‏ Matthew 16

Kòyò htû Yṳ̌daphû̌ hǐkǒdû̌ toǒ nodǔlṳ Ye̤shǔ ta̤cǒklî̌kî̌ya

(Mǎ̤riko 8:11-13; Lǔka 12:54-56)

1Pharisè̌phû̌ ta Sadugè̌phû̌ toǒ hè Běcǎ Ye̤shǔ a ǒ dě a hè kwikè̌ takǎ nû̌û ta a glè dǔlṳbǎ asî ta̤cǒklî̌kî̌ya htě a ǒ dě mǒkhû̌ hè tacǎ. ^a

2Dě a hî̌shǔ asî, “Lṳmṳ glè lòte̤hǒ akhanu, mǒkhû̌ dè lî̤ hî̌dě sî hî̌ lǒkho ta, pe̤wo̤pě mî̌ khwè̌ju tò̤. 3Htodě lṳmṳlî akhanu, mǒkhû̌ dè lî̤, poǒlṳ dè jodu hî̌dě sî hî̌ lǒkho, gili̤sǎ hèshû̌ pě. Sî kè̌ mǒla̤ ta̤ma̤htûhtò̌ toǒ dě sî kè̌shǐlṳ sî̌yanǎwǐ khwè̌ju gili̤sǎ awi̤akè̌ pò̤̌ta ta̤ma̤htûhtò̌ ana̤ khònò̤htǒo toǒnu sî cû̌ sî̌yaphlowǐ amûasǎ tò̤ mî̌ hî̌tè? 4Kòyòjî kòyòphû̌mò̤ kòyò htě acǒatè̤ kû̌kò ta Cǒmara tò̤ htǒotuhtu toǒ cû̌kwikè̌ tǒ̤ he ma̤ ta̤cǒklî̌kî̌ya tacǎ, pwǎ̤ta he glè dǔlṳbǎ pwǎpǒ̤ asî ta̤cǒklî̌ tacǎ htě asǒsǒta pwa̤po̤ Yò̤̌nǎnu pwǎ,” A hî̌htodě a hǎhtò̌cû̌ tephekè ta asî. ^b

Pharisè̌phû̌ toǒ ta Sadugè̌phû̌ toǒ ata̤bû

(Mǎ̤riko 8:14-21)

5Bǎ asî hǎhtò̌cû̌kǎbò̌hto shikoǒdû̌ akhanu, akhophijaû̌ toǒ shope̤ phî̌cû̌nṳ mû̌. 6Běcǎ Ye̤shǔ hî̌ asî, “Ǒsè̌rè̌ lǒkho Pharisè̌phû̌ toǒ ta Sadugè̌phû̌ toǒ ata̤bûnu nî̌꤮.” ^c

7Dě asî pwe̤ǐ kè̌khînû̌û ta Ye̤shǔ hî̌ yo̤sǎ htǒonu tapwa̤ ta tapwa̤ dě a hî̌ lǒkho pwǐhè̌onu, “Běcǎ hî̌ pa pwǐhè̌o numî̌ mî̌htě pa shope̤ phî̌cû̌nṳ bǎ yǎ mû̌nu hǒ.”

