‏ 1 Corinthians 12

Ta̤nî̤bǎko Běcǎ sǎcahtǐ asû toǒ

1Pṳwè̤ sî꤮, khònò̤htǒo, he sò̌yṳ dǒhtû̌ǐphlo bǎ sî ta ta̤nî̤bǎko sû htě Běcǎ sǎcahtǐ ǐ sî tapwa̤ ta tapwa̤nu toǒ awi̤akè̌. 2Bǎ sî yṳǎna̤ǎ Běcǎ Ye̤shǔ hǒtò̤ akhanu, sî gûcû̌sǔ kû̌bò pwa̤yo̤ htě a hî̌bǎjòtò̤nu toǒ akò, dě a sûcû̌sǔbò sî klè̌. 3He sò̌yṳ nosî̌yaphlo sî ta kòyò htě a ǐsho phû̌mò̤ Ye̤shǔ dǐkhò̌꤮ tò̤nu toǒ mî̌, tû̌pwǎ kòyò htě Cǒmara a sǎcahtǐ yṳ̂klè̌nè̌klò nû̌ûnu toǒ pwǎ. Běcǎ sǎcahtǐ dè yṳ̂klè̌nè̌klò kòyò tapwa̤pwa̤ tò̤ hî̌nu, a olò̤bò̌ lǒkho ta Ye̤shǔ mî̌ Běcǎ tapwa̤, hǐnu dǐpwǎ̤꤮ tò̤.

4Ta̤nî̤bǎko sû htě Běcǎ sǎcahtǐ ǐhtǒo toǒnu, a sǒsǒnû̌û dǐcǎ꤮ tò̤, a ǒklî̌ǒklû̌ pwǎ̤ta a hè a kòshî̌kòtṳ mî̌ tacǎpa pwǎ. A kòshî̌kòtṳ mî̌ a hè dě Běcǎ sǎcahtǐ htǒo a ǒ hǒ. ^a 5Ta̤ma̤ htě pa glè ma̤ bǎ pwa̤yṳǎphû̌ ahǔwa̤ toǒ ayanu, a ǒplṳ̂ pwǎ̤ta ta̤ma̤ htǒotoǒnu a kî̌yanû̌û. Pò̤̌ta Běcǎ htě pa ma̤ bǎ yǎ ta̤ma̤ htǒotapwa̤ numî̌ tapwǎ̤꤮ pa pwǎ. 6Ta̤sî̌ta̤jò htě aǒ ta pa dě pa glè ma̤ bǎ Cǒmara a ta̤phî̌ta̤ma̤ ayanu, a ǒplṳ̂ pwǎ̤ta ta̤sî̌ta̤jò htǒotoǒnu a kî̌yanû̌û. Pò̤̌ta pwa̤ htě a ǐlò̤ pa ta̤sî̌ta̤jò tapwa̤ ta tapwa̤ dě pa glè ma̤ Cǒmara ata̤ma̤ htǒotoǒ aya numî̌, Cǒmara tapwǎ̤꤮ pa pwǎ.

7Ma̤pûhǐ pa ma̤jèpû pa pṳwè̤ Khrî̌stuphû̌ ahǔwa̤ toǒ ayanu, Cǒmara dǔlṳ ta Běcǎ sǎcahtǐ ǒ dě pa pṳ̂̌꤮ tapwa̤ akû hǒ. 8Dě pakla toǒǒnu, Běcǎ sǎcahtǐ ǐlò̤ asî ta̤wi̤ta̤kè̌ htě adû̌ayǒ toǒ, toǒǒnu a ǐlò̤ asî ta̤wi̤ta̤kè̌ htě a lǒbe ta ta̤sî̌khû̌sî̌ya toǒ. 9Toǒǒnu Běcǎ sǎcahtǐ ǐlò̤ nû̌û ta̤yṳsho, toǒǒnu a ǐlò̤ nû̌û ta̤po̤ta̤phǎ htě a ma̤bǎ bǎ kò ta̤shǐta̤sha toǒ. 10Toǒǒnu Běcǎ sǎcahtǐ ǐlò̤ nû̌û ta̤po̤ta̤phǎ htě a ma̤lṳjò ta̤cǒklî̌kî̌ya toǒ. Toǒǒnu Běcǎ sǎcahtǐ ǐ asî ta̤sî̌ta̤jò htě a glè htûhtò̌ pwa̤po̤ toǒ, toǒǒnu a ǐlò̤ nû̌û ta̤sî̌ta̤jò htě a sî̌yajò ta̤ htě kò hî̌bǎ toǒ dě kò hî̌bǎ ta̤ htǒotoǒ numî̌ a ǒ dě Běcǎ sǎcahtǐ a ǒ hè mè̤ ya, mî̌ amè̤tò̤ ya hǐnu. Toǒǒnu a ǐlò̤ nû̌û ta̤hî̌bǎjò yo̤khěkhǒhtǒo toǒ. Toǒǒnu a pwe̤ǐlṳphlo tèplè̌htò̌jòge bǎ kò ta kòyòhî̌bǎ yo̤khěkhǒhtǒo htě kò sî̌yahtû tò̤ htǒotoǒ amûasǎ. 11Pwa̤ htě a ǐlò̤bò sû htǒotoǒ numî̌ Běcǎ sǎcahtǐ tapwǎ̤꤮ pa pwǎ. Dě ta̤nî̤bǎko sû htǒonu, a ǐlò̤bò pwa̤yṳǎphû̌ pṳ̂̌꤮ tapwa̤. A ǐlò̤ bǎ kò jǔ꤮ tû̌ pwǐ a sò̌yṳ ǐlò̤ kònu pwǎ.

