1Ti 1 | KxfSCKRC | STEP | He mî̌ Pò̌lu. He khwè̌cû̌ bǎ sî lî̤htǒotabǎ. Cǒmara htě a ma̤lû̌htò̌ge pa htǒotapwa̤ ta Ye̤shǔkhrî̌stu htě pa ta̤kè̌shu nǎla̤ǐ yǎ htǒotapwa̤nu, asî hî̌lò̤hto ayo̤ ta a nohtûhtò̌ he ta Ye̤shǔkhrî̌stu a pwa̤nophû̌ tapwa̤.

‏ 1 Timothy 1

1 He mî̌ Pò̌lu. He khwè̌cû̌ bǎ sî lî̤htǒotabǎ. Cǒmara htě a ma̤lû̌htò̌ge pa htǒotapwa̤ ta Ye̤shǔkhrî̌stu htě pa ta̤kè̌shu nǎla̤ǐ yǎ htǒotapwa̤nu, asî hî̌lò̤hto ayo̤ ta a nohtûhtò̌ he ta Ye̤shǔkhrî̌stu a pwa̤nophû̌ tapwa̤. 2 He khwè̌cû̌ lî̤htǒo dě Timò̤̌te htě alò̤ta he phû̌makhû sana̤ dě ta̤yṳta̤nǎ akû tapwa̤ a ǒ. ^a

Pha Cǒmara ta pa Běcǎ Ye̤shǔkhrî̌stu ǐlò̤tû̌ta a ta̤bwǐta̤sîrî, ta̤sò̌yṳgwèbǎǐ ta ta̤gûjûkabǎ nî̌꤮.

Ta̤ǐsè̌rè̌sè̌so pwa̤sû̌ǐtòwòǐ sǔ ta̤ toǒ

3 Bǎ he hǎhtò̌cû̌kè dě Makedò̌niaga akha, pwǐ he noǒsayè̤hto na bǎ Ephè̌shiawî̤kûnu, dě ǒ sayè̤ sělěpo̤ kû̌nǎ bǎnu nî̌꤮. Kòyò ǒ bǎnu toǒ sû̌ǐtòwòǐ kò ta̤sû̌ǐtòwòǐ ahǔwa̤ dě asǔ toǒ akhû̌akhî, na bǎ hî̌lò̤shû̌ nayo̤ ta noǒkǔkè asî ata̤sû̌ǐtòwòǐnu toǒ. 4 Pwe̤ǐ asî ta a glè ma̤bò nòdû̌ pûma̤ ta̤akhîakha ta ta̤dǒnè lò̤we̤ dě꤮ wǐkha toǒ ta ta̤dǒkhlidǒlè htě ahtûnu toǒ ma̤. Ta̤hǐnu toǒ mî̌ a ǐǒhtò̌ pwǎ ta̤gègo nû̌û, htohǒtò̤ a ma̤dǐdòdǒpo̤ Cǒmara ata̤ma̤ htě pa ma̤jò pwǎpǒ̤ yǎta ta̤yṳta̤nǎ htǒonunu. 5 Ta̤hî̌lò̤ yo̤htǒo a ta̤yè̤lò̤ kè̌shuǐ mî̌ ma̤pûhǐ a htû̌wè̤htò̌ ta̤mo̤ǐ ayanu pwǎ. Ta̤mo̤ǐ htǒonumî̌ a hèhǎhtò̌ dě kòyò sò̌phlǒ mṳ̂plînu toǒ akû. Htodě a hèhǎhtò̌ dě kòyò ǒ ta ta̤sî̌ya ta̤wǒ ta ta̤phû̌mò̤ dě a wû̌lǎphî̌ ta̤ htě awî̤nu toǒ, htohǒtò̤ a hèhǎhtò̌ dě kòyò ǒ mè̤mè̤̌ ta ta̤yṳta̤nǎnu toǒ akû. 6 Kòyò toǒǒnu, a htû̌tiwǐ kǒtèplè̌kè ana̤ ta ta̤htǒotoǒ dě asî cû̌hî̌bǎ dǒhtû̌ǐplǒ kè̌khînû̌û yo̤ htě a nòdû̌nu toǒ hǒ. 7 Asî sò̌yṳ htûhtò̌ lǒkho Cǒmara a pwa̤sû̌ǐ ta̤sû̌ta̤tòwò asara toǒ pwǎ̤tadě asî ata̤hî̌bǎ tû̌nu toǒ bǎbǎ, asî hî̌kwè̌꤮ hî̌tènu a sî̌ya gekhî lǒkho tò̤. Ta̤wi̤ta̤kè̌ toǒ htě asî hî̌bǎ shò̌tèklè̌ awi̤akè̌nu bǎbǎ, asî sî̌yaphlo dǐcǎ꤮ tò̤.

