2Cor 5 | KxfSCKRC | STEP | Pana̤saklû mî̌ asǒsǒta hǐ htě pa ǒǐ yǎ dě hǎkhû̌bǎo tamanu, htû̌꤮ kò ma̤pò̌kè yǎ pě, a sò̌le̤ hî̌ htû̌꤮ pa si pěmî̌, pa sî̌ya ta Cǒmara glè ma̤bǎ pahǐsa mî̌ pana̤saklû asa htǒonu dě mǒkhû̌nu pě. A ma̤ ana̤ hǐsa dě pana̤saklû asa htǒonu, a sijòpe tò̤, a ǒměgle tûjûpwa̤ pě.

‏ 2 Corinthians 5

1 Pana̤saklû mî̌ asǒsǒta hǐ htě pa ǒǐ yǎ dě hǎkhû̌bǎo tamanu, htû̌꤮ kò ma̤pò̌kè yǎ pě, a sò̌le̤ hî̌ htû̌꤮ pa si pěmî̌, pa sî̌ya ta Cǒmara glè ma̤bǎ pahǐsa mî̌ pana̤saklû asa htǒonu dě mǒkhû̌nu pě. A ma̤ ana̤ hǐsa dě pana̤saklû asa htǒonu, a sijòpe tò̤, a ǒměgle tûjûpwa̤ pě. 2 Pwǎ̤tadě, pa sò̌yṳ kè̌shu geǒ hǐ dě mǒkhû̌ htǒonu tama akhû̌akhî, bǎ pa ǒpe hǐ dě hǎkhû̌ tamakû akhanu, pa nǎsǔ kookasha mè̤mè̤̌. 3 Ma̤pûhǐ pana̤saklû htǒo a ǒ sělě pûnu, Cǒmara ǐ tèplè̌ pana̤saklû asa htǒonu dě mǒkhû̌ pě. 4 Bǎ pa ǒpe hǐ ta pana̤saklû dě hǎkhû̌bǎo tamakû akhanu, pa kè̌shǐbǎ ta ta̤pò̤ta̤sha akhû̌akhî, pa kookasha. He hî̌ ta pa sò̌yṳ ǒtephekè ta pana̤saklû hǐnu mè̤tò̤. He sò̌yṳ hî̌ ta, ma̤pûhǐ pana̤saklû htě a sijòhtǒo, a htû̌lè̌ tèplè̌kè ta pana̤saklû htě a htûpwa̤ tûjûpwa̤ aya htǒonu, pa sò̌yṳ geǒ dě na̤saklû asa htǒonu akû hǒ, hǐnu pwǎ. 5 Pwa̤ htě a ma̤wǒnǎ bǎ pa dě pa glè nî̤bǎ na̤saklû asa htǒotapwa̤ numî̌ Cǒmara pwǎ. Htohǒtò̤ a ǐlò̤ kû̌po̤ pa Běcǎ sǎcahtǐ htǒonumî̌ alò̤ta ta̤ma̤dòǐ htě aměaglo tacǎ dě a ma̤lǒma̤bebò bǎ pa ta a wṳ̂dònu toǒ hǒ.

