Luke 4:16-30
Nǎ̤sèrèwî̤phû̌ yṳǎ Ye̤shǔ tò̤
(Matěo 13:53-58; Mǎ̤riko 6:1-6)
16Běcǎ Ye̤shǔ gesǒ dě Nǎ̤sèrèwî̤ bǎ a la̤dû̌htò̌ǐnu tî̤wî̤. Bǎ Yṳ̌daphû̌ mṳni̤dǔ ▼▼Yṳ̌daphû̌ a mṳni̤dǔ mî̌ mṳgòtò̤
akha, pwǐ ala̤klo ǒnu, a cû̌nṳ dě ta̤sabahǐkû. Bǎ a glè ihtǒdǒ Cǒmara ale̤ayo̤ akhanu, 17Kò ǐ nû̌û lî̤tûlû htě pwa̤po̤ Isaǐa khwè̌nǎ dě꤮ awǐnu tabǎ. A bòmo lî̤tûlû htǒotoklo dě a kè̌shǐ kò khwè̌nǎ lî̤ tûmûnu a hî̌, 18“Běcǎ ta̤adû̌ sǎcahtǐ ǒ dě hekû, ma̤tè̤hî̌dě a wû̌lǎ he ta he glè pwe̤ǐ bǎ kòyò shèwèphû̌ toǒ ta ta̤sò̌le̤sò̌lò̤ awi̤akè̌ htǒonu hǒ. Kòyò htě kò pṳ̂ dǒlò̤te̤ yǎ apo̤kû toǒ bǎ nî̤bǎ ta̤ma̤lû̌htò̌ge aya, kòyò htě a mi̤sǎkhǐ toǒ bǎ mi̤sǎlî gesǒ aya, ta kòyò htě kò ma̤jîma̤jû nû̌û toǒ bǎ nî̤bǎ ta̤ma̤lû̌htò̌ge ayanu, a nohè he dě he glè pwe̤ǐbǎ asî hǒ. b 19Htohǒtò̤ Cǒmara nohè he dě he bǎ pwe̤ǐsî̌ya bǎ kò ta Běcǎ glè ma̤lû̌htò̌ge akòyònu, akhîakha hèto̤hǒ.” c 20Dě Běcǎ Ye̤shǔ khû̌tûlûwǒ gesǒ lî̤tûlûnu toklo dě a ǐgewǒsǒ nû̌ûta pwa̤kè̌ǐkhwè̌ǐ ta̤sabahǐnu tapwa̤ a cǔdekû dě a hǎnòò̌lò̤. Kòyò lǒ̤꤮ bò ǒ dě ta̤sabahǐkûnu toǒ kè̌jèwè̤bò nû̌û. 21Dě Ye̤shǔ hî̌ lǒkho asî, “Cǒmara ale̤ayo̤ htě sî gana̤de he dǒbǎ sî htǒotûmû numî̌ a lǒhtò̌behtò̌ htǒoti̤ni̤ hǒ.” 22Bò꤮ kò gana̤de toǒnu, kò htû̌sò̌ǐ lǒ̤bò nû̌û pṳ̂̌꤮ tapwa̤, dě a ta̤hî̌bǎmo̤ hî̌bǎnî̤ htǒonu, kò sû̌pi̤sò̌pi̤bòkè dě asî hî̌ lǒkho, “A mî̌ Jǒjè aphû̌makhû pwǎ amè̤tò̤ya?” 23Dě a hî̌shǔ asî, “He yṳǎ te̤mǎ ta sî glè hî̌ he ta yo̤sǎkhěkhǒ tûmû dě a hî̌, ‘Ta̤khû̌sara ma̤bǎ tû̌ nana̤nu.’ Htodě sî glè hî̌po̤ he, ‘Ta̤ma̤cǒklî̌ htě pa gana̤de na ma̤ bǎ Kaperanòwî̤kû toǒnu, ma̤lṳ dǒbǎ pata bǎ na dû̌htò̌ǐ wî̤ htǒo tî̤wî̤ akûhtǒo nǔ꤮’” hǐnu pě. 24Dě Ye̤shǔ hî̌po̤, “He hî̌ mè̤mè̤̌ sî꤮, Cǒmara apwa̤po̤ bǎtè꤮ tapwa̤ bǎbǎ, adokûphû̌ kaǎshǔ nû̌û dǐpwǎ̤꤮ tò̤. d 25He hî̌ mè̤mè̤̌ sî꤮, bǎ pwa̤po̤ Èlî̌a ahtukhanu, gako suně ta lasusǒ dě gawi̤gako jîjû ǒhtò̌ dě Israelga sagala̤. Bǎnu htukha, dě Israelgakûnu, mamǔǒkhwè̌ ǒplṳ̂. e 26Pwǎ̤tadě Cǒmara nocû̌ pwa̤po̤ Èlî̌a dě mamǔǒkhwè̌nu toǒ a ǒ dǐpwǎ̤꤮ tò̤. Cǒmara nocû̌ pwǎ nû̌û dě mamǔǒkhwè̌ htě a ǒ dě Saratǎwî̤, Sidogaphû̌nu tapwa̤ a ǒ pwǎ. f 27Htodě, dě Israelgakû, bǎ pwa̤po̤ Èlǐsha htukhanu kòyò nî̤bǎ ta̤shakroǎ dě phělo̤ toǒnu a ǒplṳ̂ pwǎ̤ta Cǒmara ma̤hǎmǎ bǎ asî dǐpwǎ̤꤮ tò̤, a ma̤hǎmǎ bǎ tû̌pwǎ Shurǐagaphû̌ Ne̤ma tapwa̤ pwǎ.” g 28Dě kòyò lǒ̤꤮ bò ǒ bǎ ta̤sabahǐkûnu toǒ gana̤de Ye̤shǔ hî̌bǎ htǒotoǒ akhanu, asî sò̌phlǒdû̌ jòjî̌꤮ tò̤. 29Asî ihtǒ dě cǐhǎhtò̌cû̌kè Ye̤shǔ wî̤khlo, asî cǐhǎhtò̌ nû̌û dě asî la̤ǒǐ wî̤ khoplò̤lo̤ tò̤glò. Dě asî gènè̤ shò̌lò̤te̤kè nû̌û dě shǒla̤, 30Pwǎ̤ta a hǎhtò̌cû̌kè bǎ kòyò aprṳ̂ahonu toǒ akǎmakû.
Copyright information for
KxfSCKRC