Na̤klû aphwǐaphrû̌ ǒplṳ̂ pwǎ̤ta na̤ ǒhtupwǎ nû̌û tapwǎ̤꤮ pa

12Kòyòhǎkhû̌phû̌ ana̤klû htǒonu aphwǐaphrû̌ ǒplṳ̂ mè̤mè̤̌ pwǎ̤ta na̤klû ǒhtupwǎ nû̌û tapwǎ̤꤮ pa pwǎ. Sǒsǒta hǐnuakho pa yṳǎ Ye̤shǔkhrî̌stu htǒotoǒnu, a ǒplṳ̂ mè̤mè̤̌ pwǎ̤tadě pa htûhtupwǎ nû̌û na̤ tapwǎ̤꤮ pa pwǎ. ^b 13Hǐnuhǒ, dě paklanu, toǒǒ mî̌ Yṳ̌daphû̌, toǒǒ mî̌ Yṳ̌daphû̌ mè̤tò̤, toǒǒ mî̌ jû, toǒǒ mî̌ pwa̤pelesesǎphû̌. Pwǎ̤tadě Běcǎ sǎcahtǐ htǒotapwa̤ ǒhtupwǎ nû̌û akhû̌akhî, pa plohtubò nû̌û shi ta Khrî̌stu ana̤klû ta̤pwǎ̤꤮ pa akû pwǎ. Pa nî̤bǎ sǒsǒbò nû̌û Běcǎ sǎcahtǐ tapwǎ̤꤮ pa pwǎ.

14Ma̤tè̤hî̌dě, kòyò ana̤klûnu, aphwǐaphrû̌ ǒ pwǎ tacǎpa mè̤tò̤. A ǒ plṳ̂. 15Hî̌mò̌, khò̌lopo̤ dè hî̌ ta, “He mî̌ cǔde mè̤tò̤, hǐnudě he mî̌ na̤klû aphwǐaphrû̌ mè̤tò̤,” a dè hî̌ hǐnu, pwǎ̤ta a htûsadape pwǎ na̤klû aphwǐaphrû̌ pwǎ. 16Htodě nò̌kulǎ hî̌ ta, “He mî̌ mi̤sǎphlǒ mè̤tò̤, hǐnudě he mî̌ na̤klû aphwǐaphrû̌ mè̤tò̤,” a dè hî̌ hǐnu pwǎ̤ta a htûsadape pwǎ na̤klû aphwǐaphrû̌ pwǎ. 17Pa na̤klûhtǒo a dè ǒ cè̌cè̌pwǎ mi̤sǎphlǒ hî̌dě, pa cû̌ gana̤dejò hî̌tè? Pa na̤klûhtǒo a dè ǒ cè̌cè̌pwǎ nò̌kulǎ hî̌dě, pa cû̌nṳsabǎjò hî̌tè? 18Pò̤̌ta na̤klû aphwǐaphrû̌ tacǎ ta tacǎnu, Cǒmara ǐlò̤tû̌ nû̌û agûla̤ ta agûla̤ dě jǔ꤮ tû̌ a bè̌lò̤tû̌ pwǐ ato nû̌ûsò̌phlǒnu hǒ. 19Na̤klû aphwǐaphrû̌ gûla̤ pṳ̂̌꤮ tò̤glònu, a dè ǒ cè̌cè̌pwǎ mi̤sǎphlǒ, mè̤tò̤mî̌ a dè ǒ cè̌cè̌pwǎ nò̌kulǎ dèhî̌dě na̤klû ǒpe tò̤ hǒ. 20Hǐnu akhû̌akhî, na̤klû aphwǐaphrû̌ ǒplṳ̂ pwǎ̤ta na̤ ǒhtupwǎ nû̌û tapwǎ̤꤮ pa pwǎ.

