1Ti 3 | KxfSCKRC | STEP | Ta̤hî̌bǎ htǒonumî̌ acǒatè̤ dě kòyò tapwa̤pwa̤ dè sò̌yṳhtû pwa̤yṳǎta̤ aprṳ̂aho hǐkǒdû̌ hî̌nu, ta̤ma̤ htě a sò̌yṳma̤ htǒonumî̌ ta̤ma̤ awǒ tacǎ hǒ.

‏ 1 Timothy 3

Pwa̤yṳǎta̤ aprṳ̂aho hǐkǒdû̌ toǒ

1 Ta̤hî̌bǎ htǒonumî̌ acǒatè̤ dě kòyò tapwa̤pwa̤ dè sò̌yṳhtû pwa̤yṳǎta̤ aprṳ̂aho hǐkǒdû̌ hî̌nu, ta̤ma̤ htě a sò̌yṳma̤ htǒonumî̌ ta̤ma̤ awǒ tacǎ hǒ. 2 Kòyò htě a htû pwa̤yṳǎta̤ aprṳ̂aho hǐkǒdû̌ tapwa̤nu, kò bè̌ ta̤sǔ dě alo̤nu a bǎ ǒ tò̤, a bǎ maǒpwǎ tapwǎ̤꤮ pa, a bǎ jîsapwa̤ ana̤, a bǎ pǒǐjò ana̤, a bǎ ǒhtûpwa̤hǎnòò̌ te̤bǎte̤to, a tobǎ kaǎshǔ shǐpwa̤shǐmè̤ dě ahǐ, a tobǎ sû̌ǐtòwòǐjò ta̤. ^a 3 Htodě a tobǎ ǎmṳopǒnṳ tò̤, a bǎ sò̌phlǒphǒ tò̤, pwǎ̤ta a to htû kòyò htě a sò̌dohobî̌, kòyò htě agèago kû̌kò tò̤, a bǎmo̤ǐ wûhta tò̤. 4 A to htû kòyò htě a pǒǐjòwǒ a hǐphû̌phòphû̌ toǒ, htodě a tobǎ bǔǐdû̌ sû̌ǐhtò̌jò aphû̌ toǒ htě a gana̤de nû̌û yo̤ ta a bè̌dubè̌na̤ nû̌û dě ta̤ lǒ̤꤮ bò akû. 5 Ma̤tè̤hî̌dě kòyò tapwa̤pwa̤ dě a topǒǐ a hǐphû̌phòphû̌ toǒ hî̌tènu, a dè sî̌ya tò̤ hî̌dě a kè̌ǐkhwè̌ǐjò Cǒmara a pwa̤yṳǎta̤ aprṳ̂ahophû̌ tò̤. 6 Ma̤pûhǐ a bè̌htò̌yî̤ pû asò̌phlǒ tò̤, htodě ma̤pûhǐ Cǒmara cèrò sǒsǒ pû yǎta a cèrò khînǎmo̤pha hǐkǒdû̌ tò̤nu, a bǎ htû kòyò htě a yṳǎsa mǒ̤pepwǎnu tò̤. 7 Kòyò htě a yṳǎ Ye̤shǔ tò̤ toǒ glè bè̌dubè̌na̤ pû nû̌û ayanu, a ta̤ǒhtûpwa̤hǎnòò̌ hî̌bǎhî̌sho toǒ tobǎ wǒ pṳ̂̌꤮ taplǎ. Kòyò htě a yṳǎ Ye̤shǔ tò̤ toǒ dè bè̌dubè̌na̤ nû̌û hǐnutò̤ hî̌nu, a ma̤sòwò̤ nû̌û pě, htohǒtò̤ a nî̤kè khînǎmo̤pha hǐkǒdû̌ htò̌glo pě.

