‏ Genesis 6

Kòyòhǎkhû̌phû̌ ata̤phû̌mò̤shî̌hto

1Bǎ kòyòhǎkhû̌phû̌ tèhtò̌ ǒplṳ̂ǒphǎhè ta ǒpîshîcû̌bò hǎkhû̌tebě dě kò phû̌ǒlò̤nṳ phû̌mamǔ sîtoǒ akhanu, 2Cǒmaradû̌ atanaphû̌ sîtoǒ kè̌shǐ kòyòhǎkhû̌phû̌ aphû̌mǔ toǒ mo̤wî̤mo̤tè̤ mè̤mè̤̌ dě a wû̌lǎphî̌ lǒkho nû̌ûta ama. 3Dě Cǒmara tûjûpwa̤ hî̌, “He noǒ sayè̤kû̌ heyolahtûpwa̤ ta kòyòhǎkhû̌phû̌ htǒotoǒ tûjûpwa̤ mî̌ awǒ tò̤, ma̤tè̤hî̌dě asî ǒ pwǎ̤ta sǐshiphěyî̌ htě a sijònu akhû̌akhî, asî bǎ ǒhtûpwa̤ pwǎ aně ta̤ya̤ ta gini̤shi pwǎ.”

4Bǎnu tuhtukha bǎbǎ, nǒkò htukha bǎbǎ, Cǒmaradû̌ atanaphû̌ toǒ ta kòyòhǎkhû̌phû̌ aphû̌mǔ toǒ phî̌nû̌û dě a phû̌ǒlò̤nṳ kòyòshû̌kòyòsho kòyòdû̌htû toǒ. Dě ami̤dû̌ lṳshilṳga lǒkho wǐnukhanu toǒ hǒ. ^a

5Cǒmara tûjûpwa̤ kè̌shǐ kòyòhǎkhû̌phû̌ sîtoǒ ta ajîajû phû̌mò̤shî̌hto aplǎaplò̤ mè̤mè̤̌, htohǒtò̤ asîsò̌phlǒ toǒnu a shokhû̌ye̤yo̤ma̤ còcè̌ ta̤phû̌mò̤shî̌hto pṳ̂̌꤮ taplǎ. ^b 6Dě Cǒmara tûjûpwa̤ bǒ kòyòhǎkhû̌phû̌ hǎkhû̌bǎo akhû̌akhî, a gènè̤mo̤ dî̌kî̌ tò̤ dě a shèwè̤ mè̤mè̤̌ nû̌ûsò̌phlǒ. 7Cǒmara tûjûpwa̤ hî̌, “Kòyòhǎkhû̌phû̌ ta ta̤phû̌ta̤li̤ lǒ̤꤮ bò htě adû̌dû̌ apî̌tî̌tî̌nu toǒ ta htû̌phû̌yṳphû̌ htě he bǒlò̤bò asî toǒnu, he ma̤hǎmǎkèbò asî hǎkhû̌ bǎonu pě. Ma̤tè̤hî̌dě he bǒlò̤ asî akhû̌akhî, a shèwè̤ mè̤mè̤̌ hesò̌phlǒ.” 8Pwǎ̤ta Nǒa nî̤bǎ khǒtû̌ Cǒmara tûjûpwa̤ abwǐdû̌ asîrîhtû.

Nǒa awi̤akè̌

9Htǒomî̌ ta̤khwè̌mǎǐ tû̌ Nǒa akhlialè to̤gilò̤ sî toǒ awi̤akè̌. Bǎ Nǒa ahtukhanu, a mî̌ kòcǒkòtè̤ tapwa̤, a ta̤ǒhtûpwa̤nu kò la̤bè̌ nû̌û ta̤sǔ ǒ tò̤. Htohǒtò̤ abǒsû̌khǎkho cû̌htukhahtu kû̌ta Cǒmaradû̌. ^c 10Nǒa aphû̌makhû ǒ sò̌su. Asî mi̤ ta Shemǎ, Hamǎ ta Ya̤phè̌.

