Mar 16 | KxfSCKRC | STEP | Bǎ Yṳ̌daphû̌ a mṳni̤dǔ tûlû̌kèhto to̤wo̤nu, Madalě̤na dokûmo̤ Marǐa, Jǎgomo̤ amo̤ Marǐa ta Salo pwî̤nṳ shinṳmû̌ dě a glè̌ cû̌plṳ lǒkho nû̌ûta Běcǎ Ye̤shǔ ana̤.

‏ Mark 16

Ye̤shǔ htûpwa̤gesǒ

(Matěo 28:1-8; Lǔka 24:1-12; Jowǎ̤ni̤ 20:1-10)

1 Bǎ Yṳ̌daphû̌ a mṳni̤dǔ tûlû̌kèhto to̤wo̤nu, Madalě̤na dokûmo̤ Marǐa, Jǎgomo̤ amo̤ Marǐa ta Salo pwî̤nṳ shinṳmû̌ dě a glè̌ cû̌plṳ lǒkho nû̌ûta Běcǎ Ye̤shǔ ana̤. 2 Toshodè akû awǐtocǒnu ti̤ni̤ bǎ lṳmṳlî wosò lṳmṳkhǐ pi̤pè̤pe akhanu, asî hè lǒkho dě lṳkhû̌. 3 Bǎ asî hè klè̌lo̤ akhanu, asî hî̌ kè̌khînû̌û, “Mî̌ûpè glè htû̌toklotephekè bǎ pa lo̤bědû̌ htě kò htû̌toklobǐ nû̌ûta lṳkûnu tama pě ya?” Ma̤tè̤hî̌dě lo̤běnu tama mî̌ adû̌mati̤.

4 Pwǎ̤tadě bǎ asî kè̌cû̌ akhanu, a kè̌shǐ kò htû̌toklo tephenǎhtokè lo̤bědû̌nu tama hǒ. 5 Bǎ asî nṳ dě lṳkû akhanu, a kè̌shǐ makhûphû̌sǎ sǒnṳ hǐdopo̤to̤bû tṳpṳ tapwa̤ hǎnòò̌lò̤ bǎ lṳkû cǔdemûnu tokho dě asî sò̌gònò̤bòkè.

6 Dě a hî̌ asî, “Sò̌gònò̤ lǒkho pûma̤꤮, sî kè̌lǎ Nǎ̤sèrèwî̤phû̌ Ye̤shǔ htě kò htǎwa̤si yǎ nò̌dòhtǔlo̤nu tapwa̤ numî̌ he sî̌ya. A htûpwa̤ gehtosǒhǒ. A ǒpe bǎo tò̤. Hèkè̌mò̌ lǒkho, htǒomî̌ agûla̤ htě kò bè̌nṳ nû̌û agûla̤nuhǒ. 7 Gepwe̤ǐ pû Petru ta Ye̤shǔ akhophijaû̌ ahǔwa̤nu toǒ ta Ye̤shǔ cû̌ ǒnǎwǐ sî dě Galilî̌a gakûnu hǒ. Pwǐ a hî̌nǎhto sînu sî glè kè̌shǐ tû̌ yǎ bǎnu pě.” ^a

8 Asî sû̌pi̤sò̌pi̤ dě ana̤ gònò̤gèglè lǒ̤bò akhû̌akhî, asî khlè̌hǎhtò̌kè dě lṳkûkhlo. Asî ǐsha tûlû̌shû̌ dě bǎ a hǎhtò̌cû̌ akhanu, a hî̌bǎpe kò dǐpwǎ̤꤮ tò̤.

Ye̤shǔ ǒlṳhtò̌ bǎ ana̤ ta Madalě̤na dokûmo̤ Marǐa

(Matěo 28:9-10; Jowǎ̤ni̤ 20:11-18)

9 Ye̤shǔ htûpwa̤gesǒ bǎ toshodè akû awǐgutṳ̌nu ti̤ni̤ ^{▼▼Toshodè akû asakhû̌lû̌nu ti̤ni̤ mî̌ mè̤hǒ khònò̤ pwa̤yṳǎkhrî̌stuphû̌ toǒ hî̌ nû̌ûta mṳni̤dǔnu ti̤ni̤ hǒ.} lṳmṳlîwosònu to̤wo̤. Htodě nǒkònu a cû̌dǔlṳ wǐlǒ bǎ ana̤ ta Madalě̤na dokûmo̤ Marǐa. Dě Marǐa htǒotapwa̤ numî̌ a mî̌ mamǔ htě Ye̤shǔ wṳ̂hǎhtò̌kè bǎ nû̌û khînǎkhîno susǒtado dě alo̤nu tapwa̤ hǒ. 10 Hǐnudě, Marǐa cû̌pwe̤ǐlṳ bǎ kòyò htě a cû̌htukhahtu ta Ye̤shǔnu toǒ ta Ye̤shǔ ǒlṳhtò̌ bǎ nû̌û awi̤akè̌. Bǎnuakha asî sǎpla̤sǎyṳ dě ǒyi̤ǒhǎ pepwǎ lǒkho. 11 Asî gana̤de Marǐa pwe̤ǐ bǎ asî ta, “Ye̤shǔ htûpwa̤ pwǎ, he kè̌shǐ sana̤ yǎ ta hena̤,” apwe̤ǐ bǎ asî hǐnu pò̤̌ta asî yṳǎ tò̤.