6 Hǐnu akhû̌akhî, pa yṳǎ te̤mǎ ta̤htǒotoǒ hǒ. Pana̤saklû dè ǒpepwǎ bǎ hǎkhû̌bǎotoǒ akû hî̌numî̌, pa cû̌ ǒ dě gûla̤ bǎ Běcǎ Ye̤shǔ ǒnu mè̤ hǒtò̤. 7 Ma̤tè̤hî̌dě pa ǒhtûpwa̤ ta ta̤ htě pa yṳǎ yǎ toǒ pwǎ, pa ǒhtûpwa̤ ta ta̤ htě pa kè̌shǐ yǎnu toǒ mè̤tò̤. 8 He hî̌ ta, pa yṳǎ Běcǎ htǒonu ashû̌asho dě pa sò̌yṳ hǎhtò̌cû̌kè ta pana̤saklû htǒo dě pa sò̌yṳcû̌ ǒkû̌dǒ ta Běcǎ dě mǒkhû̌ hǒ. 9 Pwǎ̤tadě, pa ǒ bǎtè꤮ tò̤glò bǎbǎ, pa ǒ pepwǎ bǎo bǎbǎ, pa cû̌ ǒ dě hǐmǒkhû̌ pě bǎbǎ, pa sò̌yṳ ma̤to pwǎ Cǒmara asò̌phlǒ pwǎ. 10 Ma̤tè̤hî̌dě, htû̌꤮ nǒkòpěmî̌ pa pṳ̂̌꤮ tapwa̤ bǎhè ǒbò dě Khrî̌stu la̤cèrò gògohtahtò̌yî̤ alo̤mo̤ pě. Bǎ pa ǒ hǎkhû̌ akha, pa lǒ̤꤮ bò ma̤hto ta̤ htě awǒ toǒnu bǎbǎ, ta̤ htě asǔ toǒnu bǎbǎ, pa nî̤bǎge ta̤ma̤khû̌kǎ pě ya, mî̌ pa nî̤bǎ tò̤ yanu, a sèlèkè̌bò pa pě pṳ̂̌꤮ tapwa̤. ^a

Khrî̌stu akhû̌akhî pa htûhtò̌ Cǒmara a sû̌kho

11 Ma̤tè̤hî̌dě pa sî̌ya ta htû̌꤮ nǒkòpěnu, Běcǎ sèlèkè̌bò kòyòhǎkhû̌phû̌ toǒ ata̤ma̤ hǐnu pě akhû̌akhî, pa ǐsha bè̌dubè̌na̤ na̤cè̌ yǎ pě. Hǐnudě ma̤pûhǐ kò yṳǎna̤ǎge Běcǎ Ye̤shǔ ayanu, pa sò̌phlǒ dǒhtû̌ǐsho bǎ kò hǒ. Kwè̌꤮ mî̌titè ǒ dě pa sò̌phlǒkûnu Cǒmara sî̌yabò ta ana̤ pwǎ. Hǐnudě, pa mî̌ kòyò hî̌tè toǒnu, he kè̌shuǐ ta sî sî̌yahè lòtṳ̌ pwǎpě. 12 Gènè̤ pûma̤ lǒkho ta pa sò̌yṳ hî̌bǎ htò̌yî̤ gesǒ pana̤ hǐnu ma̤. Pa hî̌ sî hǐnu ma̤tè̤hî̌dě ma̤pûhǐ sî hî̌ geshǔjò kòyò htě a pi̤jishǐcǒ panu toǒ ayanu, pa sò̌yṳ nosî̌ya te̤mǎ sî ta pa ma̤kwè̌꤮ mî̌titè hǐnu pwǎ. Kòyònu toǒ mî̌ a bè̌dû̌ phî̌htò̌yî̤ tû̌pwǎ ta̤sî̌ta̤jò htě a ǒlṳ dě akhlonu toǒ pwǎ, a bè̌dû̌ kû̌kò ta̤ htě a ǒ dě kòyò tapwa̤pwa̤ a sò̌phlǒkûnu toǒ tò̤. 13 Kò dè hî̌ pa ta kòyò kicǐ dèhî̌dě, la̤hî̌ǒ nǒtò̤, pa ma̤ lǒ̤꤮ bò htǒotoǒ numî̌ Cǒmara aya pwǎ. Kò hî̌mò̌ pa ta pa ma̤ta̤ ato hî̌mò̌nu, a mè̤hǒ, pa ma̤ mè̤mè̤̌ ta a nî̤bwǐnî̤sîrî sîyanǔ. 14 Khrî̌stu ata̤mo̤ǐ ma̤pè̤kè pa akhû̌akhî, pa ǒhtûpwa̤ ta Cǒmara aya hǐnu hǒ. Pa sî̌ya ta Khrî̌stu si bǎ kòyò pṳ̂̌꤮ tapwa̤ aya. Amûasǎ mî̌ kòyò pṳ̂̌꤮ tapwa̤ si kû̌dǒ ta Khrî̌stu. 15 Pa htûpwa̤ htǒotoǒnu, ma̤pûhǐ pa gû ǒhtûpwa̤ sayè̤pe pûma̤ pwǐ pa sò̌phlǒ a ta̤sò̌yṳnu toǒ ma̤, ma̤pûhǐ pa gû ǒhtûpwa̤ sayè̤kû̌ pwǐ pwa̤ htě a khòsihto paya dě a htûpwa̤gehtosǒ htǒotapwa̤ ayanu, Běcǎ khòsi bǎ pa pṳ̂̌꤮ tapwa̤ aya hǒ.

