Rev 12 | KxfSCKRC | STEP | Htodě ta̤cǒklî̌kî̌ya adû̌ayǒ tacǎ ǒlṳhtò̌ mǒla̤. Dě mamǔ tapwa̤ kûsǒnṳ lṳmṳ dě a yî̤lò̤ la bǎ a khò̌yî̤la̤ htodě a glûhtò̌nṳ shǎ shǐginǐ̤ma.

‏ Revelation of John 12

Mamǔ ta Wṳ̂sapo̤pṳ tabo

1 Htodě ta̤cǒklî̌kî̌ya adû̌ayǒ tacǎ ǒlṳhtò̌ mǒla̤. Dě mamǔ tapwa̤ kûsǒnṳ lṳmṳ dě a yî̤lò̤ la bǎ a khò̌yî̤la̤ htodě a glûhtò̌nṳ shǎ shǐginǐ̤ma. 2 Mamǔ htǒotapwa̤nu a mo̤dodû̌ dě a glè̌ phû̌ǒ akhû̌akhî, aphushashû̌ dě a yi̤kǒyi̤hta. 3 Ta̤ma̤dòǐ khǒ ahǔwa̤ tacǎ ǒlṳhtò̌po̤ dě mǒla̤. Dě wṳ̂sapo̤pṳlî̤dû̌ htě a hǐkǒǒ susǒtama, ane̤ ǒ aphòshǐ dě a glûnṳbò khû̌glûhta a hǐkǒlo̤ pṳ̂̌tama. ^a 4 A cǐlòte̤ shǎ sulè̌tèlè̌ dě mǒla̤ ta agòme̤, dě a wîlòte̤bò shǎ htǒotoǒ hǎkhû̌. Wṳ̂sapo̤pṳ htǒotabonu, a ihtǒ ǒ mamǔ htě a glè̌ phû̌ǒ tè̤tè̤ htǒotapwa̤ alo̤mo̤ dě a dè phû̌ǒ ǒ ta a glè̌ pṳ̂ǎkè nû̌ûphû̌. ^b 5 Htǒotaplǎdě mamǔ htǒotapwa̤ phû̌ǒnṳ a phû̌makhû tapwa̤ dě a pǒshipǒga pṳ̂̌tebě ta khî̌po̤ te̤htò̌ nutama pě. ^c Dě phijaphû̌ htǒotapwa̤nu kò phî̌cû̌ tephekè nû̌û dě kò johtò̌kè nû̌û Cǒmara ǒ ta a phî̌htò̌kè nû̌û dě Cǒmara a gògohtahtò̌yî̤ la̤ǒ agûla̤nu. ^d 6 Mamǔ htǒonu a khlè̌cû̌ dě Cǒmara ma̤wǒnǎ bǎ nû̌û lo̤měshǒkla agûla̤ tò̤glò. Dě kò kè̌ǐkhwè̌ǐ yǎ mṳni̤ tîrî̌ ta ginǐ̤ya̤ ta shisusǒ pě.

7 Bǎnuakha ta̤shěta̤pe̤ ǒhtò̌ mǒkhû̌. Dě mǒkhû̌tanaphû̌ Mi̤kělè ta a tanaphû̌ toǒ shě ta wṳ̂sapo̤pṳnu tabo. Dě wṳ̂sapo̤pṳ nutabo ta a tanaphû̌ toǒ shěshǔ asî. ^e 8 Htǒotaplǎdě wṳ̂sapo̤pṳ hǐnutabo lò̤jûkè dě a ta a tanaphû̌ toǒnu, kò ǐ ǒpe asî mǒkhû̌ tò̤ hǒ. 9 Wṳ̂sapo̤pṳdû̌ děwǐkha tabo htě kò kaǎ nû̌ûmi̤ ta khînǎmo̤pha hǐkǒdû̌ mètò̤mî̌ Sehto htě a cû̌ htû̌sǒbǎ phû̌mò̤bò kò hǎkhû̌tebě htǒotabonu, ^f kò wîlòte̤kèbò a ta a tanaphû̌ toǒ hǎkhû̌. ^g