8 Pa noǎ ta̤sû̌ta̤tòwò htǒo bǎ a gwa noǎ akhanu, pa sî̌yapwǎ ta awǒ. 9 Pa sî̌ya ta ta̤sû̌ta̤tòwò htǒotoǒnu, kò ǐǒhtò̌ yǎta kòcǒkòtè̤ toǒ ayanu mè̤tò̤. Mî̌tanu, kò ǐǒhtò̌ kòyò htě a ma̤sǔ ta̤sû̌ta̤tòwò toǒ ta kòyò htě a gana̤de kû̌kò tò̤ toǒ, htodě kòyò htě a bè̌dubè̌na̤ kû̌kò Cǒmara tò̤ toǒ, ta kòyò htě a ma̤ ta̤sǔta̤plě toǒ, ta a saba kû̌kò Cǒmara tò̤ toǒ, ta a gènè̤ kû̌kò Cǒmara tò̤ toǒ, ta a ma̤si apha dèmè̤tò̤mî̌ amo̤ toǒ, ta a ma̤si kòyò toǒ, 10 Ta kòyò htě a cû̌sǔnṳ mamǔmakhû toǒ, ta kòyò htě a cû̌ma̤bò̌ aphû̌amakhû̌ toǒ, makhû ta makhû sǔkè̌khînû̌û, kòyò pṳ̂shaǎ kò ta wû toǒ, kòyò htě a lòhota̤ toǒ ta kòyò htě a cû̌ khòbǐkhòǒ asò̌ toǒ, dèmè̤tò̤mî̌ a ma̤ta̤ ahǔwa̤ tacǎcǎ dě a khlè̌khǒ ta ta̤sû̌ǐtòwòǐ acǒatè̤ toǒ aya pwǎ. 11 Ta̤sû̌ǐtòwòǐ htě acǒatè̤ htǒonumî̌, kè̌shǐpwǎ yǎ dě ta̤sò̌le̤sò̌lò̤ awi̤akè̌ akû htǒonu pwǎ. Cǒmara yṳǎ he dě a ǐ he ta̤sò̌le̤sò̌lò̤ awi̤akè̌ htǒo ta he bǎ wi̤lò̤ ayanupwǎ. Ta̤sû̌ǐtòwòǐ acǒatè̤ htǒonumî̌ a hè dě ta̤howi̤ a Cǒmaradû̌ htě kò htû̌sò̌ǐ nû̌û htǒotapwa̤ a ǒ.

Běcǎ a ta̤gwèbǎǐ akhû̌akhî Pò̌lu hî̌bwǐhî̌sîrî nû̌û

12 Pa Běcǎ Ye̤shǔkhrî̌stu ǐ he ta̤khû̌ta̤ǎ dě he ma̤ ata̤ma̤ aya akhû̌akhî, he hî̌bwǐhî̌sîrî yǎ. Htohǒtò̤ a bè̌ he pwǐ kòyò htě acǒatè̤ ta ayo̤ tapwa̤ dě a wû̌lǎ he ta he ma̤bǎ ata̤ma̤ akhû̌akhî, hî̌bwǐhî̌sîrî yǎ. 13 Dě꤮ awǐkha numî̌, he hî̌ phû̌mò̤shî̌hto Ye̤shǔkhrî̌stu, he ma̤jîma̤jû yǎ, he pi̤jishǐcǒ yǎ pwǎ̤tadě Běcǎ gwèbǎǐ he, ma̤tè̤hî̌dě he yṳǎna̤ǎkû̌ hǒtò̤, dě he ma̤ta̤ htǒotoǒnu, he sî̌ya hǒtò̤ akhû̌akhî, a gwèbǎǐ pwǎ he. ^b 14 Dě pa Běcǎ glolò̤ lò̌lò̤plṳ̂ mè̤mè̤̌ abwǐasîrî helo̤ dě a ǐ he ta̤yṳta̤nǎ ta ta̤mo̤ǐ htě a ǒ dě Ye̤shǔkhrî̌stu akûnu toǒ hǒ.