Pwa̤ma̤jè pwa̤yṳǎta̤ aprṳ̂ahokû toǒ

8 Sǒsǒta hǐnuakho kòyò htû hǐkǒdû̌ dě a ma̤jè pwa̤yṳǎta̤ aprṳ̂aho toǒnu, kò pṳ̂̌꤮ tapwa̤ tobǎ bè̌dû̌ asî, dě asî tobǎ hî̌bǎcǒtè̤ yo̤sǎ, asî tobǎ o tûlû̌talǎ sobîshisî̌yo̤ tò̤, htodě a to lòho pṳ̂sigwiǎ wû dě kòkhû̌ tò̤. 9 Ta̤yṳta̤nǎ htě acǒatè̤ adû̌ayǒ htǒonu, asî tobǎ pṳ̂měǐwǒ a ta sò̌phlǒ ta̤mṳ̂plî. 10 Kò tobǎ ma̤kè̌wǐ asî. Asî dè khòbò̌ ta̤ma̤kè̌htǒo, htodě kò la̤bè̌ ta̤sǔ dě alo̤ dè ǒtò̤ hî̌nu noma̤nǒ asî ta pwa̤ma̤jè ta̤dě pwa̤yṳǎta̤ aprṳ̂aho akûnu.

11 Asî ma toǒnu bǎbǎ, kò pṳ̂̌꤮ tapwa̤ tobǎ bè̌dû̌bè̌htû asî, asî tobǎ dǒ kòyo̤ tò̤, asî bǎ jîsapwa̤ ana̤ dě asî to htû kòyò htě acǒatè̤ ta ayo̤ dě ta̤ lǒ̤꤮ bò akû.

12 Pwa̤ma̤jè pwa̤yṳǎta̤ aprṳ̂aho tapwa̤nu ama tobǎ ǒpwǎ tapwǎ̤꤮ pa, a bǎ pǒǐjòwǒ tûû̌ a hǐphû̌phòphû̌. 13 Pwa̤ma̤jèta̤ htǒotoǒ htě a ma̤wǒ ta̤phî̌ta̤ma̤ toǒnu, kò bè̌dû̌bè̌htû asî pě, dě bǎ asî sû̌ǐ bǎ kò ta a ta̤yṳǎna̤ǎ Běcǎ Ye̤shǔkhrî̌stu htǒo akhapěnu, a sò̌phlǒkhuha hè dě yṳǎhè ǐtû̌ ana̤ pě.

Pa ta̤subusaba adû̌ayǒ

14 Timò̤̌te꤮, bǎ he khwè̌bǎ na lî̤ htǒotabǎ akhanu, he kè̌shuǐ ta yî̤hǒtò̤ pěnu, he hè kè̌shǐ phwèlǎ ta na pě. 15 Pò̤̌ta he dè hè pò̤ya̤ mò̌nu pa to ǒhtûpwa̤ ta Cǒmara a hǐphû̌phòphû̌ aya hî̌tènu, he lî̤htǒo ǐsî̌ya na pě. Hǐ htǒo numî̌ Cǒmara htě a htûpwa̤ tapwa̤ a pwa̤yṳǎta̤ aprṳ̂aho htǒonuhǒ. Pwa̤yṳǎta̤ aprṳ̂aho htǒonumî̌ a ǐ shohtò̌ ta̤cǒta̤tè̤ a ta̤sû̌ǐ toǒ htě alò̤ta hǐhtǔ ta hǐnò̌dò̌dû̌ dě a tûhtû̌mě hǐ htǒo tamanu hǒ. 16 Pa ta̤subusaba adû̌ayǒhtǒo adû̌ pwî̌꤮ tènu kò htè̌shǔjò yǎ dǐpwǎ̤꤮ tò̤.

Khrî̌stu ǒlṳhtò̌ pwǐ kòyòhǎkhû̌phû̌ tapwa̤, dě Běcǎ sǎcahtǐ khòlṳ ana̤ ta Khrî̌stu htǒonu a ma̤to Cǒmara asò̌phlǒ, dě mǒkhû̌ tanaphû̌ toǒ kè̌shǐbǎ yǎ. Htodě awi̤akè̌ htǒonu, kò dǒhtû̌ǐ yǎ dě khlilèhǔwa̤phû̌ toǒ aklahǒ. Kòyò ǒ hǎkhû̌bǎo toǒǒnu a yṳǎna̤ǎkû̌ nû̌û hǒ. Cǒmara johtò̌ yǎ dě mǒkhû̌ ta̤sîrîdû̌sîrîhtû akûhǒ.