‏ Psalms 105

Cǒmaradû̌ ma̤lû̌htò̌kè akòyò toǒ

1Hî̌bwǐhî̌sîrî Cǒmara tûjûpwa̤, kwisabahtò̌ yǎta ami̤.

Ǐsî̌yadǒ bǎ khlilèphû̌ toǒ ta a ma̤hto ta̤nu.

2Sò̌po̤htò̌mò̌ yǎ, sò̌po̤ htû̌sò̌ǐmò̌ nû̌û.

Pwe̤ǐlṳbòmò̌ bǎ kò ta lǒ̤꤮ bò a ma̤ ta̤cǒklî̌kî̌yanu.

3Htû̌sò̌ǐ mò̌ ami̤cahtǐ.

No sò̌le̤sò̌lò̤ mò̌ kòyò htě a kè̌lǎ Cǒmara tûjûpwa̤nu.

4Kè̌lǎ mò̌ Cǒmara tûjûpwa̤, kwihtò̌ mò̌ atakhû̌ta̤ǎ.

Pṳ̂̌plǎplǎ hèphǔ alo̤mo̤.

5Gènè̤htò̌to̤ ta̤cǒklî̌kî̌ya, ta̤ma̤te̤pe̤ sû̌pi̤sò̌pi̤, ta̤cèròtocèròbǎ htě a ma̤htonu.

6Sî mî̌ Cǒmaradû̌ apwa̤ma̤ta̤phû̌ mî̌ Abraham aphû̌ali̤ hǒ.

Sî mî̌ Yǎ̤kò akhlialè htě Cǒmara wû̌lǎ toǒ hǒhǒ.

7A mî̌ Cǒmara tûjûpwa̤, pacǒmaradû̌ hǒ.

A cèròtocèròbǎbò hǎkhû̌běkhû̌.

8A gènè̤ǐ ata̤wṳ̂dò pṳ̂̌꤮ taplǎ.

Yo̤sǎ htě a olò̤hto toǒnu, kòyòtuhtu hto tuhtu, htu dě arî̌kû a shope̤nǎpè̤ tò̤.

9A glè cǒtè̤ ta ayo̤ htě a wṳ̂dòhto ta Abraham, a bèlò̤hto ta Isǎkonu. ^a

10A bè̌měbè̌gle ata̤sû̌ta̤tòwò ta Yǎ̤kò.

A wṳ̂dò měgle ayo̤ ta Israel tûjûpwa̤. ^b

11A hî̌ ta, “He glè ǐ na Khana̤ga pwǐ naû̌cata̤bî̌.”

12Bǎ a hî̌ yo̤ hǐnu akhanu, asî ǒpî̌tî̌lepe pwǎ.

Asî htû shǐpwa̤shǐmè̤ dě Khana̤gakûnu a ǒpî̌tî̌pe pwǎ.

13Asî lè ta̤ga hto ta̤ga, tò̤glò hto tò̤glò.

14A noma̤jîma̤jû asî ta kòyò dǐpwǎ̤꤮ tò̤.

Dě asî ayanu, a ǐsè̌rè̌nṳ Khwǐ toǒ dě a glè ma̤kwaǐ asî. ^c

15A hî̌ ta, “Ma̤bǎma̤sha pûma̤ kòyò htě he wû̌lǎ yǎnu toǒ ma̤.

“Ma̤shama̤htò pûma̤ hepwa̤po̤nu toǒ ma̤.”

16Cǒmara tûjûpwa̤ noǒhtûhtò̌ gawi̤gakodû̌ dě Khana̤gakû.

A ma̤pî̌ma̤lṳ̂kèbò asîsǒsǎwû̌pho bǔmṳ sîtoǒ. ^d

17A sûcû̌wǐ kòyò tapwa̤ dě asî alo̤mo̤.

Kò shaǎcû̌kè Jǒjè dě Egyptga pwǐ jû tapwa̤. ^e

18Kò coklo htòbò nû̌ûkhò̌lopo̤ ta sǒpli̤ te̤htò̌.

Kò kǒle̤nṳ te̤htò̌pli̤ dě agobolo̤. ^f

19Cǒmara tûjûpwa̤ pwe̤ǐnǎ yo̤ toǒ lǒhtò̌behtò̌ hǒtò̤nu, a ma̤kè̌pe Jǒjè ata̤bè̌ sò̌phlǒsû̌shi.

20Egyptgaphû̌ plûhtò̌kè Jǒjè.

Pwa̤pǒǐ khlilèphû̌ toǒnu tapwa̤ plûhtò̌ pelekè nû̌û. ^g

21Khwǐ nohtû nû̌û ta pwa̤pǒǐ yǎ hohta.

A nopǒǐ nû̌û ta Khwǐ ata̤kî̌ta̤kû̌ lǒ̤꤮ bò. ^h

22Jǒjè yṳ̂klè̌nè̌klò bǎ Khwǐ apwa̤ma̤ta̤phû̌ toǒ pwǐ ata̤sò̌yṳ ǒnu.

A sû̌tòwòǐ pwa̤htû hǐkǒlǒkòdû̌ htě a ǐsî̌yajè Khwǐ htǒotapwa̤nu toǒ.

23Htodě Israel hèto̤ dě Egyptga. ⁱ

A hèǒ shǐtè̤mè̤ gûmṳ̂ bǎ Hamǎkhlilèphû̌ ǒǐ gakû. ^j

24Cǒmara tûjûpwa̤ nophû̌ǒwo̤ li̤ǒphǎ akòyò.