15 Ma̤pûhǐ Ye̤shǔkhrî̌stu hè ma̤lû̌htò̌ge kòyò ta̤ma̤sǔphû̌ toǒ dě, a hèlò̤ hǎkhû̌ bǎo hǒ. Ta̤hî̌bǎ htǒonumî̌ acǒatè̤ dě kòyò lǒ̤꤮ bò tobǎ phî̌shǔ lǒ̤sû̌lǒ̤sò̌ yǎ. Ta̤ma̤sǔphû̌ lǒ̤꤮ bò aklanumî̌ he mî̌ kòyò htě a ma̤sǔ dû̌khlokò tapwa̤ hǒ. 16 Pwǎ̤ta ma̤pûhǐ Cǒmara dǔlṳhtò̌ Běcǎ Ye̤shǔkhrî̌stu a ta̤khòsò̌do alǒabe dě helo̤ ayanu, a gwèbǎǐ he. Ma̤tè̤hî̌dě he mî̌ kòyò htě a ma̤dû̌khlo kò ta̤sǔ tapwa̤. Ma̤pûhǐ he htûhtò̌ bǎ kò la̤kè̌mò̌mṳ dě pwa̤yṳǎge a nǒkò toǒ aya, htodě ma̤pûhǐ asî nî̤bǎkû̌ yolahtûpwa̤ tûjûpwa̤ talakhǎ ayanu dě Cǒmara gwèbǎǐ pwǎ he. 17 Kòyò pṳ̂̌꤮ tapwa̤ htû̌sò̌ǐ tû̌ Khwǐ htě a pǒǐta̤ tûjûpwa̤ talakhǎ dě a sijòtò̤ htǒotapwa̤ nî̌. A mî̌ Cǒmara htě kò kè̌shǐjò yǎtò̤. Cǒmara mî̌ a tapwǎ̤ pa. Kòyò pṳ̂̌ tapwa̤ bè̌dû̌bè̌htû tû̌ta yǎ, a ǒtû̌ta ta̤sîrîdû̌sîrîhtû pṳ̂̌꤮ tuhtu nî̌. Amè̤.

18 Hephû̌khû Timò̤̌te, ta̤htě he noma̤ na khònò̤ htǒotoǒ numî̌, a gûma̤kû̌pwǎ kòyò toǒ a ta̤hî̌bǎnǎ nawi̤nakè̌ toǒnu pwǎ. Ma̤pûhǐ na shěwǒ ta̤ ayanu, noǎ Cǒmara a ta̤hî̌bǎnǎ htǒotoǒ pwǐ kò noǎ ta̤wè̌ta̤htò toǒnu nî̌꤮. 19 Dě pṳ̂měǐ na ta̤yṳta̤nǎ ta na sò̌phlǒ a ta̤gènè̤ mṳ̂plînu toǒ nî̌꤮. Kòyò toǒǒnu, a plûkè lǒkho ata̤ htǒotoǒ akhû̌akhî, a ta̤yṳta̤nǎ pî̌kèbò pwǎ. 20 Kòyò htě a ta̤yṳta̤nǎ pî̌kè hǐnu toǒ mî̌ Hǔmenè̌ ta Alexander hǒ. Ma̤pûhǐ a htû ta̤sû̌ǐ ta asîya dě a ǒkǔkè a ta̤hî̌bǎsǔ Cǒmara toǒ ayanu, he ǐlò̤kè asî dě khînǎmo̤pha hǐkǒdû̌ a cǔdekû hǒ.