1 Corinthians 13
Ta̤mo̤ǐ
1He dè hî̌bǎjòbò kòyòhǎkhû̌phû̌ ayo̤ toǒ ta mǒkhû̌tanaphû̌ lǒ̤꤮ bò toǒ ayo̤ pwǎ̤ta he dè mo̤ǐ kò tò̤ hî̌nu, he htû pwǎ mo̤ ta cî̌ca htě apo̤ te̤we̤toso koo nòdû̌ htǒotoǒ pwǎ. 2He dè nî̤bǎ ta̤sî̌ta̤jò dě he dǒhtû̌ǐjò bǎ kò ta Cǒmara ale̤ayo̤ toǒ bǎbǎ, he dè sî̌ya bòmṳ̂sîglî ta̤ adû̌ayǒ toǒ ta bò꤮ ta̤sî̌khû̌sî̌ya toǒnu bǎbǎ, he nî̤bǎ ta̤yṳ htě a nosǒsǔ cû̌bò̌kè kholo toǒ bǎbǎ, he dè mo̤ǐ kò tò̤ hî̌nu, he mî̌ kòyò nòdû̌pwǎ tapwa̤. a 3Ta̤ lǒ̤bò htě a ǒ ta he toǒnu, he ǐbòkè yǎta kòyò shuphǔshèwè toǒ bǎbǎ, htohǒtò̤ he lṳhtò̌kè hena̤ dě kò shû̌gèkè he ta mî̌ bǎbǎ, he dè mo̤ǐ kò tò̤ hî̌nu, a nî̤bwǐnî̤sîrî heya dǐcǎ꤮ tò̤. 4Pa dè mo̤ǐ kò hî̌dě, pa khòsò̌dobò̌, pa gwèbǎǐ kò, pa sò̌khě kò ta̤ tò̤, pa hî̌bǎhtò̌yî̤ payo̤ tò̤, pa phî̌dû̌phî̌htû pana̤ tò̤. 5Pa dè mo̤ǐ kò hî̌dě ta̤ htě atoabǎ tò̤ toǒnu pahî̌pama̤ kò tò̤. Pa kè̌lǎcèkwè̌lǎ tû̌ paya tò̤. Pa dè mo̤ǐ kò hî̌nu pa sò̌phlǒdû̌ yû kò tò̤. Pa pṳ̂mě kòta̤sǔ tò̤. 6Pa dè mo̤ǐ kò hî̌dě, bǎ kò ma̤ ta̤phû̌mò̤shî̌hto akhanu, pa sò̌le̤sò̌lò̤ tò̤, pwǎ̤ta kò dè hî̌cǒma̤cǒ ta̤ hî̌nu, pa sò̌le̤sò̌lò̤ mè̤mè̤̌. 7Pa dè mo̤ǐ kò hî̌nu, pa sò̌phlǒ pî̌pè̤ dǐkhò̌꤮ tò̤. Pa yṳǎ sělě ta kò wǒ hè pě, pa kè̌shuǐ sělě ta Cǒmara ma̤wǒ hè kò pě, htohǒtò̤ pa khòsò̌dobò̌ ta̤pṳ̂̌tacǎ. 8Ta̤mo̤ǐnu agutṳjòtò̤, a ǒměǒgle tûjûpwa̤. Pwa̤po̤ a ta̤hî̌bǎ toǒ bǎbǎ, ta̤hî̌bǎjò yo̤khěkhǒhtǒo toǒ bǎbǎ, ta̤sî̌yaphlophǎ toǒ bǎbǎ, a ǒ měgle tûjûpwa̤ tò̤, a hǎmǎkèbò pě. 9Pa ta̤sî̌khû̌sî̌ya khònò̤kha htǒotoǒnu bǎbǎ, pa ta̤hî̌po̤phǎnǎ Cǒmara ale̤ayo̤ toǒnu bǎbǎ alǒabe hǒtò̤. 10Pwǎ̤tadě htû̌꤮ nǒkòpě bǎ Cǒmara ǐpa ta̤sî̌khû̌sî̌ya htě alǒabe htǒo akhapěnu, ta̤ htě alǒabe tò̤ toǒnu a hǎmǎkèbò pě. 11Bǎ he phijaû̌pe akhanu, he ta̤hî̌bǎ bǎbǎ, he ǐlò̤ he sò̌phlǒsǔshi toǒnu bǎbǎ, he ta̤gènè̤ toǒnu bǎbǎ, asǒsǒta phijaû̌ tapwa̤nu pwǎ. Pò̤̌ta bǎ he dû̌pwa̤ hè akhanu, he wîkèbò phijaû̌ ala̤klo toǒ. 12Sǒsǒta hǐnuakho ta̤ htě pa sî̌ya khònò̤htǒo toǒ numî̌ a lò̤pwǎ ta pa kè̌ me̤dǔ dě a lṳ sûprṳ̂pwǎ tabǎnu. Pwǎ̤ta nǒkò pěnu mṳni̤mṳsa htě pa kè̌shǐ glashǔ sana̤ Cǒmara ta pana̤ pěnu, a hèto̤ pě, dě pa sî̌yaphlobò pṳ̂̌꤮ tacǎ pě. Khònò̤dě pa sî̌yaphlobò Cǒmara hǒtò̤ pwǎ̤ta bǎnukha pěnu, pa sî̌ya te̤mǎbò pwǐ Cǒmara sî̌ya te̤mǎbò panu pě. 13Pò̤̌ta khònò̤ htǒonu, ta̤yṳ, ta̤kè̌shuǐ ta ta̤mo̤ǐ ǒkèpe sucǎ. Dě htǒo sucǎ aklanu adû̌khlo kò mî̌ ta̤mo̤ǐ.
Copyright information for
KxfSCKRC