Mar 12:1-12 | KxfSCKRC | STEP | Ye̤shǔ bòhtò̌ dǒnè bǎ pwa̤tòlûhtò̌ hǐkǒdû̌ toǒ ta pwa̤sû̌ǐ ta̤sû̌ta̤tòwò asara toǒ ta Yṳ̌daphû̌ hǐkǒdû̌ toǒ ta yo̤sǎkhěkhǒ toǒ hè̌o, bǎtaplǎ, kòyò ǒ tapwa̤, a shǒǐ a sobîmṳ toǒ ahǔklakhû̌ htǒo dě a te̤we̤bǐbò a sobîphǎ htǒo, dě a khǔ ahǎkû tûkû ala̤yî̤htò̌ nû̌ûta sobîshi, dě a shǒhtò̌ gojohǐphû̌ kò la̤ǒpo̤kè̌ǐ yǎta sobîphǎ htǒonu tama. Htodě anokhò̌ǎ gûmṳ̂ nû̌ûta pwa̤khò̌ǎ toǒ dě a hǎhtò̌cû̌kè gaahǔwa̤ taga.

‏ Mark 12:1-12

Yo̤sǎkhěkhǒ htě kòyò hè khò̌ǎ sobîphǎ toǒ

(Matěo 21:33-46; Lǔka 20:9-19)

1 Ye̤shǔ bòhtò̌ dǒnè bǎ pwa̤tòlûhtò̌ hǐkǒdû̌ toǒ ta pwa̤sû̌ǐ ta̤sû̌ta̤tòwò asara toǒ ta Yṳ̌daphû̌ hǐkǒdû̌ toǒ ta yo̤sǎkhěkhǒ toǒ hè̌o, bǎtaplǎ, kòyò ǒ tapwa̤, a shǒǐ a sobîmṳ toǒ ahǔklakhû̌ htǒo dě a te̤we̤bǐbò a sobîphǎ htǒo, dě a khǔ ahǎkû tûkû ala̤yî̤htò̌ nû̌ûta sobîshi, dě a shǒhtò̌ gojohǐphû̌ kò la̤ǒpo̤kè̌ǐ yǎta sobîphǎ htǒonu tama. Htodě anokhò̌ǎ gûmṳ̂ nû̌ûta pwa̤khò̌ǎ toǒ dě a hǎhtò̌cû̌kè gaahǔwa̤ taga. ^a 2 Bǎ sobîsǎ mihǒ akhanu, sobîphǎběcǎ nohè a jûphû̌ tapwa̤ dě pwa̤khò̌ǎ htǒotoǒ a ǒ dě a nohè phî̌ge nû̌û sobîsǎ htě a to nî̤bǎnu toǒ. 3 Pwa̤khò̌ǎ hǔkla htǒotoǒ pṳ̂ nû̌û dě po̤plè nû̌û jûphû̌ htǒotapwa̤ dě a plûge koyoklî̌kè pwǎ nû̌û. 4 Htodě sobîphǎběcǎ nohè tèplè̌lè̌ ajûphû̌ ahǔwa̤ tapwa̤ asî ǒ dě asî po̤ nû̌ûhǐkǒ htodě ma̤sòwò̤bò nû̌û. 5 Sobîphǎběcǎ nohèpo̤ ajûphû̌ nǒkò tapwa̤, dě asî ma̤sikè nû̌û. Sobîphǎběcǎ plûhè plṳ̂pe ahǔwa̤ toǒ. Asî po̤plè kò toǒǒ, ma̤sikè kò toǒǒ.

6 Sobîphǎběcǎ la̤nohèpo̤ kònu a ǒkè pepwǎpǒ̤ aphû̌makhû htě a mo̤ǐ nû̌û htǒotapwa̤ pwǎ. Agutṳ̌lò̤ dě a gènè̤, he nohè he phû̌makhû mî̌ a bè̌dubè̌na̤ khlopě kǎlè, a gènè̤ dě a nohè nû̌û pwa̤khò̌ǎ htǒotoǒ a ǒ.

7 “Pò̤̌ta pwa̤khò̌ǎ htǒotoǒnu a pwe̤ǐ nû̌û tapwa̤ ta tapwa̤ dě a hî̌ lǒkho, ‘Kòyò htǒotapwa̤ mî̌ sobîphǎběcǎ aphû̌khû htě a glè̌ nî̤bǎ û̌cata̤bî̌nu tapwa̤ hǒ. Cû̌! cû̌ma̤sikè yǎ hò̌꤮! A û̌cata̤bî̌ toǒnu a htûbò pata pě.’ 8 A hî̌ lǒkho dě asî pṳ̂ ma̤sikè sobîphǎběcǎ aphû̌khûhtǒo dě a wîhtò̌kè nû̌û sobîphǎwe̤khlo,” Ye̤shǔ hî̌khěkhǒ bǎ asî hǐnu.

9 Htodě Ye̤shǔ gwè asî, “Dè ma̤hǐnudě sobîphǎběcǎ htǒotapwa̤nu a ma̤ hî̌tè pě? A hè ma̤sikè pwa̤khò̌ǎ hǔklanu toǒ dě a nokhò̌ǎ tèplè̌lè̌ nû̌ûta kòyò ahǔwa̤ toǒ pě.” 10 Htodě Ye̤shǔ hî̌ gesǒ asî, “Lî̤cahtǐkû hî̌,

‘Kòyò ma̤htò̌ hǐ dě lo̤ htě asî wîkè nû̌û nutamanu a htûhtò̌ lo̤ htě a tûhtû̌měbò hǐ tama. ^b 11 Htǒonumî̌ Běcǎ Cǒmara ma̤ta̤ pwǎ, dě a ma̤ta̤ htǒonumî̌ a cǒklî̌kî̌ya mè̤mè̤̌.’ ^c

Lî̤cahtǐkû hî̌ hǐnumî̌ sî dǒnǒ kû̌kò dǐkhò̌꤮ tò̤ ya? Sî dǒnǒ lòtṳ̌ pwǎ.”

12 Yṳ̌daphû̌ hǐkǒdû̌ toǒnu, a sî̌ya ta Ye̤shǔ dǒnèkhěkhǒ asî ta pwa̤wîkè lo̤nu tama mî̌ asî akhû̌akhî, a kè̌lǎ lǒkho klè̌klò dě a glè̌ pṳ̂ Ye̤shǔ, pwǎ̤ta asî ǐsha kòyò saprṳ̂ toǒ ala̤ dě asî hǎhtò̌cû̌ tephekè pwǎ Ye̤shǔ ala̤.