‏ 2 Timothy 2

Ye̤shǔkhrî̌stu akliphû̌ htě a sò̌phlǒcǒtè̤ tapwa̤

1Hǐnu akhû̌akhî, hephû̌khû꤮ bè̌shû̌bè̌sho na sò̌phlǒ ta ta̤bwǐta̤sîrî htě a ǒ dě Ye̤shǔkhrî̌stu akûhtǒonu nî̌꤮. 2Phî̌nṳ ta̤sû̌ǐ htě na gana̤dehto he pwe̤ǐhto bǎ na dě pwa̤lò̤sasî̌ saprṳ̂ a lo̤mo̤nu toǒ nî̌꤮, dě ǐlò̤ tṳtṳ ta̤ htǒotoǒnu ta kòyò htě acǒatè̤ la̤nǎla̤ǐ yǎ dě a sû̌ǐjò tṳtṳ bǎ kònu toǒ a cǔdekû nî̌꤮. 3Khòplǒkû̌ ta̤pò̤ta̤sha ta Khrî̌stuphû̌ ahǔwa̤ toǒ pwǐ Ye̤shǔkhrî̌stu akliphû̌ htě awǒ tapwa̤nu nî̌꤮. 4Kliphû̌ htě a ǒ dě ta̤phî̌ta̤ma̤ akû tapwa̤nu, a sò̌yṳ ma̤toma̤bǎ aklihǐkǒdû̌ asò̌phlǒ akhû̌akhî, a to ma̤ dǐdò ǐ ana̤ ta ta̤phî̌ta̤ma̤ ahǔwa̤ toǒ tò̤. 5Kòyò htě a lò̤we̤ ta̤ tapwa̤nu, a dè gana̤de gûma̤kû̌ ta̤ta̤shǔ a ta̤sû̌ta̤tòwò tò̤ hî̌numî̌ a nî̤bǎjò kû̌kò ta̤ta̤shǔ akhû̌akǎ tò̤. 6Kòyò htě agoakwè̌ ma̤ǎlè̤ tapwa̤nu, a to nî̤bǎwǐgutṳ̌ pwǎ sǒsǎwû̌pho toǒ. 7Gènè̤ te̤mǎ lǒkho ta̤ htě he hî̌htǒonu, ma̤tè̤hî̌dě Běcǎ ǐ sî̌yaphlobò tû̌ na ta̤pṳ̂̌꤮ tacǎ pě.

8Gènè̤bǎ lǒkho Ye̤shǔkhrî̌stu htě Cǒmara ma̤htûpwa̤gesǒ a ta ta̤si htǒonu tapwa̤. A mî̌ Dǎ̤wi̤ akhlialè hǒ. Ta̤sò̌le̤sò̌lò̤ awi̤akè̌ htě he dǒhtû̌ǐ bǎ sî htǒonumî̌ Ye̤shǔ htǒo awi̤akè̌ hǒ. 9He dǒhtû̌ǐ bǎ kò ta̤sò̌le̤sò̌lò̤ awi̤akè̌ akhû̌akhî, he khòbǎ ta̤jîta̤jû dě kò coklomě he ta sǒpli̤te̤htò̌ asǒsǒta kòyò ma̤sǔ ta̤sû̌ta̤tòwò tapwa̤. Pwǎ̤ta Cǒmara ale̤ayo̤nu kò coklomějò nǒ yǎtò̤. 10Hǐnudě ma̤pûhǐ kòyò htě Cǒmara wû̌lǎ nû̌û toǒ nî̤bǎkû̌ ta̤ma̤lû̌htò̌ge ta ta̤sîrîdû̌sîrîhtû tûjûpwa̤ dě Ye̤shǔkhrî̌stu akû htǒonu dě, he khòsò̌dopwǎ bǎ asî.

11Ta̤hî̌bǎ ǒ ta,

“Pa dè si kû̌ta Khrî̌stu dě pa htûpwa̤ kû̌ta a pě.

12Pa dè khòsò̌do ta̤ hî̌dě pa pǒǐ kû̌dǒ ta̤ ta a pě,

Pa dè la̤lò̤kè yǎ dě a la̤lò̤shǔ pa pě. ^a

13Pa dè cǒtè̤ ta a tò̤ pò̤̌ta acǒtè̤ kû̌ta pa pě, ma̤tè̤hî̌dě a la̤lò̤jò ana̤tò̤.”

Ta̤hî̌bǎ htǒotoǒ mî̌ acǒatè̤ pwǎ.