Ye̤shǔ ǒlṳhtò̌ bǎ akhophijaû̌ sò̌gini̤

(Lǔka 24:13-35)

12 Děnǒkònu akhophijaû̌ sò̌gini̤ hǎhtò̌cû̌ doshǒ akha, asî kè̌shǐ Ye̤shǔ sûlûkhǒ bǎ nû̌û ana̤ dě a dǔlṳ asî. 13 Akhophijaû̌ htǒosò̌gini̤ ge pwe̤ǐ akhophijaû̌ ahǔwa̤toǒ pwǎ̤tadě asî yṳǎ lǒkho kòyò htǒosò̌gini̤ ayo̤ tò̤.

Ye̤shǔ ǒlṳhtò̌ bǎ akhophijaû̌ shǐtapwa̤

(Matěo 28:16-20; Lǔka 24:36-49; Jowǎ̤ni̤ 20:19-23; Pwa̤nophû̌ toǒ 1:6-8)

14 Anǒkò taplǎpe dě bǎ akhophijaû̌ shǐtapwa̤ ǎshǎ akhanu, a dǔlṳ bǎ gesǒ asî ta ana̤. Kòyò htě a kè̌shǐ Ye̤shǔ si htûpwa̤gesǒ htǒotoǒ pwe̤ǐ bǎ asî hǐnudě asî hǐkǒshò̌ dě a yṳǎ lǒkho kò yo̤tò̤ akhû̌akhî, Ye̤shǔ sǎhtǎ asî.

15 Dě a hî̌ asî, “Cû̌ hǎkhû̌ pṳ̂̌tebě dě cû̌shido dǒhtû̌ǐ dǒpû kò lǒ̤bò pṳ̂̌꤮ tapwa̤ ta ta̤sò̌le̤sò̌lò̤ awi̤akè̌ htǒonu nî̌꤮. ^c 16 Kòyò htě a yṳǎ ta̤sò̌le̤sò̌lò̤ awi̤akè̌ htǒo dě a ploge ana̤ ta shi tapwa̤pwa̤nu a glè nî̤bǎ ta̤ma̤lû̌htò̌ge pě. Pwǎ̤ta kòyò htě a yṳǎ tò̤ toǒnu a khòbǎ ta̤cèrò pě. 17 Kòyò htě a yṳǎ toǒnu he ǐ asî sîrîpo̤phǎ dě a bǎ ma̤jò lǒkho ta̤cǒklî̌kî̌ya toǒ pě. Asî wṳ̂hǎhtò̌bò̌ lǒkho khînǎ toǒ ta hemi̤ pě, asî hî̌bǎjò yo̤sǎahǔwa̤nu toǒ pě. 18 Asî dè pṳ̂ wṳ̂phû̌mò̤ toǒ bǎbǎ, a dè cû̌ǎbǎobǎ ta̤wè̤ta̤htòshi htě asijò toǒ bǎbǎ, a ma̤pò̤ma̤sha nǒ asî dǐcǎ꤮ tò̤. Asî dè dò̌htò̌ acǔde dě kòyòshǐkòyòsha toǒ alo̤ hî̌nu, asî ta̤shǐta̤sha hǎmǎkèbò pě.”

Cǒmara kaǎ kihtò̌kè Ye̤shǔ dě mǒkhû̌

(Lǔka 24:50-53; Pwa̤nophû̌ toǒ 1:9-11)

19 Běcǎ Ye̤shǔ hî̌bǎhto ta akhophijaû̌ toǒ dě Cǒmara kaǎ kihtò̌kè nû̌û mǒkhû̌ dě a hǎnòò̌ Cǒmara acǔdemû tokho. ^d 20 Ye̤shǔ akhophijaû̌ toǒ cû̌shido dǒhtû̌ǐ bǎ kò ta Cǒmara ale̤ayo̤ gûla̤ pṳ̂̌꤮ tò̤glò. Ma̤pûhǐ kòyò yṳǎna̤ǎ kû̌ lǒkho ta̤sò̌le̤sò̌lò̤ awi̤akè̌ htě asî pwe̤ǐ bǎ kò htǒonumî̌ a mè̤na̤cè̌ ayanu, Běcǎ ǐ asî htě a glè ma̤jò lǒkho ta̤ma̤ cǒklî̌kî̌ya toǒ pṳ̂̌tacǎ. ^{▼▼Kò khwè̌ lî̤phě dě꤮ nukha kò nǎla̤ǐwǒ yǎ toǒ ta lî̤phě ahǔwa̤ toǒnu, Mǎ̤riko 16:9-20 htǒo kò kè̌shǐ a ǒpa tò̤.}