Revelation of John 7
Israel akòyò apwa̤ tesě lǐ̤sò̌ ta lǐ̤rî̌
1Ta̤ma̤ana̤ pwǐhè̌o htodě hǎkhû̌bǎo bǎbǎ, shidû̌shite̤we̤ htǒotoǒ bǎbǎ, sǒmṳ toǒ bǎbǎ, ma̤pûhǐ gili̤sǎ hèbǎ pû asî tò̤nu, he kè̌shǐ tanaphû̌ sò̌li̤ ihtǒ ǒ lǒkho hǎkhû̌ lǐ̤ne̤ dě a ma̤dǐdòshǔkèbò gili̤sǎ klè̌. a 2He kè̌shǐ tanaphû̌ ahǔwa̤tapwa̤ ǒ mṳhtò̌ tokho hè dě a phî̌hènṳ Běcǎ Cǒmara htě a htûpwa̤ htǒotapwa̤ a ta̤ma̤dòǐ tukǔ. Htodě a jipwi̤ yi̤kǒhtò̌ tanaphû̌ htǒosò̌li̤ htě Cǒmara ǐhto asî ata̤po̤ta̤phǎ dě a glè ma̤pî̌kè hǎkhû̌ ta shidû̌shite̤we̤ htǒotoǒ. 3Tanaphû̌ htǒotapwa̤ hî̌, “Bǎ pa ma̤dòǐhto Běcǎ Cǒmara ajûphû̌ htǒotoǒ ta ta̤ma̤dòǐ dě a me̤htò̌lo̤ hǒtò̤nu, hǎkhû̌ bǎbǎ, shidû̌shite̤we̤ bǎbǎ, sǒmî̌wû̌ bǎbǎ, tobǎ ma̤pò̤ma̤sha asî dǐcǎ꤮ hǒtò̤.” b 4Dě kò pwe̤ǐ he ta kòyò htě kò ma̤dò a ta Cǒmara a ta̤ma̤dòǐ dě a me̤htò̌lo̤ toǒnu, aǒ apwa̤ tesě lǐ̤sò̌ ta lǐ̤rî̌. Asî toǒ mî̌ mî̌pwǎ Israelphû̌ shǐginǐ̤gumṳbò htǒotoǒ hǒ. 5Dě Yṳ̌da tṳmṳtacǎ akla numî̌ apwa̤ tòsò̌ ta ginǐ̤rî̌, Dě Rǔbe tṳmṳtacǎ akla numî̌ tòsò̌ ta ginǐ̤rî̌, Dě Gǎ tṳmṳtacǎ akla numî̌ tòsò̌ ta ginǐ̤rî̌, 6Dě Asha tṳmṳtacǎ akla numî̌ tòsò̌ ta ginǐ̤rî̌, Dě Natali tṳmṳtacǎ akla numî̌ tòsò̌ ta ginǐ̤rî̌, Dě Manǎshe tṳmṳtacǎ akla numî̌ tòsò̌ ta ginǐ̤rî̌, 7Dě Simeo tṳmṳtacǎ akla numî̌ tòsò̌ ta ginǐ̤rî̌, Dě Lě̤wǐ tṳmṳtacǎ akla numî̌ tòsò̌ ta ginǐ̤rî̌, Dě Isakarǒ tṳmṳtacǎ akla numî̌ tòsò̌ ta ginǐ̤rî̌, 8Dě Sabulo tṳmṳtacǎ akla numî̌ tòsò̌ ta ginǐ̤rî̌, Dě Jǒjè tṳmṳtacǎ akla numî̌ tòsò̌ ta ginǐ̤rî̌ ta dě Bejame tṳmṳtacǎ akla numî̌ apwa̤ tòsò̌ ta ginǐ̤rî̌.Kòyò saprṳ̂dû̌ tṳ̂prṳ̂
