Mat 28 | KxfSCKRC | STEP | Bǎ Yṳ̌daphû̌ a mṳni̤dǔhto anǒto̤wo̤ lṳmṳlî wosò lṳmṳkhǐ pi̤pè̤pe akhanu, Madalě̤na dokûmo̤ Marǐa ta Marǐa ahǔwa̤tapwa̤ hèkè̌ lǒkho Běcǎ alṳkû.

‏ Matthew 28

Běcǎ Ye̤shǔ htûpwa̤gesǒ

(Mǎ̤riko 16:1-8; Lǔka 24:1-12; Jowǎ̤ni̤ 20:1-10)

1 Bǎ Yṳ̌daphû̌ a mṳni̤dǔhto anǒto̤wo̤ lṳmṳlî wosò lṳmṳkhǐ pi̤pè̤pe akhanu, Madalě̤na dokûmo̤ Marǐa ta Marǐa ahǔwa̤tapwa̤ hèkè̌ lǒkho Běcǎ alṳkû.

2 Dě tṳtṳhtû̌dî̌ ma̤shû̌mè̤mè̤̌, ma̤tè̤hî̌dě Běcǎ a tanaphû̌ tapwa̤ ǒ dě mǒkhû̌ hèlò̤ htû̌toklotephekè lo̤nu tama dě a hè hǎnòò̌lò̤ lo̤nu tama akhû̌. 3 Ana̤saklû dě a shěrakha lò̤kèta laû̌shěnu, htodě ahǐdopo̤to̤nu a bûsǔlǔ sǒsǒta cashi lò̤nu. 4 Pwa̤ǒpo̤ toǒ gònò̤gèglè lǒ̤bò. Asî ǐsha tûlû̌shû̌ dě asî sǒsǒkè ta kòyòsinu.

5 Dě mǒkhû̌tanaphû̌ hî̌ mamǔ htǒosò̌gini̤, “Ǐsha lǒkho pûma̤, ma̤tè̤hî̌dě sî kè̌lǎ Ye̤shǔ htě kò htǎwa̤si yǎ dě nò̌dòhtǔlo̤nu tapwa̤ numî̌ he sî̌ya. 6 Pwǎ̤tadě a ǒpe bǎo tò̤. Pwǐ a pwe̤ǐnǎ htonu, ahtûpwa̤ge htohǒ. Hèkè̌mò̌ yǎ la̤hǎmoǒ gûla̤bǎo. 7 He hî̌ sî꤮ gepwe̤ǐ phwèmò̌ akhophijaû̌ toǒ ta, ‘A htûpwa̤gesǒ khònò̤ hǒ dě a cû̌ ǒnǎwǐ sî dě Galilî̌a gakûnu hǒ, sî cû̌kè̌shǐ yǎ bǎnu pě,’ Khònò̤ dě he pwe̤ǐlṳ bǎ sî hǒ.”

8 Hǐnudě mamǔ htǒosò̌gini̤ ǒ bǎ lṳkûnu dě a tṳplṳtî̤wî̤ hǎhtò̌ lǒkho. Asî ǐshasha, sò̌le̤sò̌lò̤lò̤ dě a khlè̌ge pwe̤ǐ lǒkho akhophijaû̌ toǒ. 9 Taplǎpa Běcǎ Ye̤shǔ kè̌shǐ glashǔ asî dě a hî̌mo̤hî̌wǒshǔ asî. Dě asî hèshǔ Běcǎ dě a hè pṳ̂mě nû̌û khò̌lopo̤ ta subusabahtò̌ nû̌û. 10 Htodě Ye̤shǔ hî̌ asî, “Ǐsha lǒkho pûma̤. Gepwe̤ǐ lǒkho hepṳhewè̤ ta, cû̌ lǒkho dě Galilî̌aganu, Sî cû̌kè̌shǐ he bǎnu pě, pwe̤ǐbǎ asî hǐnu nî̌꤮.”

Pwa̤ǒpo̤ toǒ gepwe̤ǐlṳ ta Běcǎ ǒpe tò̤

11 Bǎ mamǔ htǒotoǒ ge dě klè̌lo̤ akhanu, pwa̤ǒpo̤ lṳkû toǒ geginṳto̤bò wî̤kû dě a ma̤kwè̌꤮ hî̌tènu, Asî gepwe̤ǐlṳ nû̌ûta pwa̤tòlûhtò̌ hǐkǒdû̌ toǒ. 12 Bǎ pwa̤lṳhtò̌ hǐkǒdû̌ toǒ kè̌shǐ glashǔ ta Yṳ̌daphû̌ wè̤khǔwè̤pwa̤ htě a hǐkǒdû̌ toǒ akhanu, Asî bǎ ma̤ lǒkho hî̌tè pěnu a tîwî̌tòwò lǒkho. Htodě asî ǐ kliphû̌ toǒ wû tûprṳ̂taphǎ dě a hî̌ asî, 13 “Sî tobǎ hî̌ lǒkho pwǐhè̌o, ‘Bǎ pa hǎmoǒ shope̤ akhanu, akhophijaû̌ toǒ hèphî̌gehǔkè nû̌û hǒ,’ hî̌ lǒkho hǐnu nî̌꤮. 14 Ta̤wi̤ta̤kè̌ htǒo dè lṳcû̌to̤ dě Khwǐ ǒ pě hî̌dě ma̤pûhǐ a ma̤pò̤ma̤sha pû sî ma̤nu, pa kè̌ hî̌tû̌ yǎ pě.” 15 Hǐnudě kliphû̌ toǒ phî̌ lǒkho wû htǒonu dě a hî̌ pwǐ asî sû̌ǐ nû̌nu. Yo̤sǎ htǒotûmûnu Yṳ̌daphû̌ sagala̤ hî̌ ǐbòpe tǒ̤khònò̤.

Běcǎ hî̌bǎ ta akhophijaû̌ toǒ

(Mǎ̤riko 16:14-18; Lǔka 24:36-49; Jowǎ̤ni̤ 20:19-23; Pwa̤nophû̌ toǒ 1:6-8)

16 Htǒotaplǎdě akhophijaû̌ htǒo shǐtapwa̤ cû̌ lǒkho dě Galilî̌a kholokhû̌ pwǐ Běcǎ pwe̤ǐnǎ asînu. ^a 17 Bǎ asî kè̌shǐ a Běcǎ akhanu, asî sabahtò̌ nû̌û pwǎ̤tadě toǒǒnu asò̌phlǒ wò̌wè̌pe. 18 Dě Běcǎ Ye̤shǔ hè asî ǒ dě a hî̌ asî, “Ta̤shû̌ta̤sho mǒkhû̌ bǎbǎ, hǎkhû̌bǎonu bǎbǎ, kò ǐbò nû̌ûta he hǒ. 19 Ma̤hǐnudě, he hî̌ sî꤮, cû̌ lǒkho dě kòyò khlilèphû̌ toǒ a ǒ dě cû̌ma̤ htûhtò̌ asî ta he khophijaû̌ nî̌꤮. Cû̌ plo bǎ lǒkho asî shi ta pha ami̤, phû̌khû ami̤ ta Běcǎ sǎcahtǐ ami̤ nî̌꤮. ^b 20 Htodě sû̌ǐtòwòǐ lǒkho asî ta a glè jûle̤phî̌yo̤ gûma̤kû̌bò pwǐ he mǎnǎ sî yo̤nu toǒ nî̌꤮. He ǒkû̌ tû̌ta sî pṳ̂̌꤮ plǎ pě, to̤htû̌ hǎkhû̌gutṳ pě bǎbǎ he ǒkû̌ tû̌ta sî pě.”