8Běcǎ Ye̤shǔ sî̌ya ta asî hî̌bǎ kè̌khînû̌û ta mû̌ awi̤akè̌ akhû̌akhî, a gwè asî, “Kòyò ta̤yṳpî̌tî̌ sî꤮, mî̌ma̤tè̤dě sî cû̌pwe̤ǐ kè̌khînû̌û ta sî shope̤ phî̌cû̌nṳ mû̌ awi̤akè̌ hî̌tè? 9Tǒ̤khònò̤ sî sî̌yaphlo kû̌nǒ kò hǒtò̤ ya? Bǎ he bǔǎ mû̌ yè̤̌ma ta kòyò yè̤̌rî̌ akhanu, sî phî̌wǒge a ǒkwèkhlonu toǒdě a ǒ bephǒbětè numî̌ sî shope̤nǎkè hǒ ya? ^d 10Mè̤tò̤mî̌ bǎ he bǔǎ kòyò lǐ̤rî̌ ta mû̌ susǒtama akhanu, sî phî̌wǒge a ǒkwèkhlonu toǒ dě a ǒ bephǒbětè numî̌ sî shope̤nǎkè hǒ ya? ^e 11He hî̌ mû̌ awi̤akè̌ mè̤tò̤ numî̌ sî to sî̌ya kû̌kò hǒ. He hî̌ sî, ǒsè̌rè̌ lǒkho Pharisè̌phû̌ toǒ ta Sadugè̌phû̌ toǒ ata̤bûnu nî̌꤮.” 12Bǎnukha akhophijaû̌ toǒ sî̌yaphlohè ta Běcǎ Ye̤shǔ noǒsè̌rè̌ asî ta ta̤bû htě kò ma̤ sè̌tophǒ dû̌htò̌ yǎ ta mû̌nu mè̤tò̤. A noǒsè̌rè̌ asî ta Pharisè̌phû̌ toǒ ta Sadugè̌phû̌ toǒ a ta̤sû̌ǐtòwòǐ toǒnu pwǎ.

Petru olò̤ ta Ye̤shǔ mî̌ Khrî̌stu

(Mǎ̤riko 8:27-30; Lǔka 9:18-21)

13Bǎ Běcǎ Ye̤shǔ cû̌to̤ Kèsarǐwî̤ Phǐlǐpia akhanu, a gwè akhophijaû̌ toǒ, “Kò hî̌ lǒkho kòyòphû̌khû mî̌ hehtǒo ta he mî̌ ûpè?”

14Asî hî̌shǔ nû̌û, “Toǒǒmî̌ a hî̌ ta pwa̤ploshi Jowǎ̤ni̤, toǒǒmî̌ a hî̌ ta pwa̤po̤ Èlî̌a, toǒǒmî̌ a hî̌lè̌ ta pwa̤po̤ Jeremǐa, tò̤mî̌ pwa̤po̤ ahǔwa̤ khǒtû̌ toǒ akla tapwa̤pwa̤ pwǎ,” A hî̌ lǒkho hǐnu. ^f

15“Pò̤̌ta, sî lè̌lè꤮, sî glè hî̌ he ta ûpè?” A hî̌ dě,

16Shîmǒ̤nè̤ Petru hî̌shǔ nû̌û, “Na mî̌ Khrî̌stu htě a ma̤lû̌htò̌ge kò tapwa̤ hǒ. Na mî̌ Cǒmara htě a htûpwa̤ tapwa̤ aphû̌khû.” ^g

17Dě Běcǎ Ye̤shǔ hî̌shǔ yǎ, “Yò̤̌nǎ aphû̌khû Shîmǒ̤nè̤, Cǒmara howi̤ na hǒ ma̤tè̤hî̌dě htǒomî̌ kòyòhǎkhû̌phû̌ ǐsî̌yahtò̌lṳ na mè̤tò̤, mî̌pwǎ pha Cǒmara dě mǒkhû̌nu tapwa̤ ǐsî̌yahtò̌lṳ pwǎ na. 18Dě he hî̌ na, nami̤ mî̌ Petru ▼

▼Petru amûasǎ mî̌ “Lo̤”

dě he glè shǒlò̤ he pwa̤yṳǎta̤ aprṳ̂aho lo̤htǒo alo̤ pě. Ta̤si ashû̌asho lò̤jûbò ala̤ pě. 19He ǐ na mǒkhû̌ shila̤gakû sò̌shî̌ pě. Na cokloměbò kò dě hǎkhû̌ htǒonu, Cǒmara coklomě tû̌ kò dě mǒkhû̌ pě. Lǒ̤꤮ bò na bòphlǔ plûkè hǎkhû̌ htǒotoǒnu Cǒmara bòphlǔ plûkè tû̌ dě mǒkhû̌ pě.” ⁱ 20Dě Běcǎ Ye̤shǔ ǐsè̌rè̌ akhophijaû̌ toǒ, he mî̌ Khrî̌stu tapwa̤nu cû̌pwe̤ǐlṳ pûma̤ kò dǐpwǎ̤꤮ ma̤ nî̌꤮.