10 Htodě he gana̤de yo̤po̤pi̤ti̤ mǒkhû̌ dě a hî̌,

“Khònò̤htǒo Cǒmara a ta̤ma̤lû̌htò̌ge hèto̤hǒ. Khònò̤htǒo Cǒmara dǔlṳhtò̌ a ta̤po̤ta̤phǎ hǒ. Khònò̤htǒo Cǒmara pǒǐ hǎkhû̌ pwǐ Khwǐ tapwa̤nu hǒ. Khònò̤htǒo aphû̌khû Ye̤shǔkhrî̌stu tèhtò̌ pǒǐta̤ hǒ. Ma̤tè̤hî̌dě kòyò htě a ihtǒ ǒ pa Cǒmara a lo̤mo̤ dě a bè̌ kòyò htě a yṳǎna̤ǎta̤ htǒotoǒ a ta̤sǔ lṳmṳkhǐkhǐ, lṳmṳshasha tapwa̤nu, khònò̤dě kò wîlòte̤kè nû̌û hǒ. ^h 11 Pa pṳwè̤ toǒnu, sophû̌ asǐ akhû̌akhî, ta asî dǒhtû̌ǐ bǎ kò Cǒmara ale̤ayo̤ akhû̌akhî, asî ma̤pè̤kè khînǎmo̤pha hǐkǒdû̌ hǒ. Asî kè̌shǐbǎ ta ta̤si bǎbǎ, a sò̌le̤ǐ a ta̤htûpwa̤ tò̤. 12 Ma̤hǐnudě mǒkhû̌ ta bò꤮ kòyò ǒ dě mǒkhû̌nu toǒ lǒ̤꤮ bò sî, sò̌le̤sò̌lò̤ lǒkho nî̌꤮, pò̤̌ta hǎkhû̌ ta shidû̌shite̤we̤ ayanu ajîajû mè̤mè̤̌. Ma̤tè̤hî̌dě khînǎmo̤pha hǐkǒdû̌ hèlò̤ sîǒ dě a sò̌phlǒdû̌ mè̤mè̤̌. Ma̤tè̤hî̌dě a sî̌ya ta a akhîakha ǒkè pepwǎ teděsǎ pwǎ.”

13 Bǎ wṳ̂sapo̤pṳ htǒotabo sî̌ya ta kò wîlòte̤kè a hǎkhû̌ akhanu, a tèhtò̌ lṳ̂pṳ̂ mamǔ htě aphû̌ǒnṳ a phû̌makhû htǒonu tapwa̤. 14 Pwǎ̤ta ma̤pûhǐ mamǔ htǒotapwa̤ wi̤gebò̌ agûla̤ htě ala̤ ǒǐ dě mi̤kla aya pěnu, kò ǐ nû̌û ta le̤sǒdû̌ aděge ginǐ̤kho. Dě kò cû̌kè̌ǐkhwè̌ǐ tepheyî̤ khǒkè nû̌û ta wṳ̂sapo̤pṳ htǒotabo suně ta takama pě. ⁱ 15 Htodě ma̤pûhǐ wṳ̂sapo̤pṳhtǒo plûlo̤cû̌kè mamǔhtǒo tapwa̤ ayanu, a plûpo̤htǎhtò̌ shi dě agokû sǒsǒta shikhî̌kû dû̌hènu. 16 Pwǎ̤tadě hǎkhû̌ ma̤jè mamǔnu tapwa̤. Bǎ shikoǒ ǒ wṳ̂sapo̤pṳ gokû hǎhtò̌ dě a dû̌hè akhanu, hǎkhû̌ òmo agokû dě a cî̌o nṳkèbòpwǎ shihtǒonu toǒ. 17 Wṳ̂sapo̤pṳ htǒotabo sò̌phlǒdû̌ mamǔnu tapwa̤ akhû̌akhî, a hǎhtò̌cû̌ tephekè dě a glè cû̌shě lè̌ta mamǔ aphû̌ali̤ htě a ǒkènu toǒ. A ǒkè htǒotoǒ numî̌ kòyò htě a gana̤de Cǒmara ta̤mǎlò̤nu toǒ ta kòyò htě acǒatè̤ ta a ta̤khòlṳ dě Ye̤shǔ dǔlṳkè nû̌ûnu toǒ hǒ. 18 Dě wṳ̂sapo̤pṳ htǒotabo cû̌ ihtǒ ǒ bǎ shidû̌shite̤we̤ ahtunu.