1 Corinthians 5
Ta̤cû̌sǔnṳ mamǔmakhû ǒhtò̌ dě pwa̤yṳǎta̤ aprṳ̂aho akû
1Khònò̤dě, kò pwe̤ǐlṳ bǎ he ta, dě sîklanu kòyò cû̌sǔnṳ mamǔ dě a cû̌sǔnṳgesǒtû̌ ta amo̤nǒ ǒ tapwa̤ he gana̤de kò hî̌ he hǐnu. Kòyò htě a yṳǎ Khrî̌stu tò̤ toǒ dě ta̤sǔ pwǐhè̌onu a ma̤nǒ lǒkho tò̤. a 2Dè ma̤hǐnudě, sî cû̌ phî̌htò̌yî̤jò sîna̤ hî̌tè? Wǐ꤮ ta sî phî̌htò̌yî̤ sîna̤nu, sî to sǎpla̤sǎyṳ sikè sîna̤. Kòyò htě a cû̌sǔnṳ pwǐhè̌o tapwa̤pwa̤nu, sî to wṳ̂hǎhtò̌kè yǎta sî aprṳ̂aho kla. 3He na̤klû ǒyî̤ ta sî pò̤̌ta he sò̌phlǒ tǒhtupwǎ ta sî. Kòyò htě a ma̤ta̤sǔ adû̌ayǒ pwǐhè̌o toǒnu, he cèrò yǎta Ye̤shǔ ami̤akû pwǐ he ǒplǒ ta sînu hǒ. 4Bǎ sî ǒplǒhî̌bǎhtu kè̌shǐ glashǔplǒbò nû̌û akhapěnu, he sò̌yṳ noma̤bò sî pṳ̂̌꤮ tacǎ htě asǒsǒta he ǒplǒ ta sî hǐnu. 5Ma̤pûhǐ kò ma̤pî̌kè kòyò htǒotapwa̤ a sǐshiphěyî̌ a ta̤sò̌yṳ ayanu, sî bǎ ǐlò̤kè kòyò htǒotapwa̤ dě khînǎmo̤pha hǐkǒdû̌ a cǔdekû. Ma̤pûhǐ kòyò htǒotapwa̤ a yolahtûpwa̤ nî̤bǎ ta̤ma̤lû̌htò̌ge htû̌꤮ Běcǎ a mṳni̤ pě ti̤ni̤ ayanu, sî bǎ ma̤ hǐnu. Ma̤tè̤hî̌dě sî nî̤bǎ Běcǎ a ta̤shû̌ta̤sho ta a ta̤po̤ta̤phǎ hǒ akhû̌akhî, ma̤ lǒkho hǐnu. 6Sî cû̌ hî̌bǎ htò̌yî̤ tǒ̤ sîta̤hî̌bǎ hǐnumî̌ amè̤ tò̤. Gènè̤htò̌ lǒkho ta̤hî̌bǎ tûmû dě a hî̌, “Ta̤bû tîkî̌phû̌ pwǎ dě a ma̤tophǒbò mû̌ to̤glo,” kò hî̌ numî̌ sî sî̌ya yahî̌. Hǐnudě kòyò htǒotapwa̤ a ta̤sǔnu, a dǔlṳhtò̌ to̤kû̌bò sî tṳ̂prṳ̂ ata̤sǔ hǒ. b 7Ma̤pûhǐ sî mṳ̂plî lîtîklî̌bò ayanu, sî bǎ phî̌htò̌kè ta̤bûli̤ ata̤sǔ htǒonu, hǐnudě sî htûhtò̌ sǒsǒta mû̌sa htě ta̤bû ǒpatò̤ htǒonu pě. He sî̌ya te̤mǎ ta sî mî̌ kòyò mṳ̂plîhto toǒ, ma̤tè̤hî̌dě Khrî̌stu mî̌ pa ta̤cû̌tû̌lû̌pwè asophû̌ htě a khòsihto paya dě a bòlû̌ pa ta̤sǔ tapwa̤. c 8Hǐnudě pa ǎoplǒnû̌û ta̤cû̌tû̌lû̌pwè htǒonu hò̌꤮. Mû̌ htě a ǒshîlo̤ dǒta ta̤bû htǒonu, pa to ǎyǎ tò̤. Ta̤bû htǒonu, a ma̤ dû̌htò̌plṳ̂ ta̤sǔ ta ta̤phû̌mò̤shî̌hto toǒ pwǎ. Pa ǎoplǒnû̌û mû̌ htě ta̤bû ǒshîlo̤ tò̤ htǒonu, ta mû̌ htě a mṳ̂plî htǒonu ta ta̤te̤ta̤mǎ htǒonu toǒ hò̌꤮! d 9He khwè̌ bǎ sî lî̤ dě awǐkha tabǎ numî̌, he hî̌ sî ta bǒsû̌khǎkho pûma̤ ta kòyò htě a cû̌sǔnṳ mamǔmakhûnu toǒ ma̤, he khwè̌cû̌ bǎ sî hǐnu. 10Pwǎ̤tadě he hî̌ hè̌o numî̌, he sò̌yṳ hî̌ ta bǎ bǒsû̌ ta kòyò htě a yṳǎ kû̌kò Ye̤shǔkhrî̌stu tò̤nu toǒ ma̤ hǐnu mè̤tò̤. Dě asîkla toǒǒnu kòyò htě a cû̌sǔnṳ mamǔmakhû, a sò̌yṳnî̤dû̌khlo tû̌ aya, a ǎhǔǎkě, a saba pwa̤yo̤ sî toǒnu a ǒ akhû̌akhî, he sò̌yṳ hî̌ kòyò hǐnu toǒ mè̤tò̤. Kòyò htě a yṳǎ kû̌kò Cǒmara tò̤ toǒnu sî bǎ bǒsû̌ asî tò̤ dèhî̌dě, sî bǎ hǎhtò̌cû̌ tephephlǔkè ta hǎkhû̌ htǒonu hǒ. 11He sò̌yṳ hî̌ hî̌tèhî̌dě kòyò htě a hî̌lò̤ lǒkho ana̤ ta pwa̤yṳǎphû̌ toǒ pwǎ̤tadě a dè cû̌sǔnṳ mamǔmakhû, a sò̌yṳkè̌tû̌ aya, a saba pwa̤yo̤, dǒmi̤shǐyo̤ kò, ǎmṳopǒ mè̤tò̤dě ǎhǔǎkě sî toǒnu bǒsû̌ pûma̤ asî ma̤. Bǎ ǎhtuohtu pwǎ ta kòyò hǐnu toǒ pwǎnu ǎhtuohtu pûma̤ma̤. 12– 13Hî̌mè̤mè̤̌꤮ mî̌, cèrò kòyò ǒ dě pwa̤yṳǎta̤ aprṳ̂aho akhlonu toǒ mî̌ he ta̤ma̤ mè̤tò̤. Kòyò hǐnu toǒ mî̌ Cǒmara cèrò tû̌ asî pě. Pò̤̌ta sî to cèrò tû̌ sî pwa̤yṳǎta̤ aprṳ̂ahophû̌ toǒ numî̌ mè̤tò̤ ya? Lî̤cahtǐkû hî̌, “Wṳ̂hǎhtò̌kè kòyò phû̌mò̤ dě sîklanu,” e dě sî bǎ ma̤ kû̌ hǐnu.
Copyright information for
KxfSCKRC