1Cor 8 | KxfSCKRC | STEP | Khònò̤dě he sò̌yṳ khwè̌cû̌ bǎ sî shǎǎ htě kò bǔǎhtò̌ yǎta pwa̤yo̤nu toǒ awi̤akè̌. Sî hî̌ ta pwa̤yo̤ toǒ numî̌ a ta̤po̤ta̤phǎ shû̌sho dě a la̤ma̤pè̤ pa aǒ tò̤nu pa sî̌ya, sî hî̌ hǐnu mî̌ amè̤ lè. Sî ta̤sî̌ya htǒonu, a nophî̌dû̌ sî ta sî na̤ pwǎ̤ta ta̤mo̤ǐnu a ma̤shû̌ma̤jo mè̤mè̤̌ kò hǒ.

‏ 1 Corinthians 8

Shǎǎ htě kò bǔǎhtò̌ yǎta pwa̤yo̤ toǒ awi̤akè̌

1 Khònò̤dě he sò̌yṳ khwè̌cû̌ bǎ sî shǎǎ htě kò bǔǎhtò̌ yǎta pwa̤yo̤nu toǒ awi̤akè̌. Sî hî̌ ta pwa̤yo̤ toǒ numî̌ a ta̤po̤ta̤phǎ shû̌sho dě a la̤ma̤pè̤ pa aǒ tò̤nu pa sî̌ya, sî hî̌ hǐnu mî̌ amè̤ lè. Sî ta̤sî̌ya htǒonu, a nophî̌dû̌ sî ta sî na̤ pwǎ̤ta ta̤mo̤ǐnu a ma̤shû̌ma̤jo mè̤mè̤̌ kò hǒ. 2 Kòyò htě agènè̤ ana̤ ta he sî̌yaplṳ̂ toǒnu, ta̤ htě a to sî̌ya toǒnu, a sî̌ya dǐcǎ꤮ hǒtò̤. 3 Pwǎ̤ta kòyò tapwa̤pwa̤ htě a mo̤ǐ Cǒmaranu, Cǒmara sî̌ya nû̌ûta a mî̌ akòyò hǒ.

4 Hǐnu akhû̌akhî, ǎshǎǎ htě kò bǔǎhtò̌ yǎta pwa̤yo̤ toǒnu, pa sî̌ya ta pwa̤yo̤ htǒonumî̌ a nòdû̌ pwǎ, amûasǎ ǒ dǐcǎ꤮ tò̤. Pa sî̌yapo̤ kû̌ta Cǒmara numî̌ a ǒ pwǎ tapwǎ̤꤮ pa. 5 Cǒmara mè̤tò̤, dě kòyò saba yǎ toǒ numî̌ aǒplṳ̂ mè̤mè̤̌. Dě asî hî̌ lǒkho, Cǒmara htǒotoǒ numî̌ a ǒ mǒkhû̌, mè̤tò̤mî̌ a ǒ hǎkhû̌ bǎo, hǐnu. Dě Cǒmara mè̤tò̤ htǒotoǒnu asî sabahtò̌ nû̌û pwǐ asî Cǒmara, asî Běcǎ toǒnu. 6 Pwǎ̤ta pa sî̌ya ta Cǒmara mî̌ a ǒpwǎ tapwǎ̤꤮ pa. A mî̌ papha, a mî̌ a bǒlò̤ ta̤pṳ̂̌꤮ tacǎ dě pa ǒhtûpwa̤ ta aya. Běcǎ mî̌ a ǒpwǎ tapwǎ̤꤮ pa, a mî̌ Ye̤shǔkhrî̌stu hǒ. Cǒmara nobǒlò̤ tṳtṳ ta̤pṳ̂̌꤮ tacǎ ta Ye̤shǔkhrî̌stu. Pwa̤ htě a ǐ pa ta̤htûpwa̤ mî̌ a hǒ.