Běcǎ Ye̤shǔ pwe̤ǐlṳ ta a khòbǎ ta̤jîta̤jû ta ta̤si pě

(Mǎ̤riko 8:31-9:1; Lǔka 9:22-27)

21Bǎnuakha Běcǎ Ye̤shǔ pwe̤ǐlî akhophijaû̌ toǒ ta he bǎcû̌ Ye̤rǔshèlèwî̤ dě Yṳ̌daphû̌ wè̤khǔwè̤pwa̤ toǒ, pwa̤tòlûhtò̌ hǐkǒdû̌ toǒ ta pwa̤sû̌ǐ ta̤sû̌ta̤tòwò asara toǒ ma̤jîma̤jûplṳ̂ he pě. Asî ma̤si he pě htodě abehtò̌ suni̤ ti̤ni̤pěnu Cǒmara ma̤htûpwa̤gesǒ he pě.

22Petru kaǎcû̌ tûcûkè Běcǎ tîkî̌phû̌ dě a sǎhtǎ nû̌û, “Běcǎ Cǒmara ma̤dî̌dò bǎtû̌ na pě. A bǎ htûhtò̌ dî̌kî̌꤮ tò̤.”

23Běcǎ Ye̤shǔ kè̌tîkhî Petru dě a hî̌ nû̌û, “Kǒ꤮ khînǎmo̤pha hǐkǒdû̌, hǎhtò̌cû̌ tephekè ta he, na mî̌ alò̤ta lo̤ tama htě kò htò̌tukhu dutî̤plî̤ nû̌ûnu tama pwǎ. Na ta̤gènè̤ toǒnu alò̤ta kòyòhǎkhû̌phû̌ a ta̤gènè̤nu pwǎ, alò̤ta Cǒmara a ta̤gènè̤ toǒnu mè̤tò̤.”

24Htodě Běcǎ Ye̤shǔ hî̌ akhophijaû̌ toǒ, “Kòyò tapwa̤pwa̤ dè sò̌yṳ gû hekò hî̌nu, a tobǎ ma̤ pwǐ he sò̌yṳnoma̤ yǎnu toǒ, jǔ꤮ ama̤ tû̌ asò̌phlǒ mî̌ anî̤ tò̤. A bǎ ò̌htò̌ tû̌ a nò̌dòhtǔ dě a bǎ gû hekò. ^j 25Ma̤tè̤hî̌dě kòyò tapwa̤pwa̤ a sò̌le̤ǐ ata̤htûpwa̤nu, a si tûjûpwa̤ talakhǎ pě. Pwǎ̤ta kòyò htě a khòsi ta̤htûpwa̤ ta heya tapwa̤nu a nî̤bǎ ta̤htûpwa̤ tûjûpwa̤ pě. ^k 26Kòyò tapwa̤pwa̤ dè nî̤bǎbò hǎkhû̌tebě a ta̤dû̌yò̤htò̌sa toǒ pwǎ̤ta a dè lò̤jûkè a yolahtûpwa̤ tûjûpwa̤ htǒo hî̌nu abwǐǒ nû̌ûya hî̌tè? Kòyò htě a sò̌yṳ nî̤bǎ gesǒ a yolahtûpwa̤ tûjûpwa̤ htǒo tapwa̤pwa̤nu ta̤dû̌yò̤htò̌sa htě a glè pwî̤bò̌ nû̌ûta a yolahtûpwa̤ htǒonu a ǒ dǐcǎ꤮ tò̤. 27Ma̤tè̤hî̌dě kòyòphû̌khû mî̌ hehtǒo hè ta apha asîrîdû̌sîrîhtû pě, ta amǒkhû̌tanaphû̌ toǒ pě ^l dě a ǐbò gesǒ kò pṳ̂̌꤮ tapwa̤ pwǐ asî ma̤htonu toǒ pě. ^m 28He hî̌ mè̤mè̤̌ sî, kòyò htě a ihtǒ ǒbǎ sîklabǎo toǒǒnu, bǎ asî si hǒtò̤kha, asî kè̌shǐbǎ lǒkho kòyòphû̌khû mî̌ hehtǒo hè pwǐ Khwǐ tapwa̤nu pě.”