ်အဟံၣ်လၢတၢ်မၤန့ၢ်ဆူၣ်ဒီးလီတၢ်လီၤ.

10 ဒီးယွၤစံးဝဲဒၣ်,တၢ်လၢမုၢ်တနံၤန့ၣ်တၢ်ကမၤအသးလၢတၢ်ကိးပသူထီၣ်ကသီၣ်ထီၣ်လၢပဲတရီညၣ်,ဒီးတၢ်ကဟီၣ်ပသူထီၣ်လၢတၢ်ခံတီၤတတီၤန့ၣ်ဒီးတၢ်လီၤပှီၢ်ဖးဒိၣ်ကသီၣ်ထီၣ်လၢတၢ်စိခိၣ်တဖၣ်န့ၣ်လီၤ.

11 ပှၤအိၣ်ဝဲဆိးဝဲလၢမးကတ့ၣ်သ့ၣ်ဧၢ,ဟီၣ်ပသူထီၣ်တက့ၢ်.အဂ့ၢ်ဒ်အံၤ,ပှၤကနၤဧၣ်ဖိဘၣ်တၢ်မၤဟးဂီၤကွံာ်အီၤခဲလၢာ်,ကယဲၢ်ပှၤလၢအစိာ်စ့ဘၣ်တၢ်ဒီၣ်တဲာ်ကွံာ်ခဲလၢာ်လီၤ.

12 အဆၢအကတီၢ်ဖဲန့ၣ်ယကဃုတၢ်လၢယရူၤၡလ့ၣ်အပူၤလၢမ့ၣ်အူဒၢ,ဒီးအိၣ်သကိးပှၤလၢအအိၣ်ဒၣ်အတၢ်,လၢအစံးလၢအသးကံၢ်ပူၤ,တၢ်အဂ့ၤမ့ၢ်ဂ့ၤ,တၢ်အအၢမ့ၢ်ဂ့ၤ,ယွၤတမၤဘၣ်ဝဲဘၣ်.

13 ဒီးအတၢ်ဖိတၢ်လံၤကကဲလၢတၢ်ဂုာ်ဆူၣ်ပျီဆူၣ်,ဒီးအဟံၣ်တဖၣ်န့ၣ်ကကဲလၢတၢ်အိၣ်သယုၢ်လီၤ.ကသူၣ်ဘၣ်ဟံၣ်ဘၣ်ဆၣ်ဒီး,တအိၣ်တဆိးဘၣ်လၢအပူၤ,ကသူၣ်စပံးမုၢ်ဘၣ်ဆၣ်ဒီး,တအီဘၣ်အစပံးထံဘၣ်.

14 ယွၤအမုၢ်နံၤဖးဒိၣ်တနံၤအိၣ်ဘူးထီၣ်လံ,အိၣ်ဘူးထီၣ်လံ.ဒီးဟဲဝဲချ့ချ့လီၤ.ယွၤအမုၢ်တနံၤအကလုၢ်သီၣ်လီၤ.ပှၤအဆူၣ်ကဲးကိးနးနးကလဲာ်ဖဲန့ၣ်လီၤ.

15 တၢ်လၢမုၢ်တနံၤန့ၣ်မ့ၢ်တၢ်သးကဲၤထီၣ်အမုၢ်တနံၤ,တၢ်ဘၣ်ကိၢ်ဘၣ်ဂီၤ,ဒီးတၢ်ဘၣ်နးဘၣ်ဖှီၣ်အမုၢ်တနံၤ,တၢ်အိၣ်သယုၢ်ဒီးတၢ်လီၤပှီၢ်အမုၢ်တနံၤ,တၢ်ခံးဒီးတၢ်အုးသကျူာ်အမုၢ်တနံၤ,တၢ်အၢၣ်ဒီးတၢ်ခံးသူအမုၢ်တနံၤ, 16 ကွဲၤအသီၣ်ဒီးတၢ်ကိးပသူထီၣ်အမုၢ်တနံၤထီဒါဝ့ၢ်အိၣ်ဒီးအခိၣ်ဒူ,ဒီးတၢးထီတဖၣ်လီၤ.

17 ဒီးယကဒုးဟဲတၢ်ကိၢ်တၢ်ဂီၤလၢပှၤကညီအလိၤ,ဒီးကလဲၤတၢ်ဒ်ပှၤမဲာ်ဘျီၣ်အသိးန့ၣ်လီၤ.မ့ၢ်အမၤကမၣ်ဘၣ်ယွၤဒီး,တၢ်ကလူလီၤအသွံၣ်ဒ်ဟီၣ်ခိၣ်အကမူၣ်အသိး,ဒီးအညၣ်ကမၤသးဒ်တၢ်အ့ၣ်အသိးန့ၣ်လီၤ.

18 လၢယွၤအသးကဲၤထီၣ်အမုၢ်တနံၤန့ၣ်အစ့မ့ၢ်ဂ့ၤ,အထူမ့ၢ်ဂ့ၤမၤပူၤဖျဲးအီၤတသ့ဘၣ်.အသးက့ၣ်အမ့ၣ်အူန့ၣ်ကအီၣ်ကွံာ်ထံဧိၤကီၢ်ဧိၤဒီဘ့ၣ်ညါလီၤ.အဂ့ၢ်ဒ်အံၤ,ကမၤလၢာ်ကွံာ်ကယဲၢ်ပှၤလၢအအိၣ်အဆိးလၢကီၢ်ပူၤသတူၢ်ကလာ်လီၤ.