21Hǐnudě, “He lo̤bǎ na tò̤,” mi̤sǎphlǒ bǎ hî̌ cǔde tò̤. Hǐnuakho, “He lo̤bǎ na tò̤,” hǐkǒ bǎ hî̌ khò̌lopo̤ tò̤tò̤. 22Dèhî̌mè̤mè̤̌, na̤klû aphwǐaphrû̌ htě a lo̤bǎdû̌ tò̤, kò gènè̤pî̌tî̌ nû̌û toǒnu, kò lo̤bǎdû̌khlo ta̤pa̤ nû̌û. 23Na̤klû aphwǐaphrû̌ htě a lo̤bǎdû̌ tò̤ pa gènè̤ yǎ toǒnu, pa tǐ̤ bè̌dû̌ asî. Na̤klû aphwǐaphrû̌ htě kò kè̌shǐ yǎta awî̤ tò̤ toǒnu, pa bǎ ma̤bǐ ǐwǒkhlo yǎ. 24Na̤klû aphwǐaphrû̌ htě kò kè̌shǐ yǎta a la̤hî̌ǒtò̤ toǒnu, pa lo̤bǎ tîwî̌ kûbǐsǒbǐwǒ yǎ tò̤. Pwǎ̤ta, bǎ Cǒmara bǒ pana̤klû akha, ta̤ htě pa gènè̤ yǎta a lo̤bǎdû̌ tò̤ htǒotoǒnu, a bè̌dû̌wǒ mè̤mè̤̌ nû̌û. 25Ma̤pûhǐ sî sò̌phlǒ khlè̌khǒ pû nû̌û tapwa̤ ta tapwa̤꤮ tò̤nu, Cǒmara ma̤htò̌nṳ Khrî̌stu ana̤klû hǐnu hǒ. Hǐnudě, khònò̤htǒo, na̤klû aphwǐaphrû̌ tacǎ ta tacǎ htǒo bǎ ma̤htunû̌û ta̤ dě ma̤shû̌ma̤jo nû̌û tapwa̤ ta tapwa̤. 26Aphwǐaphrû̌ tacǎ dè khòbǎ ta̤pò̤ta̤sha hî̌dě aphwǐaphrû̌ lǒ̤꤮ bò khòbǎ kû̌dǒ yǎ. Kò dè htû̌sò̌ǐ aphwǐaphrû̌ tacǎ hî̌dě, aphwǐaphrû̌ lǒ̤꤮ bò sò̌le̤sò̌lò̤ plǒhtubò nû̌û.

27Khònò̤htǒo, sî lǒ̤꤮ bò htǒotoǒ numî̌, sî htû plǒbò nû̌û Khrî̌stu ana̤klû tacǎ꤮ pa. Dě sî tapwa̤ ta tapwa̤ numî̌ ana̤klû aphwǐaphrû̌ tacǎ꤮ pa. 28Dě pwa̤yṳǎta̤ aprṳ̂aho akûnu, Cǒmara bè̌htò̌ wǐgutṳ̌ pwa̤nophû̌ toǒ, ginǐ̤to̤tato̤ mî̌ pwa̤po̤ toǒ, suto̤tato̤ mî̌ sara toǒ, nǒkòdě kòyò htě a ma̤lṳ ta̤cǒklî̌kî̌ya toǒ, kòyò htě a nî̤bǎ ta̤sîrîpo̤phǎ dě a ma̤bǎjò bǎ kò ta̤sha toǒ, kòyò htě a ma̤shû̌ma̤jo kò toǒ, kòyò htě a yṳ̂klè̌nè̌klò bǎ kò toǒ, ta kòyò htě a hî̌bǎjò yo̤khěkhǒhtǒo toǒ hǒ. ^c 29Kòyò pṳ̂̌꤮ pwa̤ htûbò pwa̤nophû̌ tò̤. Kòyò pṳ̂̌꤮ pwa̤ htûbò pwa̤po̤ tò̤. Kòyò pṳ̂̌꤮ pwa̤ htûbò sara tò̤. Kòyò pṳ̂̌꤮ pwa̤ nî̤bǎbò ta̤sîrîpo̤phǎ htě a glè ma̤lṳ bǎ kò ta̤cǒklî̌kî̌ya toǒnu tò̤. 30Kòyò pṳ̂̌꤮ pwa̤ ma̤bǎjòbò bǎ kò ta̤shǐta̤sha tò̤, kòyò pṳ̂̌꤮ pwa̤ hî̌bǎjòbò yo̤sǎkhěkhǒhtǒo toǒ tò̤, kòyò pṳ̂̌꤮ pwa̤ htûbò pwa̤ htě a hî̌tèplè̌htò̌jò bǎ kò ta yo̤sǎkhěkhǒhtǒo toǒ amûasǎ tò̤. 31He sò̌yṳ ta sî sò̌phlǒsho sò̌yṳ kû̌ lǒkho sû htě awǒgutṳ̌ dě a ma̤shû̌ma̤jo mè̤mè̤̌ kònu toǒ. Pwǎ̤ta ta̤lǒ̤bò htǒotoǒ aklanu, awǒkhlonu a ǒpe tacǎ. Hǐnu tacǎmî̌ mo̤ǐ nû̌û tapwa̤ ta tapwa̤ htǒonu hǒ.