A nokhû̌ǎshû̌shokhlo asî ta pwa̤sò̌khě asînu. ^k

25A notèlè̌khǒkè Egyptkhlilèphû̌ asò̌phlǒ.

A nosò̌khěkhû̌khwè Egyptkhlilèphû̌ toǒ ta Cǒmara apwa̤ma̤ta̤phû̌ toǒ.

26A sûhè apwa̤ma̤ta̤phû̌ Mǒ̤jè ta Aro htě a wû̌lǎ htǒonu sò̌gini̤. ^l

27Mǒ̤jè ta Aro dǔlṳ bǎ Cǒmara ata̤ma̤te̤pe̤ sû̌pi̤sò̌pi̤ dě Egyptkhlilèphû̌ akla.

A dǔlṳpo̤ ta̤ma̤cǒklî̌kî̌ya dě Hamǎkhlilèphû̌ agakû.

28Cǒmara nokhǐlò̤ sagala̤bò.

Pwǎ̤tadě Egyptkhlilèphû̌ ma̤tukutakǎshǔ yo̤ dě a hî̌lò̤nu tò̤. ^m

29Cǒmara nohtûhtò̌kèbò asîshikhî̌ ta sǐ, dě tò̤phû̌ sikèbò. ⁿ

30Dî̌phû̌ toǒ ǒbetî̌pî̌꤮ bò dě asîgakû pṳ̂̌꤮ tò̤glò. ^o

A cû̌to̤ ǒto̤bò dě Khwǐcophǎ hohtakû.

31Bǎ Cǒmara hî̌lò̤ ayo̤ akhanu, phǔsǒphû̌ ta kadǎ toǒ a wi̤cû̌ ǒbebò asîga sagala̤. ^p

32Khwè̌ to ju dě asîga sagala̤ pwǎ̤tadě Cǒmara nojulò̤ sèwèji, anolò̤ tî̌lî̌ dě asî gakû. ^q

33A ma̤pî̌kèbò Egyptphû̌ asobîmṳ ta dǐshimṳ.

A ma̤lòkhǔ ma̤la̤gakèbò sǒmṳ dě asîgakû.

34A hî̌lò̤ ayo̤ dě dèpo̤ toǒ hèlò̤bò.

Dèpo̤ toǒ mî̌ dǒbòpè̤pe tò̤. ^r

35Asî lò̤ǎbò sǒdosǒlǎ sulè̌sula ǒ dě gakû.

A lò̤ǎbò ta̤sǎta̤pho htě asî lǔ dě ahǔklakhû̌.

36Htodě Cǒmara ma̤sikèbò Egyptkhlilèphû̌ aphû̌wè̤pwa̤.

Phû̌wè̤pwa̤ mî̌ asî ta̤khû̌ta̤ǎ awǐgutṳ̌ tacǎ. ^s

37A kaǎhǎhtò̌gekè Israelphû̌ toǒ, asî to̤ge lǒkho wûhta. ^t

Dě asîkhli aklanu, akhû̌ǎyû̌lò̤ ǒ dǐpwǎ̤꤮ tò̤.

38Egyptkhlilèphû̌ sîtoǒ ǐsha mè̤mè̤̌ Israelphû̌ toǒ ala̤ akhû̌akhî, bǎ asî hǎhtò̌ge akhanu, Egyptkhlilèphû̌ toǒ sò̌le̤sò̌lò̤ lǒ̤꤮ bò.

39Cǒmara hǔyo̤ǔ ma̤kwabǐ asî ta poǒlṳ.

Lṳmṳkhǐ dě a shělîlò̤ bǎ asî ta mî̌. ^u

40Asî kwihtò̌ ta̤yî̌ dě a ǐlò̤ bǎ asî htû̌wǐ.

A ǐlò̤ asî ta mû̌ ǒ dě mǒkhû̌ hèlò̤, asî ǎkǒobebò. ^v

41Cǒmara ma̤phò̌ bǎ asî lo̤ dě shi shǐhtò̌.

A dû̌cû̌ nò̤꤮ dě lo̤mî̌shǒklakhû̌ lò̤kèta shikhî̌. ^w

42Hǐnudě Cǒmara gènè̤to̤ ata̤olò̤ htě acahtǐ dě a olò̤hto ta apwa̤ma̤ta̤phû̌ Abrahamnu, dě a ma̤ bǎ asî hǐnu.

43Hǐnudě a kaǎhǎhtò̌ge akòyò dě Egyptgakû ta ta̤sò̌le̤sò̌lò̤.

A kaǎhǎhtò̌ge akòyò htě awû̌lǎnu ta ta̤sò̌po̤ mo̤sû̌mo̤sò̌.

44Khlilèphû̌hǔwa̤ hǎkhû̌ hǔkla toǒnu, a ǐbò nû̌ûta asî.

Kòhǔkla htě kò htǒkhû̌htǒǎma̤ toǒnu, a htûkè asî ta̤. ^x

45Ma̤pûhǐ asî gana̤debò Cǒmara ata̤hî̌bǎlò̤yo̤ dě asî glè jûle̤phî̌yo̤bò nû̌ûta̤sû̌ta̤tòwò ayanu, a ma̤pwǎ ta̤ htǒotoǒ.

Htû̌sò̌ǐ Cǒmara tûjûpwa̤.