‏

Jowǎ̤ni̤ lî̤ ginǐ̤bǎ tabǎhtǒo mî̌ lî̤ htě mo̤pwa̤ tapwa̤ khwè̌cû̌ bǎ mo̤ tapwa̤ ta aphû̌ali̤ toǒ. A sò̌yṳ hî̌ amûasǎ mî̌, pwa̤yṳǎta̤ aprṳ̂aho ta pwa̤yṳǎta̤ aprṳ̂ahophû̌ toǒ alî̤ hǐnu kǎlè. Lî̤phǔtǔphû̌ htǒotabǎ mî̌ kò khwè̌ ǐkhû̌ǐǎ pwa̤yṳǎta̤ aprṳ̂ahophû̌ toǒ glè mo̤ǐ nû̌û tapwa̤ ta tapwa̤, htohǒtò̤ a sò̌yṳ ǐsè̌rè̌nǎ pwa̤yṳǎta̤ aprṳ̂ahophû̌ toǒ ta sara sûlûlòho ana̤nu toǒ ta asî ata̤sû̌ǐtòwòǐnu toǒ awi̤akè̌ pwǎ.

Ta̤hî̌bǎ to̤to̤ ta to̤to̤

Ta̤hî̌bǎ wǐ dě alo̤mo̤ 1:1-3

Ta̤ htě a lo̤bǎdû̌shǐ mî̌ ta̤mo̤ǐ 1:4-6

Ta̤ǐsè̌rè̌sè̌sonǎ ta dǒshuǐ pûma̤ sara sûlûlòho ana̤nu toǒ ma̤ 1:7-11

Ta̤hî̌bǎ gutṳ̌lò̤ 1:12-13

‏ 2 John

1He mî̌ wè̤khǔwè̤pwa̤ htě a htû hǐkǒdû̌ tapwa̤ dě he khwè̌cû̌ lî̤htǒo dě mo̤ htě Cǒmara wû̌lǎ yǎ htǒonu tapwa̤ ta aphû̌ sîtoǒ a ǒ. ▼

▼Mo̤ htě Cǒmara wû̌lǎ yǎ htǒotapwa̤ mî̌ pwa̤yṳǎta̤ aprṳ̂aho.

Sî mî̌ kòyò htě he mo̤ǐ mè̤mè̤̌nu toǒ. He tapwa̤ mo̤ǐ tû̌ sînu mè̤tò̤, kòyò htě a sî̌ya ta̤te̤ta̤mǎ pṳ̂̌ tapwa̤ toǒ mo̤ǐdǒ sîsî. 2Dě ta̤te̤ta̤mǎ ǒ lo̤lo̤ dě pakû akhû̌akhî, pa mo̤ǐ pwǎ sî. Ta̤te̤ta̤mǎ htǒonu a ǒkû̌ ta pa tûjûpwa̤ talakhǎ pě.

Ta̤hî̌mo̤hî̌wǒ

3Pha Cǒmara ta aphû̌khû Ye̤shǔkhrî̌stu ǐlò̤tû̌ta pa htě a gana̤de jûle̤phî̌yo̤ ta̤te̤ta̤mǎ dě mo̤ǐ nû̌û tapwa̤ ta tapwa̤ htǒotoǒ ta̤bwǐta̤sîrî, ta̤sò̌yṳgwèbǎǐ ta ta̤pè̤ta̤dû htǒotoǒ nî̌.

