Mark 13:14-23
Ta̤sò̌gònò̤ ǐsha ma̤phû̌mò̤shî̌hto Cǒmara a ta̤lṳhtò̌ho pě
(Matěo 24:15-21; Lǔka 21:20-24)
14Ye̤shǔ hî̌sělěpo̤, “Sî kè̌shǐ ta ta̤wi̤japhǎkò to ihtǒ ǒ dě ta̤lṳhtò̌hokû tò̤ pwǎ̤ta a ihtǒ ǒ bǎnu pě. Dě htǒo akhû̌akhî, kò bè̌ǒkhwè̌kè ta̤sabahǐ pě (Kòyò htě a dǒlî̤ htǒotoǒ tobǎ sî̌yaphlo lǒkho.) Bǎ sî kè̌shǐ yǎ htûhtò̌ hǐnu akha pěnu, kòyò ǒ dě Yṳ̌dagakû toǒ bǎ khlè̌ lû̌htò̌ lǒkho ana̤ dě kholokhû̌. a 15Kòyò htě a ǒ dě gukhětadǎkhû̌ toǒnu, bǎ a khlè̌hǎte̤ akha a tobǎ nṳphî̌cû̌nṳ a ta̤kî̌ta̤kû̌ dě hǐkû dǐcǎ꤮ tò̤. b 16Kòyò ma̤ta̤ dě hǔklakhû̌ toǒnu a bǎ khlè̌ge phî̌nṳ ahǐdo dě hǐ tò̤. 17Bǎnu ti̤ni̤ pěmî̌ mamǔ htě amo̤do ta mo̤ htě a ǒ ta aphû̌ dě a onû̌pe nû̌ûnu toǒ ayamî̌ khîkha jîjû na̤cè̌ asîya pě. 18Ma̤pûhǐ ta̤jîta̤jû htǒo lò̤te̤to pûma̤ ta gawo̤kha ma̤nu, sî to kwisaba lǒkho Cǒmara pṳ̂̌꤮ tapwa̤. 19Asî tobǎ kwisaba lǒkho ma̤tè̤hî̌dě, ta̤jîta̤jû amṳni̤ htǒotoǒnu, tèhtò̌ dě Cǒmara bǒlò̤wǐta̤ tǒ̤khònò̤ htǒonu a ma̤nǒ hǐnu dǐkhò̌꤮ tò̤. Bǎnukhapě ta̤jîta̤jû htǒotoǒnu a jîkhlo pě dě anǒkòpěnu a htûhtò̌penǒ hǐnu dǐkhò̌꤮ tò̤. c 20Běcǎ dè ma̤phǔtǔ ta̤jîta̤jû ani̤asa tò̤ hî̌numî̌ kò lû̌htò̌bò̌nu a ǒ dǐpwǎ̤꤮ tò̤. Pwǎ̤ta kòyò htě Cǒmara wû̌lǎnǎhto nû̌û toǒ ayanu Běcǎ ma̤phǔtǔbǎ asî ani̤asa pě. 21A htûhtò̌ hǐnu htopědě kòyò tapwa̤pwa̤ dè hî̌ sî ta, ‘Kè̌mò̌ lǒkho, htǒo mî̌ Khrî̌stu htě a ma̤lû̌htò̌ge kònu tapwa̤ hǒ,’ mè̤tò̤mî̌ a glè hî̌ sî ta, ‘Cû̌ kè̌ lǒkhomò̌, Khrî̌stu htě a ma̤lû̌htò̌ge kònu tapwa̤ a ǒ děnu,’ a hî̌ sî hǐnu pě pwǎ̤ta yṳǎ pû lǒkho ma̤ nî̌꤮. 22Ma̤tè̤hî̌dě kòyò htě asûlû lòho ana̤ pwǐ Khrî̌stu htě a ma̤lû̌htò̌ge kò htǒotapwa̤ toǒnu ta kòyò htě asûlû lòho ana̤ pwǐ pwa̤po̤ sî toǒnu, a ǒlṳhtò̌ pě. Ma̤pûhǐ asî lǒǎplò̤ǎ dǒ kòyò htě Cǒmara wû̌lǎhto nû̌û htǒotoǒnu, asî dè ma̤jò hî̌dě, a ma̤lṳhtò̌ ata̤ma̤ cǒklî̌kî̌ya toǒ ta ata̤ma̤ sû̌pi̤sò̌pi̤ kònu toǒ pě. 23Ǒsè̌rè̌ lǒkho sîna̤ nî̌꤮. Bǎ ta̤htǒotoǒ htûhtò̌ hǒtò̤nu, he pwe̤ǐnǎwǐhtobò bǎ sî pṳ̂̌꤮ tacǎ hǒ,” Ye̤shǔ hî̌ hǐnu.
Copyright information for
KxfSCKRC