Pwa̤ma̤ta̤ htě ato Cǒmara asò̌phlǒ tapwa̤

14Ǐ gènè̤bǎ gesǒ pwa̤yṳǎphû̌ lǒ̤꤮ bònu toǒ ta ta̤htǒotoǒ nî̌꤮, dě ma̤pûhǐ asî gègokè̌khîpûnû̌û ta ta̤hî̌bǎ htǒotoǒ tò̤nu, nosè̌rè̌ sapwa̤ asî dě Běcǎ a lo̤mo̤nu nî̌꤮. Ta̤hǐnu toǒ mî̌ a ma̤wǒ ta̤ mè̤tò̤. Mî̌ta a ma̤pî̌ma̤lṳ̂kè pwǎ kòyò htě a hè gana̤de asî gègokè̌khînû̌û ta ta̤hî̌bǎnu toǒ pwǎ. 15Ma̤pûhǐ na ma̤toma̤bǎ pwǐ Cǒmara a ta̤sò̌yṳnu, htohǒtò̤ ma̤pûhǐ na sǒsǒta pwa̤ma̤ta̤ tapwa̤ htě a sòwò̤ǐ a ta̤phî̌ta̤ma̤ tò̤, htohǒtò̤ ma̤pûhǐ na htûtû̌ kòyò htě a sû̌ǐto sû̌ǐbǎ kò ta Cǒmara ale̤ayo̤ a ta̤te̤ta̤mǎ tapwa̤ ayanu, jipwi̤ ma̤wǒwǒ nî̌꤮. 16Cû̌we̤ khawe̤kè ta̤hî̌bǎ htě a bè̌dubè̌na̤ Cǒmara tò̤nu toǒ nî̌꤮, ma̤tè̤hî̌dě ta̤hî̌bǎ hǐnu toǒ mî̌ sǔ꤮ sǔ a sûtephe yî̤cû̌ yî̤cû̌kè kò ta ta̤bè̌dubè̌na̤ Cǒmaranu. 17Ta̤ htě kòyò htǒotoǒ dǒhtû̌ǐ numî̌, alò̤ta ta̤shata̤htò dě a ǎ lòte̤pò̤kè phěyî̌nu toǒ. Kòyò ǒ sò̌gini̤ dě a ma̤ta̤ pwǐhè̌o numî̌ Hǔmenè̌ ta Phǐlè̌tǔ. 18Asî cû̌ tephekè ta̤te̤ta̤mǎ aklè̌ dě asî hî̌ lǒkho, ta̤si htûpwa̤gesǒ numî̌ a htûhtò̌htohǒ a hî̌ lǒkho hǐnu akhû̌akhî, a ma̤pî̌kèbò kòyò toǒ a ta̤yṳta̤nǎ. 19Pwǎ̤tadě kò ma̤ guyṳjò Cǒmara a ta̤kòshî̌ měgle htǒonu tò̤. Dě ta̤kòshî̌ htǒo alo̤nu kò khwè̌nǎ ta, “Běcǎ sî̌yaǐtû̌ akòyò” ^b dě “Kòyò pṳ̂̌꤮ tapwa̤ htě a hî̌ ta he mî̌ Běcǎ akòyò toǒnu, a tobǎ htû̌tiwǐ cû̌khǒkè ana̤ ta ta̤sǔ htǒonu.”

20Dě kòyò dû̌yò̤ hǐtama akûnu dîpo̤dîdo ǒklî̌ǒklû̌. Toǒǒnu kò ma̤ yǎta wûhta, toǒǒnu kò ma̤ yǎta sǒ, toǒǒnu kò ma̤ yǎta lo̤hǎ. Toǒǒ dě kò noǎyǎ bǎ kò lo̤bǎdû̌ khǒtû̌ a akhîkha, toǒǒnu, kò bè̌ yǎta la̤noǎ a pṳ̂̌ni̤pṳ̂̌sa aya pwǎ. 21Kòyò tapwa̤pwa̤ dè ma̤ mṳ̂plîhtò̌ge ana̤ ta ta̤ htě a wî nû̌ûnu toǒ hî̌nu, a htûhtò̌ dîpo̤dîdo tacǎ dě kò noǎyǎ bǎ kò lo̤bǎdû̌ khǒtû̌ a akhanu hǒ. A bè̌cahtǐ ana̤ akhû̌akhî, a htûbwǐhtûsîrî ta a Běcǎ aya. Htodě a ma̤wǒ ana̤ ta a glè̌ ma̤wǒ ta̤ lǒ̤꤮ bò aya hǒ. 22Cû̌tephekè ta phû̌sǎ a ta̤sò̌yṳ wǒtò̤nu toǒ nî̌꤮, dě lṳ̂ lǒkho ta̤cǒta̤tè̤, ta̤yṳta̤nǎ, ta̤mo̤ǐ ta ta̤gûjûkabǎ, dě ǒkû̌ ta kòyò htě a yi̤kǒhtò̌ Běcǎ ta asò̌phlǒ mṳ̂plînu toǒ nî̌꤮. 23Cû̌tephekè ta ta̤gègo nòdû̌ htě amûasǎ ǒtò̤nu toǒ nî̌꤮. Na sî̌ya ta ta̤ htǒotoǒnu gutṳ̌lò̤ pěmî̌ a ǐ htûhtò̌ ta̤gègo kè̌khîpwǎ nû̌û. 24Běcǎ ajû tapwa̤ hî̌numî̌ a to bǎgèbǎgo kò tò̤, mî̌tanu, a to hî̌bǎ sò̌dohobî̌ dě kòyò lǒ̤bò akhû̌, htodě a tobǎ htû sara htě awǒ dě khòsò̌do ta̤ tapwa̤. 25Bǎ a sû̌ǐwǒ gesǒ kòyò htě a htè̌shǔ nû̌û toǒ akhanu, a to hî̌bǎ sò̌dohobî̌ kò. Kǎlè̌ mî̌, Cǒmara ǐ asî ashuakhwèwǒ ta a bǎ yò̤lò̤gesǒ asò̌ pě dě a sî̌yahtò̌ge ta̤te̤ta̤mǎ pě kǎlè. 26Dě asî gènè̤htò̌ge ana̤ pě dě a ma̤lû̌htò̌ge tû̌ ana̤ ta khînǎmo̤pha hǐkǒdû̌ ahtò̌glo htǒo akû pě. Ma̤tè̤hî̌dě khînǎmo̤pha hǐkǒdû̌ pṳ̂nṳ asî dě a noma̤ asî pwǐ ato nû̌ûsò̌phlǒnu hǒ.