11Cǒmaradû̌ kè̌shǐ sî̌yabò ta kòyòhǎkhû̌phû̌ asò̌phlǒnu a phû̌mò̤shî̌htojî mè̤mè̤̌, bǎtè tò̤glòtè bǎbǎ aphû̌mò̤jîbò. 12Cǒmaradû̌ kè̌lò̤ hǎkhû̌ bǎo dě a phû̌mò̤shî̌hto jîajû lǒ̤bò, kòyòhǎkhû̌phû̌ bǎ hǎkhû̌ htǒonu a ma̤bò ta̤sǔta̤plě pṳ̂̌꤮ tapwa̤. 13Cǒmaradû̌ hî̌ Nǒa, “He bè̌lò̤ he sò̌phlǒ ta he cèrò ma̤pî̌kèbò kòyò hǎkhû̌phû̌ pṳ̂̌꤮ tapwa̤ pě. Ma̤tè̤hî̌dě hǎkhû̌bǎo alǒbebò ta ta̤phû̌mò̤shî̌hto hǒ. Ma̤tè̤hî̌dě asî akhû̌akhî, he ma̤pî̌dǒbòkè asî ta hǎkhû̌ pě. 14Dě phî̌ mò̌ sǒhǐ ▼

▼Kò ma̤ sǒkhlidû̌ ta sǒ titènu tapwǎ̤꤮ sî̌ya te̤mǎ tò̤.

dě ma̤htò̌mò̌ yǎta sǒkhlidû̌ nunî̌. Dotṳ dědǎ to̤to̤ ta to̤to̤ dě plṳbǐbò akûkû akhlokhlo ta sǒcònu nî̌. 15Ma̤dû̌yǎ pwî̌tè hî̌dě, ma̤htû yǎ apla̤ suya̤. Ma̤lè̤ yǎ apla̤ yè̤shi dě ma̤htò̌yî̤ yǎ apla̤ sushi nî̌. 16Na bǎ klǒbǐ akhû̌klǒ, akhû̌klǒla̤ ta dědǎkhû̌ aplǎnu bè̌ǒkè a ta̤pla̤ nî̌. Dě awe̤pa̤nu bè̌ǒ takha tûkû dě ma̤htò̌ a suto̤. Dě ma̤htò̌ akòdǎ to̤to̤, akǎmakû to̤to̤ ta akhû̌ to̤to̤ nî̌. 17He nodû̌htò̌ shi hǎkhû̌bǎo dě he ma̤pî̌kèbò ta̤ htě a ǒ mǒla̤ toǒ pě. Bò ta̤ htě a ǒ hǎkhû̌ bǎotoǒnu a sikèbò pě. ^e 18Pwǎ̤ta he ma̤měma̤gle heta̤wṳ̂dò ta na pě. Kaǎnṳ naphû̌ makhû toǒ ta nama, kaǎnṳ nadè̌nu toǒ dě nṳlǒkho sǒkhlidû̌kû nunî̌꤮. ^f 19Ma̤pûhǐ bò꤮ ta̤phû̌ta̤li̤ toǒ ǒhtûpwa̤ hèpo̤ lǒkho ayanu, pṳ̂nṳ sûkhû̌ amo̤ ta apha tacǎ mî̌ tûphû̌ dě sǒkhlidû̌kûnu nî̌. 20Bò htû̌tî̤pî̤ ta htû̌li̤cò̌ tû̌, ta̤phû̌ta̤li̤ ta ta̤phû̌ta̤li̤ akhli tû̌, ta̤phû̌ta̤li̤ htě adû̌dû̌ apî̌tî̌tî̌nu toǒ akhli ta akhli tû̌ hèbò naǒ pě dě ma̤pûhǐ a htûpwa̤ hèpo̤ ayanu, pṳ̂nṳ amo̤ tabǎ apha tabǎ nî̌. 21Phî̌nṳplǒbò nala̤ǎla̤o pṳ̂̌꤮ tacǎ ta ta̤phû̌ta̤li̤ la̤ǎla̤o pṳ̂̌꤮ tacǎ nî̌.”

