‏ Psalms 147

Htû̌sò̌ǐ Cǒmara htě asîrîpo̤phǎ

1Htû̌sò̌ǐ Cǒmara tûjûpwa̤.

Ta̤sò̌po̤ htû̌sò̌ǐ pacǒmaradû̌ numî̌ awǒ na̤cè̌.

Ta̤htû̌sò̌ǐ nû̌û numî̌ awî̤awǒ, atoabǎ.

2Cǒmara tûjûpwa̤ ma̤htò̌nṳ gesǒ Yerǔshèlèwî̤.

A kaǎgeplǒbòsǒ Israelphû̌ htě kò pṳ̂cû̌kè asînu toǒ.

3A ma̤mo̤ma̤wǒnṳ kòyòsò̌phlǒpî̌.

A ma̤hǎmǎ bǎ asî ta̤shahtò.

4A dǒmǎǐ shǎ, a htò bǎ asî tama ta tama ami̤.

5Paběcǎ ta̤adû̌ mî̌ apo̤aphǎ dû̌꤮ na̤cè̌.

Ata̤sî̌yaphlophǎ numî̌ kò sî̌yahtûbò̌ nǒ dǐpwǎ̤꤮ tò̤.

6Cǒmara tûjûpwa̤ ma̤jè kòyò htě a shò̌lò̤ asò̌phlǒ.

A bè̌jûlò̤kè kòyòphû̌mò̤.

7Sò̌po̤htò̌ lǒkho Cǒmara tûjûpwa̤ ta ta̤hî̌bwǐhî̌sîrî.

Dǒ tǐtute̤gwe dě sò̌po̤ htû̌sò̌ǐ lǒkho pacǒmaradû̌.

8A hǔbǐ mǒla̤ ta poǒlṳ.

A nojulò̤ khwè̌ dě hǎkhû̌, a nodǒhtò̌ mi̤mṳ dě kholokhû̌.

9Bǎ ta̤phû̌ta̤li̤ toǒ hǎwopo̤ akhanu, a ǐǎǐo asî, a ǐǎǐonṳ cǎwǎphû̌.

10Tîsî̌ htě ashû̌ashonu bǎbǎ, kòyòhǎkhû̌phû̌ htě akhuahînu bǎbǎ, a to nǒ nû̌ûsò̌phlǒ tò̤. 11Cǒmara tûjûpwa̤ sò̌phlǒto kòyò htě a ǐsha bè̌dubè̌na̤ nû̌û ta a nǎla̤ǐ pǒ̤꤮ pwǎ nû̌ûta̤mo̤ǐ htě ahǎbòjò tò̤nu toǒ.

12Kǒ Yerǔshèlèwî̤phû̌ toǒ, htû̌sò̌ǐ Cǒmara tûjûpwa̤.

Kǒ Sǐowî̤phû̌ toǒ, htû̌sò̌ǐ nacǒmaradû̌.

13A ma̤tònòwǒ bǎ nawî̤we̤dû̌ takhanò̌lṳ̂.

A howi̤homò̤ nadophû̌shǒphû̌.

14A ma̤pè̤ma̤dûbò bǎ nashinaga sagala̤.

A ǐǎǐo na ta huwî̤huwǒ gutṳ̌.

15A hî̌lò̤ ayo̤ hǎkhû̌ dě pwǐ a hî̌nu a htûhtò̌ sumṳ.

16A nolò̤ cashi dě abû sǒsǒta sǒphû̌shû̌.

A ma̤pîshîcû̌bò shikhlǒ pwǐ꤮ phǎ.

17A nojulò̤ asèwèji pwǐ lo̤mǔ.

Ûpè tapwa̤ ǒkhòbò̌ gawo̤gashǐ htě a nohtûhtò̌nu pè?

18Htodě a hî̌lò̤po̤ ayo̤ dě shikhlǒ toǒ htûshikè.

A nosǎhè agili̤ dě shi dû̌hèbò.

19A ǐsî̌yalṳ bǎ Yǎ̤kò akhlialè toǒ ta ale̤ayo̤.

A ǐsî̌yalṳ bǎ Israelkhlilèphû̌ toǒ ta ata̤yṳ̂klè̌nè̌klò, ata̤mǎlò̤.

20A ma̤ bǎ khlilèphû̌hǔwa̤ toǒ pwǐhè̌onu tò̤.

Khlilèphû̌hǔwa̤ sî̌yakû̌ lǒkho nǒ ata̤mǎlò̤ tò̤tò̤.

Htû̌sò̌ǐ Cǒmara tûjûpwa̤.