2Pe 1:3-10 | KxfSCKRC | STEP | Ye̤shǔ a ta̤po̤ta̤phǎ htǒo akhû̌akhî, bǎ pa sî̌yahèto̤khlo nû̌û akhanu, ma̤pûhǐ pa ǒkû̌ ta ta̤htûpwa̤, htodě ma̤pûhǐ pa ma̤kû̌pwǐ ato nû̌ûsò̌phlǒ ayanu, a ǐlò̤bò pa lo̤bǎnu toǒ hǒ. Dě a ta̤po̤ta̤phǎ htě adû̌ayǒ ta ata̤wǒ mè̤mè̤̌ htǒotoǒ akhû̌akhî, a kaǎ pa hǒ.

‏ 2 Peter 1:3-10

Cǒmara ata̤kaǎ ta ata̤wû̌lǎhtò̌

3 Ye̤shǔ a ta̤po̤ta̤phǎ htǒo akhû̌akhî, bǎ pa sî̌yahèto̤khlo nû̌û akhanu, ma̤pûhǐ pa ǒkû̌ ta ta̤htûpwa̤, htodě ma̤pûhǐ pa ma̤kû̌pwǐ ato nû̌ûsò̌phlǒ ayanu, a ǐlò̤bò pa lo̤bǎnu toǒ hǒ. Dě a ta̤po̤ta̤phǎ htě adû̌ayǒ ta ata̤wǒ mè̤mè̤̌ htǒotoǒ akhû̌akhî, a kaǎ pa hǒ. 4 A ta̤po̤ta̤phǎ htě adû̌ayǒ ta ata̤wǒ mè̤mè̤̌ htǒotoǒ akhû̌akhî, a ǐlò̤hto pa a ta̤olò̤ htě apwî̤dû̌ dě adû̌ayǒ mè̤mè̤̌ htǒotoǒ hǒ. A ǐlò̤ ta̤htǒotoǒ akhû̌akhî, sî lû̌htò̌kè ta ta̤gènè̤ patǎ phû̌mò̤shî̌hto htě a ma̤pî̌ sî dě hǎkhû̌bǎonu toǒ pě. Htohǒtò̤ sî htûhtò̌ sǒsǒkû̌ta pwǐ Cǒmara ala̤klonu pě.

5 Ta̤wi̤ta̤kè̌ htǒo akhû̌akhî, jipwi̤ hèwǒpo̤ lǒkho dě alo̤mo̤ nî̌꤮. Dě sî ta̤yṳta̤nǎ akhû̌nu, bè̌plǒ dû̌htò̌po̤ ta̤bè̌ sò̌phlǒsǔshi htě awǒ, dě ta̤bè̌ sò̌phlǒsǔshi awǒ akhû̌nu, bè̌plǒ dû̌htò̌po̤ ta̤sî̌khû̌sî̌ya, 6 Dě ta̤sî̌khû̌sî̌ya akhû̌nu, bè̌plǒ dû̌htò̌po̤ ta̤khòǐpè̤ tû̌ na̤, dě ta̤khòǐpè̤ tû̌ na̤ akhû̌nu, bè̌plǒ dû̌htò̌po̤ ta̤khòsò̌do, dě ta̤khòsò̌do akhû̌nu, bè̌plǒ dû̌htò̌po̤ ta̤ǒhtûpwa̤ tobǎ ta Cǒmara, 7 Dě ta̤ǒhtûpwa̤ tobǎ ta Cǒmara akhû̌nu, bè̌plǒ dû̌htò̌po̤ ta̤mo̤ǐ pṳwè̤, dě ta̤mo̤ǐ pṳwè̤ akhû̌nu, bè̌plǒ dû̌htò̌po̤ ta̤mo̤ta̤kla nî̌꤮. 8 Ta̤htǒotoǒ sǔsǔ dè ǒhtò̌dû̌ hî̌dě, a htûbwǐhtûsîrî ta sîya dě sî sî̌yahè te̤mǎwǒpo̤ Běcǎ Ye̤shǔkhrî̌stu pě. 9 Pwǎ̤tadě kòyò htě a ǒkû̌ ta ta̤htǒotoǒ tò̤nu toǒ, alò̤ta kòyò htě a mi̤sǎkhǐ. Dě a shope̤nǎkè Cǒmara ma̤mṳ̂plîhto nû̌ûta̤sǔ dě awǐkhanu toǒ pwǎ.

10 Hǐnudě pṳwè̤ sî꤮, ma̤pûhǐ Cǒmara ata̤kaǎ sî htǒonu ta a ta̤wû̌lǎhtò̌ sî htǒo glè htûhtò̌ hè mè̤mè̤̌ ayanu, jipwi̤ ma̤dû̌htò̌po̤ lǒkho dě alo̤mo̤ tokho nî̌꤮. Sî dè ma̤hǐnu hî̌dě sî htò̌tukhu lòkhǔpe dǐkhò̌꤮ tò̤ hǒ.