22Htodě Nǒa gûma̤kû̌ pwǐ Cǒmaradû̌ mǎnǎ nû̌ûnu pṳ̂̌꤮ tacǎ.

‏ Genesis 7

Shidû̌htò̌ awi̤akè̌

1Dě Cǒmara tûjûpwa̤ hî̌ Nǒa, “Kaǎnṳ nahǐphû̌phòphû̌ dě nṳmò̌ sǒkhlidû̌kûnu nî̌꤮. Dě kòyò htǒotuhtu aklanu he kè̌shǐ na ta na mî̌ kòcǒkòtè̤ tapwa̤ hǒ. 2Ta̤phû̌ta̤li̤ lǒ̤꤮ bò htě amṳ̂plî toǒnu pṳ̂nṳ sûkhû̌ amo̤ susǒtado ta apha susǒ tado nî̌. Dě ta̤phû̌ta̤li̤ htě a mṳ̂plî kû̌kò tò̤ dě a gwa lṳhtò̌ ta Cǒmara tò̤ toǒnu, pṳ̂nṳ a tacǎ mî̌ tûphû̌, amo̤ tado ta apha tado pwǎ nî̌. 3Dě htû̌tî̤pî̤ khli pṳ̂̌꤮ tacǎnu, pṳ̂nṳ a tacǎ mî̌ susǒtûphû̌, tacǎ mî̌ susǒtûphû̌, dě pṳ̂nṳ amo̤ tabǎ apha tabǎ pṳ̂̌꤮ tacǎ nî̌. Ma̤pûhǐ asî phû̌phǎhtò̌dû̌ sělěhè hǎkhû̌teběbò ayanu, ma̤ hǐnu nî̌. 4Ma̤tè̤hî̌dě susǒti̤ni̤ behtò̌ pěnu, he nojulò̤yî̤ khwè̌ lṳmṳkhǐkhǐ lṳmṳshasha ani̤ li̤shi, asa li̤shi pě. Kòyòhǎkhû̌phû̌ ta ta̤phû̌ta̤li̤ lǒ̤꤮ bò htě he bǒlò̤ yǎ hǎkhû̌ bǎotoǒnu he ma̤sikèbò asî pě.” 5Dě Nǒa ma̤bò pwǐ꤮ Cǒmara tûjûpwa̤ hî̌lò̤ nû̌ûnu toǒ.

6Bǎ shidû̌htò̌ hǎkhû̌bǎo akhanu, Nǒa něǒ aya̤susǒ hǒ. ^g 7Ma̤pûhǐ Nǒa, ama, aphû̌makhû ta adè̌ sîtoǒ lû̌htò̌ ta shidû̌ htǒonu dě asî nṳ lǒkho sǒkhlidû̌ kû. ^h 8Ta̤phû̌ta̤li̤ adû̌dû̌ apî̌tî̌tî̌ ta htû̌phû̌yṳphû̌ lǒ̤꤮ bò toǒnu a mṳ̂plî bǎbǎ, a mṳ̂plî tò̤ bǎbǎ, htě a ǒ lǒkho hǎkhû̌ bǎoteběbònu, 9Amo̤ tabǎ apha tabǎ asî nṳ sûkhû̌bò lǒkho nû̌û sǒkhlidû̌kû pwǐ Cǒmaradû̌ mǎnǎ Nǒanu. 10Susǒti̤ni̤ behtò̌ dě shidû̌htò̌bǐkè hǎkhû̌ hǒ.

11Bǎ Nǒa něbehtò̌ ya̤susǒ, ginǐ̤la tala, shǐsusǒnu ti̤ni̤ akha, bò shihtǎpo̤ hǎla̤nu toǒ a shǐhǎhtò̌bò. Shitakha dě mǒkhû̌nu toǒ bǎbǎ a mo sǒsǒta takha lṳ̂monu ⁱ 12Htodě khwè̌julò̤ lṳmṳkhǐkhǐ lṳmṳshasha dě a ju ani̤ li̤shi.