7 Pwǎ̤ta, pa pṳwè̤ Khrî̌stuphû̌ toǒǒ dě a sî̌ya te̤mǎbòkû̌ ta̤sî̌ya htě he khwè̌ bǎ sî khònò̤htǒo hǒtò̤nu aǒ toǒ. Bǎ asî yṳǎ Ye̤shǔ hǒtò̤ akhanu, asî gènè̤ ta pwa̤yo̤ htǒotoǒ numî̌ a ta̤shû̌ta̤sho ǒ akhû̌akhî, asî glè wîkè a ta̤gènè̤ htǒotoǒnu, apò̤asha mè̤mè̤̌ asî aya. Bǎ asî ǎshǎǎ htě kò lṳhtò̌ yǎta pwa̤yo̤ htǒotoǒ akhanu, a mo̤ nû̌ûsò̌phlǒ tò̤, dě a ma̤sǔ ta̤ hǒ a gènè̤ lǒkho hǐnu. 8 Shǎǎshǎo htǒonu a ma̤wǒhtò̌to̤ pa ta̤bǒsû̌khǎkho ta Cǒmara dî̌kî̌꤮ tò̤. Pa ǎ bǎbǎ, pa ǎ tò̤ bǎbǎ, a la̤htûbwǐhtûsîrîto̤ paya dǐcǎ꤮ tò̤.

9 Sî sò̌yṳ ǎ ta̤ titètè̌꤮ nu sî ǎnî̤ pwǎ pwǎ̤tadě, ǒsè̌rè̌ lǒkho sîna̤ nî̌꤮. Ma̤tè̤ sî ma̤ta̤ toǒnu, nohtûhtò̌ pûma̤ ta̤lòkhǔlòpo̤ ta kòyò a ta̤yṳta̤nǎ pî̌tî̌ toǒ aya ma̤. 10 Hî̌mò̌, kòyò htě ata̤yṳ pî̌tî̌ tapwa̤pwa̤ dè kè̌shǐ sî cû̌phî̌ ǎshǎ htě kò lṳhtò̌ yǎta pwa̤yo̤ htǒo, hî̌mò̌nu. Sî sî̌ya ta pwa̤yo̤ htǒonumî̌ a nòdû̌ pwǎ, amûasǎ ǒ dǐcǎ꤮ tò̤ pwǎ̤ta kòyò htě a sî̌ya kû̌kò tò̤ htǒotapwa̤nu a kè̌mò̌mṳ sî dě a cû̌phî̌ǎ kû̌ pě. A phî̌ǎ dě a mo̤ nû̌ûsò̌phlǒ tò̤, pwǎ̤tadě a phî̌ǎ pě. 11 Hǐnudě sî pṳwè̤ htě ata̤yṳ pî̌tî̌ htǒotapwa̤nu, sî tobǎ sî̌ya ta Khrî̌stu khòsidǒ bǎ aya. Ma̤tè̤hî̌dě sî sî̌ya ta̤htǒo ta sî ma̤ta̤ htǒo akhû̌akhî, sî ma̤pò̤ma̤sha sî pṳwè̤ htǒo hǒ. 12 Dě sî ma̤hǐnu akhû̌akhî, sî ma̤sǔkè sî pṳwè̤ htǒotoǒ hǒ. Ma̤tè̤hî̌dě ata̤yṳ pî̌tî̌ dě a gû kè̌mò̌mṳ ma̤kû̌ sî dě asò̌phlǒmo̤ nû̌û tò̤ akhû̌akhî, a sǒsǒta sî ma̤sǔkè Khrî̌stunu hǒ. 13 Ma̤hǐnudě, he ǎ ta̤yî̌ khû̌khî, a dǔlṳhtò̌ pṳwè̤ Khrî̌stuphû̌ tapwa̤pwa̤ a ta̤lòkhǔlòpo̤ hî̌mò̌nu, he ǎpe ta̤yî̌ dǐkhò̌꤮ tò̤. Ma̤tè̤hî̌dě he sò̌yṳ nohtûhtò̌ ta̤lòkhǔlòlo ta he pṳwè̤ Khrî̌stuphû̌ htǒotoǒ aya tò̤ akhû̌akhî, he ǎpe tò̤.