16 Hǐnudě khònò̤htǒo pa htûhtò̌ ta Khrî̌stu tacǎnǔ꤮ pa akhû̌akhî, pwǐ kòyò htě a yṳǎ Khrî̌stu tò̤ toǒ bè̌dû̌ ta̤ǒlṳ dě akhlo toǒnu, pa bè̌dû̌kû̌pe hǐnutò̤. Dě nukha pa gènè̤sǔtò̤ Khrî̌stu hǐnu, pwǎ̤tadě khònò̤htǒo pa gènè̤sǔpe yǎ hǐnu tò̤hǒ. 17 Kòyò tapwa̤pwa̤ a htûhtò̌ ta Khrî̌stu tacǎnǔ꤮ panu, a htûhtò̌ kòyò tapwa̤ dě Cǒmara bǒlò̤ tèplè̌sa nû̌û hǒ. A wîkè a ta̤ǒhtûpwa̤ ali̤ toǒ dě a ǒhtûpwa̤ tèplè̌kè ta asa hǒ. 18 Ta̤htǒotoǒ lǒ̤bò numî̌ Cǒmara ma̤bò pwǎ. Khrî̌stu hèma̤ bǎ pa akhû̌akhî, pa htûhtò̌ ta Cǒmara a sû̌kho hǒ. A ǐlò̤ pa ta̤phî̌ta̤ma̤ htě pa glè cû̌ dǒhtû̌ǐ yǎta kò htě Khrî̌stu ma̤htûhtò̌ gesǒ pa ta Cǒmara a sû̌kho hǒ, hǐnu pwǎ. 19 Pa sò̌yṳ hî̌numî̌ hî̌tèhî̌dě, Khrî̌stu akhû̌akhî, Cǒmara ma̤htûhtò̌ kòyòhǎkhû̌phû̌ pṳ̂̌꤮ tapwa̤ ta a sû̌kho hǒ. Cǒmara bè̌pe kòyòhǎkhû̌phû̌ toǒ a ta̤ma̤sǔ tò̤ hǒ. Dě a ǐlò̤kè pa ta̤ma̤htǒo dě pa glè cû̌ dǒhtû̌ǐlṳ bǎ kò ta Cǒmara ma̤htûgesǒ kòyòhǎkhû̌phû̌ toǒ ta a sû̌khonu hǒ. 20 Hǐnudě, khònò̤htǒo pa htû pwa̤hî̌bǎta̤ dě Khrî̌stu agûla̤. Cǒmara sana̤ nokwigwèbǎǐ tṳtṳ pa ta sî dě sî gana̤de pa ta̤dǒhtû̌ǐ sî htǒo. Dě Khrî̌stu agûla̤nu pa kwigwèbǎǐ sî, noma̤ lǒkho Khrî̌stu ta a glè ma̤htûhtò̌ge sî ta Cǒmara a sû̌kho toǒ. 21 Khrî̌stunu ata̤sǔ ǒ dǐcǎ꤮ tò̤. Pwǎ̤tadě, ma̤pûhǐ a plělîkè bǎ pa ta̤sǔ ami̤shû̌ toǒ ayanu, Cǒmara nokhòsi nû̌û ta pa ta̤sǔ aya. Khrî̌stu ma̤ bǎ pa hǐnu akhû̌akhî, pa htûhtò̌ ta Khrî̌stu tacǎnǔ꤮ pa dě, Cǒmara bè̌cǒbè̌tè̤ pa dě alo̤mo̤ pě.