13Nǒa ta aphû̌makhû sò̌su mî̌ Shemǎ, Hamǎ, Ya̤phè̌ ta Nǒa ama ta adè̌ sò̌su nṳ lǒkho sǒkhlidû̌kû bǎ khwè̌julò̤nu ti̤ni̤ hǒ. 14Bò꤮ ta̤phû̌ta̤li̤ mi̤klanu toǒ ta ta̤phû̌ta̤li̤ htě kòbǔǐ a hǐphònu toǒ ta bò꤮ ta̤phû̌ta̤li̤ htě adû̌dû̌ apî̌tî̌tî̌nu toǒ ta ta̤phû̌ta̤li̤ htě a wi̤ dě mǒla̤nu toǒnu, a nṳǒ dǒkû̌bò ta asî. 15Ta̤bǒlò̤ lǒ̤bò htě asò̌phlǒ htûpwa̤ toǒnu, amo̤ tado apha tado, tûphû̌ hto tûphû̌ a nṳplǒkû̌ lǒkho ta Nǒa sǒkhlidû̌kû. ^j 16Ta̤phû̌ta̤li̤ tacǎ꤮ ta tacǎ, amo̤ ta apha nṳ sûkhû̌ lǒkho nû̌û sǒkhlidû̌kû pwǐ Cǒmaradû̌ mǎnǎ Nǒanu, htodě Cǒmara tûjûpwa̤ ma̤bǐkè takha.

17Khwè̌ju hèyî̤ ani̤li̤shi dě shidû̌htò̌ ta dû̌htò̌ hǎkhû̌bǎo a jo gojohtò̌kè sǒkhlidû̌htǒo shikhû̌ dě sǒkhlidû̌ ǒgojohtò̌yî̤khlokè ta hǎkhû̌. 18Shi dû̌htò̌ ta dû̌htò̌ hǎkhû̌htǒo dě sǒkhlidû̌ lo̤cû̌ shikhû̌. 19Shidû̌htò̌ yo̤ mè̤mè̤̌ akhû̌akhî, a plû̌bǐbò kholodû̌kholohtû to̤dě mǒla̤nu toǒ. 20Shidû̌htò̌ ta dû̌htò̌ dě a dû̌htò̌tûlû̌kè kholonu toǒ shǐyè̤̌ pla̤. 21Htû̌phû̌yṳphû̌ toǒ bǎbǎ, ta̤phû̌ta̤li̤ a bî̌ htě kò bǔǐ nû̌û hǐnu toǒ bǎbǎ, ta̤mi̤ta̤mò̤ htě aplò̤nu toǒ bǎbǎ, kòyòhǎkhû̌phû̌ bǎbǎ, ta̤ lǒ̤꤮ bò htě a ta̤htûpwa̤ gugwè dě hǎkhû̌ htǒo toǒnu a sikèbò. 22Ta̤bǒlò̤ lǒ̤꤮ bò htě ata̤htûpwa̤ ǒbò dě hǎkhû̌ htǒotoǒnu, a sikèbò. 23Ta̤ lǒ̤꤮ bò htě a ǒ htûpwa̤ gugwè dě hǎkhû̌ htǒotoǒnu a sikèbò hǒ, kòyòhǎkhû̌phû̌ bǎbǎ, bò꤮ ta̤phû̌ta̤li̤ htě a ǒ mi̤klanu toǒ bǎbǎ, bò꤮ ta̤phû̌ta̤li̤ htě kò bǔǐ hǐnu toǒ bǎbǎ, htû̌phû̌yṳphû̌ wi̤ dě mǒla̤ sîtoǒ bǎbǎ Cǒmara tûjûpwa̤ ma̤sikèbò hǒ. A ǒ htûpwa̤kè pwǎpǒ̤ Nǒa ta kòyò htě a ǒ kû̌ ta anu toǒ pwǎ. ^k 24Shidû̌ bǎ hǎkhû̌ htǒonu ayî̤ mṳni̤ ta̤ya̤ ta yè̤shi.