9Ta̤ma̤ana̤ pwǐhè̌o htodě he kè̌shǐ kòyò ǒplṳ̂ǒphǎ mè̤mè̤̌ tṳ̂prṳ̂ dě kò dǒbòpè̤ asî dǐpwǎ̤꤮ tò̤. Asî ǒ kòyò khlilèphû̌ pṳ̂̌꤮ tacǎ, khlilè pṳ̂̌tṳmṳ, kòyò pṳ̂̌tṳmṳ, ta yo̤sǎ pṳ̂̌꤮ tacǎ hè dě asî hèihtǒ ǒ sophû̌ ta akhwǐcophǎ gògohtahtò̌yî̤ alo̤mo̤. Htodě asî kûsǒhtò̌nṳ hǐdopo̤to̤bûhtû dě pṳ̂měǐ lǒkho kolotṳphò toǒ. 10Asî jipwi̤ yi̤kǒ dě a hî̌, “Tû̌pwǎ pa Cǒmara htě a hǎnòò̌ dě Khwǐcophǎ gògohtahtò̌yî̤ alo̤nu tapwa̤ ta sophû̌nu tado ma̤lû̌htò̌gepwǎ pa.” 11Mǒkhû̌tanaphû̌ lǒ̤bò toǒ ihtǒ ǒ te̤we̤bò ta Khwǐcophǎ gògohtahtò̌yî̤ htǒo ta wè̤khǔwè̤pwa̤nu toǒ ta ta̤htûpwa̤nu lǐ̤do. Bǎnuakha asî gene̤lò̤bò Khwǐcophǎ gògohtahtò̌yî̤ alo̤mo̤ dě subusabahtò̌ lǒkho Cǒmara. 12Dě a hî̌ lǒkho, “Amè̤, ta̤htû̌sò̌ǐ, ta̤sîrîdû̌sîrîhtû, ta̤sî̌ta̤jò, ta̤hî̌bwǐhî̌sîrî, ta̤bè̌dubè̌na̤, ta̤po̤ta̤phǎ, ta ta̤khû̌ta̤ǎ toǒnu, pa Běcǎ Cǒmara nî̤bǎ tû̌ta tûjûpwa̤ talakhǎ nî̌꤮ Amè̤.” 13Htodě wè̤khǔwè̤pwa̤nu toǒ akla tapwa̤nu a gwè he, “Kòyò htě a kûsǒ hǐdopo̤to̤bûhtû htǒotoǒ numî̌ ûpè? Asî mî̌ a ǒ bǎtè hè?” 14“Saradû̌, he sî̌yatò̤, na sî̌ya pwǎ,” he hî̌shǔ a hǐnu. Dě a hî̌shǔ he, “Asî toǒ numî̌ kòyò htě a cû̌ tûlû̌bò̌hto ta̤ma̤jîma̤jû dě a sò̌gònò̤ ǐsha htǒotacǎnu hǒ. Asî shǔjahto a hǐdopo̤to̤htû htǒotoǒ hǒ, htodě a ma̤bûhto nû̌ûta sophû̌nu tado asǐ hǒ. c 15Hǐnu akhû̌akhî, Asî ihtǒǒ bǎ Cǒmara akhwǐcophǎ gògohtahtò̌yî̤ alo̤mo̤ dě asî ma̤ nû̌û ta̤ma̤ lṳmṳkhǐkhǐ, lṳmṳshasha dě ta̤lṳhtò̌hokûnu hǒ. Pwa̤htě a hǎnòò̌ dě Khwǐcophǎ a gògohtahtò̌yî̤ alo̤ htǒotapwa̤nu, a ǒkû̌ ta asî dě a tò̤gòǐ asî pě. 16Sǎǎsò̌ope dǐkhò̌꤮ tò̤. Lṳmṳ gûbǎpe asî dǐkhò̌꤮ tò̤. A khòbǎnǒpe ta̤agûalû̌ tò̤. d 17Ma̤tè̤hî̌dě sophû̌ ǒ Khwǐcophǎ gògohtahtò̌yî̤ akǎmakûnu tado e gèǐ asî dě a sûcû̌ asî dě shi htě a ǐ asî ta̤htûpwa̤ a shihtǎpo̤khû̌ toǒ ǒ pě. f Htodě Cǒmara htǔsûkè bǎ asî mi̤sǎshi pṳ̂̌tèmè pě.” g
Copyright information for
KxfSCKRC