Matthew 16:5-12
Pharisè̌phû̌ toǒ ta Sadugè̌phû̌ toǒ ata̤bû
(Mǎ̤riko 8:14-21)
5Bǎ asî hǎhtò̌cû̌kǎbò̌hto shikoǒdû̌ akhanu, akhophijaû̌ toǒ shope̤ phî̌cû̌nṳ mû̌. 6Běcǎ Ye̤shǔ hî̌ asî, “Ǒsè̌rè̌ lǒkho Pharisè̌phû̌ toǒ ta Sadugè̌phû̌ toǒ ata̤bûnu nî̌꤮.” a 7Dě asî pwe̤ǐ kè̌khînû̌û ta Ye̤shǔ hî̌ yo̤sǎ htǒonu tapwa̤ ta tapwa̤ dě a hî̌ lǒkho pwǐhè̌onu, “Běcǎ hî̌ pa pwǐhè̌o numî̌ mî̌htě pa shope̤ phî̌cû̌nṳ bǎ yǎ mû̌nu hǒ.” 8Běcǎ Ye̤shǔ sî̌ya ta asî hî̌bǎ kè̌khînû̌û ta mû̌ awi̤akè̌ akhû̌akhî, a gwè asî, “Kòyò ta̤yṳpî̌tî̌ sî꤮, mî̌ma̤tè̤dě sî cû̌pwe̤ǐ kè̌khînû̌û ta sî shope̤ phî̌cû̌nṳ mû̌ awi̤akè̌ hî̌tè? 9Tǒ̤khònò̤ sî sî̌yaphlo kû̌nǒ kò hǒtò̤ ya? Bǎ he bǔǎ mû̌ yè̤̌ma ta kòyò yè̤̌rî̌ akhanu, sî phî̌wǒge a ǒkwèkhlonu toǒdě a ǒ bephǒbětè numî̌ sî shope̤nǎkè hǒ ya? b 10Mè̤tò̤mî̌ bǎ he bǔǎ kòyò lǐ̤rî̌ ta mû̌ susǒtama akhanu, sî phî̌wǒge a ǒkwèkhlonu toǒ dě a ǒ bephǒbětè numî̌ sî shope̤nǎkè hǒ ya? c 11He hî̌ mû̌ awi̤akè̌ mè̤tò̤ numî̌ sî to sî̌ya kû̌kò hǒ. He hî̌ sî, ǒsè̌rè̌ lǒkho Pharisè̌phû̌ toǒ ta Sadugè̌phû̌ toǒ ata̤bûnu nî̌꤮.” 12Bǎnukha akhophijaû̌ toǒ sî̌yaphlohè ta Běcǎ Ye̤shǔ noǒsè̌rè̌ asî ta ta̤bû htě kò ma̤ sè̌tophǒ dû̌htò̌ yǎ ta mû̌nu mè̤tò̤. A noǒsè̌rè̌ asî ta Pharisè̌phû̌ toǒ ta Sadugè̌phû̌ toǒ a ta̤sû̌ǐtòwòǐ toǒnu pwǎ.
Copyright information for
KxfSCKRC