Ta̤te̤ta̤mǎ ta ta̤mo̤ǐ

4He kè̌shǐbǎ naphû̌nali̤ toǒ ǒhtûpwa̤ ta̤te̤ta̤mǎ akû pwǐ pha Cǒmara mǎnǎ pa yo̤nu akhû̌akhî, he sò̌le̤sò̌lò̤ mè̤mè̤̌. 5Mo̤, khònò̤htǒo he kwigwèbǎǐ na, pa mo̤ǐ kè̌khînû̌û tapwa̤ ta tapwa̤ hò̌. He khwè̌ bǎ na ta̤mǎlò̤ htǒotûmû numî̌ asa mè̤tò̤, ta̤mǎlò̤ htě pa nî̤bǎhto dě khû̌lû̌khanu tûmû pwǎ. ^b 6Ta̤mo̤ǐ amûasǎ mî̌, pa ǒhtûpwa̤ gûgana̤de Cǒmara ta̤mǎlò̤nu toǒ hǒ. Pwǐ sî lǒ̤bò gana̤dehtotû̌ ta̤mǎlò̤ khû̌lû̌kha dě a hî̌ ta, sî lǒ̤bò htǒo toǒnu sî tobǎ ǒhtûpwa̤ ta ta̤mo̤ǐ nû̌û akû, a hî̌ hǐnu.

7Pwa̤lǒǎplò̤ǎ kò ǒlṳhtò̌plṳ̂ dě hǎkhû̌bǎo hǒ. Ye̤shǔkhrî̌stu hèlò̤ dě hǎkhû̌bǎo, a hè ta kòyòhǎkhû̌phû̌ a sǐshiphěyî̌nu, asînu toǒ mî̌ a olò̤ kû̌kò tò̤. Kòyò htě a olò̤ kû̌kò hǐnu tò̤ tapwa̤pwa̤ hî̌numî̌ mî̌pwǎ kòyò lǒǎplò̤ǎ kò hǒ, dě a mî̌ kòyò htě a sò̌khě Khrî̌stunu tapwa̤ hǒ. 8Hǐnu akhû̌akhî, ma̤pûhǐ sî nî̤bǎhto ta̤nu toǒ hǎmǎkè pû bǎ sî tò̤nu, htohǒtò̤ ma̤pûhǐ sî nî̤bǎ lǒbebò sî ta̤ma̤khû̌kǎ ayanu, sè̌rè̌ǐ lǒkho sîna̤ nî̌. 9Kòyò htě a ǒměǒgle kû̌kò ta Khrî̌stu a ta̤sû̌ǐtòwòǐ akû tò̤, dě a shû̌nṳlǒshû̌nṳkhlo po̤ a ta̤sû̌ǐtòwòǐ toǒ ta Khrî̌stu a ta̤sû̌ǐtòwòǐ akû toǒnu, Cǒmara ǒkû̌nǒ asî tò̤. Kòyò htě a ǒměǒgle ta Khrî̌stu a ta̤sû̌ǐtòwòǐ akû toǒnu, phataphû̌ sò̌gini̤bò glè ǒkû̌pwǎ ta asî. 10Hǐnu akhû̌akhî, kòyò tapwa̤pwa̤ dè hè sî ǒ hî̌dě a dè phî̌hènṳ ta̤sû̌ǐtòwòǐ htǒotoǒ tò̤ hî̌mò̌nu, kaǎshǔ pûma̤ yǎ dě sî hǐdǒkû ma̤ nî̌. “Ta̤pè̤ta̤dû ǒkû̌ tû̌ta na nî̌,” hî̌shǔ pûma̤ yǎ hǐnu ma̤. 11Ma̤tè̤hî̌dě kòyò tapwa̤pwa̤ dě a kaǎshǔ nû̌ûnu, a htûhtò̌ pwa̤ma̤ plǒta̤ ta a dě ma̤ ta̤phû̌mò̤shî̌hto akû hǒ.

Hî̌bǎ gutṳ̌lò̤kè yo̤

12He sò̌yṳ pwe̤ǐ plṳ̂pe sî ta̤hî̌bǎ toǒ pwǎ̤tadě he sò̌yṳ khwè̌ yǎ ta lî̤bě ta lî̤boshi tò̤. Pwǎ̤tadě ma̤pûhǐ pa ǒlǒbe ta ta̤sò̌le̤sò̌lò̤ ayanu, he kè̌shuǐ ta he hè sî ǒ dě pa kè̌shǐ glashǔ hî̌bǎ gesǒnû̌û tapwa̤ ta tapwa̤ pě.

13Sî pṳwè̤ mamǔ htě Cǒmara wû̌lǎ a tapwa̤ aphû̌ali̤ toǒ sûhè bǎ sî ata̤hî̌mo̤hî̌wǒ htǒotoǒ.