Genesis 18:1-16
Shǐtè̤mè̤ sò̌su hèǒlè kû̌ Abraham
1Ti̤ni̤kha Abraham ǒ Mè̌mare asǒmṳdû̌cahtǐ kòshî̌nu tò̤glò. Dě bǎ lṳmṳbǎgagû akhanu, a hǎnòò̌ bǎ ahǐphû̌ takhahtu dě Cǒmara tûjûpwa̤ hèǒlṳhtò̌ bǎ nû̌û. 2Dě a kè̌cû̌ dě a kè̌shǐ kòmakhû sò̌su ihtǒǒphǔ nû̌û. Bǎ a kè̌shǐ asî akhanu, a tṳplṳtî̤wî̤ cû̌kè̌ gòyò̤shǔ asî, ta ta̤bè̌dubè̌na̤ asî aya, a gene̤lò̤ û̌tṳglulò̤ dě hǎkhû̌. a 3Dě a hî̌, “Kǒ꤮ he Běcǎ ta̤adû̌, na dè kè̌shǐ ta he gwa dě nalo̤mo̤ hî̌dě, khòsò̌do cû̌tûlû̌ pûma̤ he ma̤nî̌꤮, nṳǒkǔ kû̌nǎ dě najû hǐdǒkû htǒo nî̌꤮. 4He nophî̌hè bǎ sî shi pě dě shǔbò lǒkho yǎta sîkhò̌lòpo̤ dě hǎmoǒlò̤ lǒkho bǎ sǒyo̤ǔla̤ bǎo pě teděsǎ nî̌꤮. 5He phî̌hè bǎ sî la̤ǎ toǒ, dě sî ǎ nî̤khû̌nî̤ǎ gesǒ yǎdě hǎhtò̌cû̌ sělěhè nǒ sîklè̌ pě nî̌꤮. Sî hèto̤ kû̌ he dě he sò̌yṳǐǎǐo pwǎ sî.” Dě asî hî̌shǔ nû̌û, “O awǒ hǒ, dè hî̌ hǐnudě tûrû̌ ma̤pwǐ na hî̌nu nî̌꤮.” 6Htǒotaplǎ dě Abraham tṳplṳtî̤wî̤ khlè̌nṳ ahǐphû̌kû dě a hî̌ Sharǎ, “Phî̌hè phwèmò̌ bǔkû̌lǎ mǔwǒ bǎo shǐginǐ̤jè. Cîmǔmò̌, bǒmò̌ mû̌ dě shû̌ǎ mò̌ yǎ.” 7Htodě a khlè̌cû̌po̤ pṳ̂ saprṳ̂ ǒ dě a cû̌pṳ̂ pṳ̂phaphû̌ bû̌sû̌ tado dě a nocû̌ tîwî̌tòwò nû̌ûta ajû tapwa̤. 8Dě a phî̌hènṳ pṳ̂nṳ̂shikhlǒ ta pṳ̂nṳ̂shi acè̌wî̤wǒhtǒo ta pṳ̂yî̌ htě kò phoǎ htohǒnu dě a hèǐ nû̌ûta shǐtè̤mè̤ nusò̌su. Bǎ shǐtè̤mè̤ ǎo akhanu, a dě a ihtǒǒ bǎ asî kòshî̌ sǒmṳla̤nu. 9Asî gwè lǒkho nû̌û, “Na ma Sharǎ lè?” Dě a hî̌shǔ asî, “A ǒ dě hǐphû̌kûnu.” 10Bǎnu sò̌sukla tapwa̤ numî̌ Cǒmara tûjûpwa̤ dě a hî̌ Abraham, “Htû̌꤮ něbǎ pwǐ khònò̤kha htǒo pěnu, he hè gesǒ mè̤mè̤̌sǒ dě na ǒ pě. Dě nama Sharǎ phû̌ǒlò̤nṳ phû̌makhû tapwa̤ pě.” b Bǎ a hî̌ hǐnuakha, Sharǎ gana̤de dě hǐphû̌ takhahtu bǎ asî nǒkònu. 11Bǎnukha Abraham ta Sharǎ sò̌gini̤bò mî̌ a mo̤pwa̤ hǒ dě Sharǎnu mamǔsǐla̤klo hèpetò̤ akhû̌akhî, aphû̌ ǒjòpetò̤ hǒ. c 12Hǐnuakhû̌akhî Sharǎ ya̤lò̤hǔ tû̌ ana̤ dě a gènè̤, “He mo̤pwa̤ hǒ. Hewṳ̂ mî̌ a mo̤pwa̤ mè̤mè̤̌ hǒhǒ. Hǐnudě he glè hǎmoǒkû̌ ta a dě a cû̌ma̤mo̤jòpe hesò̌phlǒ hî̌tè?” d 13Htǒotaplǎ dě Cǒmara tûjûpwa̤ hî̌ Abraham, “Ma̤hî̌tèdě Sharǎ ya̤ dě a cû̌hî̌tǒ̤ ta, ‘Khònò̤htǒo he mo̤pwa̤ hǒ dě he phû̌ǒjòpe ya?’ 14Cǒmara tûjûpwa̤ ma̤jòta̤ tò̤nu mî̌ a ǒnǒ ya? Pwǐ he pwe̤ǐhtokè na ta htû̌꤮ něbǎ pwǐ khònò̤kha pě, he hè gesǒ na ǒ pě dě Sharǎ phû̌ǒlò̤nṳ phû̌makhû tapwa̤ pě.” e 15Sharǎ ǐsha dě a hî̌lòhobǐkè tû̌ta, “He ya̤nǒ tò̤ lè.” Pwǎ̤ta a hî̌shǔ nû̌û, “Tò̤, na ya̤ mè̤mè̤̌.”Abraham kwigwèbǎǐ gutṳ bǎ Sò̌dowî̤ aya
16Bǎ kòyò htǒotoǒ ihtǒ hǎhtò̌cû̌ akhanu, asî kè̌hǎte̤ totǐ Sò̌dowî̤ ǒnu tokho dě Abraham gûsûcû̌kû̌ asî.
Copyright information for
KxfSCKRC