Mat 3:1-12 | KxfSCKRC | STEP | Něyî̤layî̤ hè akhanu, kòyò ǒtapwa̤, a cû̌shido dǒhtû̌ǐ ta̤dě Yṳ̌daga lo̤semě lò̤rṳ̂khû̌, dě kò kaǎ nû̌ûta pwa̤ploshi Jowǎ̤ni̤.

‏ Matthew 3:1-12

Pwa̤ploshi Jowǎ̤ni̤ a ta̤dǒhtû̌ǐ

(Mǎ̤riko 1:1-8; Lǔka 3:1-18; Jowǎ̤ni̤ 1:19-28)

1 Něyî̤layî̤ hè akhanu, kòyò ǒtapwa̤, a cû̌shido dǒhtû̌ǐ ta̤dě Yṳ̌daga lo̤semě lò̤rṳ̂khû̌, dě kò kaǎ nû̌ûta pwa̤ploshi Jowǎ̤ni̤. 2 Dě a hî̌, “Yò̤lò̤ge lǒkho sîsò̌, ma̤tè̤hî̌dě mǒkhû̌ ashiaga hèto̤phǔhǒ.” ^a 3 A mî̌ kòyò htě pwa̤po̤ Isaǐa pwe̤ǐnǎ nû̌û awi̤akè̌nu tapwa̤ ta,

“Kòyò tapwa̤ kaǎguhtò̌ lo̤měshǒkla dě a hî̌, ‘Ma̤wǒnǎ lǒkho klè̌ ta Běcǎ aya. Ma̤cǒma̤nò̤ lǒkho Běcǎ la̤hèklè̌ aya tabo nî̌꤮.’” ^b

4 Jowǎ̤ni̤ kûsǒhtò̌nṳ hǐdopo̤to̤ htě kò bǒyǎ ta tîsî̌budû̌ ashû̌, dě a wò̤htò̌nṳ sò̌to̤phě. Dě a ǎpwǎ dèpo̤ ta wè̌khû̌shi. ^c 5 Kòyò htě a ǒdě Ye̤rǔshèlèwî̤kûnu ta Yṳ̌daga sagala̤kû ta kòyò lǒ̤꤮ bò htě a ǒ te̤we̤plṳ̂ Jòda shilo̤nu toǒ hè lǒkho Jowǎ̤ni̤ a ǒ. 6 Asî hè olò̤mèlò̤ lǒkho a ta̤sǔ dě Jowǎ̤ni̤ plo bǎ asî shi Jòda shilo̤kû.

7 Pwǎ̤ta bǎ Jowǎ̤ni̤ kè̌shǐ Pharisè̌phû̌ ta Sadugè̌phû̌ toǒ hèplṳ̂hèphǎ dě a glè hèplo dǒ ana̤ ta shi akhanu, a hî̌ asî, “Wṳ̂sa sî꤮! Mî̌ûpè tapwa̤ ǐsè̌rè̌ sî ta sî lû̌htò̌bò̌ ta Cǒmara a ta̤cèrò htě a hèpě htǒonu pè? ^d 8 Sî dè yò̤lò̤ge mè̤mè̤̌ sî sò̌phlǒ dèhî̌dě dǔlṳ lǒkho sî ta̤ǒhtûpwa̤ toǒ ta sî ǐlò̤ sî sò̌phlǒsǔshi toǒ. 9 Hî̌htohî̌lò̤ pûma̤ sîna̤ ta, ‘Pa mî̌ Abraham akhlialè’ numa̤. He hî̌ sî, Cǒmara ma̤htûhtò̌ lo̤ htǒotoǒ ta Abraham aphû̌ mî̌ a ma̤jò pwǎ. ^e 10 Kû ǒ dě sǒkhòshî̌ tabǎ dě kò gûga sǒmṳ toǒ pě, dě kò cǒtṳto̤ akhò̌wi̤ pě. Sǒmṳ tṳmṳmṳ htě asǎapho wîǎ tò̤nu, kò gûgakè yǎpě dě kò wînṳkè yǎ dě mî̌kla pě. ^f

11 “Dě sî yò̤lò̤ge sîsò̌ akhû̌akhî, he plo sî ta shi. Pò̤̌ta kòyò ǒtapwa̤ a sîrîpo̤phǎ shû̌shokhlo ta henu a hè dě henǒkò pě. A plo sî ta Běcǎ sǎcahtǐ ta mî̌ pě. He bòphlǔ pwǎbǎ a khò̌phěpli̤nu, he gwata a tò̤. 12 A pṳ̂mě dògo a cǔdekû, dě a tîwî̌tòwònǎ ta a khǎbò bǔsû̌ pě. A khǎbòhto pě dě a bè̌plǒ bǔshò̌ phòkû pě. Dě asû̌aphî toǒnu a shû̌kè nû̌ûta mî̌ htě a pi̤pè̤ dǐkhò̌꤮ tò̤nu taphǎ akû pě.”